Róžeńčanski kružk pisacych zhladuje lětsa na 55. róčnicu załoženja. Alfons Wićaz je so z dwěmaj čłonkomaj rozmołwjał, kak stej ke kružkej přišłoj a što sej za jeho přichod přejetej.
Monika Kochowa z Pančic-Kukowa: Započach so za kružk zajimować, jako korigowach doma maćeri teksty basnjow. W Pančicach sym tajki kružk ze šulerjemi załožiła a jón 16 lět nawjedowała. Sym něhdźe 40 lět z čłonku Róžeńčanskeho kružka. Mjeztym napisach něhdźe 100 basnjow a hišće tójšto dalšich składnostnych za kwasy a druhe swjedźenje. To sym wšědne žiwjenje, počasy, hodowny čas a basnje z nutřkownymi začućemi tworiła. Za přichod kružka bych sej přała, zo přidruža so jemu zaso młódši ludźo. Nadźijam so, zo so snadź tež wnučki našich čłonow, hdyž su tróšku starše, do kružka zarjaduja.
K 40. róčnicy załoženja Róžeńčanskeho kružka pisacych w lěće 2003 je w tehdy wušłej zběrce basnjow a powědkow ludowych basnikow dr. Irena Šěrakowa pisała, zo běchu w Serbach hižo do toho wjacore tajke kružki załožili, Róžeńčanski pak wosta jako jenički aktiwny. Lětsa w februaru zhladowaše tón na 55. róčnicu załoženja. A kružk přeco hišće pilnje dźěła a ze swojimi kulturnymi programami z basnjemi a spěwami ludźi zwjesela, kaž na přikład w starownjach abo k swojemu jubilejnemu swjedźenjej hromadźe z Domowinskej skupinu Pančicy-Kukow a w Chróšćanskej putniskej hospodźe.
Wojerecy (SN/JaW). Prezidij Zwjazkoweho předsydstwa Domowina je so wčera nadrobnje z aktualnym stawom wobydlerskeje iniciatiwy Federalistiske unije europskich narodnych mjeńšin (FUEN) Minority SafePack zaběrał. „Wjeselimy so, zo je iniciatiwa mjeztym jedne žadanje spjelniła a w sydom krajach trěbnu ličbu podpismow docpěła. Přiwšěm pobrachuje hišće něšto wjac hač 60 000 signumow, zo bychmy trěbny milion docpěli. Smy potajkim krótko před cilom“, rozłoži předsyda Domowiny Dawid Statnik. Zdobom wón hišće raz wšitkich naležnje namołwja akciju podpěrać a skedźbnja zdobom na to, wšitke dotal zezběrane podpisma w přichodnych dnjach Domowinskemu zarjadej w Budyšinje přepodać. Domowina je wot lěta 1990 z čłonom FUEN a sylnje za wobydlersku iniciatiwu wabi.
Budyšin (SN/bn). Předsyda Maćicy Serbskeje Jurij Łušćanski, jeje městopředsydka dr. Anja Pohončowa a čłonka předsydstwa dr. Ines Kellerowa spožčichu wčera spěchowanske Myto Michała Hórnika Fabianej Neterej. Šulerja Serbskeho gymnazija Budyšin wuznamjenichu za jeho fachowe dźěło „Přesćěhanje Židow w času nacionalsocializma we Łužicy wot 1933 do 1945 na přikładźe swójby Nussenbaum z Budyšina“. Awtor bě za to fachowu literaturu intensiwnje a dokładnje wuhódnoćił, nimo toho wustupuja časowi swědcy. Byrnjež nastawk wšitkim kriterjiam, kotrež Maćica předpisuje, njewotpowědował – wupisanje žada sej mjez druhim tematisce serbski wobsah, kotryž pak lawreat bjezposrědnje wobkedźbował njebě –, je so hódnoćacy wuběrk towarstwa wědomostneje akuratesy a rěčneje kwality dla na kompromis dojednał. Fabianej Neterej přizwoli tuž připóznawanske Myto Michała Hórnika we formje wopisma, je pak dotěrowanu sumu społojčił.
Ralbicy (SN/MkWj). Pomnik za zbóžnoprajeneho kapłana Alojsa Andrickeho je Towarstwu Cyrila a Metoda dale wažne předewzaće a wostanje – kaž so wčera wječor na hłownej zhromadźiznje TCM w Ralbicach zaso pokaza – přiwšěm dosć emocionalna naležnosć.
Hižo na lońšej „hłownej“ towarstwa w Kulowje bě pomnik debatu zbudźił. Dr. Pětr Brězan ze Sulšec a jeho bratr dr. Jan Brězan z Drježdźan běštaj projekt předstajiłoj. Jeju předstawy: Pomnik Alojsa, wulki kaž čłowjek, steji měšnisku sutanu woblečeny před Róžeńčanskej swjatnicu a strowi přichadźacych putnikow. Bratraj běštaj model sobu přinjesłoj, organizatoriske prašenja w dalokej měrje hižo zrjadowałoj a samo pólskeho rězbarja za nadawk zdobyłoj. Dokelž pak je to mnohim prosće přespěšnje šło, loni w Kulowje rozsudźichu wutworić dźěłowu skupinu, kotraž ma so předewšěm z formu pomnika zaběrać a wjacore wuměłske namjety pruwować.
Budyšin (SN/bn). Na hłownej zhromadźiznje Maćicy Serbskeje sobotu na žurli Budyskeho Serbskeho muzeja je něhdźe 40 čłonow wědomostneho towarstwa rozprawje předsydy a pokładnika jednohłósnje schwaliło. Po mjeńšinje ćišiny za loni zemrěteju wjelelětneju sobustawow dr. Siegmunda Musiata a dr. Zbigniewa Gajewskeho wupraji so předsyda Jurij Łušćanski k dźěławosći towarstwa. „Jubilej ‚500 lět reformacija‘ je tež nas Serbow zaběrał. Na iniciatiwu serbskeho superintendenta Jana Malinka nasta kedźbyhódna kniha ‚Pjeć lětstotkow – Serbja a reformacija‘, ke kotrejž su nimo předsydki wuběrka za serbske pomniki Trudle Malinkoweje tež dalši čłonojo ze zajimawymi nastawkami přinošowali. Zawěsće njepřehnawam, hdyž mam wudaće za wusahowacy podawk lěta“, předsyda rjekny. Nimo toho wuzběhny wón prócowanja Maćicy wo wutworjenje pomnika za dekana Johanna Leisentritta w Budyšinje. Maćica Serbska ma „tuchwilu 106 sobustawow, mjez nimi dwanaće wukrajnych. Z towarstwa wustupiła je jedna wosoba, přistupili su tři.“
Radwor (SN/MkWj). „Tajkich prócowarjow bychmy dźensa nuznje trjebali.“ Facit Ludmile Budarjoweje drje měješe něchtóžkuli we hłowje, jako po wopominanskim zarjadowanju składnostnje 50. posmjertnin Michała Nawki minjeny pjatk w Radworju zaso domoj dźěše. Wjace hač połsta zajimcow bě na zarjadowanje na wosadnu žurlu přichwatało, na kotrež běštej Towarstwo Cyrila a Metoda a Maćica Serbska přeprosyłoj.
W krótkopřednoškach zhonichu wopytowarjo wo hoberskim spektrumje skutkowanja Radworčana, kiž bě 16. měrca 1968 zemrěł. Ludmila Budarjowa rozprawješe, kajke problemy měješe „pilny a chrobły serbski prócowar“ z nacionalsocialistami a pozdźišo ze socialistiskej wyšnosću, dokelž nochcyše so statnej liniji podwolić. Tak bě Nawka jedyn z prěnich, kiž dyrbješe 1937 na ćišć nacijow swoju serbsku domiznu wopušćić. Nacionalsocialisća přesadźichu jeho do Kamjenicy.