Dźeń do silwestra wojowachu koparjo wjesnych cyłkow zaso raz we Worklečanskej ćěłozwučowarni wo pokal CDU, tónraz hižo 30. raz. Na spočatku jubilejneho turněra witaštaj zapósłanc krajneho sejma Alojs Mikławšk a Elaine Jenčec (wobaj CDU), kiž bě patronka tohole woblubowaneho sportoweho ewenta, wšitkich wosom cyłkow do sportownje. Tež André Handrik, nawoda turněra a dr. Beno Wałda, Worklečanski chronikar a na tutym dnju zastupowacy wjesnjanosta, wšitkich hosći powitaštaj. Naposledk mjenowany pokaza před zahajenjom prěnjeje hry hišće raz wobraz loni zemrěteho Paula Šnajdera, tak zo wšitke mustwa wokomik na njeho spominachu.
Nowe lěto, nowe sportowe wužadanja! Tak to wšak kóždy znaje – tón jedyn abo druhi sej tež něšto dobreho přede-wza, snano so wjace hibać. Ale sprawnje prajene, je tajke šěre, chłódne nowe lěto wšo druhe hač dobra motiwacija. Radšo potom w nalěću, mojedla w meji sej hnydom plan zestajeć, kak móžeš wšědnje něšto za ćělnu strowotu činić. A najwažniši tip, kiž njesměće zabyć: radšo husćišo so hibać a krótšo, hač jenož jónu wob tydźeń a potom dołho. To sy dny po tym sprócny a lóšt tajke něšto zaso činić spěšnje zańdźe. Ale to jenož připódla, pohladamy raz na dwaj wjerškaj tutoho lěta.
Motocross w Jaworje
Motocross na mjezynarodnej runinje změja w Jaworje klětu 31. awgusta a 1. septembra. Potom wubědźuje so tam najwoblubowaniša motocrossowa serija Europy: ADAC MX Masters na motocrossowej čarje Kaponica. Hač do jutřišeje soboty dóstanu kupcy na tikety hišće hodowny rabat.
Nowolětny turněr w Pančicach
Na předposlednim dnju lěta, 30. decembra, hraje so wot 13 hodź. w sportowni w Pančicach-Kukowje wólnočasny wolejbul. Přizjewiło je so dźesać mustwow, na přikład z Wotrowa, Kašec, Swinarnje kaž tež z Pančic-Kukowa.
Silwesterske běhi w Budyšinje
Přez 200 běharkow a běharjow je so hižo přizjewiło, Budyske lochkoatletiske towarstwo Čerwjeno-běli Budyšin 90 pak da dźensa hišće hač do połnocy chwile so pod www.baer-service.de za 56. Budyske silwesterske běhi bjez přidatnych kóštow přizjewić. Štóž so po tym online abo na městnje přizjewi, dyrbi přidatnje 3 eurow zapłaćić. Start a cil budźetej w stadionje Młynkec łuka, běha so w Humbodtowym haju. 9.30 hodź. započnjetej so hłownej běhaj na distancomaj 5,4 km a 10,8 km, dźesać mjeńšinow pozdźišo wubědźowanje na čarje 2,6 km.
EV Landshut – Łužiske lodohokejowe liški 0:1 p.tř.p. (0:0,0:0, 0:0 - 0:1)
Na druhim hodownym swjatym dnju dźěše jězba za Łužiske lodohokejowe liški do delnjeje Bayerskeje k EV Landshut. Překwapjenkow w zestawje Liškow žanych njebě. Matthew Galajda dósta we wrotach předstup před Nikitu Quappom a Sam Dove-McFalls suny so zaso do zestawy. Landshut startowaše spěšnje do hry a Matthew Galajda smědźeše hnydom prěni wutřěl dźeržeć. Ale tež Liški běchu wot spočatka sem wotućene. Sam Dove-McFalls skedźbni z prěnjej dobrej móžnosću po dwě a poł mjeńšinje na so. Potom kwalita hry trochu spadny. Wjele misnjenjow a njedokładnych přihrawkow běše widźeć. Tola Landshut bě mustwo z mjeńšej kwotu zmylkow. Wone měješe tež wjace wobsydstwa puka, ale defensiwa Liškow bě kóždy čas kedźbliwa. W 15. min. sydaše prěnje chłostanje přećiwo Landshutej. Tak nasta šansa za Liški w powerplayju. Hobersku móžnosć měješe krótko do přestawki hišće raz Sam Dove-McFalls, tola wrotar Jonas Langmann bě na městnje (20.). Tak wosta při 0:0.
Łužiske lodohokejowe liški –
Bietigheim Steelers 3:1
(1:0, 0:0, 2:1)
To bě napjata a zabawna hra Łužiskich liškow přećiwo Bietigheimej Steelers. Něhdźe 50 do 60 fanow bě z Bietigheima přijěło a wótře swoje mustwo podpěrało. Tež fanojo Běłowodźanow činjachu porjadnje balet.
Najprjedy popřeještej sej wobě mustwje krótku fazu wottasanja. Pola hosći dyrbi so přispomnić, zo chcychu mocy lutować, přetož z rjadom mjenje běše jenož prašenje časa hdy su mocy hrajerjow přetrjebane. Genialna přihrawka Roope Mäkitala na sobuběžaceho Sebastiana Zaunera wobradźi Liškam zasłužene nawjedowanje 1:0 w 16. min.
Awtor dźensa
Toni Ryćer
Wutrobny postrow z Budyskeje chorownje. Ně, njejsym chory, njemějach njezbožo, ani njebědźa mje strowotniske wobćežnosće. Dźěłam přez swjate dny hač do noweho lěta čestnohamtsce w kuchni chorownje. To pomha druhim efektiwnje, dokelž runje w tutym času su dźěławe mocy hišće bóle prašane. To zwyši swójsku spokojnosć, zwjesela potrěbnych kaž tež sebje samoho a nimo toho je dobra wotměna k mojemu běrowowym dźěłu.
DEL
1. Fischtowns Pinguins 31 64
2. LM Berlin 31 63
3. Straubing Tigers 31 57
4. Žrawcy Köln 31 53
5. EHC Mnichow 31 52
6. ERC Ingolstadt 31 52
7. Grizzlyje Wolfsburg 31 52
8. Wild Wings Schwenningen 31 48
9. Adler Mannheim 31 46
10. Lawy Frankfurt 31 39
11. Panthery Auhsburg 31 35
12. Düsseldorfska EG 31 34
13. Nürnberg Ice Tigers 31 33
14. Iserlohn Roosters 31 23
DEL 2
1.EC Kassel Huskies 30 61
2. Ravensburg Towerstars 30 53
3. ESV Kaufbeuren 30 49
4. LP Crimmitschau 30 47
5. Łužiske liški 30 47
6. EC Bad Nauheim 30 47
7. EV Landshut 30 46
8. Krefedske Pinguiny 30 43
9. LM Regensburg 29 43
10. EHC Freiburg 31 40
11. Starbulls Rosenheim 30 40
12. Selbske Wjelki 30 40
13. Drježdźanske LL 30 39
14. Bietigheim Steelers 30 35
Wolejbul w Radworju
Serbske młodźinske towarstwo PAWK je dźensa wječor zarjadowar a wuhotowar nócneho wolejbuloweho turněra w Radworju. Přizjewjenja hižo móžne njejsu, startowa lisćina je z 12 mustwami kompletnje wupjelnjena. Hrać budźe so w Radworskej sportowni wot 18 hodź.
Běhanje w Němskich Pazlicach
Sportowa akcija „Wotběhanje hodowneje husycy“ přewjedźe so w Němskich Pazlicach lětsa zaso na zwučene wašnje, a to na druhim hodownym swjatym dnju, 26. decembra, jako ludosportowy běh. 23. nakład započnje so w 10 hodź..
Blidotenis w Konjecach
Blidotenisowe towarstwo Konjecy přeprošuje zaso na tradicionalny blidotenisowy wječor. Wšitcy, kiž so aktiwnje na winowatostnych hrach njewobdźěleja, smědźa pjatk, 29. decembra, do Konjec přijěć a tam za zelenymi blidami blidotenis hrać. Započatk za dźěći budźe w 17 hodź., a za dorosćenych w 19 hodź.
Kopańca we Worklecach