Styki na městnje pohłubšować
Přiwćicy (kl/SN). Wjace wo dźěławosći rěčneho motiwatora za kónčinu Malešecy a Bukecy su čłonojo předsydstwa župy „Jan Arnošt Smoler“ Budyšin wčera, wutoru, w jeho běrowje w Přiwćicach zhonili. Tak přihotuje motiwator Lucian Kaulfürst poskitk za nalětnje wiki přirody 27. apryla w Stróži. Wón rěčeše tež wo swojich stykach. Najebać to ma předsydstwo za trěbne, zo motiwator zwiski do serbskich cyłkow w Malešecach, Kubšicach a Bukecach dale pohłubšuje.
Zhromadnje z regionalnej rěčnicu zhladowaše předsydstwo na kubłansku jězbu minjenu sobotu do Berlina. Wobdźělnicy chwalachu serbsku bjesadu, wšako někotři ju we wšědnym dnju hižo nimaja. Na tamnym boku so prašachu, čehodla njeběše wjace zajima ze starobneje skupinje wyše 60 lět.
Wuměnichu so wo zetkanju z Domowinskimi skupinami a towarstwami w župje. Wosom skupin a towarstwow sydaše w měrcu za blidom w Radworju. Na přikład přeja sej cyłki přehlad wo serbskich přednoškach, to rěka mjena referentow, temy a kontakty. Skupiny, kotrež přitomne njeběchu, chcedźa nětko wopytać.
Planuja dialog młodźiny k rěči
Choćebuz (SN/at). Předsydstwo župy Delnja Łužica je hłownu zhromadźiznu za 8. junija, sobotu, do Lěšćow (Hornow) zwołało, kaž župan dr. Pětš Šurman po wčerawšim posedźenju gremije zdźěli.
W srjedźišću pak steješe znowa župne młodźinske dźěło. Župan je wobsahowy postup zwěsćił, kotryž zwuraznja so w zaměrnišim kubłanskim dźěle. To je wuslědk zhromadneho skutkowanja zamołwiteje za młodźinske dźěło župy w měsće, Franciski Albertoweje, a regionalneje rěčnicy Domowiny Heiki Apeltoweje. „W dobje pandemije je wěda wo ludowych nałožkach woteběrała“, rjekny župan. Za nje nětko po wšelakich kanalach wabja, mjez druhim w hamtskich łopjenach. Předwidźane je nimo toho, wjace wědy wo wotpowědnym nałožku do moderacije zarjadowanja zaplesć.
Župa wobdźěli so na informaciskim zarjadowanju Akciskeho zwjazka Braniborskeje „Rjeńšo žiwi być bjez nacijow“.
Za popołdnju do schadowanki 12. oktobra planuja młodźinski dialog „Kak móže serbska rěč wědomišo widźomna być?“. Předstajeć budu so tam zdobom serbske zarjadnišća z Choćebuza.
Jenož hišće měsac w interneće
Wobmjezowanja za čas korona-pandemije mějachu za skutkowanje Zwjazkoweho předsydstwa Domowiny tež lěpšinu: W zwisku z online přewjedźenymi posedźenjemi poskićeny livestream je tež zajimowanym zmóžnił, zarjadowanje wot doma abo něhdźe druhdźe sćěhować. Kak dołho pak měli paski w interneće přistupne być? Zwjazkowe předsydstwo je dobu nětko přikrótšiło.
Choćebuz/Budyšin (SN/at). Natočenja wo posedźenjach Zwjazkoweho předsydstwa Domowiny „měli jedyn měsac online přistupne być a so potom hasnyć“. Tak rěka w nowym dypku 1 paragrafa 3 swojeho jednanskeho porjada, kotryž je zwjazkowe předsydstwo minjeny pjatk w Choćebuzu z hłosawzdaćom schwaliło. Dotal běchu natočenja lěto internetnje přistupne. Wuběrk za zjawnostne a wukrajne dźěło je změnu poručił. Prezidij bě jón prosył, rjadowanje pruwować.
Strata za přichod
„Zorjenjo“ wo praktikumje rozprawjeli
Wuradźuje-li Zwjazkowe předsydstwo Domowiny w Delnjej Łužicy, zaběra so wone zwjetša tež z temami tamnišeje specifiki. Rěčny projekt „Zorja“ je tajka, za kotruž so tež w sakskim dźělu Łužicy zajimuja.
Choćebuz (SN/at). 18 čłonkow a čłonow zwjazkoweho předsydstwa je so na posedźenju minjeny pjatk wobdźěliło, wosom na městnje w Delnjoserbskim internaće w Choćebuzu a dźesaćo online doma před wobrazowku. Dokelž někotři do toho přizjewjachu, posedźenje prjedy wopušćić dyrbjeć, wobjednachu wobzamknjenjakmanosće dla wobzamknjenja hnydom na spočatku dnjoweho porjada. Mjez druhim pomjenowa zwjazkowe předsydstwo Bernda Jurka, Kerstin Kosakowu, Margit Neugebauer, Freda Kaisera, dr. Hartmuta Leipnera, dr. Renate Harcke a Rainera Vogela w přihotach na wólby Rady za naležnosće Serbow Braniborskeje za dobu 2024–2029 z jednym hłosawzdaćom do wólbneho wuběrka.
Program Domowiny tema w Lipsku
Diskusija wo naćisku noweho programa Domowiny je dale a šěrša – nětko su serbscy studenća w Lipsku ze zastupjerjemi třěšneho zwjazka programatiku narodneje organizacije rozjimali.
Lipsk (SN/mb). Klětu ma hłowna zhromadźizna Domowiny nowy program wobzamknyć. Wo tym, kak tón wažny dokument třěšneho zwjazka wupada, chcedźa tež serbscy studenća sobu rěčeć. Dźesać studowacych je wčera nawječor přeprošenje na wuměnu do „Centrifugi“ sćěhowało. Organizowała bě zetkanje studentka prawnistwa Lawrencija Hawšec, čłonka towarstwa Sorabija Lipsk. Přichwatali su z Budyšina předsyda Domowiny, Dawid Statnik, nawoda wuběrka za nutřkownu demokratiju a serbsku ciwilnu towaršnosć, Damian Dyrlich, referentka za naležnosće třěšneho zwjazka Madlena Di Sarnowa a kulturny referent Domowiny Clemens Škoda.
Serbsce rěčeć wysoki narok
Wuměna Załožby za serbski lud wo spěchowanskim programje „Serbska rěč a kultura w změnje strukturow“ bě płódne popołdnjo. Diskutowali pak njejsu prěnjotnje zastupjerjo tych towarstwow a iniciatiwow, wo kotrychž w serbskej zjawnosći husto rěčeli njejsu, ale tajkich, po angažemenće znatych.
Budyšin (SN/at). Tójšto idejow je Diana Tüngerthal w swojim zawodnym přednošku naličiła, z kotrymiž hodźałoj so serbska rěč a kultura po nowych pućach skrućić. „Stagnacija opcije njeje“, rjekny čłonka přirady za mjenowany spěchowanski program, kotraž dźěła jako społnomócnjena za turizm we wotrjedźe za wuwiće strukturow, spěchowanje hospodarstwa a mjezynarodne poćahi w Zhorjelskim krajnoradnym zarjedźe. Na někotrych z idejow samo hižo dźěłaja, kaž Cordula Ratajczakowa z projekta ZARI na to naspomni. Wužadanja pytać z dotal njezwučenym postupowanjom a słabosće zwěsćić, to je diskusija k wobłukam spěchowanja wotbłyšćowała.
Na najkmańšich přikładach so orientować
Budyšin (SN/bn). „Know your rights“ (Znaj swoje prawa) je hesło jutrowneho seminara Młodźiny europskich narodnych skupin (MENS), pod kotrymž je so dohromady něhdźe 60 zastupjerjow cyłkownje 16 narodnych resp. rěčnych mjeńšin w Budyšinje zešło. Nimo wjacorych čłonow hosćićelskeho towarstwa Pawk wobdźěla so na nim hosćo z Bretonskeje, Katalanskeje a Waliziskeje, młodźinskich zjednoćenstwow Korutanskich Słowjencow, Gradźišćanskich Chorwatow, Madźarow w Słowjenskej, Sewjeromacedonsklich Aromunow, Danow, Židow resp. Sintow a Romow w Němskej kaž tež němskich minoritow w Madźarskej, Ruskej, Rumunskej a Chorwatskej. Dosć wobšěrny program wopřijimaše dotal jědnaće dźěłarničkow w Serbskim domje, ekskursiju do Delnjeje Łužicy a wječoraj serbskeje hudźby a serbskich jutrownych tradicijow. Na workshopach rozjimachu prašenja kołowokoło čłowjeskich a mjeńšinowych prawow a kak hodźeli so na nje złožujo na přikład prezenca rěče w zjawnosći powyšić, na- resp.
Spěchuja dorost
Budyšin (SN). W jutrownych prózdninach organizuje Serbske šulske towarstwo (SŠT) zhromadnje z dalšimi akterami prěni raz serbski koparski camp. W Njebjelčicach, Ralbicach a Chrósćicach so serbski dorost zetkawa. 32 dźěći w starobje dźewjeć do dwanaće lět (młodźina E+D) so na nim wobdźěli. Młodych sportowcow je trenar Tadej Cyž zhromadnje ze zamołwitymi sportowych towarstwow po jich wukonach w kopańcy nominował. Při tym bě tež wažne, kajke nastajenje maja dźěći k prawidłam fairnosće w sporće. Hłownu organizaciju staj přewzałoj Michaela Rabowa, sobudźěłaćerka SŠT za kubłanje swójbow, a Tadej Cyž jako trenar wubranki dorosta starobneje skupiny D. Jimaj poboku su třo trenarjo a štyrjo co-trenarjo. Projektna towaršnosć LUCIJA budźe camp digitalnje přewodźeć a dokumentować.
Zastupjerjow Serbow schwalili
Štó budźe Serbow na mjezynarodnym parkeće přichodne měsacy zastupować? Na tute a dalše prašenja je prezidij Domowiny wotmołwu namakał. Jenož jedne prašenje wostanje wotewrjeny.
Budyšin (SN). Čłonojo prezidija zwjazkoweho předsydstwa (ZP) Domowiny su wčera wječor prěni raz po dlěšim času wšitcy „live“ w Budyšinje wuradźowali. Woni přihotowachu mjez druhim přichodne posedźenje zwjazkoweho předsydstwa, kotrež so pjatk, 12. jutrownika, w delnjoserbskim internaće w Choćebuzu wotměje.
Wobzamknyli su na wčerawšim posedźenju wjacore delegowanja. Tak wustupi skupina „Serbska reja“ na seminarje dźěłoweje skupiny „non-kin state“ (mjeńšiny bjez „maćerneho kraja“) europskeje třěšneje organizacije domoródnych narodnych mjeńšin FUEN, kotryž budźe wot 23. do 26. jutrownika w Lubnjowje.
Na 2. mjezynarodnym folklornym festiwalu w Sicilskej, kotryž budźe wot 24. do 26. róžownika, budźe Serbska rejowanska skupina Smjerdźaca serbsku kulturu a Domowinu reprezentować.
