Horni Hajnk. Jutře, štwórtk, na swjatoh Jana w 20 hodź. wotměje so w Hornim Hajnku na zahrodźe za domom Jurja ­Brězana wosebite čitanje. Awtorojo předstaja swoje teksty z literarneje zběrki „Susodźa“, kotruž je Ingrid Juršikowa w Ludowym nakładnistwje Domowina wudała. Na zahrodźe budźe městno za něhdźe połsta zajimcow. Čitać budu Beno Budar a jeho wnučk Filip, Měrka Mětowa, Lydija Maćijowa a Měrana Cušcyna. Zajimcy, kotřiž su hižo wot 19 hodź. witani, njech sebi mały piknik sobu přinjesu. Napitki budu tam na předań.

Zaso přistupnej

Budyšin. Čitarnja Serbskeje centralneje biblioteki kaž tež Serbski kulturny archiw stej po tuchwilu płaćiwych zakonskich postajenjach zaso wotewrjenej. Zajimcy njech přizjewja so telefonisce pod čisłom 03591 /4972-0 abo sćelu mejlku na . Sobu přinjesć měli čitarjo dopokaz dospołneho šćěpjenja na covid-19, dopokaz wustrowjenja, nic starši hač šěsć měsacow, abo negatiwny koronatest. Wupožčenje resp. wróćenje medijow wotměwa so dale w zachodnej rumnosći Serbskeho instituta, tak zo je čitarnja jeničce za ­rešeršowe dźěło a studij literatury wu­žiwajomna.

Budyšin. Wokrjesny radźićel Lěwcy a prawiznik Hajko Kozel poskići štwórtk, 24. junija, socialne poradźowanje. Wot 15 do 17 hodź. móža sej zajimcy we woby­dlerskim běrowje na Budyskej Šulerskej 10 po radu dóńć. Ćežišća poradźowanja su aktualne dźěło a socialnoprawniske wuskutki na koronapandemiju kaž tež domjace hladanje za čas korony. Dalše su problemy ze zarjadami nastupajo Hartz IV kaž tež podpěra w zwisku z předpisami korony dla. Bjezpłatne poradźowanje je móžne w němskej a serbskej kaž tež w kóždej dalšej rěči. Přizjewjenja pod telefonowym čisłom 035932 /363 727

Kamjenc. Přichodnu póndźelu, 21. junija, wotewru Kamjensku kupjel tež zaso za wopytowarjow a towarstwowy sport. Šulerjo poskitk hižo wjacore tydźenje ­zaso wužiwaja. Płuwać móža zajimcy tam zaso w zwučenych časach, nimo srjedy. Tón dźeń je kupjel stajnje za­wrjena. Sawnu wopytać njeje płaćiwych postajenjow korony dla móžno. Wosebity poskitk maja pjatk wot 9.45 do 10.45 hodź. To su předewšěm rentnarjo do hale přeprošeni. W hali pak njemóža zajimcy jeničce čary płuwać, ale móža tež wulke suwadło a dalše poskitki zabawneho razu wužiwać.

Dalše wolóženja čitarjam

Kamjenc. Lessingowy kaž tež sakralny muzej a Słodarnja w Kamjencu su wotnětka zaso w znatym času wotewrjene. To zdźěli Matthias Hanke, zastupowacy nawoda Lessingoweho muzeja. W galeriji sakralneho muzeja Hanineje cyrkwje su widźeć dźěła pod hesłom „Transicija – fotografije Michaela Krusche“. Nastała je zběrka składnostnje 60. narodnin we Wojerecach rodźeneho wuměłca, kiž dźensa w Berlinje bydli a skutkuje. Motiwy za swoje fotografije je Kruscha našoł w mnohich krajach swěta – w Marokku, Kazachstanje, Južnej Africe a Patagoniskej, w Omanje, Jemenje a Israelu. Zapopadnył je tam po zdaću pozabyte městnosće. Pod titulom „Tekstury“ pokazuje wón wot čłowjeka wopušćene přebywanišća jako kolažu.

Wuměłstwo a přiroda