Stafloweho dobyćerja porazyli

Montag, 17. Juni 2019
Artikel bewerten
(0 Stimmen)

Rakečanske ST – Sokoł Ralbicy/Hórki 0:2 (0:1)

Zestawa hosći: Schöne – K. Matka (46. M. Matka), Schultz, Šewc (72. M. Kurjat), Budar, Gloxyn, Šołta, Korjeńk, Bejmak, Rawš, Kurjat (60. Domaška)

Rakečanscy koparjo přećiwo Sokołej Ralbicy/Hórki – to bě minjene lěta stajnje horcy duel z přeco rozdźělnym wukóncom. W Ralbicach dobychu Rakečenjo w adwentnym času 4:1, nětko so Sokoljo pola suwereneho stafloweho dobyćerja rewanšowachu. Z wulkim sebjewědomjom minjenych partijow (stajnje 3:0 přećiwo Porchowej a Póstej Germaniji Budyšin) dźěchu woni do hry. Hrajersce drje běchu Rakečenjo přez cyły čas trochu lěpši, bojownisce pak mějachu hosćo nós prědku. W prěnich dźesać mjeńšinach so ničo naspomnjenjahódneho njesta. Z ničeho pak jewjachu so Ralbičenjo prěni raz před wrotami Rakečanow. Denny Gloxyn flankowaše róžk na Tomaša Rawša. Jeho prěni pospyt wrotar dźeržeše, druhi raz zhłójčkowa Rawš bul na łatu a třeći raz ležeše kulowata koža za wro­towej liniju (13.). Snadny předskok Ralbičenjo hač do přestawki zakitowachu, ale mějachu hdys a hdys tež zbožo. Krótki wotkop swojeho wrotarja drje Stanij Šewc přiwza, zhubi pak bul hnydom přećiwo Bosćijej Bejmje. Ralbičan w trikoće Rakečanow połoži kulowatu kožu prěki do šěsnatki, tam pak nichtó njebě, kiž móhł ju do saka sunyć. Tež dalše dobre składnosće domjacych dźěchu na łatu, nimo wrotow abo Willi Schöne je wuběrnje wotwobara. Sokoljo zady rigoroznje zakitowachu – tež z tej abo tamnej žołtej kartu – a so na kontery nastajichu. Tajki woni w poslednjej mjeńšinje za 2:0 wu­žichu. Křesćan Bejmak hrabny sej bul a smo­kny jón z 20 metrow do hornjeho třiróžka. Krasne to wrota Pěskečana.

Přichodnu njedźelu přijědźe k Sokołam druhi tabulki, team z Kulowa, na poslednju a zawěsće dalšu zajimawu dypkowu hru sezony 2018/19. Jurij Bjeńš

Veröffentlicht in Sport
Bitte anmelden, um einen Kommentar zu posten

Anzeige