Šulski puć přez zwjazkowu dróhu
Dźěći z Brězynki móžachu dotal na tym boku puća do šulskeho busa zalězć, kiž k wjesce pokazuje. Po jutrownych prózdninach to hižo móžno njebudźe. Starši a wjesna rada nochcedźa so z tym wotnamakać.
Brězynka (UM/SN). Tójšto wobchada je na tymle dnju dopołdnja na zwjazkowej dróze B 156 při wotbóčce do Malešanskeho wjesneho dźěla Brězynka. W dołhich rynkach pjeć do dźesać jězdźidłow, mjez nimi wjele nakładnych awtow, přijědźe wobchad z wobeju směrow. „A to je dźensa hišće poměrnje mało wobchada“, praji Angelika Kasper. Wona je čłonka wjesneje rady za Brězynku, Delnju Hórku a Dobrošecy a so starosći wo šulske dźěći: Wone dyrbja po jutrownych prózdninach wot přichodneje póndźelu kóždy šulski dźeń zwjazkowu dróhu přeprěčić, zo móhli do šulskeho busa zalězć.
Z wosebitej akciju podpěruje skupina žonow z Kamjenca a wokoliny ...
Wšitcy du na „Wjesołu póndźelu“
Wjace hač 50 Budyskich zarjadnišćow, towarstwow a zjednoćenstwow přeprošuje přichodnu póndźelu, 8. apryla, na Budyske Žitne wiki. Wopytowarjo móža „Wjesołu póndźelu“ aktiwnje sobu wuhotować.
Budyšin (SN/MiR). Nowy rjad zarjadowanjow „Happy Monday – Wjesoła póndźela“ su towarstwa, iniciatiwy, socialne a dobroćelske zwjazki, cyrkwje a kulturne zarjadnišća zhromadnje přihotowali. Mjez nimi je tež Domowina. Hač do 10. junija so zarjadowanja na cyłkownje dźewjeć póndźelach na wšelakorych městnach Budyšina wotměwaja.
Tutu póndźelu dožiwja wopytowarjo wot popołdnja w 17 hodź. pisany swět hudźby, klasiku, pop, bras a rockom. „Sym žehliwy přiwisnik našeje demokratije“, praji tenor Björn Casapietra z Berlina, syn Herberta Kegela, kotryž bě sławny dirigent NDR a šef Drježdźanskeje filharmonije. Casapietra njezanjese jenož sławne „Hallelujah“ Leonarda Cohena ale tež někotre němske spěwy. „Je mi wulka česć, na tutym dnju w Budyšinje mjezwočo a hłós pokazać směć.“
Krótkopowěsće (05.04.24)
Wjace wučby wupadnyło
Drježdźany. Na sakskich šulach je w prěnim šulskim połlěće wjace wučbnych hodźin wupadnyło. To bě nimale 8,8 procentow, kaž ze statistiki kultusoweho ministerstwa wuchadźa. Za něhdźe 40 000 wupadnjenych wučbnych hodźin ma ministerstwo warnowanski stawk wuwučowacych loni w nowembru a decembru za hłownu přičinu.
Wobkrućenje njerozumja
Choćebuz. Wobswětowa syć Zelena liga kritizuje, zo njeje planowanje fosilneje płunoweje milinarnje w Janšojcach energijopolitisce sćěhujomne wobkrućene. Přiwjazanje na płunowu abo wodźikowu syć je w Janšojcach nadpřerěznje drohe a analyza kóštow a wužitka za planowane zjawne spěchowanje płunowodow pobrachuje, rěka w zapodatym stejišću Zeleneje ligi předewzaće nastupajo.
Wo projektach so wuměnja
Nowe wotpočnišćo za putnikow
Policija (04.04.24)
Štyrjo zranjeni po njezbožu
Worklecy. Wjacori zranjeni a tójšto wěcneje škody bě wuslědk wobchadneho njezboža, kotrež je so wutoru na křižowanišću pola Worklec stało. 41lětna wodźerka VWja bě tam do směra na Smječkecy po puću. Na křižowanišću njewobkedźbowaše wona předjězbu 40lětneho šofera Škody a do njeho zrazy. Při tym bu Škoda hišće do transportera typa Mercedes 35lětneho muža storčeny. Wšitcy třo wodźerjo kaž tež sobu jěduce dźěćo w VWju so zranichu. Jich dowjezechu do chorownje. Škoda wučinja 35 000 eurow.
Darować na dobro swójbow
Z crowdfunding-akciju zběraja pjenjezy za wobnowjenje hrajkanišća
Smječkecy (SN/MiR). W Smječkecach je nuznje trjeba tamniše hrajkanišćo wobnowić. Worklečanska gmejna pak tuchwilu na zakładźe hospodarskeho plana naprawu podpěrać njemóže. „Hrajkanišća słušeja do dobrowólnych nadawkow gmejnow“, praji wjesnjanosta Clemens Poldrack (njestronjan) na naprašowanje SN, „my pak nimamy za tajke naprawy tuchwilu žane pjenjezy. Wjeselu so pak jara, zo su wobydlerjo iniciatiwu zrodźili a pjenježne dary zběrali.“
Koleso w garaži zamknyć
Wojerecy (KD/SN). Přemyslena infrastruktura za kolesowanje ma pomhać, zo by wjace ludźi wšědny dźeń koleso město awta wužiwało. Za to su nimo derje wutwarjenych kolesowanskich pućow tež garaže trěbne, zo móžeš swoje koleso wěsće zamknyć, hdyž chceš z busom abo ćahom dale jěć. Tajku garažu maja nětko při Wojerowskim dwórnišću, hdźež su ju tele dny zjawnosći přepodali. W njej je na hornim poschodźe městno za wosom kolesowa abo e-bikeow w jednotliwych boksach. Deleka je runje telko boksow, ale stajnje za dwě kolesy, rozłoži měšćanosta Mirko Pink.
Sobudźěłaćerka Měšćanskeho zarjadnistwa Gesine Wittkowski doda, zo móžeš na delnich městnach elektrokolesa nabiwać. Wotnajeć móžeš boksu štyri hodźiny za jedyn euro, cyły dźeń za 1,50 eurow, měsačnje, štwórćlětnje abo tež na cyłe lěto. Štóž je boksu předołho wobsadźił, móže za nju tež dodatnje zapłaćić. Kolesowarjo móža swojeho groćaneho konika dźakowano techniskemu nastrojej bjez wulkeje prócy na horni poschod garaže sunyć. Kelko městnow je runje swobodnych budźe bórze pod vvo-online/service/b+r internetnje widźeć.
