Policija (24.03.17)

Freitag, 24. März 2017 geschrieben von:

Rubježnikow lepili

Budyšin. Rubježniske padustwo je so zawčerawšim w Budyskej Strowotnej studni stało. W kupnicy swědk wobkedźbowaše, kak žona a muž drastu a kosmetiku do nachribjetnika tykataj. Po tym zo staj bjez zapłaćenja nimo kasy šłoj, jeju­ 30lětny narěča. Na to hrožeše cuzy jemu ze sykawu a zhubi so ze žonu do hłubokogaraže, hdźež šofer z awtom na njeju čakaše. Mjeztym alarmowana policija zadźerža­ awto bórze na to na Nowosólskej dróze a namaka w nim rubiznu, sykawu kaž tež nožicy. 62lětny wodźer awta­ a 26lětny paduch steještaj pod wliwom drogow. Jeju kaž tež žonu zastoj­nicy zajachu. Kriminalna policija so z padom nětko bliže zaběra.

Policija (23.03.17)

Donnerstag, 23. März 2017 geschrieben von:

Znjewužiwanje wuslědźili

Policija (22.03.17)

Mittwoch, 22. März 2017 geschrieben von:

Při pohrjebje kradnył

Wojerecy. Paducham po wšěm zdaću ničo­ swjate njeje. Póndźelu popołdnju pokradnychu njeznaći při Wojerowskim lěsnym pohrjebnišću tobołu z jězdźidła pochowanskeho předewzaća. Jeho wobsedźer w tym času runje kašć njeseše a njeboćičkeho tak k poslednjemu wotpočinkej přewodźeše. Tole je njeznaty šamale wužił a z njezamknjeneho awta tobołu hrabnył. W njej běchu wosobinske papjery a móšeń. Hódnotu rubizny trochuje wobsedźer na něhdźe 350 eurow.

Pytaja swědkow

Kamjenc. K wobchadnemu njezbožu, kotrež je so zawčerawšim krótko do 16 hodź. na Kamjenskej Wuchodnej hasy stało, pyta policija swědkow. Kolesowarka bě so před domom z čisłom 21c pěškej wuwinyła. Při tym wona tak njezbožownje padny, zo so na hłowje ćežko zrani. Z wuchowanskim helikopterom dyrbjachu ju do specialneje kliniki dowjezć. Njeznaty pěšk bě so z městna njezboža zminył. Policija pyta nětko wočiswědkow, kotřiž­ su podawk snano wobkedźbowali a móhli pokiwy k pytanemu pěškej po­dać. Informacije přijimuja pod telefonowym čisłom 03591/ 36 70.

Policija (21.03.17)

Dienstag, 21. März 2017 geschrieben von:

Žiwidła na puću leželi

Miłoćicy. Rozwaliny připowěšaka nakładneho awta, zapakowanski material a najwšelakoriše žiwidła rozpřestrěwachu so wčera wječor na statnej dróze S 100 mjez wotbóčku do Miłoćic a Hlinowcom. Tam wołachu wohnjowych wobornikow z Halštrowa, Protec a Krěpjec na pomoc. Nakładne awto połne žiwi­dłow bě so na prawym boku jězdnje ze swojim připowěšakom štoma šmórnyło. Wotmach zražki bě tak sylny, zo so připowěšak nimale dospołnje skóncowa. Wulke mnóstwo žiwidłow wusypny so na to na jěz­dnju, hydrawliske durje připowě­šaka so wottorhnychu. Wodźer nakładneho awta so na zbožo njezrani. Alarmowani wobornicy starachu so wo wuběžany wolij a statnu dróhu hrubje zrumowachu. Spedicija pósła na to nowe nakładne awto, do kotrehož žiwidła a dalše wěcy překładowachu. Za čas rumowanja bě S 100 za wobchad dospołnje zawrjena.

Policija (20.03.17)

Montag, 20. März 2017 geschrieben von:

Paduchow z rubiznu dosahnyli

Wopaka/Hornja Kina. Po pokiwje swědka bu w njedźelnych rańšich hodźinach znate, zo běchu so njeznaći do tankownje na Budyskej dróze we Wopakej (Oppach) zadobyli. Skućićeljo hrabnychu sej tam wjetše mnóstwo cigaretow, alkoho­liske napoje a słódčizny w cyłkownej hódnoće něhdźe 3 000 eurow. Nimo toho načinichu­ 2 000 eurow wěcneje škody. Swědcy zdźělichu, zo bě so wot tankownje swětły Alfa Romeo z Mittweidaskim čisłom wotsalił. Jězdźidło měješe skóncowanu wosłabjenu swěcu a jědźeše po zwjazkowej dróze B 96 do směra na Budyšin. Wobsadce policajskeho awta so poradźi, ćěkacych a policiji hižo znatych třoch paduchow w starobje 21 do 29 lět w Hornjej Kinje zadźeržeć. W jich awće namakachu rubiznu runje tak kaž grat, kotryž běchu woni wužiwali.

Policija (17.03.17)

Freitag, 17. März 2017 geschrieben von:

Pjenjezy kradnyli

Nuknica. Njeluby wopyt mějachu spočatk tydźenja w Nuknicy. Kaž nowinski rěčnik Zhorjelskeje policajskeje direkcije zdźěli, su so tam njeznaći wutoru w běhu dnja do bydlenskeho domu burskeho statoka zadobyli. Při tym mějachu sej skućićeljo poměrnje lochko, dokelž njeběchu durje zamknjene. Z běrowoweje rumnosće pokradnychu listowej wo­balce. W kóždej z njeju bě štyricyfrowa suma pjenjez, kaž w policajskim reporće dale rěka. Kriminalisća pad přepy­tuja.

Policija (16.03.17)

Donnerstag, 16. März 2017 geschrieben von:

Paduch drasty lepjeny

Kamjenc. Z tym drje 28lětny paduch zawčerawšim dopołdnja w Kamjencu ličił njebě. Na Klóšterskej hasy hrabny sej wón před modowym wobchodom wjacore dźěle drasty a so w bliskim domje zhubi. Tam wón etikety z płaćiznu wotstroni. W tym wokomiku staj jeho ciwilnaj policistaj Kamjenskeho rewěra, kotrajž běštaj njeskutk wobkedźbowałoj, překwapiłoj a młodeho muža zaještaj. Sobudźěłaćerjo­ modoweho wobchoda scyła hišće pytnyli njeběchu, zo bě so drasta w hódnoće 200 eurow zhubiła.

Policija (15.03.17)

Mittwoch, 15. März 2017 geschrieben von:

Rekord spěšnosće nastajiła

Nowe Błohašecy. Ze swojim wosobowym awtom typa VW je młoda žona wčera w Nowych Błohašecach dotalny negatiwny rekord w lětušej statistice spěšnosće w Budyskim wokrjesu nasta­jiła. Na statnej dróze S 111 błysknychu ju při wobchadnej kontroli ze 124 km/h, a to při dowolenych 50 km/h. Hrěšnica dyrbi nětko 680 eurow pokuty płaćić, tři měsacy nóžkować a dóstanje nimo toho dwaj dypkaj w Flensburgu.

Policija (14.03.17)

Dienstag, 14. März 2017 geschrieben von:

Awto so wupaliło

Połčnica. Njelubu překwapjenku dožiwi žona wčera rano w Połčnicy. Jako chcyše ze swojim awtom na dźěło jěć, dyrbješe wustróžana zwěsćić, zo bě jeje jězdźidło dospołnje wupalene. Bjez toho zo bychu wobydlerjo z jeje bydlenskeho doma abo ze susodnych domow abo pěšcy to pytnyli, bě w nocy w Citroënje z dotal nje­znateje přičiny woheń wudyrił. Při tym so wosobowe awto dospołnje zniči. Móžno, zo zwisuje tónle pad z tym, zo bě so žona hakle njedawno wot swojeho 48lětneho žiwjenskeho partnera dźěliła. Kaž policija informuje, tčeše za woknotrějakom awta někajka powěsć muža. Što je w njej dokładnje stało, znate njeje. Po­licija nětko podhlada zapalerstwa dla přepytuje.

Policija (13.03.17)

Montag, 13. März 2017 geschrieben von:

Hač chcedźa rjedźić?

Wojerecy. Swojoraznu a skerje njezwučenu rubiznu wupytachu sej paduši, kotřiž běchu so w času wot pjatka popołdnja hač do soboty ranja do wjaceswójbneho domu we Wojerecach zadobyli. Z jedneje z pincow pokradnychu tři bleše płokanskeho srědka kaž tež blešu rjedźenskeho srědka za nuzniki w cyłkownej hódnoće 15 eurow. Hač trjebaja je za nalětnje rjedźenje, bohužel znate njeje.

Anzeige