Budyšin. Rěčny centrum WITAJ ma za zajimcow a zajimče, kotrež chcyli čěšćinu nawuknyć, wosebity poskitk. Tak poruča młodym a staršim Serbam měsačny rěčny kurs w susodnym kraju. Jedyn ma so wotměć w Českich Budějovicach wot 15. awgusta do 6. septembra, tamny w Praze wot 23. julija do 19. awgusta. Štóž ma lóšt, so nimo rěčneje kwalifikacije tež ze stawiznami a kulturu susodneje Čěskeje zaběrać, njech přizjewi so hač do 15. měrca w RCW. Dalše informacije namakaće na stronje www.witaj-sprachzentrum.de pod „rěčne kursy – čěšćina“.
Pjeriznu škitać
Němske Pazlicy. Při hatach wokoło Němskich Pazlic su 25. februara wjacore zahinjene kołpje našli. Dźewjeć z nich bě z A-wirusom H5N8 (pjeriznowa mrětwa) inficěrowane, kaž Friedricha Löfflerowy institut wčera zwěsći. Dalše we wokrjesu namakane dźiwje ptaki tam nětko přepytuja. Zwěsćeneje wudyrjeneje mrětwy dla dyrbja mějićeljo pjerizny sewjernje awtodróhi A 4 w Budyskim wokrjesu nětko swoje kurjency a podobne zawrjene wostajić.
Halštrowska Hola. Gmejna Halštrowska Hola chce 1,2 hektaraj lěsa njedaloko Lejnoho (Geierswalde) kupić. Gmejnska rada je namjetej hižo přihłosowała. Komuna dóstanje lěs za dźesać centow na kwadratny meter. Kupjena přestrjeń ma lěsniskim wurunanskim naprawam słužić.
Dalše swójbne kino
Budyšin. Rěčny centrum WITAJ pokaza jutře 5. měrca, w 19 hodź. na stronje www.schadźowanka.de digitalne kino. W lěće 2012 synchronizowany danski film „Karla a Katrina“ jedna wo přećelstwje a prěnjej lubosći. Hłownu rólu rěči Gloria Žurec. Film hodźi so za dźěći wot wosom lět. Po filmje přewjedu kwiz z mytami.
Wojerecy. W zwjazku organizowane coologiske zahrody a zwěrjency su so z listom na zwjazkowu kanclerku Angelu Merkel (CDU) a ministerskich prezidentow krajow wobroćili, kaž Wojerowski zwěrjenc informuje. W lisće proša wo to, zo smědźa wot měrca zaso wotewrěć a swójbam za čas lockdowna wulětny cil być. Nastupajo přiběracy ćišć na staršich a jich dźěći maja coowy tajki poskitk za wurunanje. Při tym skedźbnjeja na hygienowe koncepty a přeja sej postupne wotewrjenje wonkownych a pozdźišo dalšich wobłukow.
Wuspěšne skutkowanje
Budyšin. W Budyšinje stacioněrowany helikopter „Christoph 62“ za wuchowanja z powětra (DRF) bě loni 1 527 króć zasadźeny, z toho 1 011 nuzowje a 516 króć za transport kritisce schorjenych abo zranjenych mjez klinikami. Lěto do toho bu 1 396 króć zasadźeny. Wot decembra maja w sprjewinym měsće dalši wuchowanski helikopter. „Christoph 114“ pomha při nuzowych zasadźenjach, zo by „Christoph 62“ móhł wjace na koronu schorjenych pacientow transportować. W Sakskej zasadźene tři helikoptery w słužbje DRF běchu loni cyłkownje 2 720 razow wołali.
Budyšin. Wobydlerjo su namołwjeni wuprajić so k naćiskej hospodarskeho plana 2021/2022 Budyskeho wokrjesa. Za to maja hač do 3. měrca chwile. Dokument je zajimcam na internetnej stronje www.landkreis-bautzen.de přistupny. Kaž hižo w zašłymaj lětomaj, je w etaće wokrjesa lětsa njecyłe a klětu něšto wjace hač 500 milionow eurow zaplanowanych. Tež w minjenymaj lětomaj su z tajkej sumu pjenjez hospodarili.
Budyšin. Swójbna schadźowanka Rěčneho centruma WITAJ lětsa njebudźe. Město njeje su wšitke serbske swójby na kinowy wječor přeprošene. Sobotu, 27. februara, w 17 hodź. pokazaja na stronje www.schadzowanka.de swójbny film „Gilles“, kotryž hodźi so za dźěći wot wosom lět. Wot lěta 2010 pask w serbskej rěči předleži. Wón powěda stawiznu wo sonach a wužadanjach wobdarjeneho dwanaćelětneho koparja Gillesa. Hłowneho rjeka rěči Jan Brězan.
Jutrowne wubědźowanje
Budyšin. Hišće hač do 19. měrca móža so dorosćeni zajimcy na 68. wubědźowanju wo najrjeńše jutrowne jejko wobdźělić. Kolekcije maja tři jejka, w jednej ze znatych serbskich technikow debjene, wopřijeć a z póštu zapodate być.
Budyšin. Budyski jobcenter přewostaja potrěbnym swójbam wotnětka přidatne pjenjezy za digitalne nastroje za distancnu šulsku wučbu. Potrjecheni, kotřiž su spěchowani po socialnym zakoniku 2, móža za to próstwu na 350 eurow stajić. Wuměnjenja su: Dźěćo chodźi na powšitkownu abo powołansku šulu, wone njeje starše hač 25 lět, wobdźěla so pandemije dla na distancnej wučbje a nima trěbne nastroje. Šula ma potrjebu wobkrućić.
Pěstowarnja zdźěla zawrjena
Budyšin. W Budyskim dźěćacym dnjowym přebywanišću „Benjamin Blümchen“ su schorjenje na koronu zwěsćili. Kubłarjo a dźěći potrjecheneje skupiny njemóža tuž karanteny dla do pěstowarnje. Žłobik njeje potrjecheny.
Budyšin. Hdyž su kina začinjene, móža lubowarjo filmow alternatiwu wužiwać, mjenujcy nowy poskitk Budyskeje měšćanskeje biblioteki. Přez portal „Filmfriend“ poskića wona wjace hač 2 500 hrajnych a dokumentarnych filmow, serijow a krótkofilmow. Na internetnej stronje biblioteki móža so zajimcy ze swojim wužiwanskim čisłom a tajnym hesłom přizjewić.
Pomhaja wikowarjam
Wojerecy. Z wot dźensnišeho w Swobodnym staće Sakskej móžnym nakupowanskim systemom „Click & collect“ měli tež wobydlerjo Wojerec swojich domoródnych wikowarjow podpěrać a pola nich nakupować. K tomu namołwja tamniše měšćanske zarjadnistwo, kotrež chce wikowarjam w měsće tohorunja pomhać. Tohodla wozjewja na internetnej stronje města přehlad wo wobchodach, kotrež „Click & collect“ poskićeja, a trěbne daty, zo móžeš pola nich twory skazać. Lisćina njeje dospołna. Wona złožuje so na přidźěło přemysłownikow a so wobstajnje aktualizuje. Pod www.hoyerswerda.de zajimcy lisćinu nadeńdu.