Wojerecy (WS/SN). Přirada za serbske naležnosće města Wojerec je loni w septembrje molowanske wubědźowanje za wšitke 4. lětniki Wojerowskich šulow wupisała. Wotpohlad bě, zo so šulerjo ze žiwjenjom Serbow we Wojerecach na wuměłske wašnje zaběraja. Jara aktiwnje dźěłachu na tutym projekće w Zejlerjowej šuli z podpěru rjadowniskeje wučerki Sylwije Wjeńcyneje. Zahoritosće dźěći dla wutworichu dźěłowu skupinu šulerjow rjadownjow 4a a 4b, kotraž zetkawaše so dźesać króć pjatk po regularnej wučbje. Šulerjo zhromadnje rozmyslowachu, na kotre wašnje móhli nazběrane serbske temy zwobraznić a kotre techniki bychu so k tomu hodźeli. Za wobraz „Serbske napisy“ podachu so samo z kameru na rešeršu. Dale wužiwachu internet a započachu kónc lěta 2015 twórby we wšelakich technikach zhotowjeć. Nimo toho zestajachu 26 šulerjow jako zhromadny projekt protyku za lěto 2016 z mólbami a tekstami k wjerškam kóždeho měsaca, poćahujo so na Wojerecy. Cyłkownje bě 36 šulerjow wobdźělenych.