Policija (20.07.22)
Diesel pokradnyli
Spale. W času, hdyž je ćěriwo najwšelakorišeho razu wosebje drohe, ćim bóle boli, hdyž je něchtó kradnje. To dyrbješe tele dny firma w Spalach pola Kulowa nazhonić. Kaž tam předwčerawšim rano zwěsćichu, běchu so njeznaći minjeny kónc tydźenja do dweju bagrow na terenje firmy na Kulowskej dróze zadobyli. Z mašinow wotklumpachu dohromady 700 litrow diesela. Škoda wučinja po informacijach Zhorjelskeje policajskeje direkcije něhdźe 1 400 eurow. Nimo toho načinichu skućićeljo na bagromaj něhdźe sto eurow wěcneje škody. Kriminalna słužba Wojerowskeho policajskeho rewěra je slědy zawěsćiła a pad nětko dale přepytuje.
Policija (19.07.22)
Paducha twarožka lepili
Njeswačidło. Njeprošeny wopyt mějachu předwčerawšim rano na wuměłstwowych wikach w Njeswačidle. Najprjedy njeznaty muž bě tam z chłódźaka 200 twarožkow spakosćił. Nimo toho wza wón wjacore drjewjane skulptury kaž tež dalše wuměłske wudźěłki w cyłkownej hódnoće 3 000 eurow sobu. Dźakowano dobremu wopisanju swědkow móžeše policija 33lětneho jako paducha wuslědźić. Při přepytowanju jeho bydlenja wulki dźěl rubizny namakachu a ju wobsedźerjam wróćichu.
Policija (18.07.22)
Při jězoru prasnyło
Brězowka. Štyrjo zranjeni a tójšto wěcneje škody su wuslědk wobchadneho njezboža sobotu popołdnju při Brězowskim jězoru w Dźěwinskej gmejnje. 79lětny wodźer Audija chcyše z parkowanišća při jězoru na statnu dróu S 126 wujěć, njewobkedźbowaše pak předjězbu 51lětneho šofera Mitsubishija. Při zražce so wobaj mužej snadnje zraništaj, runje tak kaž 66lětna sobujěduca w Audiju a 21lětny sobujěducy Mitsubishija. Na woběmaj jězdźidłomaj nasta dohromady něhdźe 20 000 eurow škody.
Do busa zrazył
Rakecy. Po wšěm zdaću njekedźbliwosć bě wina na wobchadnym njezbožu minjeny pjatk wječor w Rakecach. 42lětny wodźer busa chcyše tam ze swojim jězdźidłom typa Iveco z Hłowneje dróhi nalěwo na firmowy teren jězdźidłoweho předewzaća wotbočić. Při tym dóńdźe k zražce z wosobowym awtom typa Ford. Jeho 35lětny wodźer chcyše runje w tym wokomiku bus přesćahnyć. Wodźer Forda so při zražce snadnje zrani. Po informacijach policije nasta dohromady něhdźe 15 000 eurow wěcneje škody.
Policija (15.07.22)
Padustwo při pohrjebnišću
Wojerecy. Ani na pohrjebnišćach njemóžeš sej před paduchami wěsty być. Tole dyrbješe předwčerawšim starša žona na Wojerowskim lěsnym pohrjebnišću nazhonić. Jako wona row přiwuzneho krjepješe, pokradnychu njeznaći korb z jeje kolesa. Z korbom zhubi so toboła z móšnju. Nimo třicyfroweje sumy pjenjez pobrachuja 86lětnej nětko tohorunja dokumenty, karty a dalše wosobinske wěcy, kaž na přikład nawoči. Rubizna je dohromady tysac eurow hódna.
Policija (14.07.22)
Dźěćo snadnje zranjene
Pančicy-Kukow. Při wobchadnym njezbožu na Dróze Ćišinskeho w Pančicach-Kukowje bu předwčerawšim šěsćlětne dźěćo snadnje zranjene. Něhdźe w 19.30 hodź. bě do směra na Kamjenc jěducy 37lětny wodźer Mercedesa přewidźał, zo na prawej kromje dróhi BMW parkowaše, a do njeho zajědźe. Při tym bu w Daimleru sobu jěduce dźěćo zranjene. Dokelž z jězdźidłow wolij na puć wuběža, wołachu Pančičanskich wohnjowych wobornikow. Ći w swojej gratowni runje zwučowachu, a běchu tuž hižo za něšto wokomikow na městnje njezboža.
Policija (13.07.22)
Wobšudnistwo při telefonje
Budyšin. 7 000 eurow je Budyšan minjene dny při telefoniskim wobšudźenju zhubił. Njeznaty wudawaše so jako sobudźěłaćer banki z wotrjada za prewenciju přećiwo wobšudźenjam. Kaž rjekny, chcyše za přepruwowanje kontowe zwiski 77lětneho Budyšana měć, a tón je při telefonje přeradźi. Pječa měješe wjednistwo banki pozdźišo hišće raz zazwonić. Tomu pak njedóńdźe. Město toho běchu pjenjezy na konće fuk.
Policija (12.07.22)
Skućićelej so přeradźiłoj
Wojerecy. Hara na jeju ležownosći je w nocy na póndźelu wobsedźerjow bydlenskeho domu we Wojerecach ze spara budźiła. Wonaj wuhladaštaj wosobje, kotrejž chcyštej so runje do garaže zadobyć. Najskerje měrještej so skućićelej na moped w garaži. Jako pak nakładowane drjewo powalištaj, sebje sameju přeradźištaj a skónčnje ćeknyštaj.
Policija (11.07.22)
Wopity z kolesom jěł
Koćina. Chětro dołho na Koćinskim wjesnym swjedźenju wutrał a při tym hłuboko do piwoweje škleńcy hladał drje je młody muž, kotrehož w nocy na njedźelu w Koćinje kontrolowachu. Jako zastojnicy jeho zadźeržachu, by wón nimale z kolesa padnył. Při alkoholowym tesće so wukopa, zo měješe 20lětny 1,48 promilow alkohola w kreji.
Policija (08.07.22)
Trik bohužel fungował
Bukecy. Zaso raz su njeznaći socialne syće za wobšudnistwo znjewužiwali. Tónraz je so starša žona w Bukecach z woporom stała. Z powěsću w messengerowej słužbje 72lětnej nabarbichu, zo ma jeje syn nowe telefonowe čisło a zo trjeba nuznje pjenjezy, zo móhł swój nowy mobilny telefon wužiwać. Wěrjo do toho, zo swojemu synej pomha, Bukečanka 2 400 eurow přepokaza. Hakle pozdźišo wona pytny, zo bu wobšudźena a informowaše policiju. Zastojnicy tuž wospjet nuznje warnuja, pjenjezy na cuze konto přepokazać. Najlěpje je, stajnje wosobinsce z přiwuznymi rěčeć.
Policija (07.07.22)
Pomałe jězdźenje napadnyło
Budyšin. Normalnje dyrbja ći šoferojo z chłostanjom ličić, kotřiž přespěšnje jědu a kotrychž při tym lepja. Z nawopačnym padom je so nětko policija w Budyšinje zaběrała. Předwčerawšim popołdnju wuhladachu zastojnicy na Budyskej Hegelowej VW, kotryž napadnje pomału jědźeše. Při kontroli so móžna přičina za to spěšnje wukopa. Kaž drogowy test wunjese, steješe 32lětny čěski staćan pod wliwom amfetaminow, kotrež bě do toho brał. Dalše wodźenje wosoboweho awta jemu zastojnicy zakazachu a přikazachu, zo ma młody muž krej wotedać. Nimo toho zahajichu policisća pokutne jednanje, tak zo změje so lepjeny za swój delikt zamołwić.
