Dwurěčnje na stawizny dopominać
Wjesne srjedźišćo w Němcach ma so žiwe, zelene a originelne stać. We Wojerowskim wjesnym dźělu bydli 673 ludźi, za kotrychž chcedźa centrum wsy zachować.
Němcy (AK/SN). Wjesny předstejićer Němcow Eugeniusz Diesterheft rjekny wčera na rozmołwje z nowinarjemi: „Nazymu dóstachmy informacije wo wěstych spěchowanskich srědkach.“ Prěnjotnje planowali běchu wjesne srjedźišćo w lěće 2018. Nětko chce město Wojerecy zhromadnje z wjesnym dźělom projekt konsekwentnje zwoprawdźić. Cyłkowne kóšty wučinjeja 300 000 eurow. Město nadźija so 80 procentow spěchowanja z programa Leader w regionje łužiska jězorina. Wone chce wotpowědnu próstwu stajić a planuje swójske srědki z měšćanskeho etata.
Konsum stała so anonymnje
Smjerdźečan Gerat Róbl pomha wot drogow wotwisnym
Smjerdźaca (aha/SN). Lědma štó móže so tak spontanje kaž Smjerdźečan Gerat Róbl na to dopominać, što bě dźensa před 34 lětami. Tón dźeń je jemu tak wažny, dokelž bě so wot woneje wutory jeho žiwjenje změniło. Wot toho dnja wón ani kapki alkohola wjace pił njeje. Swoju wotwisnosć přewinyć zamó z krutej wolu a ze wšědnej modlitwu.
Wědźo, kak ćežko to za njeho bě, a znajo problemy mnohich dalšich je so njeposrědnje po towaršnostnym přewróće rozsudźił samopomocnu skupinu zarjadować. Spočatnje zetkawachu so w Ralbicach – najprjedy běchu šesćo. Mjeztym je jich něhdźe dwaceći, kotřiž so w bróžni Rakečanskeje fary zetkawaja.
Krótkopowěsće (05.05.21)
W centrumomaj dlěje šćěpja
Budyšin. Šćěpjenskej centrumaj w Kamjencu a Lubiju matej nětko hač do kónca julija dźěłać, kaž to nowe koronapostajenje sakskeho knježerstwa předwidźi. W Budyskim wokrjesu zwěsćichu wčera 27 natyknjenjow z wirusom a tři smjertne pady. Tu wučinja dźensniša incidenca po RKI 192,8. Wokrjes Zhorjelc měješe wčera 63 infekcijow a dweju w zwisku z koronu zemrěteju. Incidenca po RKI je tam dźensa 165,4.
Thespis-centrum dale spěchuja
Budyšin. Sakske socialne ministerstwo je spěchowanje Thespis-centruma hač do kónca lěta připrajiło. Projekt Budyskeho Němsko-Serbskeho ludoweho dźiwadła ma so přichodnje bóle jako „Thespis on tour“ na region wusměrjeć. Partnerojo budu mjez druhim Kamjenski Lessingowy muzej, Hórnikečanska Energijowa fabrika a Budyske wopomnišćo.
Jako předsydka wobkrućena
Policija (04.05.21)
Pytaja paducha bleški limonady
Budyšin. Na tankowni při Budyskej Róžowej bě muž sobotu wječor wokoło sedmich blešku limonady spakosćił. Policija so z padom zaběra a prosy swědkow so pod tel. čo. 03591 / 356 0 přizjewić. Škoda wučinja 2,15 eurow. Za čas padustwa běchu wjacore wosoby w tankowni. Paduch bě markantny kabat z kapucu woblečeny.
Pjenjezy na prawym městnje wudać
Budyšin (CS/SN). Budyscy měšćanscy radźićeljo dyrbjachu njedawno rozsudźić, za čo hižo planowane pjenjezy na kóncu wudadźa. Předwidźane dotal bě, připrawić škit před słóncom na južnym boku Budyskeje sukelnicy, zachować areal za padłych sowjetskich wojakow a přerjadować Rathenauwowe naměsto.
CDU pak bě próstwu stajiła, wužiwać pjenjezy za Caritu a Diakoniju jako přiražku. Wyši měšćanosta Alexander Ahrens (SPD) žadanju znapřećiwi. Wón rjekny, zo so běrowy komornistwa při słóncu tak wohrěwaja, zo horcota hižo znjesliwa njeje. Při tym runje tam dźěłacy etat zestajeja, kotryž sej wjetšina chwali. Tež srědki za sowjetske pohrjebnišćo skrótšić je wopačne znamjo.
Ruscy partnerojo kładu wulku wažnosć na tajke wopomnišća. Ahrens by so hańbował, dyrbjał-li ruskej delegaciji zanjechane pohrjebnišćo pokazać, a potwjerdźi: „Ruska njeje naš njepřećel!“
Přichodnje změja dźěći wjace móžnosćow kreatiwity
Nowotwar Čornochołmčanskeho dźěćaceho dnjoweho přebywanišća „Krabat“, kotrež je w nošerstwje Dźěłaćerskeho dobroćelstwa (AWO), nětko po zymskej přestawce dale postupuje.
Čorny Chołmc (AK/SN). Klětu w januaru maja dźěći a personal z tuchwilneho stejnišća w Domje Davida Traugotta do noweho domicila při cyrkwi přećahnyć. To je Mirko Pink, měšćanosta za šule, dźěćace dnjowe přebywanišća a socialne naležnosće města Wojerec wčera na zběhance za projekt wobkrućił. Načasny płony twar ma bjez barjerow być. Aktualna kapacita leži pola dohromady 43 městnow, 20 we žłobiku a 23 w pěstowarni. Ličba dźěći w zarjadnišću, w kotrymž tež serbšćinu posrědkuja, bě minjene lěta dosć stabilna. Wo serbsku skupinu dwu- do štyrilětnych staratej so kubłarce Silvia Stephan a Daniela Stockfisch.
Sadowcy sadźeli
Połčnica (SN). Na ležownosći centruma seniorow w Połčnicy su Łužiske kliniki 12 sadowcow sadźili. Cyle wědomje wuzwolene su družiny, kiž su we Łužicy hižo přez lěta zadomjene a kotrež su wuměnjenjam klimy přiměrjene. Sadowcy narunaja tam mjeztym chore abo stare štomy. Hižo w februaru běchu započeli pódu přihotować. „Naš zaměr je dalše štomy sadźeć, zo by nastał charakter sadowcoweje łuki“, rozjasni jednaćel zapadołužiskeje towaršnosće hladarnjow a krótkohladanja Reiner E. Rogowski. „Sadowcy tyja biodiwersifikaciji, domjacemu swětej ptačkow kaž tež škitej insektow.
Pućowanja wotprajene
Pytaja dale za slědami
Dotal štyri projekty wo měsće nad Čornym Halštrowom přewjedli
Wojerecy (SiR/SN). Projekt Wojerowskeje Kulturneje fabriki (Kufa) „Pytać za slědami“ wotmě so mjeztym štwórty króć. Tema, z kotrejž su so wobdźělnicy zaběrali, rěkaše „Dźěćatstwo w na dźěći najbohatšim měsće NDR Wojerecach“.
Na ekskursiji tójšto zhonili
Wuspěšna ekskursija po lěsu w najrjeńšim nalětnim słónčku njedaloko Grodka měješe chutny pozadk. Łužiske lěsy ćerpja pod wulkimi škodami, kotrež je mjeztym wjacore lěta trajaca suchota zawiniła.
Grodk (JoS/SN). Lěsne zawodowe zhromadźenstwo „Wuchodne koło Grodk“ (FBG) je minjeny kónc tydźenja na swoju tradicionalnu kóždolětnu ekskursiju přeprosyło. Zajim wobsedźerjow lěsa za temu „Je hižo pjeć do dwanaćich za naše lěsy?“ běše přemóžacy. Předsyda FBG Ulf Lutzens witaše jich na wulkej lěsnej swětlinje. Městnosć pod milinowodom běchu wot wobrosta wurjedźili, zo bychu wšitcy zajimcy pódla być móhli, najebać postajenja za škit před koronu.
