Přihoty na nowe šulske lěto

Dienstag, 18. August 2015 geschrieben von:

Po wočerstwjenju we wulkich prózdninach je so wčera za wjetšinu wučerjow sakskich zakładnych a srjedźnych šulow hižo nowe šulske lěto započało. Tak tež na Kulowskej wyšej šuli „Korla Awgust Kocor“. Na prěnim zetkanju po zasłuženym dowolu wěnowachu so Kulowscy kubłarjo w fachowej konferecy tomu, zo bychu wažne nadawki diskutowali a rumnosće wotpowědnje přihotowali.

Dźensa podachu so zhromadnje do města Torgau. Tu wopytachu w běhu dnja prěnju narodnu wustajeńcu „Luther a wjerchojo“. W dwěmaj skupinomaj so z temu „Torgau jako centrum duchowneje a swětneje mocy“ zaběrachu. Dalše wodźenje bě we wopomnišću młodźinskeho dwora „Jugendwerkhof“ planowane. Jutře zaběraja so kubłarjo na cyłowučerskej konferency z prašenjemi awtizma. Zajutřišim maja zhromadnje z wučerjemi z Łaza, Łutow a wyšeju šulow I a II z Wojerec dalekubłanje na temu „Motiwacija“. Zbywacy čas hač do přichodneje póndźele je za wosobinski přihot noweho šulskeho lěta. Tak su wučerjo derje na to přihotowani, zo by so start do šulskeho lěta 2015/2016 poradźił. Achim Nowak

Jaworčenjo zhromadnje swjećili

Mittwoch, 12. August 2015 geschrieben von:

Při najrjeńšim słónčnym wjedrje a horcych temperaturach wotměchu Jaworčenjo minjeny kónc tydźenja swój nadróžny swjedźeń. W srjedźišću pisaneho programa steješe dobra nalada. Tak přewjedźechu sobotu volleyballowy turněr wjesnjanow přećiwo mustwam z Njebjelčic, Noweje Wjeski, Kašec a z Hrańcy. Kaščenjo běchu najlěpši a dobychu. Wječor so wšitcy při praženym proseću a spěwje zabawjachu. Na njedźelnym swójbnym popołdnju pijachu stari kaž młodźi Jaworčenjo ze swojimi hosćimi kofej a dachu sej jězby z konjacym zapřahom lubić. Dźěći łažachu na žerdź z plackami.

Wulki wothłós žněješe horcoty dla krótkodobnje ze słomjanych walčkow a folije stajeny basenk, w kotrymž so přez cyły kónc tydźenja a tež hišće wosrjedź nocy kupachu. Swjedźeń je so dźakowano mnohim pomocnikam zaso wulkotnje poradźił. Beno Wawrich

Znajemy swoju domiznu?

Mittwoch, 22. Juli 2015 geschrieben von:

Na swojim tradicionalnym połdnjowskim kubłanskim wulěće poby Domowinska skupina „Budyšin město“ lětsa w Njebjelčicach a Kamjencu.

Hižo před lětami běchmy w Njebjelčicach serbskeho wuměłca Jana Buka wopytali a sej čistu, rjanu wjes wobhladali. Lětsa dźěše nam wo nowu pěstowarnju a nowy pomnik. Hibićiwy wjesnjanosta Tomaš Čornak nas w pěstowarni přećelnje powita a ju nam zhromadnje z wjednicu knjeni Hejdušcynej po­kaza. Je to wulkomyslny twar ze škleńcy a drjewa, z rjanym dworom a krasnej zahrodu. Zo so dźěćom w nowym přebywanišću lubi, bě widźeć a słyšeć. Ze zapalom zanje­sechu nam wone spěwčk ze serbskimi a němskimi štučkami.

Hnujacy je pomnik za nućenych dźěłaćerjow, kotřiž dyrbjachu za čas Druheje swětoweje wójny w Němskej dźěłać. Gerat­ Korjeńk rozłoži nam zrudny dóńt nućeneje dźěłaćerki Nadje. Sylza ze zornowca połoženje wbohich zawlečenych přeswědčiwje rysuje.

Poprachowacych wotmołwow dla njespokojom

Mittwoch, 01. Juli 2015 geschrieben von:

Njedawno je Wojerowske měšćanske zarjadnistwo mějićelow domow na Kulowskej dróze w Němcach na gmejnsku žurlu­ přeprosyło. Chcychu jich wo zakładnym wutwarje statneje dróhi S 95 informować.

Zastupjer Drježdźanskeho projektoweho běrowa Bonk a Herrmann, kotrež hižo druhe nadawki we Wojerecach měješe, přednjese předźěłany plan zakładneho wutwara. Tak ma so 1,19 kilometrow puća­ w třoch wotrězkach wutwarić. Prěni wotrězk je wjesny započatk ze směra do Kulowa hač k mostej, druhi budźe wot mosta hač k Wincencowej hrjebi a třeći hač k wotbóčce ke Kummelowemu młynej. Plan chcedźa w oktobru w měšćanskej radźe schwalić. Twarić ma so wot februara­ 2017 hač do junija 2018. Ru­nočasnje z ponowjenjom dróhi nasta­nje­tej potom chódnik a kolesowanski puć. Wopytowarjo informaciskeho zarjadowanja žadachu sej jasnosć wo připłaćenju. K tomu pak nochcychu so měšćanscy zastupjerjo wuprajić. To wězo wobydlerjow njespokoješe, dokelž maja mnozy wulke ležownosće. Měšćanscy zastupjerjo wobydlerjam přilubichu, jich wo dalšich krokach planowanja prawi­dłownje informować. Achim Nowak

Wo wosadźe a hwězdach zhonili

Dienstag, 30. Juni 2015 geschrieben von:

Na wulět z awtami do Ochranowa podali su so minjenu sobotu čłonojo Domowinskeje skupiny Komorow-Rakecy-Trupin. Fararka Erdmute Frank wodźeše nas po wustajeńcy Ochranowskeje wosady, po cyrkwi a po pohrjebnišću.

Jara nazornje rysuje wustajeńca stawizny Ochranowskeje wosady wot jeje spočatkow 1475 w Čechach a na Morawje. Nikolaus Ludwig Graf von Zinzendorf je we 18. lětstotku Ochranow tak zarjadował, kaž wón dźensa hišće wobsteji. Jeho wowka Henriette Catharina von Gersdorff bě přełožowanje biblije do serbšćiny spěchowała. Wustajeńca hódnoći tež skutkowanje misionarow, mjez nimi serbskich. Dźensa je Ochranow předewšěm znaty za swoje swětoznate hesła, přełožowane do 50 rěčow, tež do serbšćiny. Fararka Frank nam toho­runja zmóžni wopytać cyrkwinsku žurlu a rozjasni dźensniše žiwjenje wosady. Na historiskim pohrjebnišću z lěta 1730 z dohromady 6 200 rownymi kamje­njemi namakaš­ při hłownym puću ­tež row Zinzendorfa­.

Šulerjo wopomnišćo wopytali

Donnerstag, 18. Juni 2015 geschrieben von:

Šulerjo 6. do 9. lětnika internata Serbskeho gymnazija Budyšin pobychu njedawno we wobłuku projekta w bywšim Budyskim jastwje a dźensnišim wopomnišću. Přez nje wodźeše nas Ulrich Ingenlath. Wón je nam na jara přijomne wašnje z wjele přirunanjemi z dźensnišim časom žiwjenje w něhdyšej chłostarni zwobraznił.

Přewšo hnujace bě, jako smědźachu so šulerjo do transportera typa Barkas B 1000 sydnyć, w kotrymž je pjeć celow za transport jatych zatwarjenych. W tajkich wuskich, jenož kwadratny meter wulkich a cyle ćmowych celach bjez wokna­ běchu jeći druhdy hač do pjeć hodźin­ zawrjeni.

Po 20mjeńšinskim zawodnym filmje­ wo wšelakich dobach wobstaća jastwa­ – wot nacionalsocialistiskeje diktatury hač k režimej SED, wobhladachu sej šulerjo originalne cele z tehdyšeho časa. Zhonichu wšelake wosebitosće a krute předpisy we wotběhu wšědneho dnja, při čimž mějachu wjele prašenjow. Bě ćežko sej předstajić, pod kotrymi wuměnjenjem­i dyrbjachu jeći žiworić.

Skupinarjo zhromadnje kolesowali

Mittwoch, 17. Juni 2015 geschrieben von:

Něhdźe 40 wobydlerjow Konjec a Šunowa poda so minjenu njedźelu na swój kóždolětny wulět z kolesami, organizowany wot Domowinskeje skupiny Konjecy-Šunow, do blišeje wokoliny. Zetkachmy so při Šunowskim haće. Starši, młódši, swójby a samostejacy nastajichu so zhromadnje na puć do Tradowa. Tam čakaše na nas swačina. K tomu předstajichu nam stawizny wsy. Po małym wokołopuću jědźechmy k Tradowskim hatam, hdźež kački, kołpje a rubježne ptaki lahnu.

Dalši puć wjedźeše do Sulšečanskeho młyna. Robert Brězan nas po swojim zawodźe wodźeše. Při tym njezhonichmy jenož wjele zajimaweho wo stawiznach młyna, ale tež wo dźensnišim wašnju dźěła w nim. Runje tak kaž wonka móžachmy so nutřka po wšitkich poschodach rozhladować. Bě to jara zajimawa hodźinka, předewšěm tež za naše dźěći. Dokelž bě wjedro tón dźeń runjewon lěćne, bě derje, zo nas wosobowe awto přewodźeše a nas z napojemi zastarowaše.

Lipjenjo ze swójbnymi sej wulećeli

Dienstag, 16. Juni 2015 geschrieben von:

Je z tradiciju, zo poda so chór Lipa jónu wob lěto na wulět ze swójbnymi. Je to zdobom mały dźak swójbnym, kotřiž nas spěw­arjow a spěwarki na koncertach a při wšelakich akcijach přez cyłe lěto­ podpěruja. Druhdy zwjazamy wulět ze zwučowanskim lěhwom. Lětsa pak wuda so rjana składnosć sej do Kulowa dojěć. Towarstwo Bratrowstwo bě naš chór minjenu njedźelu na swój patro­natny swjedźeń přeprosyło.

Wjesnjanosta pomhać dyrbjał

Mittwoch, 10. Juni 2015 geschrieben von:
Poslednju njedźelu róžownika přewjedźechu Smječkečenjo swoje mejemjetanje. Štyri pory dźěći a wosom porow młodostnych wokoło meje rejwaše. Jurij Smoła jich na akordeonje přewodźeše. Jako chcychu štom powalić, wšak mějachu mały problem, dokelž so to z prěnim pospytom njeporadźi. Tak dyrbješe samo wjesnjanosta Franc Brusk sobu pomhać, zo by štom skónčnje ležał. Najspěšniši při wjeršku bě mjez dźěćimi Manuel Šiman­ a mjez młodostnymi Benjamin Greger. Wobaj mejskej porikaj podaštej so z konjacym zapřahom po wsy, tamne pory kaž tež wjesnjenjo a mnozy hosćo jej přewodźachu. Ze zhromadnej rejku a serbskim spěwom rjane popołdnjo wuklinča. Christina Hejdušcyna

Dworowy koncert w Hornjej Hórce

Donnerstag, 04. Juni 2015 geschrieben von:

Něhdźe 150 ludźi je minjenu sobotu do Hornjohórčanskeje wjacezaměroweje hale přišło, zo bychu tradicionalny dworowy koncert tamnišeho muskeho spěwneho towarstwa sobu dožiwili. Koncert zahaji wone z hymnu na Hornju Hórku, ze znatymi domizniskimi spěwami na rjanosće Hornjeje Łužicy a z wjacorymi žortnymi pěsnjemi Hornjeho kraja.

Mjeztym zo na to mužojo a tež jich dirigent­ka Marika Matthes-Hartmann a z njej organist na keyboardźe Jan Chlebníček podij wopušćichu, nastupichu so prědku holcy a hólcy šulskeho chóra Hornjohórčanskeje zakładneje šule. Hižo dwě lěće zwučuje z nimi wučer Michael Klöpper z Wopakeje. Wón je wot lońšeje na­zymy zdobom čłon muskeho chóra, a to z třomi dalšimi spěwarjemi z Budyšina, kotřiž chór tróšku womłodźeja. Klöpper je dźěći na akordeonje přewodźał, tež wone žnějachu sylny přiklesk za swój přinošk.

Anzeige