Koleso namakali a paduchow zajeli
Budyšin. Dźakowano pokiwej swědka je policija w nocy na srjedu pokradnjene koleso na Budyskej Schäfferowej namakała. Te bě něchtó srjedź septembra na Cyhelskej pokradnył. Podhladnaj staj mužej w starobje 24 a 32 lět. Jeju zastojnicy lepichu, jako nětko podarmo za pokradnjenym kolesom pytaštaj. Wobeju nachwilnje zajachu. Při kontroli młódšeho namakachu policisća wšelki grat za zadobywanja.
Wuheń so palił
Ćisk. W jednym ze statokow na Ćišćanskej nawsy je so předwčerawšim wuheń palił. Jako wobydler tam kachle zatepi, nadobo płomjenja z wuhenja sapachu. Muž spyta na to woheń w kachlach z wodu hašeć, při tym pak so wuheń pukny, tak zo nasta něhdźe tysac eurow škody. Snadnje zranjeny muž dyrbješe so w chorowni lěkarsce zastarać dać. Policija pad dale přepytuje. Zawěsće pak so z nim tež přisłušny saznik zaběra.
Wulke zbožo měli
Porchow. Zbožo w njezbožu měješe młoda swójba wčera rano na awtodróze A 4 pola Porchowa. Wona bě ze swojim Opelom do směra na Budyšin po puću, jako 28lětny wodźer z dotal njeznateje přičiny kontrolu nad wodźidłom zhubi. Opel zajědźe najprjedy nalěwo a zrazy do srjedźneho wobhrodźenja, na to suny so na tamny bok jězdnje a wosta na prawej kromje stejo. Wodźer a jeho 33lětna sobujěduca so jeno snadnje zraništaj. Jeju na městnje lěkarsce zastarachu. Tři dźěći w starobje poł, jednoho lěta a pjeć lět so njezranichu. Opel pak so po informacijach policije dospołnje skóncowa. Nimo toho wobškodźi so wobhrodźenje awtodróhi na něhdźe 50 metrach. Dohromady nasta 20 000 eurow škody.
Kolesowar so zranił
Hózk. W Hózku je srjedu wječor wodźer nakładneho awta na hłownej dróze kolesowarja přewidźał a jeho šmórny. Byrnjež z koła padnył, so škodowany na zbožo jenož lochko zrani. Zawołana policija wěcnu škodu na sto eurow trochuje.
Do firmy so zadobyli
Serbske Pazlicy. Minjeny dny běchu so njeznaći do jedneje firmy w Serbskich Pazlicach zadobyli. Kaž Zhorjelska policajska direkcija wčera w nowinarskej rozprawje zdźěli, běchu grat w hódnoće něhdźe 5 000 eurow pokradnyli. Wěcnu škodu trochuja na něhdźe 500 eurow.
Z parka palmy sobu wzali
Mužakow. W nocy na srjedu su njeznaći w Mužakowskim parku palmy pokradnyli. Jedna z eksotiskich rostlin bě po zdaću tak ćežka, zo ju policija z čworom na Zhorjelskej dróze wostajenu nadeńdźe.
Chorobne jězdźidło pokradnyli
Kamjenc. Na Jěžowskim pólnym pućiku w Kamjencu su njeznaći, kaž policija hakle wčera pisa, minjeny dny z garaže elektriski chorobny jězdny stoł typa Invacare a k tomu słušace elektriske nabiwadło pokradnyli. Ćělnje zbrašenym za žiwjenje jara wažne a trěbne jězdźidło płaći něhdźe 2 000 eurow.
Podhladneho zajeli
Budyšin. Kaž bu hakle dźensa znate, je policija póndźelu popołdnju paducha njedaloko Budyskeho policajskeho rewěra lepiła, kiž je zašły čas mnohe delikty skućił. 32lětny je podhladny, zo je so loni wjackróć do pěstowarnjow, fyzioterapijow, hosćencow a předawanišćow zadobywał. Mjez druhim jemu wumjetuja, zo je w nakupowanišću na Otta Nagelowej loni w oktobru šěsć fotoaparatow, dalokowid a pjenjezy kradnył. Tež nastupajo wopojadła je wón podhladny, zo je škodu wjacorych tysac eurow načinił. Zastojnicy su jeho přechodnje zajeli a wutoru sudnikej předstajili. Kriminalisća wuchadźeja z dalšich njeskutkow muža a nětko wšelake slědy wuhódnoćeja.
Do lawbow so zadobywałoj
Kamjenc. Kedźbliwosć wobydlerja je w nocy na wutoru paduchomaj w Kamjencu zadźěwała w zahrodkownišću kradnyć. Mužej w starobje 19 a 20 lět běštaj so na Měrowej do štyrjoch lawbow zadobyłoj. W dalšich jědnaće staj při pospyće nutřłamanja zwrěšćiłoj. Přiwšěm běštaj tójšto wěcow spakosćiłoj, z kotrymiž pak daloko přišłoj njejstaj. Po informaciji wobydlerja jeju policija lepi a nimo toho zwěsći, zo běštaj chětro alkoholizowanaj. Młódši bě tež cannabis und amfetaminy brał. Při sebi měještaj młodostnaj sekeru a wjacore nože. Hódnota pokradnjenych wěcow kaž tež rozměr wěcneje škody njejstej dotal hišće wujasnjenej. Kriminalna słužba Kamjenskeho policajskeho rewěra nětko podhlada padustwa z brónjemi dla přepytuje.
Paducha lepili
Kulow. W Kulowje maja wosebje kuražěrowanych wobydlerjow. To spózna tež 38lětny muž, kiž bě sej tam zańdźenu sobotu w kupnicy nachribjetnikaj z tworami napjelnił. Na to chwataše z objekta, sydny so na koleso a wotjědźe, bjeztoho zo by něšto z toho, štož bě sej zapakował, zapłaćił. Sobudźěłaćerka wobchoda pak jeho přesćěhaše, při čimž měješe pomoc kuražěrowaneho šofera transportera. Zhromadnje so jimaj poradźi paducha zadźeržeć. Zawołani zastojnicy zwěsćichu pokradnjene twory w hódnoće něhdźe sto eurow. Nětko ma so muž podhlada padustwa dla wusprawnić. Zwotkel měješe wón koleso, dotal tež hišće jasne njeje.
Paduši w štomowni
Wojerecy. Njeznaći su so minjeny pjatk wječor resp. hač do soboty ranja namócnje do štomownje na Grodkowskej šoseji we Wojerecach zadobyli. Woni pokradnychu wšelke kable a roły z kopora kaž tež wolijowu klumpu. Hódnota rubježnistwa wučinja 200 eurow. Zawostajili su paduši nimo toho wěcnu škodu něhdźe sto eurow. Kriminalna policija pad přepytuje.
Při spjatym jězoru zachadźeli
Budyšin/Bórk. Na promenadźe přibrjoha Budyskeho spjateho jězora we wjesnym dźělu Bórk su dotal njeznaći randalěrarjo wot zańdźeneho pjatka w nocy hač do soboty dopołdnja zachadźeli a durje do klumpoweje stacije rozbili. Wobškodźili su tohorunja tam wotstajene koleso a bow za wotpadki. Nastata wěcna škoda wučinja něhdźe 600 eurow. Wohnjowa wobora dyrbješe objekt na městnje njeskutka zawěsćić. Nětko kriminalna policija za skućićelemi slědźi.
Z awtom do chěže zrazyłoj
Wóspork. Njeznateje přičiny dla je wčera Škoda do chěže we Wósporku zrazył, drje bjeztoho zo by borzdźił. Wohnjowi wobornicy dyrbjachu 81lětnu sobujěducu z ćežkim gratom z awta wuswobodźić, na čož ju z helikopterom a šofera z wuchowanskim wozom do chorownje dowjezechu. Policija pad přepytuje.
Pytaja swědkow
Komorow. Njeznaty šofer módreho VWja z Pirnaskim Kfz-znamješkom a připowěšakom je předwčerawšim na zwjazkowej dróze B 156 mjez Komorowom a Lěskej wobchad wohrozył. Wulkodubrawska wobydlerska policija prosy swědkow, so pola njeje přizjewić.
Spěšnosć přepruwowali
Klukš. Tohorunja na B 156 su zastojnicy srjedu mjez Klukšom a Minakałom spěšnosć něhdźe 1 500 jězdźidłow kontrolowali. Dohromady 32 šoferam wuprajichu porok. Wodźerjej Audija, kiž bě ze 163 km/h po puću, hrozy pokuta znajmjeńša 600 eurow a sćazanje jězbneje dowolnosće na tři měsacy.