Zhromadnje blidotenis hrać

Donnerstag, 03. Januar 2019 geschrieben von:

Konjecy. Kóždolětny zhromadny wječor za wšěch, kotřiž chcedźa zaso jónu bli­dotenis hrać, wotměje so jutře, pjatk, na žur­li Konječanskeho towarstwoweho domu. Započatk za dźěći je wot 17 hodź. a za dorosćenych wot 19 hodź. Konječanske blidotenisowe towarstwo wšitkich zajimcow wutrobnje přeprošuje.

Kak štomiki wotbyć?

Budyšin. Hižo druhi dźeń noweho lěta je Budyski wokrjes wčera w nowinskim wozjewjenju na to skedźbnił, kak móža wobydlerjo swoje hodowne štomiki najlěpje wotbyć. Tak móža je rozkus­kować a do sudobja za biowotpadki ćisnyć. W ja­nuaru hodźi so hodowny štomik nimo toho cyły pódla wotpadkoweho sudobja stajić. Za to njesmědźa žana lameta abo druhe wěcy­ na šmrěku abo jědli wisać. Štomiki, wjetše hač 1,50 metrow, dyrbja přikrótšene być, hałžki pak maja na nich wostać. Wotrězane hałžki wotpadkowe awto žane sobu njebjerje.

Biblioteka zawrjena

Freitag, 21. Dezember 2018 geschrieben von:

Kamjenc. Měšćanska biblioteka w Lessingowym měsće wostanje wot 24. decembra do 2. januara zawrjena. W tym času maja zajimcy składnosć, digitalne wupožčowanje Onleihe wužiwać, hdźež móža sej e-booki wupožčić. Wot štwórtka, 3. januara 2019, budźe knihownja zaso­ wotewrjena.

Zaso so nawróćić?

Budyšin. Štwórtk, 27. decembra, wotměje so na wulkej žurli Budyskeho krajnoradneho zarjada „bursa nawrótnikow“. Wot 10 do 14 hodź. změja zajimcy, kotřiž tuchwilu hišće zwonka domizny dźěłaja, chcedźa pak so zaso nawróćić, přiležnosć wo dźěłowych městnach we Łužicy so informować.

Wo Kitu husličkarju

Budyšin. Dźěći móža so na dalše předstajenje klankohry „Kito husličkar“ wjeselić, kotruž 27. decembra w 10 hodź. w Budyskim Dźiwadle na hrodźe předstaja. Dokelž Kito hudźbu lubuje, by so najradšo z husličkarjom stał.

Kupjel po hodźoch zaso přistupna

Kamjenc. Kamjenska halowa kupjel wo­sta­nje wot 24. do 26. decembra za­wrjena, wot 27. do 30. decembra pak budźe wot 9 do 18 hodź. přistupna. Tež silwester a Nowe lěto njebudźe tam móžno so kupać, hakle 2. januara wot 9 do 20 hodź. kaž tež 3. a 4. januara wot 9 do 22 hodź.

Agentura zawrjena

Nowy kalender požadany

Mittwoch, 19. Dezember 2018 geschrieben von:

Hamor (SN). „Kołowokoło Bjerwałdskeho jězora 2019“ rěka nowy lětny kalender łužiskeje jězoriny. Za šěsć eurow móža sej jón zajimcy mjez druhim na Hamorskim gmejnskim zarjedźe kupić. Widźeć­ su wšelake fotowe motiwy, kaž swětłownja při jězoru. Požadany hodowny dar pak su tohorunja zastupne lisćiki za klětu planowane zarjadowanja w Dźiwadle we Wuchu.

Na farmje swjećili

Wojerecy (SN). Wulke wjeselo knježeše minjeny tydźeń mjez wopytowarjemi Wojerowskeje dźěćaceje a młodźinskeje farmy. 30 holcow a hólcow swjećeše tam swoju adwentničku, a to ći, kotřiž nimale wšědnje na farmu, zarjadnišćo Miłočanskeho Křesćansko-socialneho kubłanskeho skutka, přichadźeja, zo bychu tam skót picowali. Někotři w cirkusu Krabatino sobu skutkuja, dalši so na projektach wobdźěleja. Za swoju adwentničku dóstachu wot Wojerowskeho Lionsoweho kluba 350 eurow darjene.

Čitanski dobropis darić

Wysokoskok z hudźbu

Dienstag, 18. Dezember 2018 geschrieben von:

Wóslink (SN). Na Wóslinčanskej Ewangelskej srjedźnej šuli wotmě so spočatk decembra tradicionalny wysokoskok z hudźbu. Lětsa zličichu telko wobdźělnikow kaž hišće ženje. Přitomny bě tež jednaćel kubłanišća Henry Nitzsche. Susann Trepte a Moritz Scholze, wobaj ze 6. lětnika, běštaj najlěpšej. Absolutny rekord pak docpě z přeskočenymi 1,60 metrami Aaron Wehofsky z dźewjatki.

Šek za projekt přepodali

Hórnikecy (SN). Łužiska jězorinowa załožba podpěruje projekt Hórnikečanskeje Energijoweje fabriki „Hladanišćo – grafiti zetka ruinu“ z 3 000 eurami. W lětušich nazymskich prózdninach su w energijowej fabrice dźěłarničku pod mjeno- wanym hesłom přewjedli. Minjeny pjatk šek nětko přepodachu.

Přihotuja přebytk dźěći

Wulki krok dale

Montag, 17. Dezember 2018 geschrieben von:

Němcy (JoN/SN). Wjedro drje z dróho­twarcami w Němcach zašły tydźeń derje njeměnješe. Přiwšěm su dźěłaćerjo firmy Strabag wutoru stajeny nadawk zmištrowali a druhi a najwjetši wotrězk statneje dróhi S 95, wjeducy přez Němcy wot Grofic blidarnje hač k pućej „Při wětrniku“, ze zakładnej asfaltowej worštu pokryli. Niskich temperaturow dla steješe nad dróhu tołsta mła. Němčanscy wobydlerjo so nětko jara wjesela, zo su dróho­twarcy termin dodźerželi, zo móža swoje awta zaso na domjacej ležownosći wotstajeć a zo maja tež zymsku słužbu za­ručenu.

Zwyša popłatki

Meditacija w adwenće

Freitag, 14. Dezember 2018 geschrieben von:

Kamjenc (SN). Kóždu adwentnu póndźelu poskića Vincenc Böhmer, dušepastyr Kamjenskeje chorownje maltezow, me­di­tacije jako přihot na hody. Tak su zajimcy tež póndźelu, 17. decembra, we 18.30 hodź. do domu witani. „Z adwentnym časom­ njezapočina so kónc lěta, ale přińdźe něšto nowe“, Böhmer praji.

Štomy z měšćanskeho lěsa

Budyšin (SN). Tež lětsa předawaja w Budyšinje hodowne štomy z měšćanskeho lěsa. Lěpšina je, zo su wone wosebje čerstwe. Wšako móža sej zajimcy štomiki sami podrězać. Komuž pak wobcha­dźenje z piłu tak prawje njeleži, tomu su lěsni dźěłaćerjo rady poboku. Tak budźe tomu tež jutře, 15. decembra, wot 9 do 12 hodź. we Wuježku.

Přepodadźa nowy hort

Pěskečan znowa wuspěšny

Dienstag, 11. Dezember 2018 geschrieben von:
Lipsk/Pěskecy. Achim Weclich z Pěskec je sej minjeny kónc tydźenja znowa sakske mišterstwo w plahowanju nukli zawěsćił. Po lěće 2014 a 2016 je wón trofeju­ za plahowanje dołhokosmatych nukli­ třeći króć za sobu dobył. 62lětny Pěskowčan, kotrehož bě Sakski krajny zwjazk plahowarjow rasowych nukli před lětomaj z Wulkej złotej čestnej jehłu wuznamjenił, hižo wjacore lětdźesatki nukle plahuje. Při tym je so wón na tři po­měrnje rědke družiny, mjez nimi dołho­kosmate, specializował a hižo wjacore myta po wšej Němskej dobył.

Bjesada w sakskej stolicy

Freitag, 07. Dezember 2018 geschrieben von:

Drježdźany. Na dalšu bjesadu w maćernej rěči su Serbja, bydlacy w Drježdźanach, přeprošeni. Wobdźělnicy zetkaja so přichodny štwórtk, 13. decembra, wot 19 hodź. w hospodźe „Altes Wettbüro“ na Antonowej 8 (blisko dwórnišća Drjež­dźany-Nowe město). Wšitcy zajimcy, hornjo- a delnjoserbšćinu rěčacy a wuknjacy, su na rozmołwu w stolicy Sakskeje wutrobnje witani.

Mała Sněženka na předań

Budyšin. W Załožbje za serbski lud je wušoł druhi nakład woblubowaneje słuchohry „Mała Sněženka 2“ z hudźbu a spě­wami Měrćina Weclicha, Bena Budarja a Hrjehorja­ Nawki. Hromadźe ze Sněženku dožiwja připosłucharjo wobradźenje, zymske wjesela a pryzle, wrótne sankowanje a wulki silwesterski dyrdomdej. Swěrnaj přećelej Wětřik a Měsačk staj wězo tež zaso pódla. CD za 11,90 eurow dóstanu zajimcy w Budyskimaj Serbskej kulturnej informaciji a Smolerjec kniharni.

Zhromadnje do adwenta

Freitag, 30. November 2018 geschrieben von:

Chrósćicy. Na zhromadne zahajenje adwentneho časa přeprosy Chróšćanske wjesne towarstwo Domizna wšitkich zajimcow jutře, sobotu, na nawjes. Na předwječoru 1. adwenta zaswěća w 17 hodź. adwentnu pychu na nawsy. K tomu zanjesu dujerjo adwentnu hudźbu. Wo ćělne derjeměće budźe postarane. Organizatorojo nadźijeja so bohateho wopyta.

Wo spodźiwnych lipach

Budyšin. Přednošk wo wosebitych lipach w srjedźoněmskej budźe přichodne zarjadowanje we wobłuku Budyskeje akademije póndźelu, 3. decembra, we 18 hodź. w statnej studijnej akademiji na Lubijskej. Prof. dr. Andreas Zehnsdorf z Němskeje dendrologiskeje towaršnosće předstaji historiske a eksistowace „wjedźene lipy“, tak mjenowane rejwanske lipy. Z nimi so wón hižo 20 lět zaběra a so wo jich zachowanje prócuje.

Stajne blido Zelenych

Kamjenc. Přichodne stajne blido Kamjenskeho zwjazka Zelenych wotměje so wutoru, 4. decembra, w 19 hodź. w hosćencu La Piazza na Zwingerowj. Z hosćom budźe zapósłanča zwjazkoweho sejma Monika Lazar.

Spěwaja za dobry skutk

Za adwentničku so přizjewić

Mittwoch, 28. November 2018 geschrieben von:
Chrósćicy. Gmejna Chrósćicy přeprošuje wšitke wuměnkarki a wšitkich­ wuměnkarjow srjedu, 5. decembra, w 15 hodź. na adwentničku w Chróšćanskej wjacezaměrowej hali „Jednota“. Při kofeju, wosušku a kulturnym programje chcedźa sej zhromadnje rjane popołdnjo popřeć. Organizatoriskich přičin dla prosy gmejna wo přizjewjenje na gmejnskim zarjadnistwje hač do pjatka, 30. nowembra.

Anzeige