Policija (09.08.16)

Dienstag, 09. August 2016 geschrieben von:

Awto połne narunankow

Zhorjelc. Na awtodróze A 4 pola Zhorjelca su policisća w nocy na njedźelu 39lětneho muža zajeli, kiž chcyše po wšěm zdaću pokradnjene dźěle awtow do Pólskeje dowjezć. W jeho transporteru typa Mercedes Vito namakachu zastojnicy wjacore kašćiki z najwšelakorišimi naru­nankami. Mjez druhim běchu to wodźi­dła, airbagi, armaturowe tafle a nawi­gaciske nastroje. Wone pochadźachu ze znajmjeńša 30 wosobowych awtow BMW, VW a Mercedes a mějachu hód­notu wjacorych dźesaćitysacow eurow.

Policija (08.08.16)

Montag, 08. August 2016 geschrieben von:

Transporter a móšeń pokradnyłoj

Biskopicy. Na łuce pola Steinigtwolmsdorfa je sobotu wječor transporter tčacy wostał, a dwě wosobje z njeho so pěši wotsalištej, kaž swědk policiju informowaše. Pozdźišo so wukopa, zo staj młodostnaj w starobje 18 a 19 lět transporter do toho w Biskopicach pokradnyłoj, hdźež běštaj so do towarstwoweho domu zadobyłoj a sej tam klučik jězdźidła přiswojiłoj. Bórze na to bu pinčnikej we Wjernarjecach (Wehrsdorf) móšnja z třicyfrowej sumu pjenjez ­spakosćena. Tež tónle njeskutk dźe na konto woneju młodostneju, kaž policija pozdźišo wuslědźi. Dokelž móžachu wjacori swědcy mło­deju skućićelow dosć derje wopisować, policija jeju dosahny a nachwilnje zaja. Kelko škody staj na transporteru nači­niłoj, njehodźi so hišće dokładnje rjec. Na kóždy pad so kriminalna policija z nimaj nětko bliže zaběra.

Policija (05.08.16)

Freitag, 05. August 2016 geschrieben von:

Kolesowar ćežko znjezbožił

Bart. Zawčerawšim wječor je 16lětny kolesowar na dróze mjez Bartom a Bukojnu ćežko znjezbožił. Jako młodostneho awto přesćahny, so jeho dótkny, na čož kole­sowar padny. Wodźer ćmoweho awta pak cyle jednorje dale jědźeše. Policija za nim pyta.

Wandajolo na twarnišću

Wojerecy. Na twarnišću při B 97 we Wojerecach su njeznaći bager wobškodźili. Škoda wučinja 3 000 eurow.

Twarska mašina fuk

Miłoraz. Z wuhloweje jamy pola Miłoraza je so minjene dny twarska mašina zhubiła. Kompresor typa Copco je ně­hdźe 30 000 eurow hódna.

Policija (04.08.16)

Donnerstag, 04. August 2016 geschrieben von:

Na deponiji so paliło

Wětrow. Na Wětrowskej deponiji je so wčera wječor paliło. Spočatnje mějachu wohnjowe wobory z wokoliny městnosće płomjenjow dla ćeže z hašenjom. Skónčnje pak móžachu je zasobu podu­syć. Přičina, čehodla bě woheń wudyrił, dotal jasna njeje.

Wopačni zastojnicy po puću

Budyšin. Krajny kriminalny zarjad Sakskeje warnuje staršich wobydlerjow tež w Budyskim wokrjesu před wopačnymi zastojnikami. Wuměnkarjow wopytujo so skućićeljo wospjet jako zakryći slědźerjo wudawaja a jim wšo móžne napowědaja. Na te wašnje su jim zatrašeni hižo cyłe zamóženstwo, kaž debjenki a pjenjezy, k přepruwowanju přewostajili.

Policija (03.08.16)

Mittwoch, 03. August 2016 geschrieben von:

Frontalnje do so zrazyłoj

Wopaka. Na dalnodróze B 96 mjez Wopakej a Wurbisom je so wčera rano ćežke njezbožo stało. 57lětna wodźerka awta marki Kia zajědźe w prawej křiwicy předaloko na lěwu stronu dróhi a zrazy do napřećo přijěduceho busa. Šoferka so ćežko zrani, a ju dyrbjachu z helikopterom do chorownje dowjezć. 41lětny busowy šofer so snadnje zrani. B 96 bě nachwilnje dospołnje zawrjena.

Do składa so zadobyli

Steina. Njeznaći su so w minjenym času do składa firmy w Steinje pola Kamjenca zadobyli. Z objekta při hłownej dróze zhubichu so mjez druhim jadrowy njeboz a wšelake specielne nastroje. Hódnota kradnjeneho grata wučinja pjećcyfrowu sumu. Wěcna škoda 70 eurow je porno tomu snadna. Kriminalni technikarjo objekt za móžnymi slědami přepytuja. Policija je slědźenje za paduchami zahajiła a z pomocu swědkow za skućićelemi a gratom pyta.

Policija (02.08.16)

Dienstag, 02. August 2016 geschrieben von:

Njezboži z kolesom

Budyšin. Na Lubijskej dróze w Budyšinje wotboči wčera rano wodźer Audija dolěwa na Fichtowu a zrazy do 24lětneje kolesowarki, kotraž jědźeše we wopačnym směrje po kolesowarskej šćežce. Žona so při zražce lochce zrani a bu w chorowni zastarana. Nastata škoda wučinja 500 eurow­. Tež kolesowarjo měli so po słowach policije po předpisach měć.

Hižo njedźelu popołdnju zrazy 37lětna šoferka Opela, kotraž bě na njedowolene wašnje z Budyskeje Hasy Clary Zetkin na Leibnizowu wotbočiła, z runjewon jěducej 47lětnej kolesowarku, kotraž so lochko zrani. Na awće nasta škoda 1 000 eurow, koleso so snadnje wobškodźi.

Policija (01.08.16)

Montag, 01. August 2016 geschrieben von:

Wo pizzu njerodźili

Wojerecy. Pizzeria bě w nocy na njedźelu zaměr njeznatych zadobywarjow. Po tym zo běchu so namócnje do wobchoda zadobyli, spytachu cigaretowy awtomat wočinić, štož pak so jim njeporadźi. Z registrowanskeje kasy pak rubichu třicyfrowu sumu pjenjez a zawostajichu cyłkownu wěcnu škodu 3 00 eurow. Kriminalna policija so z padom nětko zaběra.

Zawinowar njezboža ćeknył

Połčnica. Na lěwej jězdni awtodróhi A4 do směra na Drježdźany jěducy šofer Škodowki dyrbješe so njejapcy před nim na samsnu čaru měnjacemu njeznatemu awtu wuwinyć. Při tym zhubi kontrolu nad swojim jězdźidłom, kotrež poča so wjerćeć, zjědźe z awtodróhi a so na bliskim polu zwróći. 42lětna sobujěduca so ćežko zrani a ju dowjezechu do chorownje. Šofera a sobu jěducej dźěsći su ke kontroli tohorunja do chorownje dowjezli. Awto njeda so wjac wužiwać. Nastata škoda wučinja 6 000 eurow. Zawinowar njezboža so wotsali, policija z pomocu swědkow za nim slědźi.

Z Mazdu kontra sornikej

Policija (29.07.16)

Freitag, 29. Juli 2016 geschrieben von:

Dobry popad

Zhorjelc. Šwarny popad mějachu zastojnicy inspekcije zwjazkoweje policije za­wčerawšim, srjedu. Na awtodróze A 4 pola­ Zhorjelca zadźeržachu BMW 7 z Döbelnskim čisłom. Při naslědnej kontroli so wukopa, zo njebě wulke wosobne awto ani přizjewjene ani zawěsćene. Nimo toho měješe šofer falšowanu jězbnu dowolnosć při sebi, dokelž běchu jemu jeho hač do lěta 2018 sćazali. Jězba za njeho bě nablaku nimo. Policija sćaza awto a awtowej čisle. Nětko přepytuje přećiwo mužej hnydom wjacorych přeńdźenjow dla.

Koleso kontra awto

Budyšin. Njejapcy přetorhnjena bu dowolowa jězba srjedu dopołdnja njeda­loko Budyšina. Z třěchi Škodowki bě so koleso z dźeržaka sunyło a na jězdnju padnyło. 34lětna wodźerka naslědneho VWja njezamó sčasom zaborzdźić a prasny do kolesa. Na jeje awće nasta škoda 1 500 eurow. 45lětna šoferka Škodowki po zwěsćenju formalitow skóncowane koleso zaso na třěchu jězdźidła staji a jědźeše dale do dowola. Policija skedźbnja w tym zwisku na to, kolesa na awtach wěsće při­činić.

Policija (28.07.16)

Donnerstag, 28. Juli 2016 geschrieben von:

Pokradnjenej awće napadnyłoj

Horni Wujězd. Wčera rano su policisća slědźenskeje skupiny (GFG) na awtodróze A 4 dwě pokradnjenej wosobowej awće zawěsćili a jeju šoferow zajeli. Zastojnikam běštej jězdźidle marki Honda Jazz z Geraskim čisłom napadnyłoj. Jedne awto zadźeržachu zastojnicy pola Wujězda, tamne pola wotbóčki Budyšinje-zapad. Při kontroli woni spóznachu, zo běchu zamki awtow manipulowane. Kaž so wukopa, buštej awće jenož hodźiny do toho w Gerje pokradnjenej. Wobsedźerjej njeběštaj to ani hišće pytnyłoj. 22 a 23 lět stareju skućićelow policija zaja. Wosebita komisija pad nětko přepytuje.

Policija (27.07.16)

Mittwoch, 27. Juli 2016 geschrieben von:

Muž so při dźěle wopalił

Wětrow. We Wětrowje je so dźěłaćer wčera dopołdnja při wukonjenju asfaltowych dźěłow zranił. Walca, kotruž 62lětny wodźeše, so na nahłym městnje po­wróći, na čož muž do horceho bitumena padny. Wožahanja dla jeho do chorownje dowjezechu. Lěkar bě z helikopterom k městnu njezboža přilećał.

Kremserowy wóz pomórali

Kulowc. Dotal njeznaći su po zdaću wčera w nocy kremserowy wóz a murju ležownosće w Kulowcu pomórali. Při tym wužiwachu grafitijowu prsykawu. Wěcna škoda wučinja něhdźe 500 eurow. Kriminalna policija za skućićelemi slědźi. Pomóranje pak skerje wobsedźer kremsera a domskeho wotstroni.

Anzeige