Policija (26.03.21)
Wobchadne znamjenja fuk
Debricy. Njewšědnu rubiznu wupytali běchu sej njeznaći w nocy na srjedu w Debricach (Döbra) we Wóslinčanskej gmejnje. Tam zhubi so z twarnišća na Młynskim puću sydom wobchadnych znamjenjow. Kaž policija zdźěli, jedna so mjez druhim wo znamjenja za wobmjezowanje spěšnosće, stop, zakaz přesćehnjenja a dalše. Jich hódnotu trochuja na něhdźe 500 eurow.
Policija (25.03.21)
Bjez jězbneje dowolnosće po puću
Wojerecy. Po wšěm zdaću hižo dlěje hač 16 lět Wojerowčan bjez jězbneje dowolnosće z awtom jězdźi, kaž je so předwčerawšim při wobchadnej kontroli wukopało. Krótko po 8 hodź. zadźeržachu policisća 34lětneho z jeho Polom na Kulowskej dróze we Wojerecach a chcychu jeho jězbnu dowolnosć widźeć. Tu pak wón pokazać njemóžeše, dokelž bě ju hižo lěta 2004 wotedać dyrbjał. Što je tehdy skućił, z policajskeje rozprawy bohužel njewuchadźa. Jako přewjedźechu pola młodeho muža na to drogowy test, reagowaše tón pozitiwnje na amfetaminy. Wojerowčan dyrbješe swój Polo tuž stejo wostajić, zastojnikam kluče přepodać, awtowe papjery wotedać a z policistami k „darjenju“ kreje sobu jěć. Přećiwo njemu přepytuja nětko jězdźenja bjez dowolnosće a pod wliwom drogow dla.
Policija (24.03.21)
W awće dwělować započała
Wóslink. Najskerje w poslednim wokomiku je žona z Wóslinka minjene dny spóznała, zo su ju z tak mjenowanym wnučkowym trikom wobšudźić chcyli. Kaž policija předwčerawšim zhoni, bě Wóslinčanku minjeny štwórtk cuza žona zazwoniła, wudawajo so jako pólska wobchadna policistka. Wona powědaše, zo bě dźowka 79lětneje při wobchadnym njezbožu pólskeho staćana strašnje zraniła a zo dyrbi nětko do jastwa, jeli rentnarka za nju kawciju 70 000 eurow njezapłaći. Wona tuž wšo swoje zamóženje hromadźe pytaše, sydny so do cuzeho čakaceho awta, zo by sobu do Wrócławja jěła. W běhu jězby pak započa wona dwělować. Mjez druhim ju zadźiwa, zo šofer napadnje husto telefonuje. Jako Wóslinčanka słowo „wnučkowy trik“ naspomni, da jej šofer telefon, na kotrehož tamnym kóncu bě wona „policistka“, kotraž wša rozhorjena na nju swarješe. Na to šofer zwonka Wrócławja zasta a 79lětnu z awta pušći. Tam pak so žana pozdatna policistka njezjewi. Wóslinčanka na to ze swojim zamóženjom zaso domoj jědźeše a bě dźakowna, zo swoje pjenjezy zhubiła njeje.
Policija (23.03.21)
Drogi namakali
Radwor. W dwěmaj bydlenjomaj w Radworju je policija předwčerawšim popołdnju dohromady wjace hač 50 gramow drogow namakała. Jako prěnje wobhladachu sej popołdnju po pokiwje swědka bydlenje 36lětneho. Tam namakachu 32 gramow konopje, wšelake utensilije za jeje wužiwanje kaž tež tak mjenowany butterfly-nóž. Wječor wołachu zastojnikow wospjet do samsneho bydlenja. Nětko bě tam dalši 34lětny muž, kiž uniformowanym snadne mnóstwo marihuany přepoda. Na sudniski přikaz sej tež jeho bydlenje bliže wobhladachu a z pomocu psa dalše 22 gramow konopje namakachu. Policisća wšitko sćazachu a wupisachu chłostanske přizjewjenje. Kriminalna słužba Budyskeho rewěra so z padom dale zaběra.
Policija (22.03.21)
Kolesowarka ćežko zranjena
Narć. Na zwjazkowej dróze B 96 w Narću sta so sobotu dopołdnja ćežke wobchadne njezbožo, při kotrymž je so 79lětna kolesowarka strašnje zraniła. Wona bě po wokrjesnej dróze ze směra Noweje Łuki přijěła a chcyše zwjazkowu dróhu přeprěčić, zo by so na kolesowansku šćežku na tamnym boku puća dóstała. Wona pak přewidźa z Wojerowskeho směra přijěduce wosobowe awto typa Suzuki, kotrehož 62lětny wodźer zražce hižo zadźěwać njemóžeše. Při tym njeje so jenož rentnarka ćežko zraniła, tež šofer Suzukija snadne zranjenja poćerpje. Wěcna škoda wučinja po informacijach Zhorjelskeje policajskeje direkcije tysac eurow. Njezbožowa słužba dokładnu přičinu njezboža přepytuje.
Policija (19.03.21)
Drogi připadnje namakali
Běła Woda. Při zasadźenju předwčerawšim krótko do połnocy w Běłej Wodźe namakachu zastojnicy w jednym bydlenju mału konopjowu plantažu. Poprawom běchu policistow do bydlenja 34lětneho strowotniskich problemow dla wołali. Tam pak napadny jim blachowa tyza ze 40 gramami marihuany. Statny rěčnik na to přikaza, zo maja zastojnicy stwu wobydlerja dokładnje přepytać. W kamorje namakachu woni skónčnje připrawu za plahowanje konopje, w kotrejž steješe połnje kćějaca rostlina. Ju kaž tež plahowansku připrawu nablaku sćazachu, 34lětneho wobydlerja dowjezechu k dalšemu zastaranju do chorownje.
Policija (18.03.21)
Blisko hrodu granatu namakali
Radwor. Hdyž dźěći abo młodostni wonka w přirodźe přebywaja, je to najprjedy raz chwalobne. Lědma štó na to mysli, zo móhło to snano strašne być, na přikład, hdyž namakaja woni strašnu powostanku z Druheje swětoweje wójny. Stało je so to předwčerawšim blisko Radworskeho hrodu. Při tamnišich hatach wuhladaštaj młodostnaj 30 centimetrow dołhi zerzawy nastroj. Wona zazwoništaj swojeju staršeju a informowaštaj tohorunja policiju. A to bě prawje tak, přetož namakanka bě ruska granata z přeměrom wosom centimetrow. Specialisća policije ju wotwjezechu.
Policija (17.03.21)
Paduch so sam přeradźił
Budyšin. Dokelž njeje lěpje na swoju móšeń kedźbował, je drje so 24lětny muž předwčerawšim po padustwje sam přeradźił. Wón bě dopołdnja w kupnicy na Budyskej Kamjentnej hasy wšelake twory spakosćił a na to ćeknył. Sobudźěłaćer drje spyta jeho zadźeržeć, cuzy pak so jemu wutorhny. Při tym zhubi swoju móšeń, w kotrejž bě mjez druhim personalny wupokaz. Tak je paduch policiji tójšto dźěła zalutował.
Policija (16.03.21)
Žona njemdrje zachadźała
Hermanecy. Po wšěm zdaću měšeńca alkohola a drogow je předwčerawšim zasadźenje policije w Hermanecach we Łazowskej gmejnje wuskutkowała. 37lětna žona w swojim bydlenju hewrjekaše, ćisny piwowu blešu do dalšeje žony a randalěrowaše w bydlenju. Jako policisća zakročichu, so njemdra tež do nich da, tak zo dyrbjachu ju z domu wjesć. W bydlenju namakachu marihuanu, pola žony naměrichu 2,6 promilow alkohola.
