Hač do nocy wojowali
Lětsa wotmě so nócny volleyballowy turněr Serbskeho młodźinskeho towarstwa Pawk w Pančicach-Kukowje. Tamniše sportowe towarstwo bě dwě hrajnišći spřihotowało, tak zo móžeše dohromady 16 cyłkow w štyrjoch staflach městna wo štwórćfinale wuhrać. Předkoło je pak po měnjenju mnohich jara dlijiło, wšako traješe jedna hra dwójce pjeć mjeńšin. Tež přestawki běchu njesměrnje dołhe, tak zo dyrbjachu mustwa dołho na přichodnu hru čakać.
Faworizowane cyłki kaž Bratrowstwo Róžant, Eskimowcy a Škit Budyšin z Ludwigom Eckertom a Markom Smołu so w předkole suwerenje přesadźichu. W štwórćfinalnych partijach běchu Škit Budyšin a Eskimowcy najsylnišej cyłkaj a poskićichu přihladowarjam w finalu prawy krimi. Zo hrajachu Budyšenjo jeno z pjećomi, wopokaza so na kóncu jako špak, wšako Eskimowcy wokoło kapitana Maćija Šěna swobodne rumy prawje wužiwachu a přez cyły čas tež lěpje blokowachu. Tak dobychu woni finale z jeničkim dypkom předskoka.
Wuspěšna połserija za „młodych dźiwich“ Viktorije
Hrajna doba 2015/16 je so za volleyballistow Viktorije Worklecy z wulkim wuspěchom započała. We Wojerecach dobychu wobwodny pokal, prěni raz w stawiznach towarstwa. Tónle wuspěch je jich w prěnich hrach sezony pohonjał. W Cunnersdorfje su „młodźi dźiwi“ z 3:0 jasnje dobyli, tež prěnja domjaca partija přećiwo „starym znatym“ z Běłeje Wody skónči so ze samsnym rezultatom. Wulki bój widźachu fanojo samsny hrajny dźeń přećiwo zestupnikej ze sakskeje klasy Kupoj-Nowa Łuka. Zo su Worklečenjo 2:3 přěhrali, njebě žana katastrofa. Na hromaj w Lubiju a Mittelherwigsdorfje je stary kapitan Clemens Eckert mustwu wupomhał a k dobyćomaj přinošował. Druhi domjacy hrajny dźeń prěnjeje połserije běše tež zaso wuspěšny, wuslědkaj přećiwo Zhorjelcej a Niskej rěkaštej 3:1 a 3:0. Do poslednjeho hrajneho dnja prěnjeje połserije stejachu hólcy wokoło kapitana Ludwiga Eckerta na čole tabulki a mějachu šansu na nazymske mišterstwo. W rozsudnej hrě pola sylneho mustwa Módro-běłych we Wojerecach pak podležachu a přezymuja tak na druhim městnje.
Wo SZ-pokal hrali
Henčl by rady hišće 17 dalšich dypkow měł
Z 23 dypkami steji regionalny koparski ligist Budissa Budyšin na dobrym srjedźopólnym městnje tabulki. Hanspeter Benad je so nětko w zymskej přestawce za Serbske Nowiny z trenarjom Tomašom Henčlom rozmołwjał.
Knježe Henčlo, kak spokojom sće z dotalnym wotrěznjenjom?
T. Henčl: Ličba dypkow a tež to, kak smy hrali, mje zwjesela. Z tróšku wjace rutinu wšak móhli hišće wjace dypkow měć. Z wuslědkom 1:1 pola Berlinskeho AK běch jara spokojom.
Widźiće koparjow z dorosta abo U23 Budissy Budyšin, kotřiž móhli skok do kolektiwa regionalneje ligi docpěć?
T. Henčl: Spontanje bych jenož Tonija Barnickela mjenować móhł.
Změjeće při- abo wotchady?
T. Henčl: Ně, wuchadźam z toho, zo so na kadrje ničo njezměni a zo póńdźemy bjez změnow do druheje połserije.
W zašłych hrach sće wjacore dypki krótko do kónca partije přećiwnikej darili. Na čim je to zaležało?
T. Henčl: Zo smy wólne kopy, kotrež su skónčnje k wrotam wjedli, dowolili, bě zawěsće sćěh pobrachowaceje koncetracije. Dyrbju pak tež rjec, zo běchu wólne kopy druhdy tež z trochu zbožom přetworjene.
Dźěći w „Slaviji“ sportowali
Prěni raz na kumštnym trawniku
Widźał, słyšał, napisał (28.12.15)
„Da sym ja tón posledni“; ně, nochcu tu někajku nowu stawizničku po přikładźe Bena Budarja napisać. A sym sej tež wěsty, zo njejsym posledni serbskorěčny wobydler w Nowej Wjesce. Ně, sym cyle jednorje posledni lětsa do tejele kolumny pisacy. Nětko pak tež wěm, kak ćežko to za mnohich mojich předchadnikow bě sej runje w tym padźe tematiku wuzwolić, kotraž ludźi tež zajimuje.
Posledni być we wšitkich móžnych situacijach njeje runjewon najrjeńše začuće. Zwotkel bjerješ motiwaciju za nowy pospyt, za nowe wubědźowanje? A sy-li stajnje posledni, ći tež sponsorojo z wulkimi pjenjezami njekiwaja, sy přěhračk w mnohim nastupanju. Kak pak by było, njebychu-li přichodnje jenož dobyćerja/dobyćerku mjenowali, ale tež poslednju/poslednjeho? Dźiwny to namjet, abo? Tola w sporće je wšitko móžno, startuješ-li jako jasny faworit. A hižo w prěnjej akciji móže so najlěpši z mustwa zranić.
Sport (23.12.15)
Koparski turněr Natwara
Njedźelu, 3. januar 2016, přewjedźe sportowe towarstwo Natwar Němske Pazlicy swój interny halowy koparski turněr, a to wot 13 hodź. w sportowni Kamjenskeje zakładneje šule Při Boršći.
Lodowa žona abo lodowy muž
Sportowy klub Wojerecy přeproša wšitkich zmužitych na poslednje kupanje lěta 2015, a to w Třižonjanskim jězoru we Łazu. Štóž tam 29. decembra wot 14 hodź. do wody póńdźe, móže so potom lodowa žona/lodowy muž mjenować.
25. raz za bulom honja
Worklečanska skupina CDU zarjaduje přichodnu srjedu, 30. decembra, jubilejny halowy koparski turněr z dźesać wjesnymi cyłkami. W 13 hodź. zahwizda sudnik prěnju hru předkoła, w 16 hodź. přijědźe sportowy reporter MDR Gert Zimmermann a w 16.30 hodź. zahraja hudźbnicy z Kleinröhrsdorfa. Połfinalnej hrě započnjetej so w 16.45 hodź., kónčna w 17.25 hodź. Mytowanju přizamknje so rozmołwa z Gertom Zimmermannom.
Halowe koparske turněry
27.12. wo pokal SZ w Budyšinje
28.12. dorostowe Sokoła Ralbicy/Hórki:
09.00 hodź. – młodźina F
11.30 hodź. – młodźina E
13.30 hodź. – młodźina D
28.12. 17. 00 interny Ralbicy/Hórki
02.01. S-mobilcup w Kamjencu
08.01. Landskron-cup w Budyšinje
09.01. Kulow-cup w Kulowje
Bjez poražki z wosom dypkami předskoka na čole
Po wulkotnej prěnjej połseriji sezony 2015/2016 bjez poražki a z wosom dypkami předskoka přebywaja koparjo Chróšćanskeje SJ na čole tabulki wokrjesneje wyšeje ligi. Fabian Pöpel je so trenarjow za krótkim facitom prašał.
Je so zaměr za sezonu 2015/2016, kotryž staj sej w přihotowanskej fazy stajiłoj, po chětro wuspěšnej prěnjej połseriji změnił?
Pavel Runt: (so směje) Na mojim cilu, dołhož móžno jako hrajer-trenar bjez poražki wostać, so ničo změniło njeje.
Sportowi eksperća a přiwisnicy kopańcy so prašeja, hač chce prěnje mustwo SJ Chrósćicy do krajneje klasy postupić?
Pavel Runt: Smy z mustwom minjene lěta – tež pod starymi trenarjemi – nazhonili, zo móžemy so z wyšoklasowymi cyłkami měrić. Za mnje pak njeje to prosty prěnjorjadny zaměr. Wočakńmy, na kóncu rozsudźi tež mustwo.
Radim Věchet je zawěsće hižo poskitki z wyšich klasow dóstał, Petr Králíček snano tež. Móžetaj k tutej spekulaciji něšto rjec?
57. hodowna kopańca
Druhi dźeń hód budźe zaso tak daloko. 57. raz zetkaja so lětsa serbscy a němscy lubowarjo honjeńcy za kulowatej kožu k swojej tradicionalnej hodownej kopańcy pod hołym njebjom.
Tele drje najstarše koparske zarjadowanje tajkeho razu přeco tón dźeń a zwonka někajkeje sportoweje hale w našej Łužicy a cyle wěsće po cyłej Sakskej wotmě so prěni króć 1959.
Tehdy zetkachu so młodźi běharjo na srjedźnych a dołhich čarach Motora Budyšin k wotměnje nimale wšědneho specifiskeho běhanskeho treninga k tajkej hrě.
Ani jónu njeje tale hodowna kopańca špatneho wjedra dla wupadnyła. Sněh hač do kolen, błóto hač ke kulkam, kruće zmjerznjene hrajnišćo abo hoberski wichor njemóžachu zdónk wobdźělnikow ženje zatrašić. W běhu lět su so lochkoatletam dalši zajimcy z wjacorych sportowych družin přidružili.
