Interaktiwnje po wustajeńcy

Mittwoch, 13. März 2024 geschrieben von:

Budyšin. W zwisku z wustajeńcu Muzeja Budyšin z grafikami historiskich napohladow Budyšina w originalu a 3D-technice poskićuja jutře, štwórtk, wot 15 hodź. wosebite interaktiwne wodźenje po přehladce. Za to su wšelake zabawne eksperimenty a inter­aktiwne stacije přihotowali, na kotrychž móža so wopytowarjo pospytać. Mjez druhim su přidatne nastroje, špihele a prismy nastajili. Z nimi móžeš nazhonić, kak mozy čłowjeka z rumnostnymi zaćišćemi wobchadźeja. Wodźenje zmóžnja so hłubšo do tematiki rumnostnych efektow zanurić a dohlad do mnohostronskeho swěta rumnostneho widźenja dóstać. Zastup płaći sydom eurow, potuńšeny dwaj euraj.

Nastaja kandidatow za wólby

Chrósćicy. Swobodne wolerske zjednoćenstwo Chróšćanskeje gmejny přeprošuje wšitkich wobydlerjow jutře, štwórtk, w 19 hodź. do Krawčikec hosćenca. Tam chcedźa wo swojim wólbnym programje diskutować, jón schwalić a kandidatow za wólby do gmejnskeje rady 9. junija nastajić. Zajimcy a zwólniwi za sobudźěło su wutrobnje witani.

Wjesne žony kwětki dóstali

Mittwoch, 13. März 2024 geschrieben von:
W Rownom su wjesne žony minjene dny kwětki dóstali. Wjesny předstejićer ­Matthias Jainsch měješe minjenu sobotu čestny nadawk, Rownjanskim žonam składnostnje Mjezynarodneho dnja žonow gratulować a za nje swjedźeń wuhotować. Tele zarjadowanje je na Njepilic statoku hižo 15 lět tradicija. Při kofeju, tykancu a pokładźenych pomazkach so někotražkuli rozmołwa wo wjesnych nowosćach ­plećeše. Foto: Joachim Rjela

Zetkanišćo za wšitke generacije

Mittwoch, 13. März 2024 geschrieben von:

Přećeljo wlečakow přewozmu Kobličanski towarstwowy dom

Łaz (AK/SN). Kobličanske towarstwo přećelow wlečakow wobhospodarja přichodnje Kobličanski wjesny towarstwowy dom. Łazowska gmejnska rada je wčera wotnajenske zrěčenje z towarstwom jednohłósnje wobzamknyła. Wone płaći najprjedy štyri lěta a hodźi so po tym podlěšić.

„Chcemy towarstwowy dom na zetkanišćo wšitkich generacijow wuwić“, praji wjesny předstejićer Tilo Babick. Hižo wjacore lěta so přećeljo wlečakow wo wobhospodarjenje domu prócuja. Mjez druhim su někotre rumnosće přetwarili a wonkowne připrawy sporjadkowali. Dale nasta rampa, zo móža tež ludźo z chorobnym stołom a zbrašeni do domu dóńć. Za to je so předewšěm wobydlerka Monika Pakoßnikowa angažowała. Rozsud za wotnajenske zrěčenje Tilo Babick witaše. Po jeho słowach cyła wjes za projektom steji, wón wčera rjekny. Nětko su dalše projekty planowane. Mjez druhim ma nuznik za zbrašenych a staršich ludźi nastać.

Policija (13.03.24)

Mittwoch, 13. März 2024 geschrieben von:

Na křižowanišću prasnyło

Zejicy. Jedna zranjena wosoba a tójšto wěcneje škody je wuslědk wobchadneho njezboža póndźelu rano w Zejicach. 39lětna žona bě tam na statnej dróze S 101 ze swojim Opelom z Hornjeho Wujězda přijěła. Na křižowanišću k S 100 wona po wšěm zdaću na hłownej dróze jěducy Škoda tohorunja 39lětneje žony přewidźa a do njeho zrazy. Dokelž bě zražka chětro sylna, suny so Škoda do Mercedesa, kiž na křižowanišću čakaše. Wodźerka Opela so snadnje zrani. Wuchowanske mocy žonu ambulantnje ­zastarachu. Přiwołani wohnjowi wobornicy so wo wuběžany bencin a wolij starachu. Po informacijach policije nasta něhdźe 25 000 eurow škody.

Žiwy přikład sobupostajowanja

Mittwoch, 13. März 2024 geschrieben von:

Wojerecy (AK/SN). Město Wojerecy chce w přichodnych lětach dale wobstajnje wobydlerski etat zmóžnić. Wotpowědnje dwójnemu etatej ma so wobydlerski etat kóždej dwě lěće wobzamknyć. Za kóždy dwójny etat – prěni za lěće 2025/2026 – změja 100 000 eurow za wobydlerski etat k dispoziciji. K tomu je so měšćanska ­rada na swojim zašłym posedźenju wu­znawała. Radźićeljo jednohłósnje rozsu­dźichu, poručenjam dźěłoweje skupiny slědować.

Hdyž bywaja dny poněčim trochu dlěše, a kaž za kónc tydźenja připowědźene tež ćopliše, je zaso raz składnosć sej do Łazkowskeho lěsa dojěć. Tam nětko podlěsk rjenje kćěje a k přechodźowanju přeprošuje. Dokelž někotre wobłuki lěsa pod wodu steja, bě kćějata płonina zašłe lěta hižo wjetša. Přiwšěm skići přirodna zajimawostka rjany napohlad a wóčko wobkuzłuje. Foto: Feliks Haza

Krótkopowěsće (13.03.24)

Mittwoch, 13. März 2024 geschrieben von:

Serbska iniciatiwa za měr online

Budyšin. „Namołwa k zakónčenju wójny w Ukrainje“ (Serbske Nowiny su pjatk rozprawjeli) je nětk internetnje pod www.serbja.info/namolwa-za-mer serbsce a němsce wšěm zajimcam přistupna. Kaž rěčnik skupiny dwaceći Serbow, Marko Suchy, informowaše, móže tu kóždy podpisać, kiž chce serbsku iniciatiwu za měr podpěrać.

Reakcija na wuslědki studije

Drježdźany. Sakske kultusowe ministerstwo připowědźi za nowe šulske lěto wjace wučby serbšćiny a wěcneje wučby, zo bychu šulerki a šulerjo lěpje čitać a pisać nawuknyli a wědu wo přirodźe, technice a towaršnosći pohłubšili. Z tutej naprawu reaguje na spadowace wukony dźěći. Jako dalša přičina mjenuja so sylne rozdźěle we wuwiću. Trjeba so prosće wjace wučby, zo bychu so wšěm šulerjam a šulerkam kompetency posrědkowali.

Woteběrace ličby dźěći přičina

Radźićeljo wuradźuja

Dienstag, 12. März 2024 geschrieben von:
Pančicy-Kukow. Přichodne posedźenje gmejnskeje rady Pančicy-Kukow wotměje so zajutřišim, štwórtk, w awli Šule ­Ćišinskeho. Započatk budźe w 19 hodź. We wobłuku twarskich naležnosćow zaběraja so radźićeljo z nowotwarom ratarskeho pódlanskeho twarjenja. Dale steji na dnjowym porjedźe zasadny rozsud wo twarje fotowoltaikowych připrawow na swobodnych ležownosćach na gmejnskim teritoriju.

Jutry ze serbskej paradu

Dienstag, 12. März 2024 geschrieben von:

Kónc měrca chcedźa něhdźe 50 000 hosći do sprjewineho města witać

Budyšin (SN/AN). Na nowinarskej konferency pjatk dopołdnja w Budyskej radnicy předstajichu plany za lětuše jutry w Budyšinje. K tomu porěčachu wyši měšćanosta Karsten Voigt, managerka za nutřkowne město Annett Scholz-Michalowski, wotrjadnica za hospodarstwo a turizm Doreen-Charlotte Hantschke, předsyda towarstwa nutřkowneho města Budyšin René Meißner, nawoda zjawnostneho dźěła a marketinga města Budyšina Peter Stange a předsyda towarstwa za turizm Dietmar Stange.

Policija (12.03.24)

Dienstag, 12. März 2024 geschrieben von:
Ćežke wobchadne njezbožo je so wčera w Kamjencu stało. Blisko tamnišeho lětanišća je 25lětny wodźer Škody z dotal njeznateje přičiny frontalnje do nakładneho ­awta zrazył. Młody muž bu w swojim jězdźidle zatłusnjeny. Wohnjowi wobornicy móžachu jeho po jednej hodźinje z ćežkej techniku z awta wuswobodźić. Nuzowaj lěkarjej wo žiwjenje muža wojowaštaj, ale bohužel bjez wuspěcha. 25lětny hišće na městnje njezboža wudycha. 50lětny wodźer Lkw-ja so zranił njeje. Wobchadna ­nje­zbožowa słužba za přičinami njezboža slědźi. Dróha bě dlěje hač tři hodźiny ­zawrjena. Foto: Jens Kaczmarek

Serbska debata

Neuheiten LND