Policija (14.10.21)

Donnerstag, 14. Oktober 2021 geschrieben von:

Zawinowar po njezbožu pomhał

Běła Woda. Po wobchadnym njezbožu předwčerawšim w Běłej Wodźe je 60lětny muž 81lětnej žonje pomhał. Wona bě z kolesom po Młynskej po puću, jako 60lětny ze swojim Opelom do njeje zrazy, dokelž njebě po wšěm zdaću předjězbu kolesowarki wobkedźbował. Při tym so wona zrani. Muž dowjeze ju na to ze swojim awtom do chorownje. Wo njedowolene wotsalenje z městna nje­zboža so w tym padźe njejedna, dokelž je muž žonje swoje personalije zdźělił.

Policija (13.10.21)

Mittwoch, 13. Oktober 2021 geschrieben von:

Šofer mučny był

Sprjewiny Doł. Po wšěm zdaću bě mučnota šofera wina na wobchadnym nje­zbožu, kotrež sta so předwčerawšim dopołdnja na zwjazkowej dróze B 97 pola Sprjewineho Doła. 80lětny muž bě tam ze swojim Golfom z Grodka do směra na Wojerecy po puću, jako najskerje kontrolu nad jězdźidłom zhubi a do srjedźneho wobhrodźenja zrazy. Kaž přiwołanej po­liciji pozdźišo powědaše, bě wón chětro mučny a je drje tohodla njezbožo zawinił. Muža dowjezechu do chorownje. Načinjena wěcna škoda na awće a wobhrodźenju dróhi wučinja dohromady ně­hdźe 4 000 eurow.

Policija (12.10.21)

Dienstag, 12. Oktober 2021 geschrieben von:

W bydlenju pjenjezy kradnyła

Běła Woda. Z woporom padušnicy sta so minjeny pjatk rentnarka w Běłej Wodźe, jako wona bluzu kupi. Pola njeje doma bě njeznata žona zaklinkała a jej drastu na předań poskićiła. 86lětna do toho zwoli a dźěše z cuzej do bydlenja. Z witriny wza wona 35 eurow. We wokomiku njekedźbnosće pak sej tamna žona dalše 40 eurow hrabny a so zminy.

Policija (11.10.21)

Montag, 11. Oktober 2021 geschrieben von:

Wulku škodu zawostajili

Malešecy. Nimale 20 000 eurow škody načinichu njeznaći w nocy na minjeny pjatk w Malešecach, jako so do lakěrowanskeje firmy zadobychu. Z njeje su skowanskej nastrojej kaž tež wjacore ­wobruče nakładneho awta w hódnoće 10 000 eurow sobu wzali. Wěcna škoda wučinja wjace hač 8 000 eurow.

Policija (08.10.21)

Freitag, 08. Oktober 2021 geschrieben von:

W lěsu awtomat namakał

Nowa Wjes. W lěsku blisko Noweje Wsy njeje muž jenož hriby našoł. Předwčerawšim wuhlada wón tam skóncowany a rozebrany cigaretowy awtomat. Tón steješe dotal při Rakečanskej Hłownej dróze, hdźež bě so w nocy do toho zhubił. Z awtomata pokradnychu njeznaći ­cigarety za 500 eurow. Wěcna škoda ­wučinja 2 000 eurow.

Policija (07.10.21)

Donnerstag, 07. Oktober 2021 geschrieben von:

Swójbna rozkora eskalěrowała

Běła Woda. Swójbneje rozkory dla dyrbjachu předwčerawšim wječor policiju w Běłej Wodźe wołać. Jako zastojnicy přijědźechu, 48lětny muž w bydlenju runje do dweju swójbneju biješe. Policisća chcychu jeho z bydlenja nuzować, na čož so bičk tež do nich da a jich křiwdźeše. Tak jim ničo druhe njezby, hač muža sputać a na policajski rewěr dowjezć. Tam so wukopa, zo bě wón dospołnje wopity. Pola njeho naměrichu 2,9 promilow alkohola w kreji. Nimo toho měješe muž zakazany nóž při sebi.

Policija (06.10.21)

Mittwoch, 06. Oktober 2021 geschrieben von:

Zakazane znamjenja mórali

Budyšin. Marje-Marćinu cyrkej na Budyskim Bebelowym naměsće běchu sej njeznaći minjene dny za zakazane móranja wupytali. Kaž Zhorjelska policajska direkcija rozprawja, su tam skućićeljo z čornej barbu přećiwo wustawje měrjace so symbole we wulkosći něhdźe pjeć do dźesać centimetrow namórali. Swědcy to minjenu sobotu dopołdnja wuhladachu a informowachu policiju. Kaž wona při prěnich přepytowanjach zwěsći, bě so njeskutk najskerje w času wot minjeneho štwórtka hač do soboty stał. Wěcnu škodu trochuja na něhdźe sto eurow. Statny škit pad přepytuje.

Policija (05.10.21)

Dienstag, 05. Oktober 2021 geschrieben von:

Pjanemu so wuwinyć dyrbjeli

Biskopicy. Bjezmała by předwčerawšim připołdnju w Biskopicach k wobchadnemu njezbožu mjez policajskim jězdźi­dłom a napřećo přijěducym awtom Kia dóšło. 57lětny šofer wodźeše je dospołnje wopity po Drježdźanskej dróze a měrješe so runjewon na policajske awto w napřećiwnym wobchadźe. Zastojnicy so wuwinychu, zawróćichu so a spytachu podhladneho ze sirenu a módrej swěcu zadźeržeć. Po pospyće ćeknjenja Kia skónčnje na Nowoměšćanskej dróze zasta. Při wotpowědnym tesće so wukopa, zo měješe jeho wodźer 2,78 promilow alko­hola w kreji.

Nětko dyrbi nóžkować

Budyšin. Wodźer BMWja z Wojerowskim čisłom je předwčerawšim ze 194 km/h přez kontrolu spěšnosće na awtodróze A 4 při wotbóčce Budyšin-wuchod smalił. Dowolenych pak je na wonym městnje jeničce 120 km/h. Muž dyrbi nětko z tym ličić, zo změje pokutu płaćić, zo dóstanje dypki w Flensburgu, zo budźe so swo­jeho awta chwilu wzdać a město toho wěsty čas nóžkować dyrbjeć.

Policija (04.10.21)

Montag, 04. Oktober 2021 geschrieben von:

Awće do so zrazyłoj

Salow. Třo zranjeni běchu wuslědk wobchadneho njezboža sobotu wječor w Salowje. 31lětna wodźerka Škody jědźeše tam do směra na Kulow. Na kromje wsy pak so zaso zawróći. Za njej jěduca 37lětna wodźerka Hyundaja njemóžeše hižo borzdźić a zrazy ze swojim awtom do Škody. Wobě šoferce kaž tež 29lětna sobujěduca Škody so zranichu. Wěcnu škodu trochuja na něhdźe 10 000 ­eurow.

Policija (01.10.21)

Freitag, 01. Oktober 2021 geschrieben von:

Přikładni šoferojo w Budyšinje

Budyšin/Zdźěr. Policija njeje we wobłuku hodźinskeje kontrole předwčerawšim na Drježdźanskej w Budyšinje ani jeničke překročenje dowoleneje spěšnosće 50 km/h zwěsćiła. Hinak bě to w Zdźěri, hdźež samsny dźeń pjeć hodźinow dołho spěšnosć na Mužakowskej přepruwowachu. 86 jězdźidłow njedodźeržachu dowolene tempo, „rekord“ 91 km/h docpě VW z Budyskim Kfz-znamješkom.

Serbska debata

Neuheiten LND