Konjecy (SN). Serbski muski chór Delany chce swoje 45lětne wobstaće z jubilejnym koncertom woswjećić. Mužojo wuhotuja jón njedźelu, 1. meje, w Šunowskej Fabrikskej hospodźe. Na to su so čłonojo předsydstwa dojednali a wčera w Konjecach dalše konkretnosće wobrěčeli.
Mjez druhim chcedźa na koncerće podać mały přehlad spěwneho składa, kotryž je sej chór w běhu štyriapoł lětdźesatka wobstaća přiswojił. Nimo pěsnjow ze spočatkow chcedźa tež nowe kruchi předstajić. „Planujemy tohorunja tu abo tamnu překwapjenku z wobrazami a filmowymi sekwencami“, přeradźi městopředsyda Daniel Wjesela našemu wječornikej. Přeprosyć chcedźa sej za program hóstnych sobuskutkowacych. Koho, njebě z předsydstwa zhonić. Wozrodźenej małej skupinje muskeho chóra chcedźa zmóžnić so předstajić. Tuchwilu přihotuje předsydstwo zastupne lisćiki, kotrež budu wot apryla na předań. Nowosć lětsa budźe, zo poskića po koncerće wječer.