FSV Budissa Budyšin – Kamjeničanski FC 0:1 (0:0)
Zestawa domjacych: Ebersbach – Mack, Patka, Hoßmang, Kral (85. Krawčik), Weiß, Ciapa, Treu (85. Merkel), Schmidt, Schlicht, Bönisch (75. Langr)
Młynkec łuka bě přećiwo Kamjeničanskemu FC, načolnikej regionalneje ligi sewjerowuchod, derje pjelnjena. Na papjerje běše duel za hosći poprawom hižo rozsudźeny, Budissa pak faworitej wjele ruma za hraće njedowoli. Wot wšeho započatka widźachu 1 782 přihladowarjow woporniwje wojowacych a hrajacych Budyšanow. Hižo zahe měješe Jonas Mack za hosćićela prěnju móžnosć. Bul pak dźěše snadnje wyše wrotow něhdyšeho wrotarja Budissy Jakuba Jakubova (2.). Dalšu móžnosć měješe Tony Schmidt, třělwa pak bu k róžkej, kiž ničo njewunjese, wotfalšowana (4.). Na tamnym boku buchu akcije hóstnych nadběhowarjow wot Budyskich škitarjow sčasom zakónčene. Třělwu Ioannisa Karsanidisa wrotar Budissy Maik Ebersbach popadny (18.). Kamjenica měješe jenož mało składnosćow wrota třělić, Budyšin pak wulku, jako Mateusz Ciapa jenož łatu trjechi (32.). Z jasnym plusom za Budissu a 0:0 podaštej so cyłkaj do přestawki.