Wulka kónčina wohrožena

Dienstag, 06. April 2021 geschrieben von:

Z přidatnymi srědkami chcedźa afrisku swinjacu mrětwu wobmjezować

Zhorjelc (AK/SN). Wokrjes Zhorjelc so hišće bóle prócuje wudyrjenu afrisku swinjacu mrětwu wobmjezować. K tomu je so wokrjesny sejmik minjenu srjedu wuznał. Z wjetšinu 53 hłosow schwalichu radźićeljo wudawki zwonka plana we wobjimje 1,535 milionow eurow. Štyrjo běchu přećiwo tomu, štyrnaćo so hłosa wzdachu. Srědki maja z připokazankow Sakskeje za runje tónle zaměr přińć. Z mjenowanej sumu móže Zhorjelski wokrjes prewentiwne a wotstronjowace naprawy financować, mjez druhim za to, wohrožene pasma dohladować. Wjetši dźěl srědkow ma so lokalnje wužiwać, na přikład za to zahinjenu dźiwinu nańć, kadawry rumować a wotstronić, po zakonju wo zwěrjacych mrětwach z nich proby brać a je epidemiologisce přepytować. Dźěła wukonjeć ma prěnjorjadnje wotpowědnje wukubłany a wuhotowany personal.

Nowe postajenja

Dienstag, 06. April 2021 geschrieben von:

Budyšin (SN/JaW). W Budyskim wokrjesu płaća wot dźensnišeho nowe wolóženske postajenja nastupajo škit před koronawirusom. Kaž Budyski krajnoradny zarjad w nowinskej zdźělence informuje, móža wšak „wokrjesy njewotwisnje wot incidencneje hódnoty same wolóženja z wotpowědnymi hygienowymi a testowymi konceptami přizwolić. Postajenja płaća najprjedy hač do 18. apryla. Ručež pak wućeženje chorownjow z koronowymi pacientami po wšej Sakskej 1 300 překroči, wolóženja zaso cofnjemy.“ Tuchwilu hladaja w sakskich klinkach cyłkownje 945 na kowid-19 schorjenych.

Žony wjesołe poselstwo wozjewili

Dienstag, 06. April 2021 geschrieben von:
Sydom holcow a žonow, zhotowane w tamnišej połžarowanskej drasće, je w Slepom znowa wjesołe poselstwo wo zrowastanjenju Jězusa Chrystusa wozjewjało. Tak ­zaklinčachu jutrowničku hižo rano w 6 hodź. při spěwarskich ławkach před Slepjanskej cyrkwju jutrowne kěrluše w Slepjanskej serbšćinje. Na to sćěhowaše w Rownjanskej kapale jutrowny nyšpor, kotryž je Manfred Hermaš dźeržał. Na kóncu nyšpora stajachu swójby swěčki na rowy swojich zemrětych. Tradicionalny rańši ­nyšpor jutrowničku w 7 hodź. na Rownjanskim kěrchowje je wažny dźěl jutrowneho spěwanja. Foto: Joachim Rjela

Krótkopowěsće (06.04.21)

Dienstag, 06. April 2021 geschrieben von:

Nimale tysac ludźi inficěrowanych

Budyšin. Dohromady 358 nowoinfekcijow z koronawirusom su wot zeleneho štwórtka hač do wčerawšeho w Budyskim wokrjesu zwěsćili. 994 wosobow je tuchwilu inficěrowanych. 65 pacientow lěkuja w chorownjach, z toho 16 na intensiwnej staciji. Ličba smjertnych padow powjetši so na 806. RKI je tu dźensa incidencu 166,1 podał, za Zhorjelski wo­krjes 132,2.

Płoniny za fotowoltaik pytane

Podstupim. Zaměr, do lěta 2030 ně­hdźe 3 500 megawattow z pomocu solarnych připrawow produkować, je Braniborska z nimale 38 900 připrawami hižo docpěła. Z instalowanym wukonom 3 700 megawattow móža milion domjacnosćow jedne lěto z milinu zastarać. Nětko pytaja nowe płoniny za dalše solarne připrawy. Rozmysluja, łužiske jězory z brunicowych jamow za płuwace připrawy wužiwać.

Linguist wohroženu rěč škita

Policija (01.04.21)

Donnerstag, 01. April 2021 geschrieben von:

Při napřemojězdźenju znjezbožił

Serbske Pazlicy. Lochkomyslnosć je předwčerawšim wječor w Serbskich Pazlicach k ćežkemu wobchadnemu njezbožu wjedła. Něhdźe w 19 hodź. chcyše tam 17lětny młodostny najskerje pokazać, zo zamóže ze swojim kolesom runje tak spěšnje jěć kaž jeho přećel na mopedźe. Nadobo pak rjećaz kolesa wotskoči. Młodźenc zhubi kontrolu nad kolesom, ­padny na kromje puća a so ćežko zrani. Wuchowanski helikopter dowjeze jeho do chorownje. Kaž Zhorjelska policajska direkcija informuje, wučinja škoda na kolesu sto eurow.

Biblioteka z nowym poskitkom

Donnerstag, 01. April 2021 geschrieben von:
Kolesowanske přewodniki „Bikeline“ wupožčeja wotnětka w Kamjenskej Lessingowej bibliotece. Kompaktne, před dešćom škitane a njetorhace so publikacije skića kolesowym dowolnikam dokładne karty, wopisanje čary, adresy přenocowanskich móžnosćow a dalše wužitne informacije. Tak móžeš so mjez druhim na slědy ­Theodora Fontany podać, podłu bywšeje Berlinskeje murje kolesować abo po Sprjewinym kolesowanskim puću jěć. Nad tymle poskitkom so tež předsyda nowozało­ženeho spěchowanskeho towarstwa biblioteki Wolfgang Melzer a mandźelska Karin wjeselitaj. Foto: Marion Kutter

Zběraja pjenjezy za dom kata

Donnerstag, 01. April 2021 geschrieben von:

Bóščanska hornčernja rjanu ideju k podpěrje projekta zrodźiła

Njeswačidło/Bóšicy (CS/SN). Projektowa skupina Njeswačanskeho towarstwa Přećeljo kultury a domizny je sej naročny zaměr stajiła. Jeje čłonojo proša wo dary, zo móhli bywši dom kata z Lišeje Hory kaž planowane při Chasowskim wětrniku stajić. Tuchwilu je rozebrany dom w rudnohórskej ćěslerni. Wudawki za to, projekt zwoprawdźić, trochuja na něhdźe 97 000 eurow. Přizwolene maja mjeztym 50 000 eurow ze spěchowanskeho hornca Europskeje unije. Diferencu chce towarstwo z darami zwjesć. Při tym pomha mjez druhim Budyska wokrjesna lutowarnja we wobłuku Akcije 99 škričkow. Kóždy dar w hódnoće pjeć hač do sto ­eurow chce lutowarnja podwojić. Na te wašnje chcedźa 25 000 eurow nazběrać. Wo aktualnym stawje darowanskeje akcije móža so zajimcy při zachodźe do Njeswačanskeho hrodoweho parka wobstajnje informować.

Online do muzeja

Donnerstag, 01. April 2021 geschrieben von:

Kamjenc. Muzej zapadneje Łužicy w Kamjencu drje wostanje dale zawrjeny, onli­ne pak poskića tam srjedu, 7. apryla, w 19 hodź. archeologiski přednošk. Archeologowka Jasmin Kaiser porěči wo ritualach chowanjow a wopominanja wot kamjentneje doby hač dodźensa. Wuchadźišćo jeje přednoška je prehistoriske pohrjebne polo pola Delnjeje Kiny, hdźež móžachu dźěle pochowanskich ritualow rekonstruować. Zajimcy njech přizjewja so za přednošk z mejlku pod a dóstanu potom trěbne daty.

Poskića kubłanski tydźeń

Rozrisanje tola hišće našli

Donnerstag, 01. April 2021 geschrieben von:

Njebjelčicy (JK/SN). Po tym zo Serbske Nowiny w swojim wudaću z 30. měrca wo tym rozprawjachu, zo njejsu Njebjelčanscy gmejnscy radźićeljo na minjenym posedźenju přihłosowali, so ze swójskim podźělom na projekće k njewotwisnemu zastaranju z energiju wobdźělić, su tola hišće rozrisanje na dobro gmejny našli. Kaž wjesnjanosta Tomaš Čornak (CDU) našemu wječornikej zdźěli, je so Fraunhoferski institut jako jedyn z wobdźělenych na projekće, zwólniwy wuprajił stajić próstwu wo spěchowanje skutkowneje studije.

We wobłuku widejoweje konferency su hišće raz modality projekta a studije wobrěčeli a so na to dojednali, projekt z wočow njepušćić. Dokelž dyrbješe spěchowanska próstwa hač do 30. měrca na wotpowědnym městnje być, zo bychu ju schwalili, su dźeń do toho dołho sedźeli a próstwu sformulowali, Čornak informuje. Skónčnje ju dypkownje zapodachu, a tak je projekt hišće móžny.

Ideje su wažne

Donnerstag, 01. April 2021 geschrieben von:
Originelne projekty rodźa po wšěm zdaću originelne myslički, z kotrymiž spytaš ­wěste předewzaće zwoprawdźić. To płaći tež za dom kata, kiž su w Lišej Horje wot­twarili a kotryž chcedźa rekonstruowany při Chasowskim wětrniku zaso natwarić. Historiski dom na te wašnje zachować a jemu hódne městno dać žno je zajimawa ideja. Po puću ju zeskutkownić nětko dalše ideje rodźa, tak zo kóždy po swojich mocach pomha. Bóščanski hornčer zhotowja za to wosebite karančki z runje tak wosebitym kołkom. Darićelej ekskluziwne wodźenje po wětrniku a pozdźišo po natwarjenym domje kata poskićeć je runje tak rjana myslička, kaž za wěstu sumu modelowu hrjadu přewostajić. Za telko angažowanych sobuwojowarjow móžeš Njeswačanskemu towarstwu Přećeljo kultury a domizny jenož gratulować. Tajke ideje su dźensa znajmjeńša runje tak wažne kaž spěchowanske srědki, bjez kotrychž je tohorunja ćežko něšto zwoprawdźić. Marian Wjeńka

Serbska debata

Neuheiten LND