Hannover (B/SN). Předsyda rady Ewangelskeje cyrkwje w Němskej (EKD) Heinrich Bedford-Strohm je wšěm muslimam w Němskej postrowy přeća žohnowanja k ramadanej posrědkował. „Zhromadne dźěło z druhimi w modlitwje kaž tež w nabožinskej praksy křesćanki a křesćanow z muslimkami a muslimami wjaza“, Bedford-Strohm wujasni. Ramadan je 9. měsac po islamskej protyce. W tym času maja so muslimki a muslimojo po předpisach korana wot schadźenja słónca hač k jeho chowanju posćić. Tak słuža woni Bohu a sej zdobom ćěło a duch wučisćeja. Za muslimow w Němskej započina so póstny měsac ramadan 24. apryla a kónči so 24. meje.
Pomha w chorowni
Podstupim (B/SN). Krajna předsydka braniborskeje Lěwicy Anja Mayer pomha za čas koronapandemije w Podstupimskej katolskej chorowni swj. Józefa. W ćežkich chwilach korony dla je chorownja wo pomoc prosyła. Wjacori pomocnicy z medicinskim wukubłanjom so přizjewichu, mjez nimi politikarka Anja Mayer. Wukubłana lěkarska pomocnica je hač do lěta 2006 w tym powołanju dźěłała. Nětko wukonja 41lětna rady słužbu we wotrjedźe za nuzowe přijimanje.
Budyšin (SN). W Budyšinje, Biskopicach, Kamjencu, Běłej Wodźe a Bukojnje, gmejna Malešecy, wotměchu so kónc tydźenja najwšelakoriše akcije přećiwo wobmjezowanjam koronapandemije dla.
Najwjace wobdźělnikow zličichu po medijowych rozprawach sobotu w Budyšinje, hdźež je na dwěmaj zarjadowanjomaj přibližnje 200 ludźi demonstrowało. Kaž hižo tydźeń do toho wotmě so připołdnju tak mjenowane „wuchodźowanje“ wot Žitnych wikow přez Bohatu hasu na Hłowne torhošćo. Wobdźělnicy pokazowachu mjez druhim Zakładny zakoń. Přizamkny so manifestacija AfD z Wojerowskim zapósłancom zwjazkoweho sejma Karstenom Hilsu a z krajnym předsydu AfD Jörgom Urbanom.
Prěni raz běchu Budyscy měšćanscy radźićeljo přećiwny protest organizowali. Nimo Wobydlerskeho zwjazkarstwa a AfD běchu tam wšitke dalše frakcije měšćanskeje rady zastupjene.
Podstupim (dpa/SN). Frakcija AfD w Braniborskim krajnym sejmje chcyše dźensa wo tym wuradźować, hač móže jeje dotalny předsyda Andreas Kalbitz frakciju dale nawjedować, byrnjež jeho zwjazkowe nawodnistwo AfD ze strony wuzamknyło. Po informacijach powěsćernje dpa chcyła frakcija za to jednaćelski porjad frakcije změnić. Dotal njemóže nichtó čłon frakcije być, kiž njeje čłon strony. Kalbitza běchu jeho stykow k prawicarskej scenje dla wuzamknyli.
Dalše wolóženja za hosćency
Berlin (dpa/SN). Hosćencarjo móža we wjacorych zwjazkowych krajach znajmjeńša trochu wodychnyć. Wot dźensnišeho su w dalšich krajach hosćency, kofejownje, hotele a dalše zarjadnišća zaso wotewrjene. Branšowy zwjazk Dehoga přiwšěm kritizuje, zo su rjadowanja w jednotliwych krajach hišće jara rozdźělne. Tak dyrbjachu w Berlinje korčmy kónc tydźenja hišće zawrjene wostać. W braniborskich móžachu porno tomu hižo zaso prěnje piwo točić.
Israel ma nowe knježerstwo
Berlin (dpa/SN). Zwjazkowy wonkowny minister Heiko Maas (SPD) je dźensa we wobłuku widejokonferency ze swojimi kolegami mjez Němcami woblubowanych dowolowych krajow wuradźował, kak móhli wobmjezowanja pućowanja koronapandemije dla poněčim zaso zběhnyć. Na widejowu konferencu přeprošeni běchu Španiska, Italska, Awstriska, Grjekska, Chorwatska, Portugal, Malta, Słowjenska, Cypern a Bołharska. Zaměr konferency bě, kak při wotewrjenju mjezow za turistow koordinujo postupować. W Němskej płaći hač do 14. junija swět wopřijace warnowanje před jězbami do wukraja. Maas chcył je po tym krok po kroku zběhnyć, wostanje-li połoženje nowych infekcijow dla přewidne. Zakład toho su wot komisije EU zestajane směrnicy za turizm w časach krizy.
Heiko Maas je dźensa w rańšim magacinje sćelaka ARD na pozitiwne wuwiće we wjacorych krajach pokazał. Tak móhła tež Němska wobmjezowanja pućowanja zaso zběhnyć. Ludźo pak měli wědźeć, kotre prawidła we wukraju płaća.
Choćebuz (dpa/SN). Dźe wo sta kilogramow marihuany: Z předčitanjom wobskóržby je so minjeny pjatk w Choćebuzu proces přećiwo pozdatnej cwólbje wikowarjow drogow z Braniborskeje a Berlina zahajił. Jedna žona a štyrjo mužojo dyrbja so před krajnym sudnistwom zamołwić. Woni su wobskorženi, dokelž su zhromadnje we wulkim stilu z drogami wikowali. W lětomaj 2018 a 2019 běchu marihuanu w cyłkownym mnóstwje 750 kilogramow kupowali a z wopojadłom wikowali, rěčnica sudnistwa Susanne Becker zdźěli. Cyłkownje dźe wo cyłu tonu drogow, předewšěm marihuanu.
Zazběh procesa wotmě so w njewšědnej wokolinje. Směrnicow wotstawka koronapandemije dla su za zjawne sudniske jednanje jednu z wikowych halow města Choćebuza na sudnisku žurlu přetwarili. Kóždy wobskorženy ma dweju prawiznikow poboku. Tež sudnistwo, statne rěčnistwo, swědcy a přihladowarjo trjebaja dosć městna, kaž Becker rjekny. Za telko ludźi nimaja na krajnym sudnistwje kmanu rumnosć. Za proces planuja dźewjeć sudniskich terminow. Wobskorženym hrozy hač do 15 lět jastwa.
Nócny alarmowy zwuk je w sewjerorynsko-westfalskim Münsteru wjacorym ludźom spar rubił. Alarmowani wohnjowi wobornicy zwěsćichu, zo pochadźa hara wot budźaka, kotryž ležeše w kontejneru za elektrošrot. Metalowe sudobjo skutkowaše při tym kaž rezonancne ćěleso a zwuk hišće zesylni. Šwižnemu wobornikej so poradźi do wěka kontejnera zalězć a budźak ze sekeru rozbić.
Na pućowanje po sławnym, ale tuchwilu zawrjenym Awstralskim muzeju w Sydneyju poda so wčera 25lětny muž. Ze swojim handyjom je so stajnje zaso sam fotografował. Tak połoži swoju hłowu do daloko wočinjeneho nopa dinosawriera, kaž awtomatiske stražne kamery dokumentuja. Pozdźišo staji sej kłobuk, kotryž bě w garderobje namakał. Policija je muža mjeztym zajała. 190 lět stary muzej je najstarši přirodohistoriski muzej swěta.
Berlin (dpa/SN). Žane tři tydźenje po tym zo je nowy wobchadny zakonik płaćiwosće nabył, chce wobchadny minister Andreas Scheuer (CSU) krućiše chłostanja za ranjenje zakonja zaso zběhnyć. Po informacijach powěsćernje dpa ministerstwo katalog chłostanjow tuchwilu „předźěłuje“. Při tym dźe hłownje wo to, zo dyrbiš jězbnu dowolnosć hižo měsac wotedać, hdyž sy w sydlišću 21 km/h a zwonka njeho 26 km/h přespěšny był. To je „njepoměrne“, kaž z ministerstwa rěka. Pječa je 135 000 ludźi peticiju přećiwo nowemu zakonikej podpisało.
Změnja směrnicy karanteny
Berlin (dpa/SN). Zwjazkowe kraje chcedźa koronakrizy dla wukazane směrnicy karanteny za zapućowacych ze susodnych krajow změnić. To je zwjazkowe nutřkowne ministerstwo poručiło. Dotal dyrbi kóždy, kiž ze susodneho europskeho kraja do Němskeje přińdźe, 14 dnjow do karanteny. Wo tym rozsudźić smě nětko kóždy zwjazkowy kraj sam.
Wjace pjenjez za krótkodźěło
Berlin (dpa/SN). Zwjazkowy sejm je dźensa prěni króć wo zakładnej renće diskutował. Wot klětušeho chcedźa něhdźe 1,3 milionam ludźom z jara małej rentu něšto připłaćić, kaž bě zwjazkowe knježerstwo w februaru wobzamknyło. Zwjazkowy sejm a Zwjazkowa rada dyrbitej tomu hišće přihłosować. Minjeny čas běchu sej předewšěm w rjadach CDU/CSU žadali, předewzaće nowych financielnych poćežowanjow koronakrizy dla najprjedy raz přestorčić. Zwjazkowy minister za dźěło Hubertus Heil (SPD) pak je dźensa hišće raz potwjerdźił, zo chcył zakładnu rentu přesadźić. „Wšako smy to zhromadnje wobzamknyli“, rjekny wón w rańšim magacinje telewizije ARD.
Zakładna renta płaći Němsku zwjazkowu republiku hač do 1,6 miliardow eurow wob lěto. Financować chcedźa ju z dawkowych srědkow stata a nic z přinoškow ludźi. Kritikarjo financnemu ministrej Olafej Scholzej (SPD) wumjetuja, zo nima žadyn koncept, rentu financować.