Na krasnej swjatkownej soboće swjećachu tež w Hórkach mejemjetanje. Po tym zo bě meja padnyła, dwanaće porow dźěći a młodostnych srjedź wsy zarejwa. ­Pola dźěći běše John Jödicke najspěšniši běhar a wuzwoli sej Claru Bětnarjec jako swoju kralownu. Pola młodostnych bu­štaj Jan Zarjeńk a Ida Harttrumpfec mejski porik. Wšitke holcy běchu sej serbsku ­narodnu drastu woblekli. Po mejskich rejach předstajichu wjesne dźěći wopytowarjam pisany nalětni program. Wječor zahudźichu z Hórkow pochadźacaj Cyžec bratraj Dawid a Krystof kaž tež Tomaš Hejduška a Clemens Mark serbske a němske pěsnje. Při tym knježeše mjez wjesnjanami w stanje při wohnjowej ­woborje krasna nahlada. Mejemjetanje je wjesne towarstwo „Při skale“ zhromadnje z Hórčanskim młodźinskim klubom organizowało.

Na slědach wupućowarjow

Dienstag, 23. Mai 2023 geschrieben von:

„W lěće 2015 rozsudźi so skupina Serbowkow a Serbow, sej do texaskeho Serbina dolećeć a so tam na swjedźenju potomnikow serbskich wupućowarjow před někak 150 lětami wobdźělić“, praji Marko Suchy, bywši direktor Załožby za serbski lud njedawno při swojim přednošku ze swětłowobrazami před seniorami Budyskeje katolskeje tachantskeje wosady. A dale wón wuwjedźe, zo pak zwostachu po spočatnej euforiskej naledźe jenož štyrjo, kotřiž so z lětadłom najprjedy do New Yorka podachu a potom z awtom kontinent wot wuchoda do zapada hač do Serbina přeprěčichu: Suchec mandźelskaj z Budyšina kaž tež Marko Kowar ze swojej mandźelskej z Miłoćic.

„Nětko swjatočniše dyžli prjedy“

Mittwoch, 26. April 2023 geschrieben von:

Krok po kroku so serbskim senioram Katol­skeje tachantskeje wosady w Budyšinje radźi, po přestawce pandemije dla swoje měsačne zetkanja stajnje třeću wutoru měsaca wožiwić. Tak běchu hišće zbywacy starši, ale zdobom bohudźak tež trochu młódši zajimcy njedawno po rańšich kemšach do domu Carity pře­pro­šeni. Tam poskićichu po zwučenym wašnju přednošk. Běše dźě so na zběranju nowych idejow Jurij Žur z Hrubjelčic spontanje zwólniwy wuprajił, jako na nazhonjenja bohaty křižer rozprawjeć. To wobkrući so nětko w jutrownym času jako dosć zajimawa tema.

Kelkož plincow, telko słónca

Mittwoch, 29. März 2023 geschrieben von:

Njedawno bě w internaće Serbskeho gymnazija ruski wječor „Maslenica“. Tradicionalny ruski swjedźenski tydźeń předstaji nam asistentka za cuze rěče na gymnaziju Anastasia Artemova. „Maslenica“ pochadźa wot ruskeho słowa maslo, štož přełožene butra rěka. Jedna so potajkim wo butrowy tydźeń. Swjedźeń wotměwa so kóžde lěto kónc zymy. Wažnu rólu hraja na wšěch dnjach plincy, ­kotrež symbolizuja słónco. Při tym je wažne, wjele złoćanych plincow napjec a zjěsć. Kelkož plincow, telko słónčnych dnjow přichodne lěto změješ.

Pěsnje a rejki nazwučowali

Dienstag, 07. März 2023 geschrieben von:

Dalekubłanje z nowymi serbskimi dźěćacymi spěwami za Witaj-dźěći je Rěčny centrum WITAJ minjeny štwórtk w bróžni Domowinskeho domu we Wojerecach za kubłarki a wučerki přewjedł. Prěni raz wuzwolichu sej tutu rumnosć, a běchu jara zahorjeni wo móžnosćach wužiwanja nowych meblow a wuběrnych wobstejnosćow. Přeprosychu sej wučerki delnjeho schodźenka, kotrež wuwučuja serbšćinu na šulach we Wojerecach, Nowej Wsy, Łazu a zdobom WITAJ-kubłarki z wjacorych dźěćacych kubłanišćow. Samo z Drježdźan bě kubłarka přichwatała.

Referentka Leńka Thomasowa, wjelelětna wučerka za hudźbu na Serbskej fachowej šuli za socialnu pedagogiku w Budyšinje, njenazwučowaše z nimi jenož wosom nowych abo znowa namakanych spěwow za pěstowarsku a zakładnošulsku starobu, ale podawaše tež wšelake metodiske pokiwy, kak so spěwčki a rejki we wučbje wariabelnje zasadźeć hodźa.

Weronika Butendeichowa

Dožiwjenja z Bookiijemi a hlinu

Mittwoch, 22. Februar 2023 geschrieben von:

Na rjanym prózdninskim dnju smój sej přeprosyłoj publikum, zo bychmoj rěčnu zaběru zwjazałoj ze wšelakimi instrumentami. Tak wužiwachu wobdźělnicy na přikład znate Bookii-pisaki, zo bychu sej derje wudźěłany material za serbšćinarjow wotkryli. Ale tež přewažnje pasiwnym serbšćinarjam w regionje wokoło Malešec skićeše poskitk inspiraciju, so z wjeselom a na hrajkace wašnje hłubšo ze serbšćinu zaběrać. Nimo Bookii pisakow a knižkow, kotrež słužachu wobdźělnikam wosebje jako srědk k lěpšemu zrozumjenju a wožiwjenju serbšćiny, smój tež tworjenje z hlinu poskićiłoj. Tak mějachu wšitcy móžnosć, to runje nawuknjene ze swojimaj rukomaj sami zwobraznić.

W duchu po swěće po puću byli

Dienstag, 21. Februar 2023 geschrieben von:

Nic jenož minjenu sobotu na dźěćacych póstnicach a samsny dźeń na kapičkowym wječoru knježeše w Njebjelčanskej „Bjesadźe“ dobra nalada, ale tež wječor do toho. Tam su so nory na žonjace póstnicy zetkali. Kaž je hižo někotre lěta z wašnjom, mějachu žony Serbskopazličanskeho karnewaloweho towarstwa program spřihotowany.

Lětsa běchu po puću z lětadłom „WCV airline“ a hesło rěkaše „We wosom mjeńšinach wokoło swěta“. Po zaćahu žonow z jich kóframi kapitan-pilot na lóštne wašnje wěstotne naprawy rozjasni. Jako prěnje poda so lětadło na čorny kontinent. K afriskim rytmam hibachu so žony na cebry předrasćene. Dale wjedźeše jězba do Ruskeje, hdźež zarejwachu matrjoški. Na južnym čopje wuhladachu přihladowarjo lodoweho bara a pinguina. W Mexiku wustupi hudźbna skupina z wulkimi sombrerami a pončowami. Skónčnje zarejwachu tež hišće indiske rjanolinki w swojich frinkolacych šatach a kanadiscy cowboyjojo. Přizemjenje doma we Łužicy bě potom finale, w kotrymž sej „šewca“ zarejwachu.

Palaca tema Koslowčanow dale trapi

Mittwoch, 15. Februar 2023 geschrieben von:

Wjesnjanosta gmejny Njeswačidło Gerd Schuster (CDU) je Koslowčanow tele dny na zjawnu zhromadźiznu pře­prosył, zo by jich wo aktualnym połoženju kołowokoło Koslowskich hatow informował. Přeprošeni běchu tež Jan ­Jeschke, nawoda zarjada za wobswět a lěsnistwo w krajnoradnym zarjedźe ­Budyskeho wokrjesa, Angelika Schröter z jednaćelstwa Přirodowědneje stacije Njeswačidło z.t. a Tobias Mehnert, předsyda towarstwa Zelena liga Sakskeje z.t.

Jurij Lebza je zawodnje krótki zarys stawiznow wo nastaću Koslowskich hatow a jich wobhospodarjenju hač do dźensnišeho podał. To bě wosebje tež za mnohe młode swójby, kotrež su minjene lěta do Koslowa přićahnyli, jara infor­matiwne. Zhonichu trěbne informacije k škitej přirody, štož je w nich zahoritosć za to zbudźiło.

Z jasnym planom do noweho lěta

Dienstag, 14. Februar 2023 geschrieben von:

Čłonojo Domowinskeje skupiny Pančicy-Kukow zetkachu so minjeny štwórtk na žurli wikarije we wsy k swojej hłownej zhromadźiznje. Na njej wuhódnoćichu lońšu dźěławosć a dorěčachu sej lětuše aktiwity.

Tak předsyda skupiny Pětr Korjeńk zwěsći, zo su wužadanja kaž pandemija spočatk lěta a pobrachowace rumnosće za zetkawanja w Pančicach-Kukowje skutkowanje Domowinjanow wobwliwowali. Při wšěm móžeše w swojej rozprawje na rjad rjanych dožiwjenjow zhladować. K tutym słušachu wopyt inscenacije „Šěrcec Hanka“ w NSLDź, kolesowanski wulět do wustajeńcy serbskich drastow Móniki Cyžoweje w Nowej Jaseńcy, ­spěwny wječork ze skupinu „Wólbernosće“ w Kukowje, swjedźeń za swójby na Kukowskim hrodźišću, wulět do srjedźneje Łužicy a adwentnička, kotruž ­wobrubi šulski chór „Šule Ćišinskeho“. Kruće w protyčce zapisanej stej kóžde ­lěto rjedźenskej akciji při pomniku ­Jakuba Barta-Ćišinskeho w Lipju.

„Wutrobička směj so“

Mittwoch, 08. Februar 2023 geschrieben von:

Minjenu njedźelu popołdnju zetkachu so na sto ludźi na Krawčikec žurli w Chrósćicach, zo bychu sej komediju lajskeje dźiwadłoweje skupiny Konjecy-Šunow wobhladali. „Mužojo nimaja so lochko“ rěkaše lóštna inscenacija, kotruž je dźesać lajskich hrajerjow z telko lóštom a temperamentom přihladowarjam zahrało. Hižo tema „Bur pyta žonu“ a telko rjanych a sprawnych žorćikow wuwabichu wulke wjeselo, a tak knježeštej na žurli jara dobra nalada a stajne smjeće.

W tutym kołwrótnym času, hdźež najlěpje medije nječitaš abo njehladaš, bě to rjana a tež wažna wotměna, so jónu zaso tak prawje smjeć. Za to wupraju w mjenje zawěsće wšěch w publikumje zapłać Bóh za poradźene předstajenje. Sće wulkotnje hrali!

A za tych, kotřiž dyrbjachu přepjelnjeneje žurle dla bohužel domoj hić: Maće hišće móžnosć, sej wjesołu komediju dwójce wobhladać, a to 26. februara w Haslowje abo njedźelu, 5. měrca, w Kubicec hosćencu w Lejnje – stajnje w 16 hodź.

Hrajerjam přeju dale tajki elan a dobry publikum. Weronika Bulankowa

Serbska debata

Neuheiten LND