35. swjatkowny turněr kopańcy w Pěskecach

Při najrjeńšim wjedrje – njebě přećopło a nic přezyma – wojowaše wčera, póndźelu, wosom koparskich mustwow w Pěskečanskim „stadionje k dźiwjej rancy“ wo swjatkowny koparski pokal. Jako Jurij Matka-senior, kultowy stadionowy rěčnik, cyłki na turněr witaše, běše po jeho měnjenju hižo 5 000 přihla­do­warjow přitomnych. Na kóncu zliči wón z kapsnym ličakom něhdźe 10 000; hnydo­m pak přizna, zo njeje sej při mnóstwje nulow cyle tak wěsty.

Přewjele chwile k ličenju wšak moderator nje­měješe, wšako dyrbješe hry ze swojim kolegu intensiwnje sćěhować a komentować. Wrota ze zdalenosće 50 metrow, njewšědne zmylki wrotarjow, kuriozne samowrota, přetřělene jědnatki, tójšto krasnych koparskich scenow a napjate duele hač do poslednjeje sekundy – wšo to­ tworješe zakład zajimaweho 35. swjatkowneho turněra w Pěskecach.