Krótkopowěsće (29.12.23)

Freitag, 29. Dezember 2023 geschrieben von:

Serbska murja bilancowała

Jaseńca. Lěto 2023 bě najwuspěšniše w dotalnym dźěle towarstwa Serbska murja. Tole wuchadźa z bilancy předsydstwa na wčerawšej hłownej zhromadźiznje w Jaseńcy. Předewšěm mjenowachu widejowy format Stawiznak a wubědźowanje Kwisk a trysk. Wobaj projektaj chcedźa klětu wospjetować a dale wuwiwać. Za jeje skutkowanje spožči so Serbskej muri lětsa Myto Domowiny za dorost.

Serbski sejm prosy wo dary

Njebjelčicy. Serbski sejm prosy Serbow wo pjenježnu podpěru, zo bychu klětuše druhe listowe wólby ludoweho zastupnistwa přihotować móhli. Kaž w aktualnej zdźělence rěčnicy Jadwigi Pjacec rěka, trjeba čestnohamtsce skutkowacy gremij dary za zjawnostne dźěło a wusyłanje wólbnych podłožkow. Daty wotpowědneho konta su na internetnej stronje www.serbski-sejm.de přistupne.

Amoka dla mjenje wohnjostroja?

Čehodla so ličce howjadow narězatej?

Donnerstag, 28. Dezember 2023 geschrieben von:

Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu ­přinošować chce naša serija z pokiwami z weterinarneje mediciny. (22)

W zymje su hižo naši prjedownicy skót, kotryž běchu přez lěćo kormili, rězali a wulki swjedźeń wuhotowali. Swinjo, wowca abo howjado bu pod fachowym wóčkom rěznika zarězane, a wjetšina swójbnych při předźěłanju pomhaše. Mjeztym pak kiwa wopyt z weterinarneho hamta, zo by so mjaso zarězaneho skoćeća dźiwajo na zakoń wo hygienje přepytowało. W Němskej je jedyn z najlěpšich systemow přepytowanja zežiwidłow, přez čož je so škit wužiwarjow w zašłych lětach jara polěpšił.

Při přepytowanju zarězaneho skotu kładźe so wažnosć na wosebite dźěle. Zasadnje maja wšitke dźěle na městnje přepytowanja być. Dychnica, płuca, wutroba, jatra a jěrchenki so stajnje přepytuja. Su-li wěste lymfowe suki napadne, so dalše wokoło črjewow narěznu. Pola koni a swinjow wozmje pruwowar čwak mjasa za přepytowanje na trichiny sobu.

Po cunich hodźoch twjerdy rock

Donnerstag, 28. Dezember 2023 geschrieben von:
Mjeztym dźesaty raz je towarstwo barakka koncert pod hesłom „Hody nimo – punk rock fever“ w Nukničanskim młodźinskim klubje wuhotowało. Něhdźe 200 wopytowarjow rejowaše k rockowym, psychedeliskim a punkowym zynkam dohromady štyrjoch skupin Abfahrt West (Budyšin), Ex-White (Halle nad Solawu), Dispo (Lipsk) a Circolo Viciozo (Berlin, na wobrazu) z huslerjom-spěwarjom Paulom Geigerzählerom. Po tym postara so DJjowe duwo k.o.nsti wo dobru naladu hač do rańšich ­zerjow. Foto: Bosćan Nawka

Boža mša w radiju

Donnerstag, 28. Dezember 2023 geschrieben von:

Smochćicy. Radijowy sćelak MDR Kultur wusyła Nowe lěto, 1. januara 2024, w 10 hodź. Božu mšu live z cyrkwje Smochčanskeho kubłanišća swjateho Bena. Celebrantaj staj farar Michael Kleinert a tachantski kapitular Bernhard Dittrich, kiž zdobom prěduje. Hudźbne wobrubjenje na starosći změje chór muži Drježdźanskich kapałnikow. Na pišćelach zahraje ­Felix Wunderle.

Tež klětu budu zhromadnje spěwać

Budyšin. Wjednistwo Zwjazka serbskich spěwarskich towarstwow (ZSST) tež w lěće 2024 zhromadne spěwanje planuje. Přichodne terminy su 9. januara, 6. februara, 5. měrca, 9. apryla, 7. meje a 4. junija. Zajimcy zetkaja so wot 18 do 20 hodź. w chórowej rumnosći Serbskeho ludoweho ansambla. Organizatorojo wokoło Lubiny Žurec-Pukačoweje nadźijeja so mnohich wopytowarjow.

Policija (28.12.23)

Donnerstag, 28. Dezember 2023 geschrieben von:

Zadobywanje zwrěšćiło

Lutobč. Bjezmała njelubozne hody bychu wobydlerjo jednoswójbneho domu w Lutobču měli. W nocy na druhi dźeń hód chcychu so pola nich njeznaći zadobyć. Skućićeljo spytachu chěžne durje wotamknyć, štož so jim na zbožo njeporadźi a tuž so zaso zminychu. Přiwšěm nasta něhdźe tysac eurow škody. Hač wobydlerjo doma njeběchu abo hač su spali, z policajskeje rozprawy njewuchadźa.

„La bomba“ a „Dum bum“ strašnej

Donnerstag, 28. Dezember 2023 geschrieben von:

Dokelž je silwester lětsa njedźelu, je so předań pyrotechniki hižo dźensa započała. Při tej składnosći zwjazkowa policija warnuje, sej zakazane praskotaki we wukraju kupić.

Budyšin (SN/MWj). Posledni dźeń lěta so bliži. Mnozy zwjazuja z nim silwesterske praskotanje. Runje w namjeznym regionje ludźo składnosć wužiwaja a sej praskotaki w susodnej Pólskej abo Čěskej kupuja. Ale kedźbu, štož kaž normalny praskotak, raketa abo pyrotechniska baterija wupada, móže jara strašna wěc być, zwjazkowa policija w nowinskej zdźělence warnuje. Často mjenujcy njewužiwa so čorny proch, ale hinaša maćizna, kotraž je industrijnemu rozbuchadłu jara podobna. Samo „La bomba“ abo „Dum bum“, kotrež su zdźěla wjele mjeńše hač němske praskadła, móža k ćežkim zranjenjam wjesć.

Zhromadnje ze šulerjemi Worklečanskeje zakładneje šule „Michał Hórnik“ podachu so wobydlerjo Smječkečanskeho Domu swj. Jana krótko do hód w duchu na puć, zo bychu adwentnu hwězdu pytali. Poboku bě jim knjeni Móškowa, kotraž jim puć poka­zowaše. Ze spěwami šulskeho chóra, solistiskimi přinoškami a wuběrnymi hrajerjemi dachu sej přihladowarjo połhodźinski ­adwentny program lubić. Mócny a dołhi přiklesk bě sobuskutkowacym najrjeńši dźak. Z přidawkom a zhromadnym spěwom ­tele adwentne popołdnjo w Smječkecach wuklinča. Foto: Andrea Jakubašec-Hrjehorjowa

Krótkopowěsće (28.12.23)

Donnerstag, 28. Dezember 2023 geschrieben von:

Politika měła skónčnje jednać

Drježdźany. Rjemjeslnicy w Sakskej žadaja sej dołhodobne rozrisanja za problemy město małych krokow. Za to pobrachuje politice na runinje Zwjazka „hišće móc“, kritizuje Jörg Dittrich, prezident Drježdźanskeje rjemjeslniskeje komory a Sakskeho foruma rjemjeslnikow, w lěto 2023 bilancowacej zdźělence w Drježdźanach. Na přikład so njeje poradźiło běrokratiju wobknježić.

Podpěra za wosom projektow

Budyšin/Wostrowc/Wulke Hendrichecy. Wosom projektow Budyskeho komiteja z.t., Załožby mjezynarodny zetkawanski centrum Marijiny Doł a Wobswětoweje knihownje Wulke Hendrichecy z.t. spěchuje Zwjazkowa załožba za přeslědźenje diktatury SED klětu z dohromady 101 111 eurami. Jedne ćežišćo su zarjadowanja wo ludowym zběžku w NDR 17. junija 1953, dalše wudobywanje a zmilinjowanje brunicy w sakskim krajnym třiróžku.

Młodostni narěče dokumentuja

Poslednje woknješko z dźěćacym přinoškom

Mittwoch, 27. Dezember 2023 geschrieben von:

Sernjany (SN/AN). Dwaj dnjej do patoržicy su w Sernjanach poslednje woknješko žiweje adwentneje protyki wočinili. Dźěći Mětec a Barčec swójby předstajichu hodownu stawiznu Björna Steffensa wo małej hwězdźe, kotraž chcyše wosebita być. Kostimy a rekwizity za to běchu sej sami wumyslili a zhotowili. Tež za přichwatanych hosći su překwapjenku přihotowali.

Wćipni sedźachu wosebje najmłódši na ławkach blisko małeho jewišća, kotrež běchu sej w Mětec garaži natwarili, a slědowachu napjeći powědarjej a hrajerjam. Po předstajenju rozdźělichu hrajerjo hosćom słódne poprjančki a selowe pječwo w formje hwězdow za wupyšenje hodowneho štoma. Wothłós na žiwu adwentnu protyku bě w cyłym hodowniku stajnje dosć wulki. Wobdźělnicy móžachu akciju ze swójskim přinoškom wobohaćeć. Tak změja Sernjančenjo zawěsće tež klětu zaso zarjadowanje w adwenće, kotrež wjesnu zhromadnosć w zymnym počasu skrući.

Duby skóncowali

Mittwoch, 27. Dezember 2023 geschrieben von:
Kamjenc (SN/MWj). Po wšěm zdaću 18. decembra su njeznaći na Kamjenskej Pastwinej horje při pućiku do Lückersdorfa tři čećikate duby (Traubeneiche) skóncowali. Kaž fachowc při blišim přepytowanju zwěsći, bě něchtó zdónki najprjedy narubnył, tak zo so wone pozdźišo při sylnym wětřiku złamachu. Štomy je město Kamjenc hakle před štyrjomi lětami sadźić dało. Mjeztym su so wone derje přimnyli a mějachu dobru šansu, wulku starobu docpěć. Tohodla město Kamjenc nětko wobydlerjow a wuchodźowarjow, kotřiž su snano něšto podhladneho wobkedźbowali, wo wotpowědne informacije prosy. Pokiwy přijimuja pod telefonowym čisłom 03578/ 379 101.

Serbska debata

Neuheiten LND