Kulow. Dekoraciju z hliny zhotowić a připódla so w serbšćinje wukmanić móža zajimcy jutře, štwórtk, w Kulowskim Jakubecowym wustawje. Wot 15 do 16.30 hodź. su tam wopytowarjo na serbske kreatiwne popołdnjo z Mariju Šołćic přeprošeni. Je to zhromadne zarjadowanje Domowiny z towarstwom Zhromadnje za Kulow. Wobdźělenje na wosobu płaći štyri eurow.
Z wyšim měšćanostu rěčeć
Wojerecy. Slěd zarjadowanjow „Prašej so wyšeho měšćanostu“ město Wojerecy a tamniša měšćanska biblioteka Brigitty Reimann zajutřišim, pjatk, pokročujetej. Wot 18 do 19.30 hodź. móža wobydlerjo swoje naležnosće přednjesć a so z Torstenom Rubanom-Zehom (SPD) rozmołwjeć. Wobdźělenje je darmotne, přizjewjenje trěbne njeje. Zarjadowanje wotměje so w rumnosćach měšćanskeje biblioteki.
Budyšin. Za lětuši Girls’Day w zwjazkowym sejmje pyta zapósłanča SPD w zwjazkowym sejmje Kathrin Michel hišće zajimowane šulerki w starobje mjez 15 a 19 lětami. Šulerjo změja składnosć, 26. a 27. apryla zwjazkowy sejm zeznać, w kanclerskim zarjedźe snědać a politiske rozsudy wosobinsce dožiwić. Přizjewjenja přijimuja hač do 20. měrca.
Serbsko-němska namša
Wjerbno. Přichodna serbsko-němska namša wotměje so zajutřišim, njedźelu w 10 hodź we Wjerbnjanskej cyrkwi.
Budyšin. Hnydom dwě zarjadowani wočakujetej jutře wječor, 17. měrca, wopytowarjow Budyskeje měšćanskeje biblioteki. We wobłuku nocy bibliotekow, kotraž so po cyłej Němskej přewjedźe, čita Wienski awtor Kaśka Bryla w 19.30 hodź. ze swojeje knihi „Die Eistaucher“. Slěduje předstajenje filma „Straight Outta Crostwitz“. Wobě zarjadowani budźetej we hłownej wotnožce biblioteki na Hrodowe čo. 2. Zastup je darmotny.
DADA-centrum přeprošuje
Kamjenc. Jutře, 17. měrca, wotewru nowe kreatiwne wuměłstwowe srjedźišćo w Kamjencu. „DADA-centrum“ přeprošuje w 19 hodź. na prěnje zarjadowanje do stareje póšty na Zwingerowej čo. 20. Nimo swjedźenskich přednoškow a wernisaže prěnjeje wustajeńcy DADA z twórbami sakskich wuměłcow Franka Voigta, Petry Lorenz a Volker Lenheit, budu wjacori hudźbnicy a performance-wuměłcy wustajene twórby hudźbnje wobrubić.
Na serbske burske blido
Budyšin. Pod hesłom „Bjez hranicow“ swjeći Budyska měšćanska biblioteka pjatk, 17. měrca, swoju „Dołhu nóc bibliotekow“ a přeprošuje do hłowneje biblioteki, na hrodowej čo. 12. Zazběh je w 19.30 hodź. Kaśka Bryla čita ze swojeho romana „Die Eistaucher“. W 21 hodź. pokazuja film „Straight Outta Crostwitz“, wo młodej Serbowce Hance a jeje nutřkownym konflikće jako młoda Serbowka. Zastup je darmotny. Měšćanska biblioteka prosy wo telefoniske přizjewjenje: 03591 534827. Dalše informacije namakaće pod: .
Kemše za rjemjeslnikow
Slepo. Pod hesłom „Wjele rukow, spěšny kónc!“ přeproša ewangelske wosady Běłowodźanskeho regiona wšitkich rjemjeslnikow a přemysłownikow na zhromadne kemše přichodnu njedźelu w 9.30 hodź. do ewangelskeje cyrkwje w Slepom.
Budyšin. Serbski ludowy ansambl informuje: Zajimcy móža so hišće hač do pjatka, 17. měrca, za dźěłarničku tradicionalneje serbskeje hudźby „LAB F“ přizjewić (hlej ). Zdobom připowědźi SLA, zo wotmějetej so w tym zwisku sobotu, 25. měrca, rejowanski wječor ze skupinu Serbska reja a njedźelu, 26. měrca, zakónčacy koncert z wobdźělnikami dźěłarnički.
Maćica Serbska přeprošuje
Budyšin. Sobotu, 18. měrca 2023, wotměje so wot 14 hodź. w Budyskim Serbskim muzeju hłowna zhromadźizna Maćicy Serbskeje. Zahajić budźe so tuta z přednoškomaj. Dr. Leńka Šołćić porěči wo róli wobchadneje rěče w modernym swěće Serbow a Trudla Malinkowa předstaji prócowanja Maćicy wo serbske pomniki. Po přestawce wobjednawaja so towarstwowe naležnosće.
Nócne modlenje
Chrósćicy. Hłowna zhromadźizna Chróšćan wjesneho towarstwa „Domizna“ je so sobotu w rumnosćach „Jednoty“ wotměła. Lětsa wopominaja 20lětny jubilej towarstwa, tohodla běchu tež mandźelscy čłonow k wječeri přeprošeni. Na zhromadźiznje su dźěłowy plan rozjimali, mjez nimi aktiwity za swójby a dźěći. Dale su so z podpěru mjezynarodneho folklorneho festiwala Łužica zaběrali.
Filmowy a diskusijny wječor
Budyšin. Budyski Kamjentny dom a Medijowa syć Łužica přeprošujetej jutře w 17 hodź. na filmowy a rozmołwny wječor w młodźinskim klubje „Kurti“ na Kurta Pchalekowej 20 w Budyšinje. Přednošuje Daniel Lehmann (CODE uniwersita Berlin) k temje „Socialne medije w konteksće protestnych hibanjow“. Naslědnu rozmołwu moderěruje Clemens Kiessling. W 19 hodź. so dokumentarny film „Rise Up“ režisera Marca Heiniga předstaji.
Budyšin. K zazběhej lětušeje literarneje kofejownje w Budyskim ekumeniskim wobchodźe čita dźensa wječor, 10. měrca we 18.30 hodź. Elke Lorencowa ze swojeho romana „Machtworte“.
Na 12. schadźowanku swójbow
Radwor. Rěčny centrum WITAJ a Budyska župa „Jan Arnošt Smoler“ přeprošujetej na schadźowanku za swójby njedźelu, 12. měrca, w 15 hodź. do Radworskeje „Slawije“. Pisany program zahaja mali rejwarjo „Łužičanki“ a hudźbnicy skupiny „RadworBrass“. Přizamknu so dźěłarnički a zaběry za najmłódšich, na přikład paslenje, sport a čitanski róžk. Za trochu staršich su eksperimenty, šach, nowe medije a prezentaciju policije přihotowali. Dale předstajitej so Serbski rozhłós a Ludowe nakładnistwo Domowina z najnowšimi poskitkami za dźěći. Starši maja składnosć, so z fachowcami wo rěčnych kursach a rěčnym kubłanju rozmołwjeć abo při kofeju a tykancu bjesadować.
Zběraja zaso wotpadki
Budyšink. Ze swjedźenskim zarjadowanjom zahaji so sobotu, 11. měrca, w 16 hodź. lěto Hadama Bohuchwała Šěracha w cyrkwi w Budyšinku. Mjez druhim budźe Jan Malink na H. B. Šěracha jako serbskeho fararja spominać. Günter Sodan přednošuje wo Šěrachowym skutkowanju jako sławny pčołar. Zarjadowanje wobrubi sopranistka Romy Petrick ze spěwom. Günter Sodan ma w zwisku z jubilejnym lětom Šeracha wjacore zarjadowanja lětsa a klětu planowane. Přichodne budźe hižo 2. apryla, hdyž wotkryja wopomnjensku taflu při cyrkwi w Budyšinku. H. B. Šěrach bě so 1724 w Nosaćicach narodźił a 1773 w Budyšinku zemrěł.
Do dźiwadła a k wječeri
Haslow. Lajska dźiwadłowa skupina Šunow-Konjecy předstaji swoju komediju „Mužojo nimaja so lochko“ sobotu, 18. měrca, w 17 hodź. a njedźelu, 19. měrca w 16 hodź. w Bizoldec hosćencu w Haslowje. Tuž změja wšitcy móžnosć sej komediju wobhladać, kiž ju hišće widźeli njejsu abo chcedźa sej ju hišće raz wobhladać. Sobotu, 18. měrca, poskića Bizoldecy po předstajenju słódnu wječer. Skazanki přijimuja pod telefonowym čisłom 035937 83204.
Jutrowne poskitki w SKI
Róžant. Za čas přihotow na jutry přeproša kantor Róžeńčanskeho křižerskeho procesiona Janek Wowčer wobydlerki a wobydlerjow Róžanta, kaž tež wšitkich zajimcow z wokoliny, sobotu, 11. měrca, w 19 hodź. na přednoškowy wječor do towarstwoweje rumnosće w Róžeńće. Tam porěči sedłar Marek Buk wo hladanju křižerskich gratow, konjacy sportowc Křesćan Zahrodnik wěnuje so wobchadźenju z konjemi a Janek Wowčer přednošuje wo „Krejnym jěchanju“ (Blutritt) we Weingartenje. Organizatorojo wjesela so na bohaty wopyt. Wo napoje je postarane.
Premjera přiručki wo mjenach
Budyšin. Smolerjec kniharnja přeproša štwórtk, 9. měrca, na premjeru w Ludowym nakładnistwje Domowina wušłeje přiručki „Wörterbuch der slawischen Personennamen in Ortsnamen zwischen Saale und Bober/Queis“. W njej zjima Inge Bily staw slědźenja wo słowjanskich pomjenowanjach, z čimž twori žórło za dalše přepytowanja. Čitanje z awtorku započnje so w 19 hodź.
Jejka debić wuknyć