Dóstanu spěchowanje

Dienstag, 16. April 2019 geschrieben von:

Łaz (AK/SN). Farski dom Łazowskeje ewangelskeje wosady ma lětsa zbrašenym wotpowědowacy zachod dóstać. Kaž Günter Wjenk z wosadneje cyrkwinskeje rady informuje, dóstachu tele dny přizwolenje za spěchowanske srědki sakskeho socialneho ministerswa. Za 23 500 eurow ma před zachodom skłonina nastać. Nimo toho zatwarja durje, kotrež hodźa so elektrisce wočinić.

Změja serbsku zamołwitu

Rakecy. Přichodne posedźenje Rakečanskeje gmejnskeje rady je jutře, srjedu, w 17 hodź. w zetkanišću při Nowowjesnjanskej dróze. Wuradźować chcedźa tam mjez druhim wo pomjenowanju ­zamołwiteje za naležnosće Serbow w gmejnje. Dale póńdźe wo zhromadne dźěło mjez Rakečanskej a Njeswačanskej gmejnu.

Center přetwarja

Montag, 15. April 2019 geschrieben von:

Budyšin. Wutoru po jutrach započnu w Budyšinje Center na Žitnych wikach přetwarjeć. Tam chcedźa dohromady 1,85 milionow eurow inwestować a tak serwisowy poskitk kaž tež přebywansku kwalitu za wopytowarjow polěpšić, zdźěli wjednistwo nakupowanišća. Parkowanski wobłuk dóstanje nowe barbne wuhotowanje a polěpšene wupisanje. Změnić chcedźa wjetše a mjeńše tafle w centeru, zo bychu kupcow wo serwisowych poskitkach lěpje informowali. Dale instaluja nowe sedźenske móžnosće za wotpočnjenje a nabiwansku staciju za smart­phony a tablety. Nimo toho po­nowja nuzniki a natwarja hrajkanišćo. W oktobru ma přetwar hotowy być.

Dźěłarnička za seniorow

Budyšin. Wosebje na seniorow wusměrjena je nowa dźěłarnička SAEK, kotraž zaběra so z wužiwanjom smartphonow a tabletow. Rozłožić chcedźa zawodowy system Android, za čo trjebaš konto pola Google, a kak swójski nastroj škitaš. Dźěłarnička wotměje so šěsć razow w meji, pak dopołdnja pak popołdnju. Wobdźělenje płaći 20 eurow. Zajimcy njech přizjewja so pod telefonowym čisłom 03591/ 464 177.

Koncertuja do nalěća

Freitag, 12. April 2019 geschrieben von:

Wulke Ždźary. Hudźba do nalěća zaklinči jutře, sobotu, wot 15 hodź. we Wulko­ždźarowskej ewangelskej cyrkwi. Koncert wuhotujetej Łazowski muski chór a orchester gitarow Iuventa musica. Wšitcy zajimcy su wutrobnje witani.

Popołdnjo za swójby

Brězowka. Brězowska Domowinska skupina a tamniše domizniske towarstwo přeprošatej njedźelu na debjenje jutrownych jejkow na starej šuli. W poskitku změja „set započatkarjam“. W 14 hodź. wustupi Slepjanski dźěćacy a młodźinski ansambl, w 15 hodź. pokazaja dźěći Brězowskeje pěstowarnje swój program a w 16 hodź. zaćehnje Slepjanski kwasny ćah z Grodkowskimi hercami.

Kolekcije jejkow wotedać

Porěči wo měznikach

Donnerstag, 11. April 2019 geschrieben von:
Łaz. Wo swojim pytanju za historiskimi měznikami na hranicy mjez Sakskej a Pruskej porěči Rakečan Hans-Joachim Gawor jutře we 18 hodź. we Łazowskim Domje Zejlerja a Smolerja. Jědnaće lět pytaše wón za měznikami a je wo nich knihu spisał. Spěchowanske towarstwo Łazowskeho domu na přednošk přeproša. Zastup płaći tři eura.

Jutře na knižnu premjeru

Mittwoch, 10. April 2019 geschrieben von:

Budyšin. Štwórtk, 11. apryla, w 19.30 hodź. předstaji so w Budyskej Smolerjec kniharni literarny dorost. Awtorki a awtorojo Paternostra čo. 8 su Annamaria Hadankec, Judith Handrikec, Božena Hojerec, Kira Hrjehorjec, Cecilija Neterec, Halina Pohončec, Julia Šnajderec, Luiza Šubertec, Clemens Bobka, Fabian Brycka, Michał Donat, Damian Dyrlich a Pětr Dźisławk.

Zaběraja so z biowudźěłkami

Njebjelčicy. Marketingowe strategije, sebjepomocne koncepty a móžnosće direktneho zwičnjenja ratarskich biowudźěłkow steja w srjedźišću informaciskeho zarjadowanja jutře, štwórtk, w 19 hodź. w Njebjelčanskim gmejnskim centrumje. Mjez iniciatorami wječora staj ­ratarski poradźowar Jens Gülde a předewzaćelski poradźowar Hubert F. Lange. Zajimcy su wutrobnje witani.

Lejna Theurichowa wustaja

Dienstag, 09. April 2019 geschrieben von:
Budyšin. „Doma a druhdźe“ rěka wustajeńca, kotruž wotewru jutře, srjedu, we 18 hodź. w Budyskej Serbskej kulturnej informaciji. W njej pokazuje Lejna Theurichowa swoje akwarele a wolijowe twórby, z kotrymiž je pisane krajiny a přirodu swojeje domiznu zapopadnyła. Wšitcy zajimcy su na wotewrjenje noweje přehladki přeprošeni.

Porěči wo hrabjach zur Lippe

Montag, 08. April 2019 geschrieben von:

Hodźij. Na přednošk Georga princa zur Lippe přeproša Hodźijske domizniske towarstwo jutře, wutoru, we 18 hodź. do Hodźijskeho towarstwoweho domu. Referent porěči wo skutkowanju hrabjow zur Lippe. Z jich mjenom zwjazane su ­ryćerkubła w Barće, Ćichońcy, Debrikecach a druhdźe.

Na kolokwij wo njetopyrjach

Stróža. „Njetopyrje škitać“, rěka hesło 35. kolokwija biosferoweho rezerwata Hornjołužiska hola a haty, kotryž wotměje so zajutřišim, 10. apryla, wot 15.30 do 18.30 hodź. w Stróžanskim Domje tysac hatow. Předstajić chcedźa mjez druhim wuslědki aktualnych přepytowanjow wo njetopyrjach na wsach biosferoweho rezerwata a aktiwity k jich škitej w zwisku z wu­twarom železniskeje čary Hórka– Hórnikecy. Na kolokwij su zajimcy wutrobnje přeprošeni, zastup je darmotny.

Póńdźe wo apoteki

Kamjenc. Kak je zastaranje z medikamentami z apotekow přichodnje zaručene, budźe tema přichodneho zjawneho zarjadowanja žónskeje unije Budyskeho wokrjesa srjedu w 19 hodź. w Kamjenskim hotelu „Złoty jeleń“. Jako hosća witaja tam předsydu sakskeho zwjazka apotekarjow Thomasa Dittricha.

Znamki měnjeć

Freitag, 05. April 2019 geschrieben von:

Budyšin. Štóž listowe znamki, pohladnicy a podobne zběra, njech dóńdźe sej zajutřišim wot 9 do 11.30 hodź. na měnjensku bursu w twarjenju pósta na Budyskim Póstowym naměsće. Dźěći a młodostni tam někotružkuli znamku darmotnje dóstanu.

Kołbaski woptać

Kamjenc. Cyle w znamjenju Kamjenskeje kołbaski steji zajutřišim nakupowanska njedźela w Kamjencu. Wot 12 do 18 hodź. změje tam wjace hač 60 wobchodow wočinjene, mjez druhim w nutřkownym měsće a na Wojerowskej dróze. K tomu wotměja na wjacorych městnach woptanje kołbaskow a kisałych běrnow, live-hudźba, dźiwadło za dźěći, modowe přehladki a wjele dalšeho, zdźěli měšćanske zarjadnistwo.

Při pomniku dźěłać

Pančicy-Kukow. Domowinska skupina Pančicy-Kukow přewjedźe přichodnu rjedźensku akciju při pomniku Jakuba Barta-Ćišinskeho w Lipju póndźelu, 8. apryla, w 17 hodź. Wobdźělnicy njech přinjesu sej trěbne graty sobu.

Swójby pućuja

Donnerstag, 04. April 2019 geschrieben von:
Budyšin. Swójbne kubłanje Rěčneho centruma WITAJ přeproša swójby a dalšich zajimcow na zhromadne pućo­wanje. Zajimcy zetkaja so zajutřišim, 6. apryla, w 14.30 hodź. při Wjerinej chěžce pod Budyskim Mostom měra. Zhromadnje nóžkuja podłu Sprjewje něhdźe pjeć kilometrow do Hrubjelčic. Po puću poskića dźěćom hry. Štóž nochce wróćo pućować­, móže z busom čo. 5 jěć.

Kandidaća so předstaja

Dienstag, 02. April 2019 geschrieben von:

Budyšin. „Waše a naše ideje, zhromadnje za Budyšin!“ rěka hesło wólbneho programa Budyskeje SPD za wólby tudyšeje měšćanskeje rady a wjesnych radow 26. meje. Jutře, 3. apryla, w 17.30 hodź. chcedźa w rumnosćach Dźěłaćerskeho do­broćelstwa (AWO) na Lubijskej dróze 50 w Budyšinje swój program rozłožić. Tam předstaja so tohorunja kandidaća strony za komunalne wólby, mjez nimi Serbja.

„Mały Muk“ na jewišću

Budyšin. Štóž njeje dotal hišće najnowše předstajenje serbskeho dźěćaceho dźiwadła NSLDź „Mały Muk“ widźał, móže to jutře, srjedu, nachwatać. Znatu bajku předstaja w 14 hodź. w Budyskim Dźiwadle na hrodźe.

Na dalšu bjesadu

Drježdźany. Serbja w Drježdźanach su přeprošeni na dalšu serbsku bjesadu. Wona wotměje so zajutřišim, 4. apryla, w 19 hodź. w hosćencu „Altes Wettbüro“ na Antonowej 8. Hosćenc namakaja zajimcy mjez Albertowym naměstom a nowomešćanskim dwórnišćom.

Porěči wo biotopach

Anzeige