Policija (22.08.17)

Dienstag, 22. August 2017 geschrieben von:

Z awta třělał

Wojerecy. W nocy na minjenu sobotu je młody šofer wosoboweho awta nuzowe čisło policije zazwonił, dokelž bě něchtó ze za nim jěduceho BMWja třělał. 21lětny bě z třomi sobujěducymi na Halštrowskej dróze do směra na Narć po puću, jako wjacore wutřěle słyšeše a błyski pistole w špihelu widźeše. Alarmowana wobsadka policajskeho awta při tan­kowni na Grodkowskej šoseji wopisany BMW a jeho 21lětneho wodźerja zadźerža a kontrolowaše. W jězdźidle namaka wona trašawku a wotpowědnu municiju. Dowolnosć, tajku pistolu wobsedźeć, młody muž njeměješe. Tohodla zastoj­nicy pistolu a municiju sćazachu. Kriminalna policija tónle pad nětko nadrobnišo přepytuje.

Policija (21.08.17)

Montag, 21. August 2017 geschrieben von:

Wnučkowy trik zwrěšćił

Kamjenc. Bjez wuspěcha wosta minjeny pjatk popołdnju trójny pospyt, staršim ludźom z pomocu tak mjenowaneho wnučkoweho trika pjenjezy wulišćić. Njeznata wobšudnica so telefonisce pola třoch žonow w starobje 80 do 83 lět přizjewi, wudawajo so jako wnučka resp. prawnučka. Wot rentnarkow žadaše sej wona sumy mjez 3 000 a 12 000 eurami za wumysleny nuzny pad. Žana z třoch zazwonjenych pak njeda so zjebać.

Policija (18.08.17)

Freitag, 18. August 2017 geschrieben von:

Chětro hłuboko do škleńcy hladała

Delnja Hórka. Zo policija alkoholizowanych šoferow lepi, so nimale wšědnje stawa. Zo pak něchtó po připołdnju hižo z 3,52 promilemi alkohola w kreji z awtom ­jězdźi, je njewšědne. Stało je so to zawčerawšim, srjedu, w 13.30 hodź. na Delnjohórčanskim přemysłownišću. Po pokiwje ­swědka kontrolowachu tam 49lětnu wodźerku Opela. Dokelž měješe wona chětru „chorhojčku“, přewjedźechu alkoholowy test z mjenowanym wu­slědkom. Jězbnu dowolnosć žony wšak zastojnicy bohužel sćazać njemóžachu, dokelž bě wona ju druheho delikta dla hižo wo­tedać dyrbjała. Za to wobcho­wachu sej awtowy klučik a přewodźachu 49lětnu k wotedaću kreje.

Policija (17.08.17)

Donnerstag, 17. August 2017 geschrieben von:

Alkoholizowaneho lepili

Šunow. Wodźerja Mercedesa su zawčera­wšim wječor w Šunowje kontrolowali. Při tym zwěsćichu, zo měješe 47lětny 1,94 promilow alkohola w kreji. Jeho jězbnu dowolnosć sej hnydom wobchowachu.

W błóće tčacy wostała

Chwaćicy. Dokelž je staw wody Budyskeho spjateho jězora twarskich dźěłow dla niši hač hewak, chcyše sej to zawčerawšim 64lětna žona pola Chwaćic z kolesom bliže wobhladać. Při tym pak w błóće tčacy wosta a dyrbješe policiju na pomoc wołać.

Policija (16.08.17)

Mittwoch, 16. August 2017 geschrieben von:

Jězbu droho zapłaćił

Budyšin. Dokelž so póndźelu wječor młody muž w Budyšinje alkohola wzdać nochcyše, dyrbi nětko jězbu ze swojim BMWjom droho zapłaćić. 24lětneho běchu policisća na Wósporskej dróze zadźerželi, zo bychu jeho kontrolowali. A jim napadny „chorhojčka“ šofera. Na to přewjedźeny test wunjese, zo měješe 24lětny 0,78 promilow alkohola w kreji. Za tónle delikt změje wón nětko 500 eurow pokuty płaćić, dyrbi měsac bjez jězbneje dowolnosće wuńć a dóstanje nimo toho dwaj dypkaj w Flensburgu. Wot­powědnu zdźělenku jemu krajnoradny zarjad přichodne dny připósćele.

Policija (15.08.17)

Dienstag, 15. August 2017 geschrieben von:

Płujadło přizemić dyrbjało

Zdźar. Na kukuricnišću pola Zdźarja (Särchen) we Wulkodubrawskej gmejnje dyrbješe zawčerawšim popołdnju płujadło nuzowje přizemić. Wone bě do toho na bliskim Klukšanskim lětanišću startowało. Kaž sobudźěłaćer zwjazkoweho zarjada za lětadłowe njezboža pozdźišo zwěsći, bě 53lětny pilot po wšěm zdaću nadobo termiku zhubił a njemóžeše so tak hižo dlěje w powětře dźeržeć. Při nuzowym přizemjenju so wón snadnje zrani. Wuchowanske jězdźidło dowjeze jeho do chorownje.

Policija (14.08.17)

Montag, 14. August 2017 geschrieben von:

W stanje wosrjedź lěsa bydlił

Wojerecy. Dokelž běchu so njeznaći minjeny čas do wjacorych bungalowow Wojerowskeho zahrodnišća „Wjesoły přichod“ zadobyli, je so policija sobotu nawječor w bliskim lěsu trochu dokładnišo rozhladowała. Při tym zwěsćichu tam 35lětneho muža, kiž wosrjedź lěsa w stanje bydleše. Pola njeho namakachu wšelake­ wěcy, pochadźace ze zadobywanjow. Nimo toho so wukopa, zo hižo dlěši­ čas za 35lětnym pytaja. Kriminalna policija je pad přewzała a jón nětko přepytuje. Hač jedna so wo bjezdomneho abo hač so muž w stanje chowaše, njeje znate.

Policija (11.08.17)

Freitag, 11. August 2017 geschrieben von:

Při dwórnišću traktor skóncowali

Radwor. Po wšěm zdaću wulki lóšt na ryzy kóncowanje mějachu w nocy na srjedu njeznaći při Radworskim dwórnišću. Tam přerězachu při traktoru wjacore kable a nimo toho wolijowu a dieselowu hadźicu. Skónčnje wotklumpachu hišće dźesać litrow ćěriwa, tak zo nasta něhdźe 200 eurow škody. Dale łamachu so na samsnym městnje do kólnje a wzachu z njeje dwě něhdźe 30 lět starej powětrowce w hódnoće 80 eurow sobu.

Policija (10.08.17)

Donnerstag, 10. August 2017 geschrieben von:

Z motorskim do płota

Njeswačidło. W Njeswačidle je so wčera nawječor ćežke wobchadne njezbožo stało. Tam bě krótko do 18 hodź. 55lětna wodźerka motorskeho typa Honda na Kołowym puću po puću. Z dotal njeznateje přičiny zhubi wona kontrolu nad swojim jězdźidłom a prasny do płota priwatneje ležownosće. Při tym so žona ćežko zrani, tak zo dyrbjachu ju z helikopterom do chorownje dowjezć. Dokładnu přičinu zražki policija přepytuje.

Policija (09.08.17)

Mittwoch, 09. August 2017 geschrieben von:

Awto manipulowali

Wulke Ždźary. Štož su njeznaći minjeny kónc tydźenja we Wulkich Ždźarach skućili, by w najhóršim padźe złe sćěhi měć móhło. Při wosobowym awće typa VW běchu woni šruby kolesow trochu wot­šrubowali. Jako 54lětna wobsedźerka k swojemu awtej přińdźe, pak tole njepytny a wotjědźe. Při tym so prědnje lěwe koleso z wóski suny. Na zbožo so při tym nichtó njezrani. Policija přepytuje nětko strašneho zasahnjenja do nadróžneho wobchada dla.

Anzeige