Muski chór z Hornjeje Hórki je tele dny składnostnje swojeho 50lětneho wob­staća swjedźenski koncert wuhotował. Ze swojej dirigentku Mariku Matthes-Hartmann zahajichu jón w Hornjohórčanskej wjacezaměrowej hali zhromadnje z Budyskim dujerskim orchestrom. Moderator Jürgen Hänel witaše jako čestneho hosća 93lětneho bywšeho orchestroweho nawodu Wernera Frenzela z Laatzena pola Hannovera. Werner Frenzel pochadźa z Lejna, wjesneho dźěla Hornjeje Hórki, a je 38 lět Budyski młodźinski dujerski orchester nawjedował a za njón njeličomne aranžementy spisał. Hänel postrowi tohorunja wutrobnje wjesnjana-wučerja Hilmara Urbana, kiž běše prěni dirigent jubilejneho cyłka a je jón 30 lět nawjedował. Z něhdźe 250 přichwatanymi hosćimi bě žurla hač na poslednje městno wobsadźena.

Słónčne pruhi při spěwanju

Freitag, 04. Mai 2018 geschrieben von:

Do zwučowanskeho lěhwa do Jawornika-Nechowa (Jauernick-Buschbach) blisko Zhorjelca su sej tele dny spěwarki a spěwarjo chóra Lipa wulećeli. Runje tak kaž před lětomaj, hdyž tam ze swójbnymi rjany kónc tydźenja přežiwichmy.

Hłownje słužeše chórowe lěhwo k skrućenju wobstejaceho repertoira, ale tež nowe spěwy stejachu na planje. Tuž dachmy so hnydom pjatk po wječeri do zwučowanja. Sobotu nas słónčne pruhi­ cyły dźeń přewodźachu, tak zo so hnydom po snědani hač do pózdnjeho připołdnja lěpje spěwaše. Popołdnju pak sej dlěšu přestawku popřachmy a pućowachmy zhromadnje ze swójbnymi po lěsu k něhdźe tři kilometry zdalenej wuhlad­nej wěži. Tam při najrjeńšim nalětnim wjedrje zhromadnje swačachmy a sej po něhdźe 100 schodźenkach na wěžu zalězechmy. Daloki wid na jězor a krajinu bě krasny.

Tróšku wučerpani, ale z dobrej naladu so do wustawa swj. Wjacława nawróćichmy, hdźež hižo słódna wječer na nas čakaše. Při zhromadnym spěwanju a dobrej kapce wječor wuklinča.

Wo situaciji migrantow a ćěkancow

Freitag, 27. April 2018 geschrieben von:

Wo tuchwilnej situaciji migrantow a ćěkancow w Budyskim wokrjesu zhonić, a to wot kompetentneje wosoby, běše njedawno tema stajneho blida Budyskeje žónskeje unije CDU. Předsydka Regina Spitzer běše nawodu hamta za wukrajnikow krajnoradneho zarjada Larsa Eibischa na rozmołwu do hosćenca Lusatia přeprosyła. 40lětny jurist wšak njeje po nimale třoch lětach hižo nowačk w zarjedźe. Wosebje wažne jemu je, zo so diskusija nastupajo požadarjow azyla z emocionalneje runiny skónčnje zwěcni. „Je naš job, zo problemy zmištrujemy“, je jeho dewiza.

W treningowym lěhwje pobyli

Mittwoch, 25. April 2018 geschrieben von:

Dwuskokowa reja wopřijima dwaj skokaj w jednym pohibje. Čłonojo Smjerdźečanskeje rejwanskeje skupiny hnydom cyłu reju z tym pjelnja a su ju kaž tež tamne naročne reje njedawno w Čěskej nastudowali a wufilowali. Pjatk popołdnju podachu so z busom, w kotrymž chowachu so mjez rejwarjemi tež tójšto rekwizitow, do čěskeho Janova nad Nisou. Pod nawodom Dietera Wendischa započinachu hnydom po wječeri z prěnjej pót ćěrjacej probu.

Wosebite wjeselo mějachu młodźi rejwarjo při sćoplenju. Při tym zaklinčachu mjenujcy spěwy Měrćina Weclicha, štož wubudźi dobru naladu, byrnjež jara napinace było. Sobotu rano hnydom po snědani startowachu do dalšeho treningoweho dnja, kotryž traješe hač do pózdnjeho wječora. Wječork dachu hišće zhromadnje wuklinčeć a tež tam wězo rejwachu a zhromadnje spěwachu. Treningowe lěhwo bě idealny přihot na nowu rejwansku sezonu, za kotruž je tójšto wustupow planowanych. Tak doleća sej Smjerdźečenjo mjez druhim na festiwal do dalokeho Peru. Chětro wučerpani, ale přewšo spokojni z wuslědkom lěhwa so wšitcy do domizny nawróćichu.

W mnohich naležnosćach je po puću

Dienstag, 24. April 2018 geschrieben von:

W interneće předstaji so Gerat Róbl ze Smjerdźaceje jako financny hospodar. Jako generalny zastupjer znateje zawěsćernje zasłuža sej swój wšědny chlěb. Komunikaciju z klientami poskićuje wuraznje serbsce a němsce. Rady skutkuje tohorunja jako braška. Tola hišće šěršo znaty, a to předewšěm w słowjanskim wukraju, je wón dla swojeho njewšědneho socialneho angažementa. Serbšćina je jemu kluč za durje k někotrymžkuli wutrobam.

Spytaja alternatiwnje žiwi być

Donnerstag, 19. April 2018 geschrieben von:

Slepjanske a Wojerowske kónčiny běchu njedawno cil politiskeje ekskursije Serbskeje lěwicy. W Starej předźerni pola Noweho Města informowachu so hosćo z Hornjeje Łužicy wo alternatiwnym žiwjenskim koncepće pod „Stara předźernja“ zapisaneho towarstwa. Na 3 600 kwadratnych metrach spytaja sej swoje žiwjenje na hinaše wašnje zrjadować a stare rjemjeslniske tradicije regiona wožiwić. Tola při tym so ćeže nakopjeja, rjekny zastupjer towarstwa. „Štóž so přećiwo politiskemu aparatej staja, ma tež na­blaku běrokratiski aparat přećiwo sebi.“

W Slepom rozmołwjachu so ze serbskej wobswětowej aktiwistku Edit Pjenkowej. „Wjace tajkich njepowalnych pjeńkow by serbstwo trjebało“, praji rěčnica Serbskeje lěwicy Měrka Kozelowa. Na městnje wobhladachu sej, kajke rany brunica do serbskeho kraja bije. „Krajina so zhubi a rěč na to sćěhuje“, měnješe spisowaćel Křesćan Krawc.

W Njeswačidle maja zaso póštowu wotnožku

Mittwoch, 18. April 2018 geschrieben von:

Jako bu znate, zo optikarski wobchod na terenje BHG w Njeswačidle kónc januara 2018 zawru, njebě ludnosć runjewon zwjeselena. Nimo nawočow a pisanskeje potrjeby bě we wobchodźe mjenujcy tež wotnožka póšty zaměstnjena. Po jeničce dwěmaj lětomaj so młoda wobchodnica rozsudźi, do Rakec přećahnyć. Z tym bě Njeswačidło bjez póšty. Runje w dźensnišim času, hdyž bywa mnóstwo paketow wobstajnje wyše, bě to špatny signal wobydlerjam. Ludźo dźě pakćiki jenož njepřijimuja, ale je často zaso bjezpłatnje wróćo pósćelu.

Ćim bóle so wobydlerjo nětko wjesela, zo je so mandźelska Christiana Budarja, kotryž ma blidarstwo a wobchod za pčołarsku potrjebu na terenje BHG, rozsudźiła, póštowu wotnožku we wobchodźe sobu zaměstnić. Po tym, zo bě so za wažne dźěło wukubłać dała, posłužuje Beata Budarjowa nětko kupcow wšědnje popołdnju wot 14 do 17 hodź. a sobotu wot 9 do 11 hodź.

W rejach so dale wukmanjeli

Mittwoch, 11. April 2018 geschrieben von:

Napinacy zwučowanski kónc tydźenja leži za čłonkami a čłonami rejwanskeje skupiny Serbskeho folklorneho ansambla Wudwor. Woni pobychu wot 6. do 8. apryla w treningowym lěhwje w krasnym měsće nad Nysu Zhorjelcu.

Jako běchu wšitke zmachi spakowane a skupinske foto třělene, podachu so rejwarki a rejwarjo z busom do napjateho kónc tydźenja. Do młodownje dojěwši so proby hnydom započachu. Z mócnym „Sportej zdar!“ Wudworčenjo swój zhromadny kónc tydźenja zahajichu. Hłowny fokus tónkróć bě, zwučować zakłady a skrućić wobstejacy repertoire rejow.

Pjatk trenowachu hišće hač do pózdnjeho wječora, doniž sprócni do łoža njepadnychu. Nazajtra, po rańšim joggingu w šesćich a po słódnej snědani započachu nowu treningowu jednotku z porjadnym sćoplenjom a wukmanichu so na to mjez druhim w rejach, kaž su to „Cypowa“, „Burska“, „Dumpańca“ a „Mazurka“. Po napinacym probowym dnju dachu sobotny wječor w bowlingowej hali wuklinčeć. Posledni dźeń zahajichu z rańšej nutrnosću, po kotrejž su hišće raz wšitke nazwučowane reje wospjetowali.

Powučny pućowanski dźeń

Mittwoch, 04. April 2018 geschrieben von:

Dwaj dnjej do jutrownych prózdnin mějachu wuknjacy Kulowskeje Krabatoweje zakładneje šule pućowanski dźeń. Holcy a hólcy 2. lětnika wulećachu sej k Domanicom do Hózka. Tam jich Michał Domanja wutrobnje witaše. We wěcnej wučbje běchu woni hižo wjele wo strowych žiwidłach a regionalnych wudźěłkach zhonili. Nětko móžachu na městnje dožiwić, kak w tajkim zawodźe produkuja. Šulerjo zhonichu, kak Domanicy kórki plahuja, a wuhladachu hižo małe we wulkich plahowanskich stanach. Čas so spěšnje miny. K snědani móžachu tež hižo čerstwe kórki woptać. Michał Domanja předstaji jim dalši sad a zeleninu, kotrejž tu abo w regionje plahuja. Na kóncu móžachu sej dźěći w dworowym wobchodźe něšto kupić.

Wotewru historisku dokumentaciju

Freitag, 23. März 2018 geschrieben von:

Spěchowanske towarstwo HELO wote­wrje jutře, sobotu, w 11 hodź., w Hornjej Hórce historisku „Dróhu spomnjeća“ z třinaće wulkimi taflemi, kotrež dokumentuja wuwiće ratarskeho mašinotwara w Hornjej Hórce. „Dróhu spomnjeća“ natwarichu na zelenej łuce, blisko fabrikskeho twarjenja něhdyšeho papjernika, dźensnišeje firmy Gratotwar Raussendorf.

Woswjećimy 130 lět twara ratarskich mašinow w Dźěžnikecach a dźesaćlětne wobstaće spěchowanskeho towarstwa HELO. Wjesnjenjo Hornjeje Hórki a ně­hdyši sobudźěłaćerjo fabriki móža z wulkim dźakom na zdokonjane dźesaćlětne dźěło spěchowanskeho towarstwa a na „Dróhu spomnjeća“ zhladować. Gratulujemy tuž k 130 lětam wuwiwanja a produkowanja ratarskich mašinow w Hornjej Hórce a Dźěžnikecach.

Anzeige