Policija (10.05.16)

Dienstag, 10. Mai 2016 geschrieben von:

Wobydlerjow wurubili

Jenkecy. Pjećcyfrowu sumu pjenjez su njeznaći wčera w Jenkecach rubili. Ně­hdźe w 4 hodź. zadobychu so třo mužojo do bydlenskeho domu, wubudźichu 62lětneho muža a 55lětnu žonu a zamknychu jeju do jedneje stwy. Na to dom přepytachu a so z pjenjezami zhubichu.

Policija (09.05.16)

Montag, 09. Mai 2016 geschrieben von:

Na awtodróze prasnyło

Połčnica. Wjele wutrajnosće trjebachu šoferojo dźensa rano na awtodróze A 4 mjez wotbóčkami Porchow, Ohorn a Połčnica. Krótko do 7.30 hodź. běchu mjez Ohornom a Połčnicu wjacore wosobowe jězdźidła do so zrazyli, zo bě awtodróha do směra na Drježdźany na wjace hač dźesać kilometrach dospołnje zatykana. K poćežowanjam dóńdźe na to tohorunja na zwjazkowej dróze B 6.

Tankownju nadpadnyli

Wulka Dubrawa. Po padustwach zašły čas w Malešecach, Komorowje, Kamjenej a Hućinje su sej njeznaći w nocy na njedźelu Wulku Dubrawu jako cil wupytali, a to tankownju wosrjedź wsy. Tu wočinichu namócnje durje a pokradnychu cigarety. Namakane slědy kriminalisća wčera zawěsćichu, nadźijejo so tak pokiwow na skućićelow. Tankownja wosta wčera tuž zawrjena. Što su paduši nimo cigaretow hišće spakosćili, njeje dotal hišće dospołnje zwěsćene.

Policija (06.05.16)

Freitag, 06. Mai 2016 geschrieben von:

Šofer zatłusnjeny był

Kamjenej. Na dróze mjez Budyšinom a Minakałom je srjedu popołdnju wodźer Forda Opelej předjězdbu wzał. Jako chcyše do Kamjeneje wotbočić, wón napřećo přijěduce awto přewidźa. Při zražce bu šofer w Opelu zatłusnjeny. Zawołani wohnjowi wobornicy jeho ze specialnym gratom z jězdźidła wurězachu.

Po skłoninje so dele sunył

Budyšin. Wčera rano je wodźer Forda Van na awtodróze A 4 mjez Budyšinom-zapad a -wuchod kontrolu nad awtom zhubił a so po skłoninje dele sunył. Jedna sobujěduca so lochko zrani.

Policija (04.05.16)

Mittwoch, 04. Mai 2016 geschrieben von:

Z płujadłom smjertnje znjezbožiła

Klukš. Na mjezynarodnym wubědźowanju płujadłow w Klukšu pola Wulkeje Dubrawy je so wčera tragiske njezbožo stało. 21lětna pilotka jednosydłoweho płujadła chcyše runje přizemić, jako jeje lětanski nastroj wosrjedź lětanišća z dotal njeznateje přičiny na zemju zrazy. Ćežko zranjenu młodu žonu dowjezechu do chorownje, hdźež wona pozdźišo na sćěhi swojich zranjenjow zemrě. Zwjazkowy zarjad za lětadłowe njezboža hromadźe z kriminalnej policiju přepytuje, kak je k njezbožu dóńć móhło. Wubědźowanje płujadłow w Klukšu su najprjedy raz přetorhnyli.

Policija (03.05.16)

Dienstag, 03. Mai 2016 geschrieben von:

Před dwórnišćom prasnyło

Budyšin. Runje před Budyskim dwórnišćom je so dźensa rano ćežke wobchadne njezbožo stało. Krótko po 6 hodź. wodźerka Forda z parkowanišća před dwórnišćom wujědźe a chcyše do směra na centrum wotjěć. Njewobkedźbowaše pak wulke, wotpadki wotwožowace nakładne awto a zrazy do njeho. Žona so ćežko zrani, tak zo dyrbjachu ju do chorownje dowjezć. Wodźerjej nakładneho a dalšeho wobdźěleneho wosoboweho awta so njezraništaj. Jordanowa bě wjacore hodźiny dospołnje zawrjena.

Policija (02.05.16)

Montag, 02. Mai 2016 geschrieben von:

Njezbožo z křesłom

Wojerecy. Wobchadne njezbožo trochu hinašeho razu sta so sobotu připołdnju na zwjazkowej dróze B 97 pola Wojerec. Tam bě so křesło z připowěšaka pušćiło a na puć padnyło. Dwě wosobowej awće njemóžeštej so hižo wuwinyć a zrazyštej do mebla. Na zbožo so při tym nichtó zranił njeje.

Policija (29.04.16)

Freitag, 29. April 2016 geschrieben von:

Audi pokradnjeny był

Wóspork. Na awtodróze A 4 pola Wósporka je policija zawčerawšim wosobowe awto typa Audi A 6 zadźeržała, za kotrymž hižo mjezynarodnje pytachu. Kaž so při kontroli wukopa, běchu jězdźidło w januaru 2014 w Magdeburgu pokradnyli. Pozdźišo bu wone w Pólskej z falšowanymi podłožkami znowa přizjewjene. 27lětny wodźer awta so njemało dźiwaše, jako wot zastojnikow tele wobstejnosće zhoni. Kaž wón rjekny, bě jeho bratr jězdźidło w Pólskej trjebane kupił a předawarjej dowěrił, zo je wšitko w porjadku. Ale wšitko skorženje nětko ničo njepomhaše, policija awto sćaza.

Hětu skóncowali

Komorow. Při haće blisko Komorowa pola Klukša su njeznaći minjeny čas hońtwjersku hětu skóncowali. Skućićeljo wočinichu namócnje durje a rozbichu wokno. Dale woni tyzu barby po wšěm zdaću z pyrotechniku rozbuchnychu, tak zo pryskaše barba na wjerch, sćěny a špundowanje a je zanjerodźi.

Policija (28.04.16)

Donnerstag, 28. April 2016 geschrieben von:

„Dr. Doolittle“ zastojnikam pomhał

Bambruch. Dźakowano štyrinohatemu pomocnikej je so zawčerawšim pytanska akcija w Bambruchu pola Kamjenca derje skónčiła. Někajkeho rozestajenja dla bě 16lětna dopołdnja swoju šulu wopušćiła. Dokelž njewědźachu, dokal je šła, informowaše šulski nawoda policiju, kotraž najprjedy podarmo za holcu pytaše. Skónčnje zasadźichu policajskeho psa z mjenom Dr. Doolittle. Tón čuchaše na pjerowce,­ kotruž bě holca w šuli wostajiła. Policist na štyrjoch pacach wjedźeše swojich dwunohatych kolegow po slědach­ 16lětneje, doniž ju při bliskim křižowanišću njenańdźechu. Wottam dowjezechu ju zaso do šule.

Policija (27.04.16)

Mittwoch, 27. April 2016 geschrieben von:

Paduchow gratu lepili

Kamjenej. Při kontroli pólskeho transportera zawčerawšim w Budyšinje napadny policistam wjetša ličba najwšelakorišeho twarskeho gratu. Třo mužojo w starobje 41, 47 a 48 lět pak njemóžachu rjec, zwotkel jón maja. Hódančko so bórze na to wujasni, jako z Kamjeneje pola Rakec padustwo přizjewichu. Tam běchu so w nocy do toho do twarskeho kontejnera zadobyli a runje tón grat pokradnyli, kajkiž bě w transporteru. Pakostnikow na to nachwilnje zajachu.

Policija (26.04.16)

Dienstag, 26. April 2016 geschrieben von:

121 město 50 km/h

Błohašecy. Dweju smalakow a 63 dalšich přespěšnje jěducych je policija tele dny w Błohašecach lepiła. Měrjenski team wobchad stražneje słužby bě tam na statnej dróze S 100 swoju techniku natwarił. Z něhdźe 1 400 měrjenych jězdźidłow napadnyštej motorske a awto typa Audi, wobě z Budyskim čisłom. Jeju šoferaj jědźeštaj­ ze 118 km/h resp. ze 121 km/h přez wjes. Za to změje kóždy z njeju znajmjeńša 480 eurow pokuty płaćić, dyrbi tři měsacy nóžkować a dóstanje nimo toho­ dwaj dypkaj w Flensburgu. Dopo­kazaja-li woběmaj smalakomaj wot­pohladne přespěšne jězdźenje, móže pokuta­ hišće wyša być, kaž Zhorjelska po­licajska direkcija piše.

Anzeige