Policija (26.10.18)

Freitag, 26. Oktober 2018 geschrieben von:

E-bike pokradnyli

Wojerecy. Přiběrajcy měrja so paduši kolesow na tajke z elektriskim motorom. Tak pokradnychu njeznaći tele dny na Wojerowskej Schweitzerowej běły e-bike marki Bulls Green Mover. Z kolesom zhubištej so tež nahłownik a dešćowy płašć 65lětneho wobsedźerja. Koleso ze zeleno-běłym pismom a z nalěpkom předa­warja z Rottweila na ramiku ma hódnotu něhdźe 750 eurow. Nahłownik a płašć stej 150 eurow hódnej.

Lisćiki za schadźowanku

Freitag, 26. Oktober 2018 geschrieben von:

Budyšin. Předań zastupnych lisćikow za 144. schadźowanku, kotraž budźe 24. nowembra w Budyskim Němsko-Serbskim ludowym dźiwadle, zahaji so štwórtk, 1. nowembra, při dźiwadłowej pokładni. Internetne skazanki su tohorunja móžne.

Čita z noweje knihi

Ćisk. Na němsko-serbski literarno- a hudźbny wječor přeproša Ćišćanske kulturne towarstwo jutře, sobotu, wot 17.30 hodź. na Kasperec dožiwjenski statok. Doris Kasper čita tam ze swojeje noweje knihi „Kuzło dejmantneje soniny“ a přeradźi tajny recept, kak móže čłowjek zbožowny być. Spěwna skupina Wólbernosće wječor hudźbnje wobrubi. Zastup je darmotny.

Kabaret dožiwić

Kamjenc. „Darmotne piwo budźe dróše“ rěka program kabareta „Die Herkules­keule“ njedźelu, 28. oktobra, w 16 hodź. w Kamjenskim hotelu Město Drježdźany. Za njón maja hišće zastupne lisćiki, kotrež dóstanu zajimcy za 23,50 eurow direktnje w hotelu.

Nyšpor hońtwjerjow a hajnikow

Dalša zakładna šula w sprjewinym měsće njetrěbna

Donnerstag, 25. Oktober 2018 geschrieben von:

Budyšin (SN/MWj). Přidatne kapacity w zakładnych šulach, kotrež su w nošer­stwje města Budyšina, srjedźo- a dołhodobnje žane trěbne njejsu. To wuchadźa z informacije kubłanskeho a socialneho wotrjada měšćanskeho zarjadnistwa, kotruž su měšćanskim radźićelam na jich wčerawšim posedźenju předpołožili. Pozadk su diskusije zašłych měsacow, hač trjeba sprjewine město přidatnu za­kładnu šulu. Kaž so nětko wukopa, tajka trěbna njeje.

Po tuchwilnych wobličenjach drje po­trjeba za městnami na měšćanskich zakładnych šulach najprjedy raz hač do šulskeho lěta 2023/2024 přiběra. Pozdźišo pak ličba šulerjow zaso na dźensniši abo hišće niši niwow spadnje, rěka w radźićelam předpołoženym spisu. By-li měšćanska rada nětko wobzamknyła nowu zakładnu šulu twarić, njeby kubłanišćo do šul­skeho lěta 2023/2024 hotowe było.

Ruce połnej dźěła maja tuchwilu w Čornochołmčanskim Krabatowym młynje. Tam přihotuja wulki serbski kwas, kotryž chcedźa­ zajutřišim, sobotu, wot 14.30 hodź. předstajić. Dokelž k prawemu kwasej tež zelena pletwa słuša, su ju wčera pilni pomocnicy­ wili. Za to běchu dźesać měchow zelenych hałžkow z lěsa přiwjezli. Foto: Gernot Menzel

W starobje hišće wšědnje na dźěło

Donnerstag, 25. Oktober 2018 geschrieben von:

Pěskecy (aha/SN). W pjatkownej přiłoze našeho wječornika zhonimy w seriji „Rentnar a što potom?“, kak so wuměnkarjo po nastupje renty na najwšelakore wašnje angažuja. Zwjetša wotpowěduja wužadanjam našeho časa a přewozmu čestnohamtske nadawki abo wužiwaja rentnarski čas, sej tu a tam dojěć, wopytać dźiwadłowe předstajenja abo hinaše zarjadowanja. Wjetšina z nich pak wjele čita abo wěnuje so intensiwnišo swojemu hobbyjej, štož do toho snano w tej měrje njemóžachu. Po analyzy Zwjazkoweho statistiskeho zarjada su dźensa starši ludźo tak aktiwni kaž ženje do toho. Kóždy štwórty wuměnkar hišće tři lěta­ dlěje dźěła, hač by to dyrbjał. Štóž pak ma wnučki, wobhladuje jako naj­wažniše so wo nje starać.

Hinak je to pola Pěskečana Józefa Bělka, kiž swjećeše loni 80. narodniny. Dawno drje je docpěł wuměnkarsku starobu. Wšědnje rano napoł šesćich pak jemu budźak kaza, zo je načasu stawać. Ma dźě dypkownje w Rakecach na dźěle być, hdźež skutkuje jako domownik firmy Biberstein. Tež w tajkej wysokej starobje ma hišće dźěłowe zrěčenje.

„Bulwar“ klětu časowje rozšěrja

Donnerstag, 25. Oktober 2018 geschrieben von:

Wojerecy (KD/SN). Akciju „Bulwar Cyrkwinska hasa“, kotruž su we wobłuku lětušeje 750. róčnicy Wojerec přewjedli, chcedźa klětu wospjetować a samo na tři měsacy rozšěrić. To rjekny Dorit Baumeister ze cityjoweho managementa zawčerawšim na posedźenju Wojerowskeje měšćanskeje rady. Wona hódnoćeše předewzaće w juniju, jako organizowachu na Cyrkwinskej najwšelakoriše poskitki za wobydlerjow a wopytowarjow, jako wuspěšnu. To wobkrućichu jej tež na naprašowanjach­ mějićeljo wobchodow a pasanća. Klětu chcedźa do akcije w lěću tohorunja torhošćo před starej radnicu a Friedrichowu sobu zapřijeć a tak hišće wjace poskitkow pod hołym njebjom zmóžnić.

Měšćanscy radźićeljo zaběrachu so dale ze zwoprawdźenjom směrodajneho programa Wojerecy 2030. Kaž poradźowar města Andreas Kaufmann rozłoži, hižo prěnje z dohromady 74 zapisanych naprawow zwoprawdźeja. Mjez druhim wutwarja bywši Zusowy gymnazij na třičarowu wyšu šulu a saněruja statnu dróhu S 95 w Němcach. Dalše naprawy chcedźa wobydlerjam we wobłuku měšćanskeje dźěłarnički 28. nowembra we Łužiskej hali rozłožić.

Wikowarjo a kupcy spokojom

Donnerstag, 25. Oktober 2018 geschrieben von:
Wot lońšeho nalěća přewjeduja na Budyskich Žitnych wikach stajnje štwórtk tak mjenowane zelene a měšane wiki. Nětko chcyše měšćanska rada wědźeć, kak spokojom wikowarjo a kupcy z městnosću su. Wuslědki naprašowanja předpołožichu wčera měšćanskim radźićelam. Wot wjace hač 230 woprašanych bě 87 procentow z městnom spokojom, jeno 13 procentow wotmołwi z ně. Tohodla zamołwići w měšćanskim zarjadnistwje tuchwilu žanu přičinu njewidźa, na wikowych wustawkach sprjewineho města něšto změnić. Njewotwisnje wot toho dyrbja twarske njedostatki na Žitnych wikach wotstronić. Foto: SN/Hanka Šěnec

Kóždy ptak ma swoju kombinaciju

Donnerstag, 25. Oktober 2018 geschrieben von:

Łupoj (ABa/SN). Hižo wjacore tydźenje móžeš w Hornjej Łužicy zaso žorawje wobkedźbować. Na wotžnjatych kukuricnišćach, kotrež su za přichodne lěto hižo spřihotowane, namakaja wulke ptaki přeco hišće kukuricowe zornjatka a sej z nimi tukowe rezerwy za swój lět w nowembru do juha nažeru. Wokomiknje wjele žorawjow naraz wuhladaš. Mjez Łupoju a Radworjom bě jich njedawno wjace hač 160. Z dobrym dalokowidom bě spóznać, zo běchu mjez nimi tež někotre z rynkami. Při tym jednaše so wo starše a młódše eksemplary z Čěskeje. Žorawje su woznamjenjene ze šěsć plastikowymi rynkami na nohomaj. Na lěwym boku swědča běła, čerwjena a znowa běła rynka wo tym, zo pochadźa ptak ze susodneho słowjanskeho kraja. Z kombinacije barbow na tamnej noze móžeš wučitać, wo kotreho ptaka so dokładnje jedna, přetož kóždy ma hinašu kombinaciju.

Wodnjo nažeru so žorawje na kukuricnišćach. Prjedy hač so ćmička, leća wone z wulkim wołanjom ma swoje přenocowanske městno. Wosebje woblubowane su haty pola Komorowa blisko Klukša kaž tež pola Klětnoho.

Z chorownju jubilej swjećić

Donnerstag, 25. Oktober 2018 geschrieben von:

Składnostnje 120lětneho wobstaća Woje­rowskeje chorownje poskićeja pacientam a personalej domu kaž tež zajimcam z města a wokoliny we wobłuku swjedźenskeho tydźenja přednoški.

Wojerecy (SN/mwe). Hač do jutřišeho pjatka móža so zajimcy přeco popołdnju na wjacorych přednoškach we Wojerowskej klinice łužiskeje jězoriny wobdźělić. Kaž nowinski rěčnik chorownje Gernot Schweitzer Serbskim Nowinam zdźěli, běchu dotalne zarjadowanja wo modernej diagnostice, wo neurologiji. wo črjewje a božej ručce derje wopytane. „Přeco něhdźe 30 zajimcow je přewšo zajimawe a informatiwne wyšich a šeflěkarjow sćěhowało“, Schweitzer wuzběhny. Tak budu zajimcow bjezdwěla tež jutřiše přednoški wo schorjenju kože, na temu „mužaca medicina – tež mužojo bywaja starši“ a wo operaciji wucha putać.

Krótkopowěsće (25.10.18)

Donnerstag, 25. Oktober 2018 geschrieben von:

Wuslědki ewaluacije wozjewić

Choćebuz. Aktualne wuwiće nastupajo ewaluaciju Witaj-wučby w Delnjej Łužicy je prezidij Domowiny z předsydstwom župy Delnja Łužica wčera w Choćebuzu rozjimał. Fachowe ministerstwo njeje do­tal­ cyłkowne wuslědki zjawnje předsta­jiło. „Wočakujemy, zo zhonimy wuslědki. Bjez nich njeje móžno trěbne naprawy za braniborske serbske šulske kubłanje postajić“, rjekny předsyda Domowiny Dawid­ Statnik po zetkanju.

Film wo pomnikach widźeli

Pančicy-Kukow. 40 čłonow Domowinskeje skupiny Pančicy-Kukow a dalšich zajimcow wobhlada sej wčera film Alfonsa Kuringa wo nabožno-narodnych pomnikach w swojej wsy. 82lětny je wjace hač 40 swjatych křižow a kapałkow dokumentował. Połojcu z nich, kotrež su přewažnje we wobsydstwje serbskich swójbow, zapřija chronist do hodźinskeho fil­ma­. Tamnu połojcu předstaji wón w dalšim filmje němskim wobydlerjam.

Naćisk plana rozjimali

Anzeige