Bijeńca we wobchodźe

Wojerecy. K namócnemu rozestajenju je předwčerawšim popołdnju w jednym wobchodźe při Wojerowskim torhošću dóšło. Kaž Zhorjelska policajska direkcija rozprawja, je tam sobudźěłaćer wotpokazał, 47lětnemu mužej pakćik přepodać. Na to dźěše muž wokoło předawanskeho blida a dyri sobudźěłaćerjej z pjasću mjezwoči. Hišće prjedy hač policija přijědźe, bě skućićel z wobchoda ćeknył. Hač je wón pakćik sobu wzał abo nic, z policajskeje rozprawy njewuchadźa. Kriminalna policija pad přepytuje.

Smjertny wopor kupanja

Běła Woda. Tragiske njezbožo při kupanju sta so wčera popołdnju w tak mjenowanym Twarožkowym haće w Běłej Wodźe. Tam njebě so 41lětny muž z kupanja wróćił. Wot swědka alarmowani policisća a wobornicy za nim zhromadnje z nurjerjemi a helikopterom pytachu. Něhdźe po hodźinje jeho z wody wućahnychu. Lěkar pak móžeše jenož hišće smjerć znjezboženeho zwěsćić. Bliše wobstejnosće nětko přepytuja.

Do čakaceho awta prasnył

Miłoćicy. Na statnej dróze S 100 mjez Hlinowcom a Pančicami-Kukowom je so wčera popołdnju wobchadne njezbožo stało. Wodźer Nissana dyrbješe při wotbočenju do Miłoćic čakać, za nim jěducy wodźer Opela to přepozdźe pytny a je nimale bjez borzdźenja do Nissana zrazył. Wobeju šoferow dowjezechu do chorownje. Zasadźenych bě 21 wobornikow z Miłoćic, Njebjelčic a Pěskec.

Wopita pomhać chcyła

Lubij. Konsekwency za wšěch wobdźělenych měješe wobchadne njezbožo předwčerawšim w Lubiju. Tam bě wječor krótko po sedmich Fiat 78lětneho muža do latarnje zajěł, dokelž njebě ručne spinadło prawje přićehnjene. Při pospyće, awto zadźeržeć, so muž a jeho 74lětna sobujěduca zraništaj. Na to so jeju dźowka rozsudźi, ze swojim Citroënom k městnu nje­zboža jěć. Tam policisća pola 44lětneje test alkohola přewjedźechu a zwěsćichu, zo měješe wona 3,9 promilow alkohola w kreji. Jeje jězbnu dowolnosć zastojnicy nablaku sćazachu. Wobeju rentnarjow dowjezechu do chorownje.