Israel chce ludźi „ewakuować“

Donnerstag, 14. März 2024 geschrieben von:

Washington (dpa/SN). Wonkowny minister USA Antony Blinken je Israel znowa namołwjał, humanitarne połoženje w Gazaskim pasmje polěpšić a škit ciwilneje ludnosće zaručić. Prezident USA Joe Biden bě tohorunja zwuraznił, zo měło tole najwyšu prioritu měć. Najlěpši puć by přiměr był, Blinken rjekny.

Mjeztym je israelski zakitowanski minister Yoav Galant připowědźił, zo chcył wojersku ofensiwu přećiwo Hamas w Rafah na juhu Gazaskeho pasma bórze zahajić. Tam žiwori tuchwilu něhdźe 1,5 milionow ciwilistow na najwušim rumje a pod žałostnymi wuměnjenjemi, pytajo za wućekom w druhich kónčinach dospołnje zawrjeneho pasma. Israelske wójsko chce tutych ludźi do zahajenja wojowanjow na „humanitarne kupy“ w centrumje Gazaskeho pasma ewakuować.

Wočakuja pomoc ministrow

Donnerstag, 14. März 2024 geschrieben von:
Erfurt (dpa/SN). Po měsacy trajacych protestach ratarjow w Němskeje su so dźensa ratarscy ministrojo Zwjazka a zwjazkowych krajow k nalětnemu posdźenju w Erfurće zešli. „Rozumju, zo su wočakowanja wulke“, rjekny předsydka konferency ratarskich ministrow, durinska ministerka za ratarstwo Susanna Karawanskij (Lěwica). Zwjazk ratarjow bě sej mjez druhim rozsudy za wottwar běrokratije w ratarstwje žadał. K tomu předleži ministram wobšěrny katalog namjetow zwjazkowych krajow. Karawanskij wočakuje prěnje kročele na dobro ratarjow hišće w tutym lěće. Ratarjo su protestne akcije připowědźili.

Namjety k zežiwjenju předpołožili

Donnerstag, 14. März 2024 geschrieben von:

Berlin (dpa/SN). Zwjazkowy sejm je dźensa wo poručenjach prěnjeje wobydlerskeje rady k politice zežiwjenja wuradźował. Gremij z 160 čłonami bě w februaru „Wobydlerski posudk“ předpołožił. Na prěnim městnje steji namjet, dźěćom w pěstowarnjach a šulach darmotny wobjed poskićić. Tohorunja namjetuja, nadhódnotowy dawk za sad a zeleninu šmórnyć. K doporučenjam komisije słuša tež statne woznamjenjenje žiwidłow hladajo na škit klimy, derjeměće zwěrjatow a jich wuskutki na strowotu ludźi.

Zwjazkowy sejm bě loni w meji wobzamknył, wobydlersku radu wutworić. Prezidentka sejma Bärbel Bas bě gremij nazymu při załoženju do wotewrjeneje diskusije pohonjowała. Wuzwolili běchu čłonow rady po principje připada. Namjety njejsu za parlament zawjazowace. Po dźensnišej debaće w zwjazkowym sejmje chcedźa namjety najprjedy raz we wuběrkach diskutować.

Zwjazki přetrjebarjow witaja, zo je wobydlerska rada měnjenja a nazhonjenja ludźi k zežiwjenju zezběrała.

EU Ukrainu dale podpěruje

Donnerstag, 14. März 2024 geschrieben von:

Zastupnicy čłonskich krajow so na financowanje pomocy dojednali

Brüssel (dpa/SN). Čłonske kraje EU su so po měsacy trajacych wuradźowanjach na to dojednali, ze zhromadnym financowanjom wojerskeje techniki za Ukrainu pokročować. Po wčera wječor wotzamknjenym dojednanju ma tale kročel zmóžnić, Ukrainje brónje municiju a druhe wuhotowanje w hódnoće znajmjeńša pjeć miliardow eurow dodawać, z informacijow Rady EU wuchadźa.

Konkretnje planuja, europskemu financnemu fondsej EFF přidatne srědki přewostajić. Z tutym instrumentom čłonskim krajam EU wudawki za wojersku techniku na dobro wot Ruskeje nadpadnjenej Ukrainje zarunaja.

Wobćežne běchu jednanja wosebje žadanjow Němskeje a Francoskeje dla. Tak Němska na tym wobstawa, bilateralnu pomoc Němskeje na dobro Ukrainy bóle wobkedźbować, wšako je tajka pomoc spěšniša a wunošniša. Nimo toho Němska na to pokazuje, zo Madźarska hižo měsacy srědki za fonds EFF blokuje.

Wukrajne pokuty přesadźić

Donnerstag, 14. März 2024 geschrieben von:

Straßbourg (dpa/SN). Čłonske kraje EU chcedźa při přesadźenju pjenježnych pokutow a chłostankow wobchadnych přeń­dźenjow dla sylnišo hromadźe dźěłać. Tuchwilu něhdźe 40 procentow wšitkich mjezy překročacych wobchadnych deliktow njechłostaja, Europski parlament zdźěla. Tohodla su so posrědnicy parlamenta na to dojednali, mjezsobnu hamtsku pomoc krajow sylnić. Čłonske kraje EU tute rjadowanje witaja. Parlamenty krajow dyrbja rjadowanje hišće schwalić.

Konkretnje dojednanje předwidźi, zo smědźa sej zarjady krajow pola šoferow pokutne pjenjezy žadać, kotrež su w druhich krajach přećiwo nim wukazali. Wuměnjenje je, zo je pokuta wyša hač 70 eurow a zo su wšitke druhe prawniske puće wučerpane. Priwatnym předewzaćam ma zakazane być, pjenježne pokuty w druhich krajach přesadźić. Nimo toho chcedźa lisćinu přeńdźenjow rozšěrić, za kotrež móža sej pokutu žadać. Nimo smalenja a jězdźenja pod wliwom alkohola słuša k tomu přichodnje tež wopačne parkowanje, strašne přesćehnjenje abo ćeknjenje po njezbožu. Kraje maja 30 měsacow chwile, rjadowanje přewzać.

To a tamne (14.03.24)

Donnerstag, 14. März 2024 geschrieben von:

Titanic znowa twarić dać chce awstralski miliardar. Łódź ze wšej pychu ma samo „lěpša być hač original“, 69lětny Clive Palmer zdźěla. Jězba Titanic II z britiskeho Southamptona do New Yorka ma so hižo w juniju 2027 wotměć, hinak hač 1912 pak bjez zražki z lodowcom. Ně­hdźe 500 milionow dolarow chcył Palmer wudać, zo móhł sej swój són spjelnić.

Młody rěznik z wulkimaj nožomaj w nachribjetniku je w Šwikawje zasadźenje policije zawinował. Swědk bě wobkedźbował, kak so 20lětny na dwórnišću z wulkim nožom zaběraše a na to do busa zalěze. Přiwołani policisća bus zadźeržachu a muža narěčachu. Při tym so wukopa, zo bě młody muž po puću k praktiskemu rězniskemu pruwowanju. Dokelž hrožeše policajskeho zasadźenja dla strach, zo termin skomdźi, jeho zastojnicy z policajskim awtom dowjezechu.

Scholz wotmołwja w sejmje

Mittwoch, 13. März 2024 geschrieben von:

Berlin (dpa/SN). Zwjazkowy kancler Olaf Scholz (SPD) je so dźensa prěni króć w tutym lěće w zwjazkowym sejmje prašenjam zapósłancow stajił. Unija CDU/CSU bě připowědźiła, zo chcyła so kanclera prašeć, čehodla so dale tomu spjećuje, Ukrainje němske rakety typa Taurus přewostajić, kotrež zamóža 500 kilometrow daloko lećeć. Scholz tole wotpokazuje, dokelž by so Němska tak aktiwnje na wójnje mjez Ruskej a Ukrainje wobdźěliła.

Łódź třećinu čary zmištrowała

Larnaka (dpa/SN). Łódź „Open arms“ z něhdźe 200 tonami pomocnych srědkow za wobydlerjow Gazaskeho pasma je hač do dźensnišeho ranja něhdźe třećinu puća zmištrowała. Wlečak, kiž bě wčera z cypernskeho přistawa Larnaka wotjěł, ćehnje platformu z pomocnymi srědkami za sobu. Tohodla jězdźe jenož něhdźe šěsć kilometrow wob hodźinu spěšnje. Dotal njeje jasne, hdźe a kak chcedźa material w Gazy wotkładować.

UNO za globalne rjadowanje KI

Wojowarjo georgiskeje legiony su wčera na žarowanskej swjatočnosći w Kijewje swojimaj towaršomaj poslednju česć wopokazali a jeju pochowali. Nodar Nasirov (28) a Georgi Gogilashvili (40) běštaj w boju přećiwo ruskim jednotkam padnyłoj. Georgiski legion je ukrainska wojerska jednotka, w kotrejž wojuja přewažnje Georgičenjo jako dobrowólni. pa/AP/Efrem Lukatsky

Ukrainske truty Rusku trjechili

Mittwoch, 13. März 2024 geschrieben von:
Rjazan (dpa/SN). W ruskej Rjazanskej kónčinje juhowuchodnje Moskwy je po nadpadźe trutow we wolijowej rafineriji woheń wudyrił. Po prěnich informacijach je sej nadpad wjacorych zranjenych žadał. Pječa su tři truty do zawoda zrazyli. Tež z tamnych ruskich kónčin su nadpady trutow registrowali. Hakle minjenu nóc bě ukrainski prezident Wolodymyr Zelenskyj wjećbu za ruski raketowy nadpad na město Krywoj Rih z mortwymi a zranjenymi připowědźił. Po informacijach guwernera Woronježskeho regiona su tam wjace hač 30 ukrainskich trutow wottřělili. Zbytki trutow su škody na domach a infrastrukturje zawinowali. Powětrowy alarm knježeše tež w Kursku, Brjansku, Lipecku a samo w Pětrohrodźe. W Belgorodskej kónčinje bě 45 000 ludźi nachwilnje bjez miliny, po tym zo bě ukrainska artilerija město wobtřělała.

Němske lětadła pomhaja w Gazy

Mittwoch, 13. März 2024 geschrieben von:
Berlin (dpa/SN). Zwjazkowy zakitowanski minister Boris Pistorius (SPD) je wukazał, zo tež transportne lětadła zwjazkoweje wobory nuznje trěbne pomocne srědki nad Gazaskim pasmom wotćisnu. Zasadźić chcedźa dwě mašinje typa Hercules C-130, kotrejž stejitej tuchwilu na lětanišću w Francoskej. „Ludźom w Gazy pobrachuje to najnuzniše. Chcemy swój dźěl přinošować, zo bychu woni žiwidła a medikamenty dóstali“, Pistorius zdźěla. Kóžda Hercules móže 18 tonow srědkow transportować. Akcija zwjazkoweje wobory je dźěl powětroweho mosta za Gazu, kotruž Jordaniska organizuje.

Serbska debata

Neuheiten LND