Serbski sejm chce „Arte-wuchod“
Němsko-francoski kulturny sćelak „arte“ płaći tróšku jako zdźěłany konik ludźi, kotřiž hewak telewiziju njehladaja. Serbski sejm so wo dalši tajki poskitk prócuje: „Arte-wuchod“.
Drježdźany (SN/mb). Druhi raz lětsa je zjednoćenstwo Serbski sejm do žurle krajneje nowinarskeje konferency přeprosyło, zo by swoje rozestajenje wo připóznaće serbskeho ludu jako „indigeny“ dale wjedło. Prěni raz běchu zwjazkowemu knježerstwu „ultimatum“ hač do 23. smažnika stajili, tutomu žadanju wotpowědować. Serbski sejm sam drje naš lud hižo předlońšim jako indigeny deklarowaše, to pak njeje ani w serbskej ani w němskej zjawnosći wulku kedźbnosć nadešło. Dźensa běchu nimo Tomaša Čornaka a Měrćina Krawca z wonkowneho wuběrka Serbskeho sejma wjacori partnerojo z wukraja připowědźeni. Jako prěni měješe David Chmelík, prezident załožby „Slavonic Europe“ cyłkowny koncept projekta „Arte-wuchod“ předstajić.
Dalši poskitk serbšćiny trěbny
Budyšin (kl/SN). Wo serbskim přinošku za dźeń narodnosćow, kiž budźe 17. septembra w Budyšinje, su čłonojo předsydstwa župy „Jan Arnošt Smoler“ na swojim posedźenju wčera w tudyšim Serbskim domje rozmyslowali. Tak chce rěčny motiwator Lucian Kaulfürst swój runje nastawacy memory wo dudach a druhich instrumentach z wopytowarjemi hrać.
Znowa zaběraše so předsydstwo z tematiku kubłanja. Hižo dlěje traje diskusija wo poskitku serbšćiny na dalšej zakładnej šuli w Budyšinje. Pozadk toho je, zo dyrbjachu na tudyšej Serbskej zakładnej šuli napjateje rumnostneje situacije dla dźěći z Witaj-skupin wospjet wotpokazać. Nuznje trěbne je tuž rozrisanje z dalšej šulu w sprjewinym měsće.
Rěčne zmylki na taflach Šěrachoweho kołopuća w Budyšinku nastupajo županka Leńka Thomasowa přilubi spěšnje móžnosć namakać, tute skorigować.
Župne předsydstwo wjeseli so wo namjetach z Domowinskich skupin a towarstwow za wuznamjenjenja narodneje organizacije, kiž maja so hač do 30. junija zarjadej Domowiny zapodać.
Zwiski do Łužicy w Smolinach nazhonili
Wšojedne kotreje staroby sy, noweje wědy so nasrěbać pohonja duch a wožiwja strowotu
Wučerjo a wučerki, kubłarjo a kubłarki kaž tež sobudźěłaćerjo Serbskeho šulskeho towarstwa, kotřiž su mjeztym na wuměnku, su so spočatk meje na hromadnu kubłansku jězbu podali. Lětsa su města w Smolinach wopytali, mjez kotrymiž běchu Blankenburg, Goslar, Wernigerode, Halberstadt a Quedlinburg. Nimo powabliweje krajiny su sej twarske pomniki a wosebitosće architektury wobhladali a so tróšku ze stawiznami tamnišeje kónčiny zeznajomili.
Spěw jich stajnje přewodźa
Za direktnu demokratiju
Čas samoběha je nimo
Na pikniku před Serbskim domom
Čłonow wabić najwažniše
Spěchowanske towarstwo z nowym předsydstwom, ale bjez předsydy
Łaz (AK/SN). Młódša generacija měła so sylnišo za serbske wosobiny kaž Handrija Zejlerja, Jana Arnošta Smolerja a Korlu Awgusta Kocora zajimować. Za to chce so spěchowanske towarstwo zetkanišća Dom Zejlerja a Smolerja zasadźić. „Při tym chcemy Łazowsku wyšu šulu sobu zapřijeć“, praji dotalny předsyda Reinhardt Schneider minjeny pjatk na hłownej zhromadźiznje towarstwa. Na njej wuzwolichu nowe předsydstwo. Funkciju předsydy je Reinhardt Schneider po 22 lětach złožił. Naslědnika dotal nimaja.
Kak po posudku postupować?
Budyšin (SN/at). Šěsć namjetow je wuběrk za nutřkownu demokratiju a serbsku ciwilnu towaršnosć Zwjazkoweho předsydstwa Domowiny wudźěłał, kotrež wopisaja móžnosće wabjenja dorosta za serbske institucije. Z nimi zaběra so zwjazkowe předsydstwo na zjawnym posedźenju jutře wot 19.30 hodź. w Budyšinje. Předleži zdobom namjet, do mjenowaneho wuběrka Křesćana Korjeńka jako fachowca powołać. Na dnjowym porjedźe steji dale rozmołwa ze załožbowym direktorom Janom Budarjom. Tam chcedźa tež wo aktualnym stawje projekta na Lawskim arealu rěčeć.
Prezidij je so hižo z dalšim postupowanjom po prawniskim pruwowanju wólbow serbskich załožbowych radźićelow a jich zastupjerjow ze Sakskeje zaběrał a chce zwjazkowe předsydstwo wo tym informować. Tuž wuradźuje gremij wo přihoće wólbow hišće wakantneho serbskeho naměstnika ze Sakskeje do rady Załožby za serbski lud. Domowinje je stejišćo ze sakskeho ministerstwa za wědomosć, kulturu a turizm dotal jenož zdźěla přistupne.
▶ Čitajće k tomu tež na stronje 3
Tři dźěle běchu wočornjene
Budyšin (SN/at). Zwjazkowe předsydstwo Domowiny zaběra so na swojim přichodnym posedźenju 12. meje z wólbami štwórteho serbskeho zastupjerja ze Sakskeje do rady Załožby za serbski lud. To budźe trěbne po předležacym posudku sakskeho ministerstwa za wědomosć, kulturu a turizm wo wotběhu wólbow serbskich čłonow a jich zastupjerjow ze Sakskeje do toho załožboweho gremija. Prezidij Domowiny bě naležnosć na swojim wuradźowanju minjenu wutoru rozjimał. Wo nadrobnosćach njeje so městopředsyda dr. Hartmut Leipner wuprajić chcył. „Mamy wěste namjety, kotrež pak chcemy najprjedy zwjazkowemu předsydstwu předstajić“, rjekny wón na naprašowanje našeho wječornika.
Hartmut Leipner wobkrući, zo Domowinje spis z posudkom ministerstwa z tójšto wočornjenjemi předleži. Tónle original je sej třěšny zwjazk napominał, po tym zo bě załožbowy direktor Jan Budar w serbskej rěči na jeje próstwu přepruwowanja wotmołwił, předsyda Dawid Statnik wudospołni. Wot štyrjoch dźělow originala běchu tři wočornjene, „jenož wotmołwa na prašenje Domowiny nic“.
Wjac serbšćinarjow do Wojerec!
Intensiwniše wabjenje za wučerjow serbšćiny w šulach Wojerowskich kónčin přeje sej předsydstwo župy „Handrij Zejler“. Kubłanska politika bě zaso ćežišćo wuradźowanja gremija.
Wojerecy (SN/mb). Pod nawodom županki Gabriele Linakoweje su čłonojo předsydstwa župy „Handrij Zejler“ Wojerecy srjedu wječor namjety za lětuše čestne znamješko a myto Domowiny rozjimali a njedawnu hłownu zhromadźiznu třěšneho zwjazka wuhódnoćili. Wosebje wobšěrna čiła diskusija wo kubłanskich prašenjach bě so delegatam župy spodobała. Župne předsydstwo je poziciju župy wobkrućiło, zo maja so praktiske wšědne nazhonjenja wučerjow tež w přichodźe w serbskej kubłanskej politice wobkedźbować.
