Policija (07.02.19)

Donnerstag, 07. Februar 2019 geschrieben von:

Křesło na awtodróze

Budyšin. Z njewšědnym zadźěwkom dyrbjachu so šoferojo zawčerawšim popoł­dnju na awtodróze A 4 mjez woběmaj Budyskimaj wotbóčkomaj bědźić. Do směra na Drježdźany ležeše mjenujcy křesło na lěwej jězdni. Wodźer Mercedesa bě je runje hakle kupił, ale na připowěšaku prawje njepřipasał, tak zo so wone dele suny. Dwě jězdźidle móžeštej jeno z nahłym spinanjom zadźěwać, zo do mebla njeprasnyštej. Kuražěrowani wodźerjo nakładnych awtow sćahnychu křesło na nakromne pasmo. 30lětny zawinowar podawka so k městnu wróći, swój zmylk mjeztym přichwatanej poli­ciji přizna a křesło sobu wza. Kak wone potom wupadaše, bohužel znate njeje.

Lubosć we wobrazach

Donnerstag, 07. Februar 2019 geschrieben von:

Budyšin. Nowa wustajeńca akwarelow lajskeje molerki Evelin Leske je wotnětka hač do kónca měrca w Budyskej turistiskej informaciji widźeć. Budyšanka moluje wot lěta 2013 a zwobraznja hłownje motiwy swojeho města w rozdźělnych počasach, kotrež wotbłyšćuja jeje lubosć k łužiskej metropoli.

Porěčitaj wo Sprjewicy

Łaz. Wobrazowy zwjazk wo Sprjewicy steji w srjedźišću čitanskeho wječora jutře, pjatk, we 18 hodź. we Łazowskim Domje Zejlerja a Smolerja. Knihu předstajitaj awtoraj Eberhard Garbe a Peter Hennig. Zajimcy su wutrobnje witani.

Etat z mnohimi njeznatymi

Mittwoch, 06. Februar 2019 geschrieben von:

Kaž w mnohich druhich gmejnach tež w Slepjanskej tuchwilu hospodarski plan 2019 nastajeja. A kaž wšudźe dru­hdźe dyrbja tež tu hladać, hdźe móža něšto zalutować.

Slepo (AK/SN). Wo swój zaměr, nastajić dwójny hospodarski plan 2019/2020, so Slepjanska gmejna hižo dale njeprócuje. Město toho ma so po poručenju Zhorjelskeho wokrjesa etat jenož za lětsa nastajić. To pak je ze zalutowanjemi zwjazane. „Dyrbimy wo wšěm rěčeć“, rjekny wjesnjanosta Reinhard Bork (njestronjan) na wčerawšim posedźenju gmejnskeje rady. Někotre inwesticije dyrbja na klětu přestorčić a swoje dobrowólne wukony redukować. Zo bychu wjace dochodow docpěli, maja so komunalne ležownosće předać. „Tež gmejnske objekty njebudźemy hižo za wužiwanje darmotnje přewostajić móc“, wjesnjanosta připowědźi. Diskutowali wo tym hižo su, rozsudźene pak hišće ničo njeje, dokelž pobrachuja ličby z towarstwow.

Nowe wudawki za zwjazk

Mittwoch, 06. Februar 2019 geschrieben von:

Za datowy škit dyrbja gmejny přichodnje tójšto płaćić

Pančicy-Kukow (SN/MWj). W zarjadniskim zwjazku Při Klóšterskej wodźe dyrbja přichodnje pjenjezy za eksterneho społnomócnjeneho za datowy škit wudawać. Hinak hač planowane pak njemóžachu na wčerawšim posedźenju zarjadniskeho zwjazka wobzamknyć, štó ma tónle nadawk wukonjeć. Dokelž běchu dóšłe poskitki firmow přemało wuprajace a njehodźachu so přirunować, zastupjerjo pjeć sobustawskich gmejnow wotpokazachu, wo tym rozsudźić.

Na klankach wisaja wutroba a wjele stawizničkow

Mittwoch, 06. Februar 2019 geschrieben von:

Čorny Chołmc (SiR/SN). Nad njewšědnym darom móžeše so minjenu sobotu Čornochołmčanski Krabatowy młyn wjeselić. Jemu je Brigitte Führer dźěl swojich klankow ze serbskimi motiwami dariła. Dokelž bě Wojerowčanka hižo w lěće 2015 swoje 80. narodniny swjećiła, pomhaše jej jeje dźowka Beatrice Schober z mandźelskim Mircom, zo by wšo na prawym městnje było.

Pola serbskich drastowych klankow a postawow z powědkow jedna so wo eksponaty z kónca 70tych a spočatk 80tych lět. Nastali běchu wone we Wo­jerowskim dźěćacym dźěłowym zjednoćenstwje za kostimy a klanki. Hana Bejmina­ z Wjacsławkec Serbskeho drastoweho domu je tehdy při tym pomhała a mjez druhim filigrane sački tykała.

Wobornicy wiki wobrubili

Mittwoch, 06. Februar 2019 geschrieben von:
Po lońšej premjerje su minjenu sobotu we Wudworskim Krollec zahrodnistwje druhi raz čaporowe wiki přewjedli. Hinak hač před lětom móžachu wobydlerjo tónraz swójske hižo njetrjebane wěcy wotbyć a Krollecy je w swojej rostlinarni poskićowachu. Dokelž bě dźěl wunoška lońšeje akcije na dobro Smječkečanskeje młodźinskeje wohnjoweje wobory, demonstrowachu jeje čłonojo pokazku swojich kmanosćow. K tomu móžachu sej wopytowarjo pražene kołbaski a horce wino słodźeć dać. Dźěl dobytka sobotnych wikow chcedźa Worklečanskej pěstowarni „K wódnemu mužej“ přewostajić. Foto: Feliks Haza

Krótkopowěsće (06.02.19)

Mittwoch, 06. Februar 2019 geschrieben von:

Domaška předsyda wuběrka

Pančicy-Kukow. Runja zašłym lětam změja gmejny zarjadniskeho zwjazka Při Klóšterskej wodźe za lětuše komunalne a europske wólby kaž tež za wólby Sakskeho krajneho sejma zhromadny wólbny wuběrk. Jeho předsyda je Měrko Domaška. Zo wón runočasnje za wokrjesny sejmik kandiduje, so tomu njespřećiwja. Kaž wón wčera na posedźenju zarjad­niskeho zwjazka rjekny, je wokrjes tole prawnisce pruwował.

Prěnjej čestnaj čłonaj

Bórkowy. Domowinska župa Delnja Łužica je prěni raz čestne čłonstwo spožčiła. Jako čestneju čłonow su Manfreda Starostu a Erwina Hanuša za jeju wjelelětne prócowanje wo zachowanje a pěstowanje delnjoserbskeje rěče, mjez druhim za zestajenje słownikow, na hłownej zhromadźiznje minjeny pjatk w Bórkowach wuznamjenili.

Faworića so zakopolili

Policija (06.02.19)

Mittwoch, 06. Februar 2019 geschrieben von:

Muža mortweho namakali

Běła Woda. 27lětny Běłowodźan je policiji wčera wječor zdźělił, zo w bydlenju na dróze Wam k zbožu mortwy muž leži. Policija tam 69lětneho namaka, pola kotrehož móžeše nuzowy lěkar jenož hišće smjerć zwěsćić. Hladajo na zranjenja njehodźi so namócny njeskutk wuzamknyć. Dokelž 27lětny rjekny, zo ma něšto z tym činić, jeho nachwilnje zajachu.

Po přestawce znowa pjerjo drěli

Mittwoch, 06. Februar 2019 geschrieben von:

Hišće před 50 lětami słušeše pjerjodrěće k tradicionalnym nadawkam, kotrež mějachu žony na dołhich zymskich popoł­dnjach a wječorach, hdyž dźěło na polu wotpočowaše, wobstarać. W Ćisku so Adelheid Herrmannowa dopomina, zo krótko do kwasa jeje sotry pjerjodrěće w swójbje ze znatymi a susodami cyły tydźeń traješe. K njewjesćinskemu wěnu dźě słušachu tehdy poslešći a hłowakaj. Za to trjebachu něhdźe dźesać kilogramow pjerja.

Mjeztym drje su zdźěla nowe maćizny do lěharnjow zaćahnyli, potrjeba žonow za zetkanje w ćopłej stwě pak so pozhubiła njeje. Před 14 lětami měješe Rose­- marie Böhmowa ideju, nałožk pjerjodrěća w Ćisku wožiwić. Wot toho časa ­jeje dźowka Astrid Wittowa tónle po­dawk kóžde lěto w Ćisku organizowaše. Hač do lěta 2015, jako jenož hišće dwě žonje přińdźeštej. Zajim mjez ludźimi popušći a organizatorka měješe z nowym dźěłowym městnom tež mjenje chwile.

Wo serbskich prašenjach

Mittwoch, 06. Februar 2019 geschrieben von:

Malešecy. Domowina, Rada za serbske naležnosće Sakskeje a Załožba za serbski lud přeprošuja jutře, štwórtk, w 19 hodź. na rozmołwne koło wo serbskich prašenjach do Malešanskeho hosćenca Wódny muž. Na rozmołwje wobdźěla so Dawid Statnik, Marja Michałkowa, Leńka Thomasowa a Jan Budar.

Sobotu na premjeru

Chrósćicy. „Čeplski recept“ rěka nowa komedija Serbskeje lajskeje dźiwadłoweje skupiny Chrósćicy, kotraž změje sobotu, 9. februara, w 19.30 hodź. premjeru na Chróšćanskej Krawčikec žuli. Wuměłski nawod ma Tomaš Cyž. Zastupne lisćiki w předpředani dóstanu zajimcy pola wjesneho časnikarja Jürgena Njeka. Hnydom nazajtra, 10. februara, budźe na Krawčikec žurli dalše předstajenje w 16 hodź. Pjatk, 15. februara, pokazaja Chróšćenjo swoju komediju w 19 hodź. w Sulšečanskim kulturnym domje.

Za swjedźeń so přizjewić

Anzeige