Wopity kradnył a z awtom jěł
Njeswačidło. Wutoru wječor je w Njeswačidle muž z terena firmy płunowe bleše spakosćił. Kedźbliwy wobydler to widźeše a zawoła policiju. W Čelchowje móžachu zastojnicy paducha krótko na to zajeć. W jeho awće namakachu šěsć prózdnych płunowych blešow. Alkoholowy test wunjese, zo měješe 44lětny 2,14 promilow alkohola w kreji.
Šěsć awtow skóncowanych
Budyšin. Wodźer Renaulta bě wčera připołdnju na Budyskej Schliebenowej po puću, je pak z dotal njewujasnjeneje přičiny nalěwo z puća zajěł. Zhubiwši kontrolu nad wodźidłom zrazy wón z wulkim wotmachom do jězdźidła hladanskeje słužby. Te suny so do Peugeota, kotryž prasny na to do před nim stejaceho BMWja. Tón zrazy skónčnje do Seata a VWja. Wěcna škoda je hoberska.
Z garaže koleso pokradnyli
Nowa Wjes. W Nowej Wsy pola Rakec je wobsedźer trekingoweho kolesa hakle wčera rano zwěsćił, zo wone hižo w garaži njesteji. Paduši běchu elektriske wrota wočinili a jězdźidło w hódnoće 1 000 eurow sobu wzali. Z njejasneje přičiny na wrotach žana škoda njenasta.
Pěši po awtodróze
Budyšin. Wulke zbožo měješe njedźelu wječor pěšk, kiž bě pola Porchowa na awtodróze po puću. 42lětny spyta na kromje spěšnočary awta zadźeržeć, zo bychu jeho do směra na Zhorjelc sobu wzali. Při tym šmórny so špihela Renaulta, ale so na zbožo njezrani.
Narkotiki kradnyli
Pančicy-Kukow. Do apoteki swj. Bosćana w Pančicach-Kukowje běchu so njeznaći minjeny kónc tydźenja zadobyli. Tam pokradnychu pjenjezy, techniske nastroje a wšelke narkotiki. Hódnota rubizny njeje znata. Wěcna škoda wučinja něhdźe 8 000 eurow.
Rozestajenje na „plaće“
Budyšin. 28lětny wukrajnik bě po šwarnym konsumje alkohola (2,46 promilow) sobotu nawječor na Budyskich Žitnych wikach 13lětnej holcy narěčał. Muž chcyše, zo so z nim do jeho bydlenja podatej. Po tym zo wonej to raznje wotpokazaštej, ćahaše wopity za jeju drastu. Tole wobkedźbujo so 27lětny wobydler, tohorunja alkoholizowany, do wukrajnika da a jeho chětro namócnje na zemju storhny. Holcy móžeštej so tak wuwinyć. Zawinowarja rozestajenja na „plaće“ dyrbjachu do chorownje dowjezć.
Njedźelny zakaz kontrolowali
Budyšin. Na awtodróze A 4 mjez Zhorjelcom a Drježdźanami je Budyska policija wčera w nocy dodźerženje zakaza njedźelneho jězdźenja nakładnych awtow z cyłkownej wahu wjace hač 7,5 tonow přepruwowała. W kontrolnym centrumje zwěsćichu šěsć přeńdźenjow.
Bus do awta zajěł
Minakał. Na statnej dróze S 106 mjez Łomskom a Minakałom njeje wodźer busa pjatk připołdnju předjězbu Mitsubishija wobkedźbował a zajědźe do njeho. Minakałska wohnjowa wobora městno njezboža zawěsći. Zranił so nichtó njeje.
Dźiwje swinje pod kolesa přišli
Delni Wuježd. Srjedu wječor bě so wodźer Mazdy pola policije přizjewił prajo, zo bě jemu wjelče stadło do awta zlećało. Tomu pak tak njebě. Wukopało so bě, zo běchu štyri dźiwe swinje – mortwe w přirowje ležace – pod kolesa awta přišli. Wěcna škoda wučinja 4 000 eurow.
W kurjawje do štoma zrazyła
Haselbachtal. K tragiskemu njezbožu dóńdźe dźensa w nocy w Haselbachtalu pola Kamjenca. Něhdźe w 3.35 hodź. bě žónska mjez Neukirchom a Häßlichom ze swojej Škodu po puću. Bě jara kurjawojte, tak zo njeje šoferka na dróze dale hač 50 metrow widźeć móhła. Jenož kilometer před Häßlichom bě so tragedija stała: Z dotal hišće njewujasnjeneje přičiny bě žona z wotmachom do štoma zrazyła. Tacho wosta něhdźe pola 115 km/h stejo. Jězdźidło bu tak sformowane, zo dyrbjachu wohnjowi wobornicy z Bischheima a wokoliny zatłusnjenu wuswobodźić. Byrnjež so tole poradźiło, znjezbožena na městnje njezboža zemrě.
Tepjenski wolij so do rěki dóstał
Lutobč. Kriminalna policija přepytuje w Lutobču pad njewobhladniweho zanjerodźenja wodźiznow. Kaž policija w swojej rozprawje zdźěla, je tam kónc tydźenja po wšěm zdaću na bliskim terenje firmy hadźica ze 600litrowskeho wolijoweho tanka wotpadnyła. Z njeje wuběža tepjenski wolij do wottoka a wottam dósta so do bliskeje rěčki, kotraž wuliwa so do Łomšćanki (Lomschanke). Zawołani kameradojo wohnjoweje wobory natwarichu wjacore wolijowe barjery, zo bychu dalšemu zanjerodźenju přirody zadźěwali. Kaž policija dale zdźěla, njeje dotal hišće jasne, kotry rozměr zanjerodźenje z wolijom scyła ma.
Z chorobnym stołom do štoma
Kamjenc. Wopiłstwa we wobchadźe dla změje so 54lětna Kamjenčanka nětko před sudnistwom wusprawnić. Kaž policija zdźěla, zrazy žona ze swojim elektriskim chorobnym stołom sobotu w nocy na chódniku na Wuchodnej hasy do jeničkeho štoma, kotryž tam steji. Při tym so lochce zrani a bu lěkarsce zastarana. Přepytujo přičinu njezboža zastojnicy zwěsćichu, zo bě wodźerka chorobneho stoła piła. Kaž wotpowědny alkoholowy test wujewi, měješe wona 2,18 promilow alkohola w kreji.
Wulki njeboz pokradnyli
Dźěžnikecy. Po wšěm zdaću wulku dźěru dypać chcedźa paduši, kotřiž pokradnychu minjeny tydźeń w Dźěžnikecach (Singwitz) z twarnišća wulki njeboz, kotryž móžeš minibagrej přitwarić. Kaž policija zdźěla, njebě wulki dźěl mašiny nihdźe zamknjeny, ale jenož wotpołoženy. To wšak bě paducham lochka hra. Hódnota twarskeho grata wučinja něhdźe 2 000 eurow. Policija je slědy zawěsćiła a nětko mjezynarodnje za njebozom pyta.
Bagrowu łopač tola ležo wostajili
Großharthau. Lěpje běžało je za twarsku firmu w Großharthauwje. Tam chcychu njeznaći z areala firmy bagrowu łopač spakosćić. Ta pak bě paducham skónčnje tola přećežka a tak ju ležo wostajichu, kanistraj diesela pak stej fuk.
Zuby sej wukusali
Mały Wjelkow. Prawdźepodobnje zuby wukusali su sej paduši spočatk tydźenja, jako chcychu w Małym Wjelkowje VW Passat pokradnyć. Kaž policija zdźěla, su drje so skućićeljo do awta zadobyli, startować pak je njemóžachu a dyrbjachu je stejo wostajić. Škoda na awće: 500 eurow.