Policija (26.02.16)

Freitag, 26. Februar 2016 geschrieben von:

Myjadła fuk

Koblicy. Byrnjež – abo runje dokelž – Hórnikečanski jězor wobšěrnych hórnistwowych saněrowanskich dźěłow dla tuchwilu dospołnje zawrjeny był, wón po wšěm zdaću paduchow přiwabja. Tak informowaše mějićel dowoloweho parka na Kobličanskim pobrjoze zawčerawšim policiju, zo bě so pola njeho něchtó do sanitarnych rumnosćow zadobył. Stało bě so to minjenej tydźenjej, wšako tam wobsedźer w zymje kóždy dźeń za prawym njehlada. Paduši pokradnychu tři woclowe myjadła, pjenježny awtomat za wužiwanje dušow kaž tež něhdźe 50 metrow dołhi tołsty milinowy kabl. Po trochowanju wobsedźerja načinichu woni něhdźe 4 500 eurow škody. Kriminalistam so poradźi wjacore slědy zawěsćić. Nětko so nadźijeja, zo z jich pomocu skućićelow lepja.

Policija (25.02.16)

Donnerstag, 25. Februar 2016 geschrieben von:

Wobšudnicy bohužel wuspěšni

Budyšin/Hodźij. We wobłuku Budyskeho policajskeho rewěra běchu spočatk tydźenja wobšudnicy po puću. Dotal nje­znate skućićelki běchu w dwěmaj padomaj samo wuspěšne. Kaž policija nětko zdźěli, bě póndźelu připołdnju 86lětna žona ze swojim rolatorom na Drježdźanskej dróze w Budyšinje po puću. Nadobo ju nje­znatej žonje narěčeštej a wobjima­štej. Pozdźišo rentnarka zwěsći, zo bě so z jeje płašća móšeń zhubiła. W njej bě třicyfrowa suma pjenjez.

Něhdźe hodźinu pozdźišo sta so w Hodźiju žona w podobnej starobje z woporom po wšěm zdaću samsneju skućićelkow. Blisko jeje bydlenja na Budyskej dróze wonej tež ju narěčeštej. Pokazujo jej cedlu a někotre twjerde pjenjezy po­zbudźeštej ju k darowanju. Jako rentnarka swoje mjeno do napodobnjeneje darowanskeje lisćiny zapisa, wućahnyštej njeznatej z jeje wotstajeneje tobołki móšeń. Tež w tymle padźe přisadźi škodowana wobydlerka pjenjezy a wosobinske dokumenty.

Policija w tym zwisku předewšěm staršich ludźi ke kedźbnosći namołwja, hdyž so jim cuzy bliža a jich narěča.

Policija (24.02.16)

Mittwoch, 24. Februar 2016 geschrieben von:

Padustwu zadźěwał

Ottendorf-Okrilla. Kedźbliwy wodźer nakładneho awta je zawčerawšim krótko do połnocy na awtodróze A 4 po wšěm zdaću padustwu diesela zadźěwał. Jako bě do směra na Pólsku po puću, chcyše wón na parkowanišću blisko Ottendorfa-Okrille jenož krótku přestawku zapołožić. A tam wuhlada podhladnej wosobje z kanistrom w ruce. Wonej čuještej so wobkedźbowanej, schowaštej so najprjedy pod jednym z nakładnych awtow a ćeknyštej pozdźišo do njeznateho směra. Kedźbliwy šofer informowaše na to ­policiju. Wobsadki wjacorych policajskich awtow w bliskosći za njeznatymaj pytachu, bohužel pak nikoho njenamakachu. Runočasnje wšitke jězdźidła na parkowanišću kontrolowachu a slědy wobškodźenja tankow na zbožo žane njezwěsćichu. Najskerje bě šofer runje w prawym wokomiku přijěł a je ze swojim wobhladniwym zadźerženjom ­njeskutkej zadźěwał, za čož so jemu policija wuraznje dźakuje.

Policija (23.02.16)

Dienstag, 23. Februar 2016 geschrieben von:

Njeprošenych hosći měli

Njebjelčicy. Njeznaći su so minjeny kónc tydźenja do towarstwoweho domu w Njebjelčicach zadobyli. Z objekta při Hłownej dróze spakosćichu woni telewizor a zesylnjak. Hódnota rubizny wučinja 2 500 eurow. Nimo toho nasta něhdźe sto eurow wěcneje škody.

Paduši tež w pjekarni byli

Rakecy. Tohorunja minjeny kónc tydźenja běchu paduši w Rakecach po puću. Woni zadobychu so namócnje do pjekarnje na torhošću. Tam přiswojichu sej spirituozy­ a cigarety w dotal njeznatym mnóstwje. Načinjenu wěcnu škodu trochuje mějićel na 300 eurow. We woběmaj padomaj je policija slědy zwěsćiła a nětko za paduchami pyta.

Policija (22.02.16)

Montag, 22. Februar 2016 geschrieben von:

Dwójce tobołku kradnyli

Kamjenc. Zo njeznaći we wulkich kupnicach dźeń a časćišo ludźom tobołki kradnu, dyrbještej sobotu dopołdnja žonje w Kamjencu a Wojerecach nazhonić. W Lessingowym měsće bě wobydlerka w kupnicy na Hasy Willyja Muhleho nakupować a powěsny swoju tobołku na nakupowanski wozyčk. Tole paduch wuži a ju w njewobkedźbowanym wokomiku spakosći. W tobołce bě nimo wupokaza, jězbneje dowolnosće a mobilneho telefona sto eurow.

Podobny pad sta so něhdźe w samsnym času we Wojerowskej kupnicy při Kamjenskej dróze. Tež tam bě žona tobołku na wozyčk powěsnyła. Jej pobrachuja nětko samo dwaj mobilnej telefonaj, wupokaz, EC-kartka kaž tež 140 ­eurow. Policija za paduchomaj slědźi.

Policija (19.02.16)

Freitag, 19. Februar 2016 geschrieben von:

Plesternaki na dom mjetał

Budyšin. W Budyšinje je njeznaty w ćmowej drasće dźensa rano wokno něhdyšeje dźěćaceje kliniki rozbił. W twarjenju su požadarjo azyla zaměstnjeni. Policija mozaikowe plesternaki zawěsći. Budyski operatiwny wotwobaranski škit za skućićelom slědźi.

Wopity swoje nawoči pytał

Wojerecy. Kedźbliwy Wojerowski pěšk je srjedu wječor policiju informował, dokelž bě widźał, kak muž na Sputnikowej hasy poštyrjoch łazy. Na městnje so wukopa, zo bě mócnje wopity swoje nawoči zhubił, za kotrymiž nětko pytaše.

Seniorka pječeń čuła

Rěčicy. Srjedu popołdnju je w Rěčicach trikoweho wobšudnika koza liznyła, dokelž njebě so 90lětna zjebać dała. Njeznaty chcyše jej 20 000 eurow wulišćić, powědajo, zo je přećel jeje wnučki. Žona pak zawoła hnydom policiju.

Policija (18.02.16)

Donnerstag, 18. Februar 2016 geschrieben von:

Z kurom so zajědojćiłoj

Kinspork. W domje na Großenhainskej w Kinsporku je so minjenu nóc paliło. Papjera a trundle w pincy stejachu w płomjenjach. Wobydlerjej w starobje 63 a 91 poćerpještaj zajědojćene z dymowym kurom, jeju do chorownje dowjezechu.

Před žonu so slěkał

Kamjenc. Na Kamjenskim dwórnišću je so 32lětny wutoru rano před połstalětnej slěkał a po tym ćeknył. Žona pak policiju zazwoni, kotraž je na zakładźe pasoweho fota w měsće bydlaceho azyl pytaceho spóznała. Kriminalna policija přepytuje nětko ekshibicionistiskeho jednanja dla.

Do běrowa so zadobyli

Wojerecy. W nocy na wutoru běchu so njeznaći we Wojerecach na Ferdinanda von Schillowej hasy do běrowa zadobyli. Paduši pokradnychu pjenjezy z lutowanskeho swinka a kompjuterowu techniku w hódnoće něhdźe tysac eurow.

Policija (17.02.16)

Mittwoch, 17. Februar 2016 geschrieben von:

Tobołku pokradnyć chcyłoj

Němcy. 71lětnej rentnarce chcyštej póndźelu popołdnju cuzej žonje na Drježdźanskej dróze w Němcach ručnu tobołku pokradnyć. Jako jedna z njeju seniorku narěča, chcyše jej tamna tošku wutor­h­nyć. Wuměnkarka pak ju kruće dźeržeše. Žónskej na to do njeznateho směra ćeknyštej. Kriminalna policija pyta swědkow, kotřiž su tole wobkedźbowali.

Alarm w azylowym domje

Wojerecy. W nocy na wutoru wołachu we Wojerecach policiju a wohnjowu woboru k zasadźenju. W azylowym domje na Thomasa Müntzerowej alarmowachu woheń signalizowace připrawy, zo je tam woheń wudyrił. Bórze pak so wukopa, zo bě to wopačny alarm, dokelž bě něchtó připrawu zapinył. Policija pyta nětko za winikom, kiž je hawarijowy škit znjewužiwał.

Policija (16.02.16)

Dienstag, 16. Februar 2016 geschrieben von:

Ćežke njezbožo pola Brunowa

Kamjenc. Dźensa rano dóńdźe na statnej dróze S 100 mjez Kamjencom a Brunowom k ćežkemu wobchadnemu njezbožu. Z dotal njeznateje přičiny zrazy tam Suzuki Swift do štoma. Wotmacha zražki dla so awto po jězdni suwaše a wosta na tamnej stronje puća stejo. Šofer so při tym ćežko zrani, wuchowanska słužba jeho do chorownje dowjeze. Dróha bě ně- hdźe hodźinu dospołnje zawrjena.

Paduši přez nóc přišli

Budyšin. W nocy na njedźelu běchu so paduši w Budyšinje na Drjewowych wikach do hosćenca zadobyli. W lokalu nałamachu wjacore hrajne awtomaty a spakosćichu z nich pjenjezy. Tež w tejce za- twarjeny trezor woni ze zakótwjenja wutorhnychu a ćeknychu z nim. Cyłkownje zawostajenu škodu trochuje mějićel hosćenca na 10 000 eurow. Skućićeljo načinichu tež wulku wěcna škodu. Kriminalna policija pad přepytuje a prosy swědkow wo informacije.

Policija (15.02.16)

Montag, 15. Februar 2016 geschrieben von:

Jězbny stoł pokradnyli

Budyšin. Sobotu popołdnju je so na Dr. Pětra Jordanowej w Budyšinje elektriski jězbny stoł zhubił. 3 500 eurow hódny módry Scooter Auriga docpěwa spěšnosć hač do šěsć kilometrow na hodźinu.

Do lawbow so zadobyli

Halštrow. Njeznaći zadobychu so kónc tydźenja při Halštrowskim kěrchowje do dweju zahrodkoweju lawbow. Najebać to, zo běchu grat a zahrodniske nastroje w hódnoće něhdźe 1 500 eurow pokradnyli, načinichu skućićeljo wěcnu škodu něhdźe 300 eurow.

Mortweho wjelka našli

Bórkhamor. Sobotu popołdnju wołachu wobydlerjo policiju do Bórkhamora, dokelž ležeše tam mortwy wjelk na dróze. Spěšnje bě tež sobudźěłaćerka Rěčičanskeho wjelčeho běrowa na městnje. Wona zwěsći, zo njebě nichtó zwěrjo ilegalnje morił. Po zdaću bě wjelk chory a z teje přičiny zahinył. Fachowcy chcedźa kadawer dokładnje přepytować.

Anzeige

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson