Organizuja jězby do centruma
Serwisowy běrow informuje a poradźuje wo šćěpjenju
Wojerecy (AK/SN). We Wojerowskim wobydlerskim zarjedźe dźěła wot spočatka tohole tydźenja serwisowy běrow „Koronowe škitne šćěpjenje“. Dwě přistajenej města – jedna za poradźowanje na městnje a jedna při telefonje – so wo naležnosće wobydlerjow staratej. „Kóždy ma šansu měć, dóstać šćěpjenski termin. Cyle na čole lisćiny steja starši ludźo bjez přiwuznych, kotřiž njejsu mobilni“, podšmórny wyši měšćanosta Torsten Ruban-Zeh (SPD).
Pozadk je njepřewidne a ćežke informaciske połoženje. Koronowe šćěpjenja drje su w Budyskim wokrjesu zaběželi. Aktualnje pak hodźa so w Sakskej jenož jednotliwe nowe terminy za prěnje šćěpjene w šćěpjenskich centrumach dorěčeć, mjez druhim za tón w Kamjencu. Přičina je, zo tuchwilu šćěpjenski srědk jenož we wobmjezowanej měrje dodawaja. Ćežišćo je tohodla prěnje šćěpjenje w hladarnjach. „Ale samo tu dyrbimy hišće wjele nachwatać. Dotal je jenož dźěl wobydlerjow hladarnjow prěnje šćěpjenje dóstał“, rozłoži wyši měšćanosta.
Kaščan čas žiwjenja slědźił
Kašecy (BŠ/SN). W sydomdźesatych lětach je Křesćan Krawža z Kašec na Drježdźanskej uniwersiće chemiju studował. A bě specialist na polu konstrukciskeje keramiki. W Mišnje je potom w kombinaće slědźił, ale hižo za čas přewróta je spóznał, zo je technologija na zapadźe prosće dale. Jemu bě jasne, zo njezměje zawod přichod. A wón měješe prawje, někotre lěta po tym firmu zawrěchu. To bě Křesćan Krawža hižo dźěło w Rüsselsheimje we wulkim zawodźe namakał. Tam slědźeše na polu powjerchow a špundowanjow, tak powěda. „Mój cil bě, tak twjerde, robustne a nječućiwe měšency betona wuwić, kaž jenož móžno. Tak hodźi so pawšalnje rjec“, 66lětny powěda.
Při drjewowych žnjach w lěsach maja tuchwilu ruce połnej dźěła. ...
Najebać lockdown koronawirusa dla su Choćebuske žonjace nory wčera ...
Krótkopowěsće (12.02.21)
Ličba zemrětych dale přiběra
Budyšin. W Budyskim wokrjesu zwěsćichu wčera w zwisku z koronawirusom 50 nowonatyknjenjow a sydom smjertnych padow. 467 wosobow (+31) je schorjenych. Incidenca je 106. Zhorjelski wokrjes informowaše wčera wo 43 nowych infekcijach a dalšich 13 zemrětych pacientach za dobu wot 28.11. 2020 hač do 4. februara. Incidenca tam je 95,36.
Wabja digitalnje wo šulerjow
Worklecy. Worklečanska wyša šula „Michał Hórnik“ wabi nětko digitalnje wo nowych šulerjow. Pod hesłom „zetkawanski dźeń za 4. lětnik“ předstajitej šulerce Lea a Pia w njecyłych dźewjeć minutach swoju šulu. Mjez druhim rěčitej ze šulskej socialnej dźěłaćerku a z nawodu kubłanišća. Tež nowa sportowa hala, kabinet za wučbu chemije a šulerska kuchnja hraja rólu.
Nowy poskitk Serbskeho muzeja
Nowe puće w kniharni
Budyšin. Smolerjec kniharnja w Domje Ludoweho nakładnistwa Domowina na Budyskej Sukelnskej drje je koronoweje pandemije dla dale zawrjena. Wot póndźele, 15. februara, pak poskića tam service „Click & collect“. Skazanki zajimcow přijimuja pod telefonowym čisłom 03591/577 288, e-mailnje pod abo w online-wobchodźe pod www.domowina-verlag.de. Wotewzać hodźa so skazane twory ze zličbowanku wot póndźele do pjatka wot 9 do 16.30 hodź w Smolerjec kniharni. Kupcy měli klinkačk při zachodźe do kniharnje wužiwać.
Šulerjow přizjewić
Ralbicy. Podobnje kaž na druhich wyšich šulach maja tež na Ralbičanskej starši šulerjow lětsa dwě móžnosći, swoje dźěći do přichodneho 5. lětnika přizjewić. Z póštu je to hač do 17. februara móžno. Wosobinsce móža starši swoje dźěći hišće hač do 16. februara přizjewić, a to jutře, pjatk, wot 10 do 13 hodź., póndźelu wot 8 do 14 hodź. a wutoru wot 10 do 17 hodź. We woběmaj padomaj trěbne su přizjewjenski formular, kubłanske doporučenje, porodne wopismo, połlětna informacija a dopokaz šćěpjenja pře wosypicy.
Mosty skóncowane
W nuznym padźe měr wobchować
Wojerecy (SN/MWj). Dźensniši dźeń europskeho nuzoweho telefona dopomina na wažne dźěło, kotrež na njeličomnych městnach wšudźe tam wukonjeja, hdźež nuzowe telefonaty dochadźeja. Jedne z tychle městnow je wuchowanska dispatchernja we Wojerecach. Tam dochadźeja wšitke telefonaty pod čisłom 112 z Budyskeho a Zhorjelskeho wokrjesa. Disponenća dźěłaja tam w 24hodźinskim rytmusu. Wjacehodźinske zasadźenja wotměnjeja so z přestawkami. Wšědnje je 14 sobudźěłaćerjow zasadźenych. Kóždy z nich ma dwójnu kwalifikaciju a něhdźe 5,5 lět wukubłanja za sobu. Woni su wukubłani powołanscy wohnjowi wobornicy a nuzowi sanitetarjo.
Policija (11.02.21)
Alarm na rewěrje
Budyšin. W normalnym padźe přismali policija k městnu njeskutka, njezboža abo tež wohenja. Wčera připołdnju bě tele městno Budyski policajski rewěr na Dwórnišćowej sam. Štwórć po dwanaćich přizjewi awtomatiska připrawa woheń na rewěrje a alarmowaše powołanskich wobornikow runje tak kaž dalšich dobrowólnych kameradow. Zastojnicy twarjenje bjezposrědnje na to wopušćichu a so na předpisanych městnach zhromadźichu. Wobornicy so na terenje a w twarjenjach rozhladowachu a přičinu alarma spěšnje wuslědźichu. Jednaše so wo techniski defekt tepjenskeje připrawy. Bórze na to móžachu policisća w swojej słužbje pokročować.
Za druhe bydlenje dawki płaćić
Z wosebitymi wustawkami přidatne dochody za Hamorsku gmejnu
Hamor (AK/SN). Štóž ma w Hamorskej gmejnje druhe bydlenje přizjewjene, dyrbi za to wot 1. januara 2021 dawki płaćić. Tole je gmejnska rada na swojim zašłym posedźenju z jednym wzdatym hłosom wobzamknyła. Z tym slěduje Hamor přikładej druhich komunow, přetož tež w Krušwicy, Běłej Wodźe, Zhorjelcu a Drježdźanach tajke wustawki maja. „Zasadnje dźe wo to, zo ći z druhim bydlenjom za wužiwanje gmejnskeje infrastruktury sobu płaća“, rozłoži sobudźěłaćerka komornistwa Antje Lukas. „Jako komuna prócujemy so wo přidatne dochody. Kelko to dokładnje budźe, njemóžemy hišće rjec.“ Po słowach Antje Lukas jedna so wo něhdźe 150 bydlenjow. To pak dyrbi zarjadnistwo Hamorskeje gmejny najprjedy dokładnje pruwować.
Wikowarjam poskićeja pomoc
Mjez tymi, kotřiž pod pandemiju sobu najbóle ćerpja a kotrychž eksistenca je dla toho wohrožena, su drobnowikowarjo. Jim skićeja wot přichodneho tydźenja znajmjeńša mału škričku nadźije.
Kamjenc (SN/MWj). Wobchody, kotrež wudźěłki wšědneje potrjeby njeposkićeja, su wot spočatka nowembra zašłeho lěta zawrjene. To wone tež dale wostanu, ale znajmjeńša móža swoje twory pod wěstymi wuměnjenjemi internetnje abo při telefonje poskićeć a kupcy smědźa sej je wotewzać. Po wuprajenju sakskeho hospodarskeho ministerstwa je tak mjenowany „Click & collect“ wot 15. februara dowoleny. Z tymle rozsudom skićeja drobnowikowarjam w swobodnym staće samsne móžnosće kaž na přikład gastronomam, kotřiž smědźa swoje jědźe k sobuwzaću tohorunja předawać.
