Pišćele sej wobhladać
Budyšin. Z akciskim dnjom pod hesłom „Pišćele wotewrjene“ chcedźa jutře, sobotu, zajimcam pišćele bliže předstajić a jich za nje zahorić. Mjez druhim budu pišćele Budyskeje tachantskeje cyrkwje wot 14 do 17 hodź. přistupne. Dalše instrumenty móžeš w Šěrachowje, Žitawje a Wostrowcu dožiwić.
Wo powołanjach so wobhonić
Kamjenc. Powołanske wiki wotměja so jutře, sobotu, w Kamjenskej wyšej šuli „Při Halštrowskej łuce“. Wot 10 do 15 hodź. móža šulerki a šulerjo firmy a jich wukubłarjow zeznać, so wo powołanjach informować a tón abo tamny grat wuspytać. Wjace hač sto wustajerjow je so za zarjadowanje přizjewiło. Tež zajimowani fachowcy móža so na powołanskich wikach wo swobodnych dźěłowych městnach wobhonić.
Sól a žałby zhotowić
Na dawne časy so dopominali
Solarnu připrawu wotpokazali
Lejno (SN/MWj). Planowana fotowoltaikowa připrawa pola Hłupońcy drje so po wšěm zdaću twarić njebudźe. Wotpowědnu próstwu je gmejnska rada Pančicy-Kukow na swojim wčerawšim posedźenju w Lejnjanskim hosćencu wotpokazała. Radźićeljo złožowachu so při tym na swoje směrnicy, kotrež běchu hakle w měrcu wobzamknyli. Po nich směli so fotowoltaikowe připrawy na ratarskich ležownosćach jenož twarić, hdyž je hódnota pódy pod 20. Na płoninach pola Hłupońcy wučinja tale ličba mjez 56 a 67, kaž wjesnjanosta Markus Kreuz (CDU) wčera rozłoži.
Planowana připrawa měješe wjacore hektary wulka być a so na štyri ležownosće wokoło Hłupońcy rozpřestrěć. Dwě ležownosći stej mjez Hłupońcu a Bukowcom (Bocka), jedna juhowuchodnje Hłupońcy a štwórta jako najwjetša mjez Hłupońcu a Žuricami. Wotpowědne čisła ležownosćow je wjesnjanosta Kreuz wčera zjawnje mjenował. Z internetnych kartow pod je wuwidźeć, hdźe tele ležownosće su.
Policija (19.04.24)
Wjele škody po zražce
Halštrow. Złe sćěhi měješe srjedu na pózdnim wječoru wobchadne njezbožo na statnej dróze S 94 při wotbóčce do Halštrowa. Tam bě 24lětna žona ze swojim Honda po puću, jako krótko do 23 hodź. sorna přez puć a runu smuhu do awta skoči. Zražki dla zajědźe wodźerka na lěwym boku jězdnje do skłoniny a zwróći. Skónčnje pak Honda zaso na kolesach, ale do nawopačneho směra steješe. Kaž policija zdźěli, so 24lětna snadnje zrani. Ze swojim awtom pak wona hižo dale jěć njemóžeše. Jězdźidło dyrbješe wona wotwlec dać. Po informacijach policije nasta něhdźe 15 000 eurow škody.
Puć do Rakec wažny cil
Radźićeljo koncept pućowanskich a kolesowanskich šćežkow schwalili
Kulow (AK/SN). Město Kulow prócuje so wo zwisk za kolesowarjow ze susodnej Rakečanskej gmejnu. Kolesowanska šćežka ma wot Kulowa přez Hózk, Rachlow a Komorow hač do Rakec wjesć. Tónle cil podšmórny měšćanosta Markus Posch (CDU) srjedu na posedźenju Kulowskeje měšćanskeje rady. Jeje čłonojo wobzamknychu jednohłósnje koncept kolesowanskich a pućowanskich šćežkow Hornjołužiskeje hole a hatow 2024.
Koncept nasta wot 2021 hač do 2023 w režiji regionalneho managementa Hornjołužiskeje hole a hatow. W nim zapřijatej stej prěni raz nimale dospołny wobstatk kolesowanskich a pućowanskich šćežkow a k tomu słušaca infrastruktura za wšitkich 15 komunow, kotrež Leaderowej spěchowanskej kónčnje přisłušeja. Na zakładźe wuslědka analyzy zestajichu za cyły region přehlad, hdźe móhli dalše šćežki nastać. Hižo wobstejace koncepty při tym wobkedźbowachu. Nětko wobzamknjeny koncept dotalne wudospołnja.
Jědojty staršik so rozmnožuje
Přiroda so wobstajnje měnja. Najwšelakorišich přičin dla rozmnožeja so zwěrjata a rostliny, kotrež běchmy do toho lědma na wědomje brali. Jedyn tajki pad zaběraše samo gmejnsku radu Ralbic-Róžanta na jeje zašłym posedźenju.
Róžant (JK/SN). Rostlinski problem wosebiteho razu w Delanach narězny radźićel Józef Woko wutoru na posedźenju gmejnskeje rady Ralbicy-Róžant. Wón skedźbni na strach, wuchadźacy z njewšědnje sylneho rozmnoženja jědojteje rostliny staršik (Jakobskreuzkraut) na zahonach mjez Smjerdźacej a Šunowom. Tam je so rostlina tak jara rozmnožiła, zo wupada kaž wulke polo rěpika. Rostlina je jědojta a skoćata ju samo na sebi w zelenym stawje nježeru. Ale sušena jako syno zawinuje rostlina sylne zajědojćenja a wosebje jatram skotu škodźi. Tež zezběrany jěd z tutych rostlinow njehodźi so na žane wašnje wužiwać. Wšo to su signale, zo dyrbi so dalšemu rozmnoženju zadźěwać.
Hač do nowembra 2024 na awtodróze A 4 pola Budyšina jězdnju ...
Bioratar z ćěłom a dušu
Krótkopowěsće (19.04.24)
Měto Nowak nowy nawoda
Berlin. Po třoch měsacach wakancy je mjeńšinowy sekretariat w Berlinje poziciju wjednistwa wobsadźił. Nowy nawoda je wot 15. apryla delnjołužiski Serb Měto Nowak. W swojim poslednim zastojnstwje jako referent braniborskeho społnomócnjeneho za serbske naležnosće je wusko z mjeńšinowymi zwjazkami hromadźe dźěłał. Do toho je pjeć lět Choćebuski Rěčny centrum WITAJ nawjedował.
Insolwenca jako sćěh skandala?
Drježdźany. Třěšny zwjazk organizacijow migrantow w Sakskej ma so po wuprajenju zarjadnika insolwency rozpušćić. K citatej w „Sakskich Nowinach“ nochcyše so zwjazk na naprašowanje SN wuprajić. Insolwenca je dalši sćěh rozprawy zličbowanskeho zarjada, kiž bě socialnemu ministerstwu pod Petru Köpping (SPD) politiske znjewužiwanje spěchowanja we wobłuku migracije wumjetował.
Wobchadne přeńdźenja přiběrali
Zhromadnje diskutowali
Njebjelčicy. Zjawny diskusijny wječor z generalnym sekretarom Sakskeje CDU Alexanderom Dierksom wotmě so póndźelu w Njebjelčicach. Něhdźe 40 wosobow ze serbskich gmejnow a Kamjenca přichwata na faru, zo by hromadźe diskutowało a politikarjam namjety do přichoda dało. Tak rozmyslowachu wo podpěrach za gmejny a wuměnjachu so k temje kubłanje w pěstowarnjach. Dalši dypk bě tež pomjeńšenje běrokratije.
Ze zapósłanču porěčeć
Budyšin. Zapósłanča zwjazkoweho sejma Kathrin Michel (SPD) přeprošuje jutře, pjatk, wot 11 do 14 hodź. we wobłuku temoweho tydźenja frakcije SPD zwjazkoweho sejma na wotewrjenu wobydlersku rěčnu hodźinu na Budyskim Hłownym torhošću. Rěčne hodźiny, kotrež so hewak we wólbnym běrowje wotměwaja, přećahnu na wiki, zo bychu puće k ludźom w jich připołdnišej přestawce krótke byli. W přitulnej atmosferje móža zajimcy bjez přizjewjenja z Kathrin Michel do rozmołwy přińć.
