Policija (22.06.21)
Pod wliwom drogow jěł
Wojerecy. Hnydom wjackrótnu přičinu mějachu zastojnicy policije, mužej njeprawe postupowanje porokować. Njedźelu rano by 37lětny we Wojerecach ze swojim bydlenskim mobilom nimale do policajskeho awta zajěł. Z Budyskeje aleje přijěwši njebě wón předjězbu na křižowa- nišću Grodkowska šoseja wobkedźbował. Kaž zastojnicy zwěsćichu, steješe šofer pod wliwom drogow, test na alkohol pokaza 0,3 promile a muž bě bjez jězbneje dowolnosće po puću. Wodźerja caravana dowjeze policija na to k wotewzaću kreje, wotewza jemu awtowy klučik a přizjewi jeho wohroženja wobchada a wodźenja wozydła bjez jězbneje dowolnosće dla.
Policija (21.06.21)
Pytaja za mužom
Niža Wjes. W lěsnej kupjeli w Nižej Wsy su wohnjowi wobornicy a policisća pjatk wjacore hodźiny za mužom pytali, kotryž njebě so z kupanja w jězoru na campingowanišćo, hdźež je mějićel parcele, wróćił. Tež nurjerjo su byli zasadźeni. Popołdnju, krótko do dwěmaj běchu jeho ćěło namakali. Nětko so kriminalna policija z padom zaběra.
Harowaka zajeli
Kamjenc. Na Kosakenbüschelu w Kamjencu je sobotu rano po napoł dźewjećich harowak zachadźał, kiž je tam pječa moped powalił. Wobydlerjo běchu policiju wo tym informowali. Zastojnicy zwěsćichu, jako so muža na městnje naprašowachu, zo přećiwo njemu přikaz zajeća předleži. Tón je na městnje radšo pokutu 1 000 eurow zapłaćił, zo njebychu jeho zastojnicy zajeli. Moped njebě wón wobškodźił, ma pak so pospytneho wobškodźenja dla zamołwić.
Sprinter pokradnyli
Policija (18.06.21)
Motorske so zwróćiło
Židźino. Na Starej Berlinskej w Židźinom je minjenu nóc wokoło 22.15 hodź. motorske znjezbožiło. Na statnej dróze S 234 zwróći so z dotal njeznateje přičiny šofer ze swojej mašinu, jako bě do směra na Wojerecy po puću. Ćežko zranjeneho muža nětko w chorowni lěkuja.
Na Hłownej dróze znjezbožiłoj
Korzym. Tež přičina njezboža w Korzymje dotal znata njeje. Tam stej wčera wječor awće Audi a Seat při wotbočacej Hłownej dróze do so zrazyłoj. Dwě wosobje so zraništej, zo dyrbjachu jej lěkarsce zastarać. Dobrowólna wohnjowa wobora Korzym-Rodecy je so wo wuběžane kapaliny starała. Policija njezbožo nětko dale přepytuje.
Policija (17.06.21)
Časopisy kradnyli
Wojerecy. Njeznaći su w nocy na wutoru z wulkeje, z lěsycu wobdateje kisty na Łužiskim naměsće wšelake časopisy pokradnyli. Sudobjo namócnje rozpačejo načinichu pakostnicy škodu sto eurow. Hódnota rubizny pak wučinja 2 500 eurow. Kriminalna policija je pad přewzała.
Bydlenski wóz so wotpalił
Rakecy. Z dotal njeznateje přičiny je so wutoru w nocy bydlenski wóz na Minakałskej w Psowjach (Oppitz) wotpalił. Byrnjež kameradojo wohnjowych woborow z Rakec, Stróže-Komorowa, Jeńšec-Psowjow a Minakała płomjenja zhašeć móhli, so mobil dospołnje wupali. Škoda wučinja po informacijach wobsedźerja 10 000 eurow. Fachowcy nětko přičiny wohenja přepytuja. Zdobom so tež policija z nimi zaběra.
Policija (16.06.21)
Při přesćehnjenju do so zrazyli
Krěpjecy. Na statnej dróze S 94 su wčera popołdnju krótko do napoł dwěmaj mjez Porchowom a Kamjencom tři jězdźidła do so prasnyli. Pola Krěpjec je ćmowočerwjeny Volvo před nim jěducej Audi kaž tež slěbrobarbny Volvo přesćahnył. W samsnym wokomiku wujědźe Audi nalěwo, zo by awto před sobu přesćahnył, a zrazy do ćmowočerwjeneho jězdźidła. Šofer Audija wodźeše swoje awto wróćo na prawu čaru, ale prasny tam nimale bjez spinanja do slěborneho Volva. Na zbožo so při njezbožu nichtó zranił njeje. Dobrowólnej wohnjowej woborje Krěpjecy a Halštrow stej z wosom kameradami městno njezboža zawěsćiłoj a wuběžace maćizny wotstroniłoj. S 94 běše něhdźe hodźinu na jednej čarje zawrjena, zo by policija slědy na jězdźidłach a jězdni zawěsćiła.
Policija (15.06.21)
Winik so cyle jednorje wotsalił
Kulow. Policija pyta swědkow njezboža, kotřiž móža so pod telefonowym čisłom 03571/ 465 0 abo na policajskim rewěrje přizjewić. Dźens tydźenja běše so w Kulowje njezbožo stało. 62lětna bě w 14.45 hodź. z kolesom po Kamjenskej po puću z města won. Do křižowanišća před dwórnišćom dyrbješe wona pomałšo jěć, dokelž tam awta čakachu. Při tym ju čorny VW Passat hišće přesćahny a nadobo borzdźeše. Kolesowarka sćahny wodźidło nabok, zo njeby do awta zrazyła, a padny. Zawinowar njezboža pak je z městna njezboža ćeknył.
Policija (14.06.21)
Smjertnje njezbožił
Budyšin. Pjatk wokoło 23.30 hodź. bě šofer motorskeho po zwjazkowej dróze B 156 do směra na zajězd awtodróhi Budyšin-wuchod po puću. W dołhej křiwicy zjědźe wón z jězdnjenje, zrazy do nabóčneje planki a na to do štoma. Jako prěni wuchowarjo městno njezboža docpěchu, běše muž hižo bjez wědomja. Woni drje jeho reaniměrowachu, ale bjez wuspěcha, wón hišće na městnje wudycha. B 156 běše dlěje hač dwě hodźinje zawrjena.
Policija (11.06.21)
Kedźbliwa sobudźěłaćerka
Pančicy-Kukow. Sobudźěłaćerka nakupowanišća w Pančicach-Kukowje je srjedu wobšudnistwu zadźěwała. Cuzy muž bě rentnarjej telefonisce dobyće 38 000 eurow přilubił, kupi-li wón tři Google-Play-kartki po sto eurach a hdyž jemu wotpowědne čisła posrědkuje. Předawarka pak wuměnkarja na zbožo wot toho wotdźerža. Kriminalna policija přepytuje.
Policija (10.06.21)
Polo w płomjenjach stało
Wojerecy. Wčera popołdnju wokoło dwěmaj dyrbješe wohnjowa wobora z Wojerec woheń na polu při Kamjenskim wobłuku hašeć. Tam je něhdźe 400 kwadratnych metrow role w płomjenjach stało. Spěšne zapřimnjenje wobornikow jich rozpřestrěću na zbožo zadźěwa. Kak bě k wohenjej dóšło, njeje dotal jasne. Policija přepytuje zapalerstwa dla.
Awto so paliło
Póckowy. Tež w Póckowach je so wčera paliło. Hižo rano napoł dwěmaj dyrbjachu dobrowólni wohnjowi wobornicy z Póckowow, Smělnje a Wjazońcy kaž tež z Biskopic pod carportom palace so wosobowe awto marki Seat hašeć. Kameradojo zamóchu woheń spěšnje zhašeć. Awto njehodźi so hižo wužiwać, tež carport dyrbja zwottorhać. Policisća wuchadźeja z toho, zo bu woheń wotpohladnje zamiškrjeny.
Policija (09.06.21)
Kedźbliwi swědcy pomhali
Wojerecy. Na Edisonowej we Wojerecach su předwčerawšim wječor wokoło wosmich třo swědcy zadobyće do lawby wobkedźbowali. 34lětny muž bě so tam namócnje zadobył a wšelake kamory přerył. Susodźa-zahrodkarjo słyšachu haru, chwatachu k potrjechenemu objektej a su zadobywarja narěčeli. Tón skoči z woknom a chcyše z kolesom ćeknyć, padny pak do bliskeje hrjebje. Swědcy móžachu jeho zadźeržeć a wołachu policiju, kotraž so dale wo naležnosć staraše. Při přepytowanju drje njejsu zastojnicy pola muža žanu rubiznu namakali, wón pak měješe nóž při sebi. Hač je to za chłostanje relewantne, statne rěčnistwo pruwuje.
