Domyswjećenje lětsa hinak

Mittwoch, 29. Dezember 2021 geschrieben von:
Chrósćicy. Lětuše domyswjećenje w katolskich wosadach wotměje so na hinaše wašnje hač zwučene. Duchowni póńdu po zwučenych čarach po wsy. Wobydlerjo domow su přeprošeni so stupić před swój dom. Domam a wobydlerjam domow spožča so žohnowanje wot puća sem. Duchowny praji žohnowansku formulu a krjepi swjećenu wodu. Pisać so njebudźe. Domyswjećensku modlitwu spěwa potom kóžda swójba sama za sebje w swojim domje. Domyswjećenja zahaja so 6. januara. Slěd so přichodne dny we wosadach wozjewi.

Tójšto turistow přijěło

Dienstag, 28. Dezember 2021 geschrieben von:

Budyšin. Statistika turistow za město Budyšin pokazuje, zo su w oktobrje plus jědnaće procentow při skazanju přenocowanjow zwěsćili. Lěta do toho njebě tón měsac wosebje atraktiwny był. Lětsa je sej dohromady 8 072 turistow a turistkow do sprjewineho města dojěło, mjez kotrymž běchu mnozy, kotřiž wužiwachu tež móžnosće campinga. W cyłku bu 20 486 přenocowanjow zličene. Přerěznje přebywachu ludźo dwaj a poł dnja w Budyšinje. Loni bě tu 6 381 turistow přerěznje 2,6 dnjow přebywało, štož wučinješe 16 619 přenocowanjow.

Smě ludźi wěrować

Budyšin. Budyski wyši měšćanosta Alexander Ahrens (SPD) je so ze swojim znapřećiwjenjom přesadźił. Dohladowanski zarjad je tudyšej měšćanskej radźe wumjetował, zo bě přećiwo prawu postu­powała. Radźićeljo běchu wotpokazali, zo smě Ahrens přichodnje pory stawnisce wěrować. Po rozsudźe zarjada, zo bě postupowanje rady njeprawy zasah do organizaciskeje suwerenity a swobody při wukonjenju powołanja, to měšćanosta Ahrens nětko smě. Kaž wón zdźěli, dźěše jemu jeničce wo móžnosć, hdys a hdys wěrowanja přewjesć a stawnistwo w jeho dźěle wolóžić.

Karsten Vogt kandiduje

Donnerstag, 23. Dezember 2021 geschrieben von:

Budyšin. Čłonojo Budyskeho měšćan­skeho zwjazka CDU su zašłe měsacy namjety za kandidatow wyšeho měšćanosty zběrali. Wjackróć mjenowany bu Karsten Vogt, kiž bě hižo zwólniwosć zwuraznił, kandidować. Předsydstwo zwjazka je tomu wčera jednohłósnje přihłosowało.

Boži narodk wobdźiwać

Smochćicy. Boži narodk z figurami, wulkimi kaž čłowjek, wabja wot patoržicy hač do 2. februara do Smochčanskeho kubłanišća swj. Bena. Po wuchodźowanju po ležownosći z Božim narodkom kaž tež po parku móža sej zajimcy Betlehemske měrowe swětło w cyrkwi wšědnje wot 8 do 17 hodź. sobu wzać. Boži narodk běchu sobudźěłaćerki a sobudźěłaćerjo zarjadnišća loni twarili. Boža mša patoržicu w 17 hodź. w cyrkwi je wuknihowana, ta 26. decembra w 10.30 hodź. hišće nic. Přistup je jenož po prawidle 3G móžny. Je trjeba so do lisćiny zapisać. Přizjewjenje trěbne njeje.

Dźak krajneho rady

Prěni dźeń hód so testować dać

Mittwoch, 22. Dezember 2021 geschrieben von:

Pančicy-Kukow. W Pančicach-Kukowje móža so zajimcy prěni hodowny swjaty dźeń na koronu testować dać, a to wot 9.30 do 12 hodź. w lěkarskim domje nad praksu knjenje dipl.-med. Schöbel na Halštrowskej 3. Sobu přinjesć maja woni personalny wupokaz a kartku chorob­neje kasy. Testowanski centrum na ­tym městnje je hewak stajnje póndźelu wot 14 do 17 hodź. a srjedu wot 7 do 11 hodź., nimo swjatych dnjow, wote­wrjeny.

Skrótšene wotewrjenske časy

Budyšin. Budyski krajnoradny zarjad informuje, zo změje 23. a 30. decembra skrótšene wotewrjenske časy. Hižo wot 16 hodź. budźe zarjad zawrjeny, a to na wšitkich stejnišćach. 24. a 31. decembra njebudźe scyła přistupny. Tuchwilu njeje tam regularny wopyt móžny. Jenož wu­wzaćnje je wosobinski termin po dojednanju móžny. Wobkedźbować ma so prawidło 3G. Sobu přinjesć maja ludźo tuž dopokaz šćěpjenja, wustrowjenja abo spěšnotest, nic starši hač 24 hodźin. Tež PCR-test, nic starši hač 48 hodźin, je móžny. Samotesty njejsu płaćiwe.

Dróze bórze markěruja

Dienstag, 21. Dezember 2021 geschrieben von:
Chrósćicy (SN/MWj). Komunalnej dróze z Chrósćic do Hórkow a z Nuknicy do Lejna da Chróšćanska gmejna w přichodnym času markěrować. Tam kromu jězdnje z běłej barbu woznamjenja, kaž gmejnscy radźićeljo na swojim zašłym posedźenju wobzamknychu. Wotpowědny nadawk we wobjimje 6 300 eurow přepodachu předewzaću za wobchadnu techniku Hager. Za to wužiwaja zbywace srědki z dróhotwarskeju projektow. W tym zwisku radźićel Dawid Robel namjetowaše, tež wo markěrowanju na Chróšćanskim křižowanišću Při Satkuli, Měrowa/Hórnikowa rozmyslować. Tam po jeho słowach časćišo k strašnym wobchadnym situacijam dochadźa. Dokelž pak je wot třoch pućow jenož jedyn komunalny a tamnej statny resp. wokrjesny, gmejna sama žane markěrowanje přewjesć njesmě, wjesnjanosta Marko Kliman (CDU) rozłoži.

Wutworja testowanski centrum

Montag, 20. Dezember 2021 geschrieben von:

Pančicy-Kukow. Wot dźensnišeho móža so wobydlerjo w Pančicach-Kukowje na koronawirus testować dać. Kaž gmejnske zarjadnistwo zdźěli, wutworja testowy centrum w tak mjenowanym lěkarskim domje nad praksu dźěćaceje lěkarki. Wo­te­wrjeny budźe wón póndźelu wot 14 do 17 hodź. a srjedu wot 7 do 11 hodź. Hač do hód poskićeja na wjacorych městnach přidatne móžnosće šćěpjenja. W Kamjenskej wotnožce ludoweje uniwersity móžeš so jutře wot 11 do 17 hodź. šćěpić dać. We Wojerowskej zarjadowanskej rum­nosći „Vis-à-Vis“ budźe šćěpjenski centrum zajutřišim a štwórtk wot 11 do 17 hodź. wočinjeny. W Budyskej sportowni na Třělnišću poskićeja šćěpjenje hač do štwórtka wšědnje wot 9 do 17 hodź. Termin dojednać móžeće sej internetnje pod https://sachsen.impfterminvergabe.de. Patoržicu, hodowne swjate dny kaž tež wot 31. decembra hač do 2. januara žane šćěpjenja móžne njebudu.

Předawaja namakane kolesa

Online so přizjewić

Donnerstag, 16. Dezember 2021 geschrieben von:

Budyšin. Ze spočatkom lěta 2022 budu so wobydlerjo na dźěłowej agenturje tež online a z personalnym wupokazom z online-funkciju bjezdźěłni přizjewić móc. Potom njeje hižo trjeba, zo so wosobinsce na dźěłowej agenturje přizjewiš. Wupokaz z online-funkciju je trěbny, zo hodźa so potrjecheni identifikować. Wšitke dalše kroki kaž próstwa wo bjezdźěłnostny pjenjez hodźa so potom tohorunja digitalnje wobstarać. Alternatiwnje budźe wězo dale móžno so wosobinsce na zarjedźe přizjewić.

Kupjel zawrjena

Kamjenc. Budyski krajnoradny zarjad zdźěli, zo wostanje Kamjenska halowa kupjel hač do 9. januara za zjawne płuwanje kaž tež za wužiwanje sawny a solarija zawrjena. Šulske płuwanje, towarstwowy płuwanski sport za dźěći hač do staroby 16 lět kaž tež zahajene płuwanske kursy dale su.

Radźićeljo so schadźuja

Mittwoch, 15. Dezember 2021 geschrieben von:

Njebjelčicy. Přichodne zjawne posedźenje Njebjelčanskeje gmejnskeje rady wotmě­je so jutře, štwórtk, w 19.30 hodź. w tamnišim gmejnskim zarjadnistwje. Na dnjowym porjedźe steji mjez druhim informacija wo nowych wotnajenskich zrěčenjach za regeneratiwne ratarstwo. Nimo wjacorych ležownostnych prašenjow póńdźe tež wo termin klětušich wólbow wjesnjanosty a wo nakup drasty a wuhotowanja za wohnjowu woboru.

Mjenje wopytowarjow

Wojerecy. Prawidło 3G korony dla Wo­jerowskemu zwěrjencej tuchwilu tójšto mjenje wopytowarjow wobradźa. Hač­runjež su zastupny lisćik wot dźewjeć na pjeć­ eurow na wosobu potuńšili, je ličba wopytowarjow w nowembru porno samsnemu měsacej lěta 2019 wo 35 procentow woteběrała. Tropowy dom kaž tež hród a měšćanski muzej dyrbjachu do­społnje zawrěć. Přiwšěm dyrbja zwěrjata dale zastarać. Pytaja tuž zajimcow, kotřiž móhli coowej z kmótřistwom pomhać.

Radźićeljo so schadźuja

Dienstag, 14. Dezember 2021 geschrieben von:
Chrósćicy. Stejišćo k dźělnemu pře­twarej hospodarskeho twarjenja štyri­stron­skeho statoka na prózdninski dom w Nuknicy budźe jedna z temow posedźenja Chróšćanskeje gmejnskeje rady zajutřišim, štwórtk, w 19 hodź. w Chróšćanskej „Jednoće“. Dale zaběraja so radźi­ćeljo z inženjerskim zrěčenjom wo no­wowuhotowanju Chróšćanskeje nawsy a Cyrkwinskeje hory. Nimo toho přepodadźa nadawk za zhotowjenje gmejnskeho wuwićoweho koncepta a postaja termin za wólby wjesnjanosty.

Koncert wupadnje

Donnerstag, 09. Dezember 2021 geschrieben von:

Budyšin. Tradicionalny adwentny ­koncert 1. serbskeje kulturneje brigady tež lětsa njebudźe. Kaž předsydstwo ­brigady zdźěli, dyrbja bohužel na date wobstejnosće reagować a koncert wotprajić. Kaž w nowinskej zdźělence předsydstwa brigady dale rěka, so nadźijeja, zo so klětu poradźi tradiciju znowa dale wjesć. Hižo nětko přeje předsydstwo wšitkim swěrnym připosłucharjam a připosłucharkam woblubowa­neho spěwneho ćělesa žohnowane hody a strowe nowe lěto.

Wotewru testowanski centrum

Łaz (AK/SN). Wot 50. kalendroweho ­tydźenja, potajkim póndźelu, 13. decembra, ma we Łazu testowanski centrum na koronu ­dźěłać započeć. To zdźěli wjesnjanosta Thomas ­Leberecht (CDU) tele dny na posedźenju tamnišeje gmejnskeje rady. Testowanske srjedźišćo zaměstnja w Domje Zejlerja a Smolerja. Po słowach Thomasa Leberechta ­maja za nje priwatneho wobhospodarjerja, kiž ma za to dowolnosć strowotniskeho zarjada Budyskeho krajnoradneho zarjada. Wo koho so dokładnje jedna, wjesnjanosta njezdźěli. Dokładne wotewrjenske časy chcedźa hišće zdźělić.

Serbska debata

Neuheiten LND