Policija (25.04.24)
Ćěkanje pomhało njeje
Njedźichow. Po wšěm zdaću čuwy zhubił je we wčerawšich rańšich hodźinach wodźer Audija A 6 Avant, jako w Njedźichowje policajske awto za sobu wuhlada. Muž stupi na płun a smaleše zdźěla hač do 160 km/h spěšnje po statnymaj dróhomaj S 94 a S 92 kaž tež přez Lěsku (Lieske) a Debricy (Döbra) do směra na Kamjenc. Policisća jědźechu za nim, zhubichu pak Audi z wočow. Dokelž běchu zastojnicy čisło awta spóznali, wopytachu woni 27lětneho doma. Při tym so wukopa, zo měješe młody muž 0,4 promilow alkohola w kreji. Najskerje bě to přičina nócneho ćěkanja. Wón změje so nětko podhlada zakazaneho awtoweho wubědźowanja dla zamołwić.
Policija (24.04.24)
Šofer transportera zemrěł
Brunow. Při ćežkim wobchadnym njezbožu je wčera wječor na S 100 pola Brunowa (Brauna) wodźer transportera zemrěł. Wón bě z wotmachom do štoma zrazył a bu při zražce z awta ćisnjeny. We wobkruhu sto metrow pytachu wobornicy za dźělemi awta a ćěła.
Policija (19.04.24)
Wjele škody po zražce
Halštrow. Złe sćěhi měješe srjedu na pózdnim wječoru wobchadne njezbožo na statnej dróze S 94 při wotbóčce do Halštrowa. Tam bě 24lětna žona ze swojim Honda po puću, jako krótko do 23 hodź. sorna přez puć a runu smuhu do awta skoči. Zražki dla zajědźe wodźerka na lěwym boku jězdnje do skłoniny a zwróći. Skónčnje pak Honda zaso na kolesach, ale do nawopačneho směra steješe. Kaž policija zdźěli, so 24lětna snadnje zrani. Ze swojim awtom pak wona hižo dale jěć njemóžeše. Jězdźidło dyrbješe wona wotwlec dać. Po informacijach policije nasta něhdźe 15 000 eurow škody.
Policija (15.04.24)
Jězbna dowolnosć fuk
Malešecy. Při wobchadnej kontroli sobotu w Delnjej Hórce policisća zwěsćichu, zo steješe 35lětny wodźer VWja pod wliwom alkohola. Pola njeho naměrichu 1,42 promilow. Jeho jězbnu dowolnosć sej zastojnicy hnydom wobchowachu. Muž změje so nětko pjanosće w nadróžnym wobchadźe dla zamołwić.
Policija (12.04.24)
Lkw piwo zhubił
Habrachćicy. Wodźer piwoweho awta je štwórtk rano w Habrachćicach (Ebersbach) dźěle swojeje nakładowaneje twory zhubił. 43lětny po wšěm zdaću kašćiki prawje zawěsćił njeje. W prawej křiwicy so něhdźe połojca cyłkownje něhdźe 150 kašćikow z nakładneho awta suny a na puć padny. Dróhu dyrbjachu zdźěla zawrěć, zo móhli wohnjowi wobornicy rozbite bleše a kašćiki rumować. Wěcnu škodu trochuja na něšto wjace hač tysac eurow.
Policija (11.04.24)
W lěsu so paliło
Spale. Z dotal njeznateje přičiny je so wutoru wječor pola Spalow čwak lěsa palił. Wobydler je to wobkedźbował a krótko do 21.30 hodź. Wojerowsku wuchowansku dispatchernju zazwonił. Wottam wohnjowu woboru a policiju alarmowachu. Po informacijach Zhorjelskeje policajskeje direkcije wupřestrě so woheń na něhdźe 200 kwadratnych metrow. Za čas hašenja dyrbjachu wokrjesnu dróhu mjez Spalemi a Mučowom dospołnje zawrěć. Krótko do napoł dwanaćich běchu płomjenja podušene, tak zo móžachu tež dróhu zaso wočinić. Wojerowski policajski rewěr přepytuje w tym padźe lochkomyslneho zapalerstwa dla.
Policija (10.04.24)
Nimale dwójce tak spěšnje
Kulow. Zastojnicy Wojerowskeho policajskeho rewěra a wobchadneje stražowanskeje słužby su póndźelu dopołdnja na statnej dróze S 95 w Kulowje kombinowanu kontrolu spěšnosće přewjedli. Při wotbóčce wodočisćernje do směra na Wóslink je 50 km/h dowolenych. Wot 450 jězdźidłow, kotrež nimo měrjenskeje připrawy jědźechu, bě 122 přespěšnych. 70 šoferam kiwa pokuta, tamnym warnowanje. Najspěšniši bě wodźer VWja z Budyskim čisłom, kotrehož błysknychu ze 97 km/h. Wón změje nětko 400 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
Elektrokoleso pokradnyli
Budyšin. W nocy na póndźelu su paduši na Budyskej Ostwaldowej elektrokoleso pokradnyli. Woni zadobychu so do pincy wjaceswójbneho domu a wzachu koleso typa Cube w hódnoće něhdźe 3 200 eurow sobu.
Policija (08.04.24)
Jehnjo z pastwy pokradnyli
Kulow. Móhłrjec pojutrownu rubiznu su sej njeznaći w Kulowje wupytali. Tam je so w nocy na pjatk młody boran z pastwy na Koćinskim puću zhubił. Jehnjo z čornej hłowu měješe po informacijach policije hódnotu něhdźe 150 eurow. Kriminalna słužba pad přepytuje.
Policija (04.04.24)
Štyrjo zranjeni po njezbožu
Worklecy. Wjacori zranjeni a tójšto wěcneje škody bě wuslědk wobchadneho njezboža, kotrež je so wutoru na křižowanišću pola Worklec stało. 41lětna wodźerka VWja bě tam do směra na Smječkecy po puću. Na křižowanišću njewobkedźbowaše wona předjězbu 40lětneho šofera Škody a do njeho zrazy. Při tym bu Škoda hišće do transportera typa Mercedes 35lětneho muža storčeny. Wšitcy třo wodźerjo kaž tež sobu jěduce dźěćo w VWju so zranichu. Jich dowjezechu do chorownje. Škoda wučinja 35 000 eurow.
Policija (03.04.24)
Transporter do Lkw-ja zrazył
Hamor. Při wobchadnym njezbožu blisko Hamora bu wčera popołdnju wodźer transportera ćežko zranjeny. 48lětny bě ze swojim jězdźidłom na zwjazkowej dróze B 156 z dotal njeznateje přičiny na napřećiwnu jězdnju zajěł a na njej frontalnje do nakładneho awta zrazył. Njezbožo sta so z tajkim wotmachom, zo so wobě jězdźidle do přirowa sunyštej. Nimo toho su dźěle transportera a Lkw-ja dalšej awće wobškodźili. Helikopter dowjeze zawinowarja njezboža do chorownje. Dróhu dyrbjachu nachwilnje zawrěć.
