Njeswačidło. Rěčna motiwatorka Raphaela Wićazowa a projektna sobudźěłaćerka Njeswačanskeje přirodoškitneje stacije Madlena Mičkec přeprošujetej zajimowanych na přirodźe a serbšćinje na dwurěčne pućowanje podłu hatow wokoło Njeswačidła. Wone wotměje so pjatk, 26. apryla, w 16 hodź. Zajimcy zetkaja so při přirodoškitnej staciji w parku. Přizjewić měli so woni hač do 25. apryla pod telefonowym čisłom 039935 169 970 abo pod . Při pućowanju po přirodźe zeznaja wobdźělnicy domjace rostliny a zwěrjata kaž tež jich serbske pomjenowanje. Puć je něhdźe šěsć kilometrow dołhi. Krute črije su trěbne. Wuklinčeć dać chcedźa pućowanje w Njeswačanskim „Knježim hosćencu“. Wobdźělenje płaći na wosobu dwaj euraj.
Přeprošuja na forum
Slepo. Na wobydlerski forum přeprošujetej Slepjanska gmejna a zjednoćenstwo inwestorow Romus Energie & Innovation jutře, srjedu, w 15 hodź. do Slepjanskeho Serbskeho kulturneho centruma. Tam změja zajimcy składnosć so wo planowanych předewzaćach nastupajo energijowe drustwo wobhonić a swoje prašenja wotbyć.
Budyšin. Staroměšćanske towarstwo Budyšina přeprošuje jutře, wutoru, w 19 hodź. na přednošk Jurja Łušćanskeho wo žiwjenju a skutkowanju serbskeho molerja Jurja Hajny (1877–1952) do měšćanskeje biblioteki na Budyskej Hrodowej. Jurij Hajna słušeše 1923 k załožerjam Zjednoćenstwa serbskich wuměłcow a je po zakazu tež při znowazałoženju towarstwa 1948 přitomny był. Hajna běše pilny moler-wuměłc, kiž wšitke wuměłske pola molerstwa wobknježeše. Mištersku zdokonjanosć naby sej z mólbami krajinow Łužicy a Italskeje, hdźež wjacore lěta přebywaše a sej mandźelsku namaka. Znate su mnohe jeho zwobraznjenja wosobinow, mjez druhim Miny Witkojc a dekana Jakuba Skale.
Seniorojo škotuja
Njeswačidło. Přichodny škotowy turněr serbskich seniorow wotměje so jutře, wutoru, w Njeswačanskim Knježim hosćencu. Započatk budźe w 14 hodź. Kaž organizator Měrćin Nowak zdźěli, su nowačkojo rady witani. Dalši turněr přewjedu 28. meje w Kozarčanskim hosćencu.
Budyšin. Z akciskim dnjom pod hesłom „Pišćele wotewrjene“ chcedźa jutře, sobotu, zajimcam pišćele bliže předstajić a jich za nje zahorić. Mjez druhim budu pišćele Budyskeje tachantskeje cyrkwje wot 14 do 17 hodź. přistupne. Dalše instrumenty móžeš w Šěrachowje, Žitawje a Wostrowcu dožiwić.
Wo powołanjach so wobhonić
Kamjenc. Powołanske wiki wotměja so jutře, sobotu, w Kamjenskej wyšej šuli „Při Halštrowskej łuce“. Wot 10 do 15 hodź. móža šulerki a šulerjo firmy a jich wukubłarjow zeznać, so wo powołanjach informować a tón abo tamny grat wuspytać. Wjace hač sto wustajerjow je so za zarjadowanje přizjewiło. Tež zajimowani fachowcy móža so na powołanskich wikach wo swobodnych dźěłowych městnach wobhonić.
Sól a žałby zhotowić
Njebjelčicy. Zjawny diskusijny wječor z generalnym sekretarom Sakskeje CDU Alexanderom Dierksom wotmě so póndźelu w Njebjelčicach. Něhdźe 40 wosobow ze serbskich gmejnow a Kamjenca přichwata na faru, zo by hromadźe diskutowało a politikarjam namjety do přichoda dało. Tak rozmyslowachu wo podpěrach za gmejny a wuměnjachu so k temje kubłanje w pěstowarnjach. Dalši dypk bě tež pomjeńšenje běrokratije.
Ze zapósłanču porěčeć
Budyšin. Zapósłanča zwjazkoweho sejma Kathrin Michel (SPD) přeprošuje jutře, pjatk, wot 11 do 14 hodź. we wobłuku temoweho tydźenja frakcije SPD zwjazkoweho sejma na wotewrjenu wobydlersku rěčnu hodźinu na Budyskim Hłownym torhošću. Rěčne hodźiny, kotrež so hewak we wólbnym běrowje wotměwaja, přećahnu na wiki, zo bychu puće k ludźom w jich připołdnišej přestawce krótke byli. W přitulnej atmosferje móža zajimcy bjez přizjewjenja z Kathrin Michel do rozmołwy přińć.
Worklecy. Přichodne posedźenje Worklečanskeje gmejnskeje rady wotměje so jutře, štwórtk, we 18.30 hodź. we wyšej šuli. Mjez druhim zaběraja so radźićeljo z twarskim planom za Přemysłowy park při jězoru, kotryž ma so na Smječkečanske ležownosće rozšěrić. Nimo toho porěča wo koncepće kolesowanskich a pućowanskich šćežkow Hornjołužiskeje hole a hatow.
Njebjelčicy. Tohorunja jutře, ale w 19 hodź. zetka so Njebjelčanska gmejnska rada w sydarni w gmejnskim zarjadnistwje. Tež na jeje dnjowym porjedźe steji Přemysłowy park při jězoru. Tu pak jedna so wo Serbskopazličanske ležownosće.
Pančicy-Kukow. A skónčnje wuradźuje jutře tež gmejnska rada Pančic-Kukowa, a to w 19 hodź. w Lejnjanskim hosćencu. Mjez druhim póńdźe we wobłuku twarskich naležnosćow wo podlěšenje twarskeje dowolnosće za přetwar bywšeje starownje w Swinjarni na spěchowansku šulu klóštra Marijineje hwězdy. Dowolnosć pochadźa z nowembra 2020.
Wokrjesnu dróhu ponowja
Wojerecy. Analyza aktualneho połoženja demokratiji napřećiwnych prudow a jich wuskutkow na towaršnosć w Budyskim wokrjesu je wobsah rozmołwy jutře, srjedu, wot 18 do 20.15 hodź. w Krabatowej pincy na Wojerowskim hrodźe. Christian Schäfer ze syće tvBUNT pokaza wideja a rozłoži pokazki na tute zjawy. Akterojo starosća so wo rosćacy wliw prawicarsko-ekstremistiskich myslow a jednanjow w towaršnosći kaž tež wo stupacej ličbje demonstracijow neonacijow a namocy w regionje. Wobmjezowaneje ličby městnow dla měli so zajimcy pola Ludoweje uniwersity Wojerecy, kotraž rozmołwu zarjaduje, pod 03571 20937200 abo e-mejlnje pod přizjewić.
Nazwučuja słowjanske reje
Bukecy. Rejowanska dźěłarnička z choreografom Georgijom Marinovom wotměje so štwórtk, 18. apryla, we 18.30 hodź. na wosadnej žurli ewangelskeje wosady při cyrkwi w Bukecach. Tam nazwučuja a rejuja so słowjanske ludowe reje. Zastup je darmotny. Zajimcy su wutrobnje witani.
Pančicy-Kukow. Domowinska skupina Pančicy-Kukow přeprošuje swojich čłonow a wšitkich dalšich zajimcow na přichodne zarjadowanje srjedu, 17. aprila, w 19 hodź. do awle Šule Ćišinskeho. Tam přednošuje Sulšečanski krosnowar Achim Mič wo swojich dožiwjenjach w Indoneziskej. Wšitcy su wutrobnje witani.
Wotnožku banki přetwarja
Kulow. Wot 19. apryla budźe wotnožka Ludoweje banki w Kulowje twarnišćo. Hač do kónca meje chcedźa rumnosće tak přetwarić, zo móža w nich wobydlerjow lěpje poradźować. Z tutej inwesticiju chcedźa městnosć Ludoweje banki w Kulowje do přichoda zaručić. Tež samoposłužowanska technika so za čas twarskich dźěłow wužiwać móc njebudźe. Wobydlerjo móža so w mjenowanym času we wotnožce na Wojerowskej Friedrichowej čo. 2 poradźować dać a tam swoje pjenježne naležnosće wobstarać.
Njebjelčicy. Aktualne wuwića a wužadanja na komunalnej runinje steja w srjedźišću zjawneho diskusijneho wječora póndźelu, 15. apryla, w 19.30 hodź. w Njebjelčanskej „Bjesadźe“. Na njón přeprošujetaj kandidatka CDU za wólby Sakskeho krajneho sejma Elaine Jenčec a zapósłanc krajneho sejma Alojs Mikławšk (CDU). Z hosćom budźe generalny sekretar sakskeje CDU Alexander Dierks. Wšitcy třo kaž tež dalši mandatni nošerjo chcedźa so ze zajimowanymi wobydlerjemi wuměnjeć a ideje wuwiwać, kak hodźa so wuhibki za spušćomne a do přichoda sahace wuwiće Sakskeje a wjesnych kónčin stajeć.
Nalětni kolokwij
Stróža. Fachowe zarjadowanje wo kibuće (Kiebitz), ptačku lěta 2024, wotměje so jutře, sobotu, wot 9.30 hač do 16.30 hodź. w Stróžanskim Domje tysac hatow. Dokelž njeje hižo dosć wulkich njewobtwarjenych płoninow, je kibut w Sakskej wot wotemrěća wohroženy. Tohodla su intensiwne prócowanja trěbne dalšemu pohubjeńšenju połoženja zadźěwać. Zarjadowanje měri so na nazhonitych ornitologow runje tak kaž na lajkow a zajimowanu zjawnosć. Wobdźělenje je darmotne.
Sportowy dom sej wobhladać
Pančicy-Kukow. W sydarni zarjadniskeho zwjazka Při Klóšterskej wodźe wotměje so jutře, štwórtk, w 17 hodź. zjawne posedźenje gmejnskeho wólbneho wuběrka. Wón rozsudźi wo přizwolenju wólbnych namjetow za komunalne wólby 9. junija. Zajimcy su wutrobnje witani.
Bal narodneje drasty
Ćisk. Serbska rejwanska skupina Ćisk přeprošuje na 9. bal narodneje drasty sobotu, 13. apryla, w 19 hodź. na žurlu Ćišćanskeho hosćenca „Zeleny wěnc“. Witani su wšitcy, kiž maja wjeselo a radosć při rejwanju a dujerskej hudźbje – hač w narodnej drasće abo nic. Wo dobru naladu a hudźbu stara so dujerska kapała z Wjelceja. Zastup płaći 7,50 eurow. Zajimcy njech přizjewja so pod telefonowym čisłom 0172 2017468.
W lěsu so informować
Budyšin. Kniha Sabiny Bauer-Helpert „Johann Zautes Lebensfahrt“ steji w srjedźišću přichodneho zarjadowanja w Budyskej Smolerjec kniharni štwórtk, 11. apryla, w 19 hodź. Kniha je biografiski roman wo wosudźe hornjołužiskeho ewangelskeho Serba w 19. lětstotku. Z dokładnej rešeršu wo wšědnym dnju, kulturje a stawiznach rysuja so tež lokalne a regionalne podawki z časa sakskeho kralestwa.
Předstaja projekt při skale
Njebjelčicy. Přichodne posedźenje Njebjelčanskeje gmejnskeje rady wotměje so štwórtk, 11. apryla, w 19 hodź. w sydarni gmejny. Na dnjowym porjedźe steji mjez druhim nowotwar towarstwoweho domu při Miłočanskej skale. Towarstwo Kamjenjak projekt předstaji. Dale chcedźa komunalne wobswětlenske připrawy do rukow SachsenEnergie přepodać.