Z rizikom do přichoda!
Rjemjeslnicy do twarskich wikow
Köln (dpa/SN). Twarske a zahrodniske fachowe wobchody registruja přiběracu ličbu požadanjow z rjemjeslniskich powołanjow. „Wobkedźbujemy widźomnu žołmu přizjewjenjow rjemjeslnikow“, rjekny Franz-Peter Tepaß, rěčnik předsydstwa wikowanskeho zwjazka za domjace paslenje, twarjenje a zahrody (BHB) wčera w Kölnje. Minjenych šěsć měsacow je ličba požadanjow widźomnje rozrostła.
Tepaß ma wuwiće za pozitiwne, nic jenož pobrachowacych fachowcow dla. „Trjebamy runje tutu ekspertizu: Su to fachowcy, kotřiž móža swoju wědu derje dale posrědkować.“ Přiběraca ličba přizjewjenjow ma wjacore přičiny: Mjez druhim krizu w bydlenjotwarje kaž tež insolwency projektnych wuwiwarjow a twarskich firmow, štož wuskutkuje so negatiwnje na rjemjeslniske firmy. Nimo toho je dźěławym nad 50 lětami dale a ćešo, ćělne napinanje někotrych rjemjeslniskich powołanjow zmištrować.
Zo su twarske wiki mnohim rjemjeslnikam powołanska perspektiwa, njeje nowe. Tepaß trochuje, zo bě kóždy dźesaty přistajeny twarskich wikow něhdy moler, muler abo kładźer kachlicow.
To a tamne (06.03.24)
Ćeknjenej domjacej swinjeći je wohnjowa wobora wčera w bayerskim Heroldsbergu pytała a skónčnje popadnyła. Žona bě při rańšim přechodźowanju njewšědnej zwěrjeći zetkała a policiju informowała. Přiwołani wobornicy swinjeći skónčnje na swjedźenišću města wuhladachu a z pomocu wobsedźerja popadnychu. Prawniske sćěhi akcija njezměje, policija zdźěla – ani za ćeknjenej swinjeći ani za wobsedźerja.
Mały gorila je so w Berlinskej coologiskej zahrodźe narodźił. Młodźo je w nocy na póndźelu na swět přišło, zwěrjenc zdźěla, runje na mjezynarodnym dnju wohroženych družin. Mać so dotal lubosćiwje wo nje stara. Tež swójba wopicow dorost w swojej srjedźiznje wćipnje wita. Najwjetša družina wopicow je wohrožena. W Africe liča hišće 300 000 gorilow z raznje woteběracej tendencu.
Scholz na dobro Assangea
Sindelfingen (dpa/SN). Zwjazkowy kancler Olaf Scholz (SPD) je so přećiwo tomu wuprajił, Juliana Assangea justicy USA přepodać. Britiske sudnistwa měli na dobro Assangea rozsudźić, wšako dyrbi wón w USA z přesćěhowanjom ličić, „dokelž je statne potajnstwa kraja přeradźił“, rjekny Scholz wčera na wobydlerskim zarjadowanju w badensko-württembergskim Sindelfingenje. Knježerstwo USA chce Awstralčana zasudźić. Jemu hrozy jastwo hač do 175 lět.
Pytaja dale za teroristami
Berlin (dpa/SN). Policija pyta dale z wotmachom za bywšimaj teroristomaj Burkardom Garwegom a Ernstom-Volkerom Staubom. Specialne komando policije je minjenu nóc bydlenje w studentskim internaće w Berlinje Friedrichshainje přepytowało. Zajeli pak nikoho njejsu. Mjeztym přizjewja so podpěraćeljo bywšeju teroristow. Woni wobkedźbuja aktiwity policije, registruja čisła ciwilnych awtow zastojnikow a warnuja před jich akcijemi.
China planuje zaso rozrost
Nakupowanska kartka w Sakskej wot 1. apryla
Drježdźany (dpa/SN). W aprylu chcedźa w sakskich wokrjesach nakupowansku kartku za ćěkancow jako pilotowy projekt krok po kroku zasadźić. „Z wokrjesami smy so jara spěšnje na zhromadne postupowanje dojednali“, rjekny nutřkowny minister Armin Schuster (CDU) nowinarjam. Wokrjesy chcedźa kartku z wulkeho dźěla hižo 1. apryla wužiwać. Přechod k planowanej zhromadnej kartce za wšón swobodny stat je pječa zaručeny. Nimo toho je system nakupowanskeje kartki tak zrjadowany, zo je pozdźišo tež po wšej Němskej zasadźomna. Na kartku pak měsačnje pak po dwěmaj tydźenjomaj pjenjezy přepokazaja. Wotzběhnyć móža potrjecheni jónu měsačnje najwjace 50 eurow. Přepokazanje pjenjez a wužiwanje kartki we wukraju njeje móžno.
Žada sej wothłosowanje wo renće
Berlin (dpa/SN). Zapósłanča zwjazkoweho sejma Sahra Wagenknecht žada sej ludowe wothłosowanje wo přichodźe renty w Němskej. Do wozjewjenja planow rentoweje reformy přez zwjazkowe knježerstwo rjekny předsydka Zwjazka Sahry Wagenknecht powěsćerni dpa: „Akcijowa renta je kazino-renta. Dokelž nima knježerstwo w rentowej politice žadyn plan, sadźa ampla starobne zastaranje ludźi z wysokim rizikom na bursy.“
Zwjazkowy financny minister Christian Lindner (FDP) a dźěłowy minister Hubertus Heil (SPD) chcetaj ze swojim rentowym paketom niwow renty dołhodobnje na 48 procentow zapisać a nowy kapitalny zakład za rentowe zawěsćenje natwarić. Pjenjezy chce stat přewostajić a na akcijowych wikach zapołožić. Po tutym puću chcedźa hač do 2030 znajmjeńša 200 miliardow eurow kapitala natwarić. Z pjenjezami chcedźa po kuskach rentowe zawěsćenje podpěrać.
Wagenknecht žada sej ludowe wothłosowanje po přikładźe Šwicarskeje, hdźež běchu ludźo 13. rentu přesadźili.
Rozsudne předwólby w USA
Bywši prezident Donald Trump nawjeduje – Joe Biden znowa nastupi
Washington (dpa/SN). Wólby prezidenta USA steja dźensa, wutoru, před wosebje wažnym měznikom. Tak mjenowany „Super Tuesday“ je rozsudna wutora, na kotrejž přewjedu republikanojo kaž tež demokraća w USA we wjace hač dźesać zwjazkowych statach nutřkostronske předwólby, mjez druhim w statach Alabama, Kaliforniskej, Colorado, Maine, Minnesota, North Carolina, Texas a Virginia. Wothłosować maja ludźo tam wo tym, štó jako kandidat w nowembru k wólbam nastupi. Na stronskich zjězdach w lěću kandidatow oficialnje nominuja.
Pola republikanow wojujetaj bywši prezident Donald Trump a něhdyša wulkopósłanča zjednoćenych statow pola UNO Nikki Haley přećiwo sebi. Trump tuchwilu jasnje nawjeduje a je dotal nimale wšitke předwólby bjez problemow dobył. Tež dźensa bě Trump jasny faworit. Porno tomu nichtó z tym njeliči, zo móhła Haley Trumpa chutnje wohrozyć.
To a tamne (05.03.24)
Palacy so milinowy sćežor je produkciju w jeničkej europskej tworni elektroawtow typa Tesla zlemił. Zawod w Grünheide pola Berlina su mjeztym ewakuowali. Wohnjowu woboru běchu dźensa rano w 5.15 hodź. wołali. Njedaloko Goßena so na polu sam stejacy sćežor paleše. Na to je milina we wjetšej wokolinje wupadnyła. Hač steji woheń w zwisku z protestami w lěsu njedaloko twornje, njewědźa.
Dwaj bowaj wolija za fritěrowanje su njeznaći na schodźe dwórnišća w Berlinje-Lichtenbergu wukidnyli. Znajmjeńša 13 ludźi je so na hładkich schodach wobsunyło. Muž so zrani. Wón je so pola policije přizjewił a skoržeše na bolosće bjedrow a zhibadłow. Njeznaći, mužej a žona, běchu wolij z bliskeje předawanskeje budki pokradnyli a na schodach rozkidali, kaž awtomatiska kamera pokazuje. Policija pyta nětko za swědkami.
W měrowej misiji
Bologna/Turin (B/SN). W nadawku bamža Franciskusa jedna kardinal Matteo Zuppina z posołami Vatikana w Kijewje a Moskwje wo měr w Ukrainje. Tuchwilu koncentruje so wón na wuswobodźenje tysacow ukrainskich dźěći, do Ruskeje zawlečenych. Předsyda Italskeje biskopskeje konferency je politiske rozmołwy w Ukrainje, Ruskej, USA, Chinje a z prezidentom Francoskeje Emmanuelom Macronom wo nowej humanitarnej iniciatiwje wjedł.
Měr – ćežišćo zetkanjow
Erfurt (B/SN). 103. zjězd katolikow wot 29. meje hač do 2. junija w Erfurće budźe so hłownje z měrom na swěće zaběrać. Prezidentka Centralneho komiteja katolikow Irme Stetter-Karp k tomu praji: „Zacpěću demokratije njemóžemy přihladować a mjelčeć. Smy žiwi z nadźije, zo so wudani wo měr wojować.“
Tibetske dźěći wotcuzbnić
Köpping: Egoizm towaršnosć žerje
Na mjeztym 14. zarjadowanje „Budyskich narěčow“ běchu zajimcy minjeny pjatk do Tachantskeje cyrkwje prošeni. Přeprosyli běchu sej saksku socialnu ministerku Petru Köpping (SPD).
Budyšin (SN/MkWj). Hłowna tema narěče sakskeje ministerki „Zo njeby nas njemdrosć roztorhała“ zwoprědka na to pokaza, zo chce so Petra Köpping dosć palacej naležnosći wěnować, kotraž wulki dźěl towaršnosće zaběra: polarizowanju a radikalizowanju ludnosće, kotraž je po zdaću do lěhwow dźělena a kotraž nima sej ničo wjace rjec. Ewangelski tachantski farar Christian Tiede wobdźělnikow hnydom na spočatku namołwješe, so demonstracijow, plakatow a wołanja wzdać. Wotpowědujo tomu po někotrych mjeńšinach hižo prěni cyrkej zaso wopušćichu.
