Płaćizna za ležownosće jasna

Dienstag, 09. Februar 2021 geschrieben von:

Pančicy-Kukow (SN/MWj). Jednotliwe ležow­nosće w nowej bydlenjotwarskej štwórći při Srjedźnym puću w Pančicach-Kukowje chce tamniše gmejnske zarjadnistwo tele dny zwičnjeć započeć. Tole praji wjesnjanosta Markus Kreuz (CDU) na zašłym posedźenju gmejnskeje rady. Za to su minjeny štwórtk w njezjawnym posedźenju posledni zadźěwk wotstro­nili. Dotal mjenujcy njebě hišće jasne, kelko změja zajimcy za ležownosće płaćić. Kaž Kreuz na naprašowanje SN zdźěli, płaći kwadratny meter 67 eurow.

Nastaja nowe awtomaty

Dienstag, 09. Februar 2021 geschrieben von:

Parkowanje při Bjerwałdskim jězoru na wšelakore wašnje zapłaćić

Hamor (AK/SN). Za parkowanje při Bjerwałd­skim jězoru budu wopytowarjo bórze nowe parkowanske awtomaty wu­ži­­wać móc. Te chcedźa krok po kroku na městnje dotalnych dźesać awtomatow nastajić, kotrež bě Hamorska gmejna w lěće 2009 kupiła. Wone pak fungowachu jeno z drobnymi pjenjezami. Nowe maja uniwerselnje wužiwajomne być. Po wčerawšim rozsudźe Hamorskeje gmejnskeje rady kupja najprjedy tři nowe awtomaty. Nastajić chcedźa je w Klětnjanskim přistawje, při Klětnjanskim wuhladnišću a na wulkim parkowanišću při Delnjowujězdźanskim pobrjoze jězora.

Tři awtomaty płaća dohromady něšto wjace hač 12 000 eurow. Tale suma je w lětušim dwójnym hospodarskim planje zapisana. Hišće do zahajenja lětušeje kupanskeje a wodosportoweje sezony chcedźa nastroje wobstarać. Wužiwać móža je wopytowarjo kaž dotal z drob­­nymi pjenjezami, ale tež z bankowej abo kre­ditnej kartu abo ze šmóratkom. Gmejna nadźija so z toho přidatnych parkowanskich dochodow.

Witaja do ponowjeneho wobchoda

Dienstag, 09. Februar 2021 geschrieben von:

Někotryžkuli priwatny předewzaćel pod wuskutkami pandemije ćerpi, dokelž­ njesmě hosćenc abo frizerski salon­ wočinić. Zahrodnistwa ze swójskej produkciju móžachu minjeny čas lědma dodźěłać.

Wudwor (SN/MWj). Na swoju zahrodku drje tele dny lědma štó mysli, dokelž ske­rje­ wo tym rozmysluje, dokal wšón sněh rumować. Zahrodnistwa porno tomu su hižo dawno na nalěćo wusměrjene a so hižo nětko na nawal kupcow přihotuja. Tak maja tež Krollecy we Wudworju jako přemysło ze swójskej produkciju wočinjene, štož něchtóžkuli ani njewě.

Sněh sypać rěkaše wčera a njedźelu wšudźe w Hornjej Łužicy. Nic pak jenož na pućach a chódnikach dyrbjachu ludźo běłu pychu rumo­wać. Tež na kěrchowach a pohrjebnišćach bě to trjeba, wšako maja tam chowanja dale zaručić. Na Budyskim Mikławšku­ staraše so Thomas Schubert wo to, zo móhli ludźo po pućikach chodźić. Foto: Carmen Schumann

Na zadwělowane połoženje pokazali

Dienstag, 09. Februar 2021 geschrieben von:
Na Budyskich Žitnych wikach je so wčera napominanska straža k tuchwilnej politice koronakrizy dla wotměła. Rěčnicy zwěsćichu, zo je tójšto faktow, kotrež běchu zamoł­wići hišće před měsacami jako „teoriju zapřisahanja“ zaćisnyli, nětko woprawdźitosć. Nimo toho kritizowachu, zo su wobmjezowanja na škodu dźěći. Frizerka a předawarka rysowaštej zadwělowane połoženje, w kotrymž stej mjeztym ze swojimi kolegami. Policija je zastojnikow z Kamjenicy přiwołała, zo móhła zarjadowanje zawěsćić. Město Budyšin bě do demonstracije na Žitnych wikach sněh zrumować dało, kiž bě so we wulkim mnóstwje našoł. Foto: Carmen Schumann

Wjele abo nic?

Dienstag, 09. Februar 2021 geschrieben von:
Dołho je so wo tym spekulowało a tukało, kelko drje nowe ležownosće w Pančicach-Kukowje mjez tankownju a Srjedźnym pućom­ płaća. Nětko je jasne, zo změja přichod­ni wobsedźerjo 67 eurow na kwadratny meter płaćić. To zda so w prěnim wokomiku wjele a je na kóždy pad wjace hač w druhich tajkich nowotwarskich štwórćach, na přikład w Sernjanach. Problem je, zo njemóžeš Pančičanske ležownosće tak jednorje z druhimi přirunować. Nic jenož awtodróha A 4 je bliša hač dru­hdźe, tež infrastruktura je wjele wobšěr­niša. Samo na sebi njetrjebaš tule wja­core tydźenje ze wsy, jeli nochceš, dokelž wot nakupowanišća přez tankownju hač k pjekarnjam, rěznikomaj a frizerskimaj salonomaj je wšitko we wsy. Tež na le­žownosći samej ludźom žane dalše kóšty njenastanu, dokelž dóstanu wšitke medije składźene a dróhu twarjenu. Najebać wšitke lěpšiny wostanje 67 eurow chětro wjele pjenjez. Mi so pak zda, zo su wone derje inwestowane. Marian Wjeńka

Wjeseli so nad kóždym kupcom

Dienstag, 09. Februar 2021 geschrieben von:
Hornčerski mišter Andreas Hegewald z Čorneho Chołmca so njepoda. Byrnjež wob­mje­zowanja koronawirusa dla jeho chětro haća. Loni njeměješe žane dochody z adwent­nych wikow, kotrež su wob lěto najwunošniše. Tuž wjeseli so wunamakar Čornochołmčanskich rapakow w Krabatowym młynje nad kóždym kupcom a wšědnje w swojej dźěłarni skazanku po skazance wotdźěłuje. Najwoblubowaniše nimo wšědneho sudobja su jeho rapaki. Swoje wudźěłki předstaja Hegewald tež inter­netnje pod www.toepferei-hegewald.eu, hdźež móža sej je zajimcy skazać a na dojednanym terminje pola njeho w dźěłarni wotewzać. Foto: Gernot Menzel

Krótkopowěsće (09.02.21)

Dienstag, 09. Februar 2021 geschrieben von:

Incidenca dale spaduje

Budyšin. Kónca tydźenja dla su w Budyskim wokrjesu wčera jenož štyri no­wo­na­tyknjenja z koronawirusom zwěsćili. Tuchwilu je 489 schorjenych (-63), z nich 87 (+1) w chorowni lěkuja. Wčerawša inci­denca bě 119,3. Runje tak niska je ličba třoch nowoinfekcijow w Zhorjelskim wokrjesu. Tam přizjewichu wčera wosom smjertnych padow za dobu wot 21. do 28. januara. Tamniša incidenca je 121,87.

Safer Internet Day

Berlin. Strona Piratow zahaji składnostnje dźensnišeho Dnja wěsćišeho interneta (Safer Internet Day) akciski tydźeń přećiwo hidźe a cyber-mobbowanju w syći. W srjedźišću informaciskeje kampanje stejitej wujasnjenje a prewencija přećiwo šćuwańcy w interneće. Potrjeche­ni a zajimcy namakaja na stronje piratenpartei.de/gegen-hass-im-netz pomoc, informacije a narěčenskich partnerow.

Zakazanu chorhoj wupójsnyli

Dorost leopardow wosebity wuspěch był

Montag, 08. Februar 2021 geschrieben von:

Wojerecy (SN/MWj). Najebać wšitke ćežke wobstejnosće koronapandemije dla zhladuje Wojerowski zwěrjenc na wuspěšne plahowanske lěto 2020. Kaž w nowinskim wozjewjenju woblubowaneho coowa rěka, mějachu pola 21 wot cyłkownje 120 družin dorost. Cyłkownje maja tam 910 indiwiduumow, kaž je lětuša inwentura wunjesła. W minjenych tydźenjach su sobudźěłaćerjo wšitkich zwěrjećich wobydlerjow statistisce zapisali a sej jich dokładnje wobhladali. Při tym zwěrjata měrjachu, wažachu a přepruwowachu jich strowotniski staw.

Policija (08.02.21)

Montag, 08. Februar 2021 geschrieben von:

W lěsu drjewo kradnyłoj

Biehla. Hdyž so wonka sněži a wětřik hwizda, kaž minjeny kónc tydźenja, je lědma něšto rjeńšeho hač so doma we stwě před kaminom zhrěć a płomjenjam přihladować. Po wšěm zdaću sej tole tež žonje wažitej, kotrejž je policija sobotu připołdnju w lěsu pola Běłeje blisko Kamjen­ca lepiła. 73lětna a 46lětna běštej mjenujcy runje při tym, drjewo do swo­jeho jězdźidła nakładować. Kaž policija zdźěli, mějachu kuluchi hódnotu něhdźe 50 eurow. Žonje smědźeštej je hnydom zaso wróćo na hromadu połožić.

Serbska debata

Neuheiten LND