Němcy (AK/SN). Wjesne srjedźišćo Němcow chce město Wojerecy znowa wuhotować. „Lětsa zdźěłamy plany, klětu chcemy twarić“, praji nawoda měšćanskeho twarskeho zarjada Dietmar Wolf na njedawnej rozmołwje z wobydlerjemi. Na rozmołwje je so tež wyši měšćanosta Torsten Ruban-Zeh (SPD) wobdźělił. Dohromady zaplanuja něhdźe 300 000 eurow a nadźijeja so 80procentowskeho spěchowanja z programa Leader.
Wažne městno w planach zaběraja nowy adwentny swěčkowy wobłuk, mlokowa rampa a městno, hdźež so jutrowničku křižerjo hromadźa. Staru wohnjowobornu gratownju chcedźa wottorhać. Nastać maja zelenišća a parkowanske městna kaž tež historiski kamjentny móst. „Wone su runje za Němcy typiske. Nad Wincencowej hrjebju tajki hišće je. Zbytki tychle mostow smy při wutwarje statneje dróhi S 95 přez wjes namakali“, Dietmar Wolf rozłoži.
Kiwkawu pokradnyli
Kamjenc. Samo dźěćace hrajki njejsu před paduchami wěste, kaž dyrbjachu minjeny kónc tydźenja w Kamjencu nazhonić. Sobotu wječor su njeznaći na Macherowej dźěćacu kiwkawu (Wippe) znački Hudora pokradnyli. Módry nastroj typa HD 2000 bě něhdźe 70 eurow hódny, rěka w rozprawje Zhorjelskeje policajskeje direkcije. Při zadobywanju načinichu nimo toho dźesać eurow wěcneje škody.
Awto kačku přejěło
Spale. Swoju zmužitosć, z BMWjom so nasadźować, dyrbješe předwčerawšim wječor dźiwja kačka w Spalach ze žiwjenjom zapłaćić. Chrobły ptak so z puća njehibny, jako so 53lětny z awtom bližeše a skónčnje kačku přejědźe. Na BMWju nasta 450 eurow škody.
Swinjarnja (SN/MWj). Nimale dwaceći lět steji w Chrósćicach Dom swj. Ludmile. Prjedy hač jón nowy natwarichu, bě starownja w Swinjarni zaměstnjena, hdźež bě spočatk 1970tych lět wjele wěriwych ze serbskich wosadow pomhało bywšu póštownju přetwarić. Mjeztym twarski kompleks w Swinjarni přerjany zaćišć njezawostaja. Wot drjewjanych dźělow a wot fasady so barba puka, škleńca woknow je zdźěla rozbita, ze wšěch kutow njerodź rosće, hdyž ju runje sněh njewodźěwa.
Za kulisami pak so něštožkuli stawa. Wot časa přećaha starownje do Chrósćic klóšter Marijina hwězda jako wobsedźer twarskeho kompleksa za idejemi pyta, kak jón wužiwać. Něhdźe tři lěta su plany mjeztym konkretniše. Za swoju spěchowansku šulu za duchownje zbrašenych chce klóšter areal w Swinjarni přetwarić. Loni w decembru dóstachu za to twarsku dowolnosć. Hač pak budu scyła twarić móc a hdy, je dospołnje njejasne a wot spěchowanskich srědkow wotwisne, z klóšterskeho zarjadnistwa rěka.
Při zymskim wjedrje zašłych dnjow su mnozy skerje na smykače, sanki a sněhaki myslili. W nowym Budyskim wobchodźe pak něchtóžkuli tež hižo swoje koleso za nalěćo přehladać da.
Budyšin (CS/SN). To je zmužite! Wosrjedź koronakrizy zwažitaj sej Robert Heinze a Max Noack krok do samostatnosće. Na Budyskej Róžowej čo. 8, bjezposrědnje napřećo tankowni, staj wonaj 1. februara kolesowu zamkarnju „Räderei“ wotewrěłoj. W dobrymaj prěnimaj tydźenjomaj je so wopokazało, zo přemało kupcow dla skoržić njetrjebataj. Kaž młodaj mužej powědataj, mnozy čas z wjele sněhom wužiwaja a so wo swoje groćane koniki staraja. Ručež so dwukolesowa sezona započnje, móža woni potom zaso z połnym elanom do pedalow stupać. Ale kolesowanskaj přećelej staj tež hewak optimistiskaj. Z pandemiju korony dla kolesowanje wšudźe wulki rozmach dožiwja. Ručež budźe zaso móžno z kolesami wikować, chcetaj młodaj předewzaćelej tež kolesa a wšitko, štož za nje trjebaš, předawać.
Wobmjezowani zběhnjenej
Budyšin. Zakaz, bydlenje w nocy wopušćić, a pohibowanski radius 15 kilometrow stej w Budyskim wokrjesu wot dźensnišeho, w Zhorjelskim wokrjesu hižo wot wčerawšeho zběhnjenej. We wokrjesu Budyšin zwěsćichu wčera dwanaće dalšich natyknjenjow z koronawirusom a dźesać smjertnych padow. Incidenca wučinješe 83,66. Jednu nowoinfek- ciju a třoch zemrětych mějachu we wokrjesu Zhorjelc, hdźež bě incidenca 87,84.
Wjace tworow z Pólskeje
Waršawa. Podźěl z Pólskeje do Němskeje wuwožowanych tworow wučinješe loni 28,9 procentow cyłkownych eksportow, to stej 1,2 procentaj wjace hač lěto do toho, kaž pólski statistiski zarjad zdźěli. Hódnota eksportow z Pólskeje je loni wo 3,9 proc. na 68,3 miliardy eurow přiběrała, importy z Němskeje woteběrachu tam wo pjeć procentow na 49,3 mrd. eurow.
Žně aronije chětro ćerpjeli
Njeswačidło (JK/SN). Nawodnica twarskeho zarjada Njeswačanskeje gmejny Katrin Ulrich njeměješe so lochko, jako na zašłym posedźenju gmejnskeje rady lětušu sumu pjenjez za ponowjenje a wudźeržowanje gmejnskich dróhow mjenowaše. 53 000 eurow smědźa wočakować a k tomu zbytk 5 600 eurow z lěta 2020. Tak mało pjenjez wulke skoki njedowola. Tohodla wjesnjanosta Gerd Schuster (CDU) namjetowaše, takrjec jako domjacy nadawk, wo tym rozmyslować, kotre dróhi měli so sporjedźeć abo ponowić. Tajku prioritnu lisćinu přihotuja samo na sebi kóžde lěto. Za lětušu lisćinu, wo kotrejž chcedźa na přichodnych posedźenjach wuradźować, mjenowaštaj Schuster a Ulrich někotre přikłady. Tak měli so Kamjenska dróha a Při hrodźe w Njeswačidle, dźěl wjesneje dróhi w Dobrošicach a dźěl puća w Holešowje ponowić. Dale předwidźane su někotre mjeńše puće, kotrež maja so zazyglować, to rěka z ćeńkej asfaltowej worštu skrućić a zrunać.
Budyšin. Hdyž su kina začinjene, móža lubowarjo filmow alternatiwu wužiwać, mjenujcy nowy poskitk Budyskeje měšćanskeje biblioteki. Přez portal „Filmfriend“ poskića wona wjace hač 2 500 hrajnych a dokumentarnych filmow, serijow a krótkofilmow. Na internetnej stronje biblioteki móža so zajimcy ze swojim wužiwanskim čisłom a tajnym hesłom přizjewić.
Pomhaja wikowarjam
Wojerecy. Z wot dźensnišeho w Swobodnym staće Sakskej móžnym nakupowanskim systemom „Click & collect“ měli tež wobydlerjo Wojerec swojich domoródnych wikowarjow podpěrać a pola nich nakupować. K tomu namołwja tamniše měšćanske zarjadnistwo, kotrež chce wikowarjam w měsće tohorunja pomhać. Tohodla wozjewja na internetnej stronje města přehlad wo wobchodach, kotrež „Click & collect“ poskićeja, a trěbne daty, zo móžeš pola nich twory skazać. Lisćina njeje dospołna. Wona złožuje so na přidźěło přemysłownikow a so wobstajnje aktualizuje. Pod www.hoyerswerda.de zajimcy lisćinu nadeńdu.
Smjertnje znjezbožił
Syjk. Tragiski wukónc měješe wobchadne njezbožo sobotu rano na statnej dróze S 126 mjez Slepom a Syjkom (Graustein) 32lětny wodźer BMWja bě tam krótko do 4 hodź. do směra na Braniborsku po puću, jako kontrolu nad wodźidłom zhubi a na lěwy bok jězdnje zajědźe. Mužej so poradźi awto zaso na puć wodźić, při čimž pak so wone suwać započa. Jězdźidło znowa dolěwa zajědźe, prasny do štoma a skónčnje na třěše ležo wosta. Najebać prěnje pomocne naprawy njemóžachu mužej hižo pomhać. Wón hišće na městnje njezboža wudycha.