3 500 kilometrow po Europje

Freitag, 02. Februar 2024 geschrieben von:

Chrósćicy. Tole staj Choćebuskaj dźiwadźelnikaj Matthias Greupner a Sylvia Burza w dźesać lětnych etapach zmištrowałoj. Startowałoj staj w Zhorjelcu, cil ­rěkaše Santiago de Compostela w sewjernej Španiskej. Při tym sćěhowaštaj slědam swjateho japoštoła Jakuba. Rady chcetaj přisłucharjow sobu wzać w swojim něm­skorěčnym přednošku na tutón napjaty puć přez Němsku, Šwicarsku, Francosku a Španisku. W słowach a wobrazach wopisujetaj swoje dyrdomdeje a dataj tež putniskim zajimcam a nowačkam wažne pokiwy za jich prěnje putnikowanje. Přednošk dožiwja zajimcy sobotu, 3. februara, w 19.45 hodź w Chróšćanskej putniskej hospodźe. W 16 hodź su dźěći na serbske dźěćace kino přeprošene.

Debja jutrowne jejka

Pjeć nowačkow witali

Donnerstag, 01. Februar 2024 geschrieben von:
Lejno. Nowy slěd škotowych turněrow serbskich seniorow w lěće 2024 su wutoru w Lejnjanskim Kubicec hosćencu zahajili. Wobdźěliło je so škotowarka a 30 škotowarjow. Mjez nimi witachu pjeć nowačkow, kaž hłowny organizator Měrćin Nowak zdźěli. Prěni turněr lěta doby Herbert Krječmar z přemóžacymi 3 127 dypkami před Erhardom Kroschkom (2 656) a Měrkom Šmitom (2 475). Přichodny škotowy turněr wotměje so 27. februara w 14 hodź. w Karstenowej Piwowej stwičce w Pančicach-Kukowje.

Stipendije za kurs čěšćiny

Mittwoch, 31. Januar 2024 geschrieben von:

Budyšin. Štóž ma zajim za rěčny kurs ­čěšćiny wot 18. julija hač do 15. awgusta 2024 w Praze abo wot 11. awgusta hač do 2. septembra 2024 w Čěskich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda (Póstowe naměsto 2, 02625 Budyšin, e-mail ). Wotpowědny formular a dalše informacije su na internetnej stronje přistupne.

Awtorka čita swoje basnje

Budyšin. „innen bröckelt die unerhörte schicht“ rěka nowa zběrka basnjow, kotruž je Měrana Cušcyna zestajiła. Z pomocu Kulturneje załožby Swobodneho stata Sakskeje staj ju Jayne-Ann Igel a Jan Kuhlbrodt w Lipšćanskim Poetenladen wudałoj. Zběrku předstaji awtorka štwórtk, 1. februara, w 19 hodź. w Budyskej Smolerjec kniharni.

Awtorka čita swoje basnje

Dienstag, 30. Januar 2024 geschrieben von:

Budyšin. „innen bröckelt die unerhörte schicht“ rěka nowa zběrka basnjow, kotruž je Měrana Cušcyna zestajiła. Z pomocu Kulturneje załožby Swobodneho stata Sakskeje staj ju Jayne-Ann Igel a Jan Kuhlbrodt w Lipšćanskim Poetenladen wudałoj. Zběrku předstaji awtorka štwórtk, 1. februara, w 19 hodź. w Budyskej Smolerjec kniharni.

Wobchod zaso wočinjeny

Pančicy-Kukow. Po wobnowjenju klóšterskeho wobchoda w klóštrje Marijinej hwězdźe w Pančicach-Kukowje je wobchod nětko zaso wočinjeny a kupcow wot póndźele do pjatka stajnje wot 10 do 16.30 hodź. přeprošuje. W februaru je wobchod sobotu zawrjeny. Štwórtk, 1. februara, w 15 hodź. změja tam domy­swjećenje. K tomu su wšitcy zajimcy wutrobnje přeprošeni. Po tym poskićuja ­kofej a tykanc.

Seniorojo škotuja

Montag, 29. Januar 2024 geschrieben von:
Lejno. Přichodny škotowy turněr serbskich seniorow wotměje so jutře, wutoru, w Lejnjanskim Kubicec hosćencu. Započatk budźe w 14 hodź. Nowačkojo su kaž stajnje rady witani. Kaž organizator Měrćin Nowak zdźěli, je so loni škotowarka a 34 škotowarjow na měsačnych zetkanjach wobdźěliło. Přichodny škotowy turněr wotměje so 27. februara w Karstenowej piwowej stwičce w Pančicach-Kukowje.

Spominaja na wopory

Freitag, 26. Januar 2024 geschrieben von:

Budyšin. Na cyłoněmskim dnju wopominanja woporow nacionalsocializma wotměje so jutře, 27. januara, w Budyšinje spomnjeće za wopory wonkowneho lěhwa KZ Groß Rosen při zachodźe do zawoda Alstom na Neuschowej promenadźe. Započatk budźe w 11 hodź. Wot oktobra 1944 hač do apryla 1945 dyrbjachu jeći w wagonowej a mašinowej fabrice dźěle za brónjensku industriju zhotowić. Srjedź apryla 1945 lěhwo rumowachu a jatych nuzowachu, do Mikulašovic pochodować. Mnozy z nich tónle pochod njepřežiwichu.

Žana wostuda w prózdninach

Wojerecy. Hač ze sněhom abo bjez – na Wojerowskej dźěćacej a młodźinskej farmje Křesćansko-socialneho kubłanskeho skutka w zymskich prózdninach žana wostuda njeknježi. Wotydźenja wot 10 do 16 hodź. poskićuja sobudźěłaćerjo wotměnjawy program. Cyłkowny přehlad nańdu ­zajimcy pod . Dalše informacije podawaja pod telefonowym čisłom 03571 979164.

Poslednjej předstajeni

Budyšin. Dźiwadłowa skupina Bühnenvolk pokaza jutře, sobotu, hru „Der Sohn“. Tydźeń pozdźišo slěduje poslednje předstajenje. Wobě zarjadowani wotmějetej so w Dźiwadle na hrodźe a započnjetej so w 19.30 hodź.

Spominaja na wopory

Donnerstag, 25. Januar 2024 geschrieben von:
Wojerecy. Składnostnje wopomnjenskeho dnja za wopory nacionalsocializma 27. januara namołwjatej město Wojerecy a měšćanski zwjazk za přesćěhanych nacistiskeho režima k wobdźělenju na wopominanju, kotrež wotměje so jutře, 26. januara. Započatk budźe w 13 hodź. ze zarjadowanjom w Domje Martina Luthera Kinga, kotrež šulerjo Johanneuma wobrubja. Narěč změje Diana Karbowa, sobudźěłaćerka měšćanskeho zarjadnistwa a społnomócnjena za serbske naležnosće města Wojerecy. Přizamknje so połoženje wěnca w susodnym wopomnišću.

Radźićeljo wuradźuja

Mittwoch, 24. Januar 2024 geschrieben von:

Róžant. Hnydom tři gmejnske rady we wobłuku zarjadniskeho zwjazka Při Klóšterskej wodźe zetkaja so jutře, štwórtk, na wuradźowanje. We 18.30 hodź. započnje so zeńdźenje radźićelow Ralbic-Róžanta w gmejnskej sydarni w Róžeńće. Tam poda planowanski běrow pdw informacije wo twarskim stawje a financowanju nowotwara Ralbičanskeje pěstowarnje. Dale zaběraja so z naprašowanjom Serbskeho šulskeho towarstwa wo perspektiwiskim wužiwanju twarjenja Smjerdźečanskeje LIPY.

Njebjelčicy. Wot 19 hodź. wuradźuje ­jutře gmejnska rada w Njebjelčanskej sydarni. Na dnjowym porjedźe steja twarski plan w Pěskecach a priwatne twarske naležnosće. Nimo toho chcedźa radźićelam tři projekty předstajić. Při tym jedna so wo twar kolesowanskeje šćežki podłu statneje dróhi S 100, koncept za hrajkanišćo w Njebjelčicach kaž tež wo projekt zjawneho nuznika w Njebjelčicach.

Dźěłowy kruh so zeńdźe

Dienstag, 23. Januar 2024 geschrieben von:

Budyšin. Přichodne posedźenje dźěłoweho kruha za serbske naležnosće města Budyšina wotměje so srjedu, 24. januara, w 17 hodź. na radnej žurli radnicy. Na dnjowym porjedźe zjawneho dźěla wuradźowanja póńdźe mjez druhim wo serbske poskitki w Budyskich pěstowarnjach. Dale zaběraja so čłonojo dźěłoweho kruha z konceptom wo wonkownym wo­brazu serbskeje rěče w zjawnym rumje sprjewineho města. Nimo toho chcedźa lońše Wjacławske wiki wuhódnoćić a wo tym rozmyslować, kak móhli so při planowanju lětušich sobu zapřijeć.

Psychedeliski rock a metal

Budyšin. We wobłuku rjadu „Koncerty w foyeru“ přeprošuje Kamjentny dom dźensa, wutoru, na wustup skupiny Slow Green Thing. Drježdźanski kwartet pěstuje psychedelisku měšeńcu stoner rocka kaž tež metala a je projekt wjacorych weteranow sceny, kotřiž su mjez druhim (bywši) čłonojo kapałow Stonehead a Red Wave. Koncert započnje so w 20 hodź., zastup je darmotny. Zarjadowar kaž tež band pak wjeselitej so nad šćedriwymi pjenježnymi darami.

Wernisaža wustajeńcy

Na wólbnu zhromadźiznu

Freitag, 19. Januar 2024 geschrieben von:

Hórki. Serbscy Sokoljo přeprošuja wšitkich zajimcow na hłownu a wólbnu zhromadźiznu Serbskeho Sokoła z.t. Zarjadowanje budźe pjatk, 2. februara, wot 18 hodź. w Hórkach w tamnišim Młynkec hosćencu.

Sobotu do šule

Kulow. Na Kulowskej wyšej šuli „Korla Awgust Kocor“ zetkaja so jutře wot 17 do 19 hodź. wšitcy zajimcy na dźeń wote­wrjenych duri. Šulerjo, wučerjo, zastupjerjo staršich a sobudźěłaćerjo přeprošeja swójby, wosebje dźěći, kotrež tuchwilu do 4. lětnika chodźa. Móža rejowansku skupinu a šulsku band dožiwić a so z konceptom šule zeznajomić.

Dowěru sebi sylnić

Budyšin. Šulski centrum Caritas Budyšin přeprosy sobotu, 3. februara, na Dźeń wotewrjenych duri. Wot 9.30 do 12.30 hodź. maja zajimcy składnosć, wo poskitkach, wobsahach, metodice a zaměrach wukubłanja na socialneho asistenta a kubłarja zhonić.

Serbska debata

Neuheiten LND