Na hłownej zhromadźiznje župy „Michał Hórnik“ wobkedźbowane
Kamjenska župa „Michał Hórnik“ je wšo druhe hač rentnarske zhromadźenstwo. Byrnjež w někotrych Domowinskich skupinach přerězna staroba poměrnje wysoka była a so tež na zarjadowanjach zwjetša jeno starši ludźo wobdźěleli, je župa poměrnje młody cyłk. To wotbłyšćowaše so na njedawnej župnej hłownej a zhromadźiznje we Wotrowje, hdźež bě tójšto młodych wobličow, runje tak kaž w přehledźe wo zestawje župy a nic naposledk w župnym programje.
Zestawa župy so dale womłodźa. Nimo štyrjoch Domowinskich skupin – Njebjelčanskeje, Pančičansko-Kukowskeje, Šunowsko-Konječanskeje a Kanečanskeje – přisłušeja jej tajke cyłki kaž Wotrowska młodźina, chór Lipa z tuchwilu wjace hač 50 spěwarjemi a spěwarkami, Serbski folklorny ansambl Wudwor a Smjerdźečanska rejwanska skupina, kotrež maja wšitke tež mnohich młódšich čłonow w swojich rjadach. A we Wotrowje so nětko hišće tři dalše skupiny přidružichu – Ralbičanski a Chróšćanski młodźinski klub kaž tež Hórčanske wjesne towarstwo Při skale.
