Krótkopowěsće (31.03.21)
Incidenca trochu woteběrała
Budyšin. Wot jutřišeho płaći w Sakskej nowe škitne postajenje koronawirusa dla, přistupne pod . W Budyskim wokrjesu rozprawjachu wčera wo sydom dalšich natyknjenjach, ličba smjertnych padow powjetši so wo dwaj na 801. RKI je dźensa incidencu 135,1 podał. W Zhorjelskim wokrjesu běchu wčera 103 nowoinfekcije, incidenca po RKI je tam dźensa 170,9.
Dźěłowe wiki zaso wožiwjeja
Budyšin. We wuchodnej Sakskej bě w měrcu 19 582 bjezdźěłnych, 251 mjenje hač měsac do toho. Kaž Budyska wotnožka agentury za dźěło dźensa informuje, je wjace wosobow swoju bjezdźěłnosć zakónčiło a nowe dźěło nastupiło. To zwisuje ze sezonalnym wožiwjenjom dźěłowych wikow. 4 731 socialneho zawěsćenja winowatostnych dźěłowych městnow je k dispoziciji.
Zwisk zasadnje polěpšić
Wobornicy w lěsu hašeć dyrbjeli
Policija (30.03.21)
Kolesa dźeń a požadaniše
Łuty. Z přichadźacym nalěćom so paduši nětko po wšěm zdaću přiběrajcy zaso na kolesa měrja. Tak su njeznaći we Łutach w nocy na njedźelu hnydom dwaj e-bikeaj pokradnyli. Jeju hódnotu trochujetaj wobsedźerjej na 5 000 eurow. Dalšej tajkej elektrokolesy zhubištej so minjeny kónc tydźenja w Radebergu. Z pincy wjacebydlenskeho domu běchu skućićeljo nimo toho nabiwanskej nastrojej, kolesowej kompjuteraj a zamkaj sobu wzali. Wěcna škoda wučinja 2 300 eurow. Slěbrobarbne koleso typa Merida Crossway LRS w hódnoće 600 eurow pokradnychu sobotu we Wjazońcy.
Wěnuja so serbskim temam
Budyšin. Pod hesłom „Serbja we Łužicy. Drěmacy pokład w Sakskej?“ přeprošuje Politiski kubłanski forum Sakska Konrada Adenaueroweje załožby přichodne tydźenje na wjacore onlinowe zarjadowanja z diskusiju. Wone wotměja so po štyrjoch wječorach, stajnje wot 18 hodź. přez platformu Zoom.
Prěnje budźe jutře, 31. měrca. Na nim porěčitaj rěčespytnica dr. Jana Šołćina ze Serbskeho instituta a nawoda Serbskeho gymnazija René Wjacławk na temu „Wysokoněmsce, saksce – serbsce? Rěč a identita we Łužicy“. Ze zarjadowanjemi pokročuja stajnje srjedu.
7. apryla přednošujetaj Chróšćanski farar Měrćin Deleńk a jednaćel Ludoweho nakładnistwa Domowina Pětr Syman Cyž wo „Křižerjach a ptačim kwasu. Serbska kultura mjez pandemijowym modusom a starosćemi wo eksistencu“.
14. apryla wěnujetaj so bywša zapósłanča zwjazkoweho sejma Marja Michałkowa a Slepjanski wjesnjanosta Jörg Funda temje „Jedyn lud, jedyn hłós!? Politiska participacija Serbow w Sakskej“.
Podarmo so prócowałoj
Planowanej projektaj z Njebjelčanskej gmejnu najprjedy raz njenastorča
Njebjelčicy (JK/SN). Nimale kaž na wabjenskej jězbje z pućowanskim busom drje čujachu so Njebjelčanscy gmejnscy radźićeljo na swojim zašłym posedźenju. Wo jich přichilnosć prócowaštaj so zastupjerjej dweju wšelakeju projektow. Jako prěni předstaji Marcel Bellmann z Budyskeje energijoweje agentury projekt „Skutkownje z krizy“. Jeho zaměr je zawěsćić gmejnje njewotwisne zastaranje z energiju, hladajo na strukturnu změnu we Łužicy a na dale napjatu energijowu situaciju. Bellmann prošeše radźićelow wo schwalenje podpěry za skutkownu studiju po energijowym koncepće gmejny, kotryž bě wona nazymu 2019 wobzamknyła. Studija je prěni krok k nimale awtarknemu zastaranju komuny z milinu. Njebjelčenjo měli so nětko z dźesać procentami na studiji wobdźělić, kotraž cyłkownje něhdźe 200 000 eurow płaći. Planowanje je, w prěnim kroku zapodać próstwu wo spěchowanske srědki. Termin za to je hižo tónle tydźeń.
Tak kaž dyrbiš doma awto abo tepjenje hdys a hdys přehladać dać, ...
Krućiše prawidła dla korony
Budyšin (SN/at). Wot dźensnišeho płaća w Budyskim wokrjesu zaso krućiše postajenja, kotrež předpisuje sakske škitne postajenje wo koronje za pad, zo je incidenca po Roberta Kochowym instituće we wokrjesu tři dny za sobu nad 100.
To nastupa zakaz pića alkohola na wot komunow postajenych městnach a wopušćenje bydlenja jenož wažneje přičiny dla. Tajke přičiny su we wosebitym hamtskim łopjenu wokrjesa wozjewjene a pod přistupne. W priwatnych rumnosćach smědźa so přisłušnicy jedneje domjacnosće jenož hišće z dalšej wosobu zetkać, dźěći hač do 15 lět su z toho wuwzate.
Wšitke dnja 8. měrca postajene wolóženja je Budyski krajnoradny zarjad cofnył. K tomu słuša zakaz skupinskeho sporta w towarstwach za dźěći a młodostnych. We wikowanju njesmědźa wobchody click & meet dlěje poskićeć. Krajnoradny zarjad pak mnohich naprašowanjow dla wobkrući, zo njejsu twarske wiki, zahrodne wiki, kwětkowe wobchody a kniharnje potrjechene, wone su za kupcow pod płaćiwymi naprawami hygieny dale wočinjene. Dale móžne su nimo toho wotewzaća a dodawanja, mjez druhim click & collect.
Krótkopowěsće (30.03.21)
Ličba schorjenych dale stupa
Budyšin. Budyski wokrjes je wčera wo 36 dalšich natyknjenjach z koronawirusom rozprawjał. Ličba schorjenych rozrosće wo 28 na 860, z kotrychž 37 stacionarnje lěkuja. Incidenca minjenych sydom dnjow na 100 000 wobydlerjow bě dźensa rano po RKI 168,8. Dalše testowanske centrumy su dźěłać započeli, tak w Budyšinje a Kulowje. W Zhorjelskim wokrjesu bě wčera jedna nowoinfekcija. Po RKI je incidenca dźensa 174,9.
Dale stacionarne kontrole
Berlin. Němska w koronakrizy zawjedźene stacionarne kontrole na mjezy k Čěskej republice wo dalšej dwě njedźeli podlěši. Wo tym je zwjazkowy minister nutřkowneho Horst Seehofer (CDU) dźensa w Berlinje informował. Kontrole k awstriskemu zwjazkowemu krajej Tirolej porno tomu dlěje njewobsteja.
Morawscy narodowcy aktiwni
Policija (29.03.21)
W nocy randalěrowali
Radwor. Na dompuću ze swjedźenja z wjacorymi wosobami su njeznaći w nocy na sobotu wokoło Radworja chětro randalěrowali a wěcy wobškodźeli. Kaž policija rozprawja, podachu so skućićeljo něhdźe w 2 hodź. z Miłkec přez Čorny Hodler a Chelno do směra na Mały Wjelkow. Po puću kóncowachu woni pokazowaki, sudobja za kwětki, wobchadne stołpy, płoty, listowe kašćiki a štomiki. Škoda wučinja nimale 1 500 eurow.
