Nowi w zarjedźe

Mittwoch, 05. Juli 2017 geschrieben von:

Choćebuz (SN/JaW). Domowinski běrow kaž tež wotnožka Załožby za serbski lud w Choćebuzu matej wot spočatka tydźenja štyrjoch nowych sobudźěłaćerjow.

Kaž wobkrući našemu wječornikej zastupowacy jednaćel třěšneho zwjazka Marcus Kóńcaŕ, je spočatk měsaca Heike Apeltojc zastojnstwo jako nowa regionalna rěčnica za Delnju Łužicu nastupiła. Wona naslěduje Utu Henšelowu, kotraž nawjeduje wot spočatka februara Choćebusku Šulu za delnjoserbsku rěč a kulturu. Apeltojc ma prěnjorjadnje wudźeržować zwiski k delnjołužiskim gmejnam we wokrjesomaj Hornje Błóta-Łužica a Dubje-Błóta kaž tež k Domowinskim skupinam a towarstwam na teritoriju župy Delnja Łužica.

Dalšej nowaj sobudźěłaćerjej we wobłuku projektoweho skutkowanja Domowiny staj Katrin Šwjelina a Gerald Schön. Wonaj starataj so hač do kónca lěta­ wo projektowe dźěło, předewšěm na polu kultury. Tohorunja wot spočatka julija dźěła w Choćebuskej wotnožce Załožby za serbski lud Irina Henšelowa. Wona je wotnětka zamołwita za institucije a wobdźěłanje projektow.

Domowinski pokal do Rogozna

Mittwoch, 05. Juli 2017 geschrieben von:
Hochoza (HA/SN). Hižo 20. raz za sobu je župa Delnja Łužica přewjedła swój koparski turněr wo Domowinski cup. Sydom mustwow – pjeć muskich a dwě žonjacej – zetka so k tomu minjenu sobotu w Hochozy. Hrajny modus bě tajki, zo dyrbješe kóžde z nich znajmjeńša jónu přećiwo sebi nastupić. Po dohromady 21 partijach bě skónčnje jasne, štó lětsa pokal župy dóstanje. Cyłk młodych Domowinskich čłonow z Rogozna (Willmersdorf) doby před Dešnjanami a Hochožanami. Pola žonow běchu koparki z Hochozy na kóncu lěpše hač mustwo z Rogozna. Jasne nětko je, zo budźe přichodny koparski turněr wo pokal Domowiny klětu w Rogoznje.

Skupinu njerozpušćić

Dienstag, 04. Juli 2017 geschrieben von:
Wětošow (SN/JaW). Domowinska skupina Wětošow hrozy rozpadnyć. Přičina je pobrachowacy dorost. Předsydstwo bě so na njedawnym zetkanju dojednało, dźěło skupiny kónc lěta skónčić. Kaž wottam rěka, njejsu naslědnika za předsydu našli. „Hižo dlěje spytam zastojnstwo młódšemu přepodać, njenamakam pak nikoho za nje“, rjekny dotalny předsyda skupiny Milan Nowak Nowemu Casnikej. Dołho a na­drobnje su diskutowali, kak měło ze skupinu dale hić. Tuchwilu ma wona jědnaće čłonow, wjetšina su starši ludźo. Młódši su wokoło 50 lět a su połnje do powołanja zapřehnjeni. Mnozy skutkuja hižo w dalšich towarstwach. Třěšny zwjazk so nadźija, zo zamóža Wětošowscy Domowinjenjo rozpušćenje skupiny hišće wotwobarać. Snano móhli so z dalšej skupinu zjednoćić, kaž to hižo wjacore cyłki w Delnjej Łužicy praktikuja, rěka k tomu z Choćebuza. Kaž zastupowacy jednaćel Domowiny Marcus Kóńcaŕ potwjerdźi, chcedźa nazymu nadrobnje wo ćežach a móžnosćach rozmyslować.

Serbska šulska konferencaza Delnju Łužicu

Montag, 03. Juli 2017 geschrieben von:

Choćebuz (HA/SN). Zhromadne dźěło nawodnistwa Domowiny ze župu Delnja Łužica – to bě hłowna tema posedźenja prezidija Domowiny minjeny štwórtk w Choćebuzu. Wobaj gremijej běštej so lěta 2014 z kooperaciskim zrěčenjom na to­ dojednałoj. W diskusiji, na kotrejž so nimo prezidija a župneho předsydstwa tež čłonojo noweho zwjazkoweho předsydstwa, braniborskeje serbskeje rady a Rěčneho centruma WITAJ wobdźělichu, dźěše hłownje wo ćežišća tajkeje kooperacije. Tak so dojednachu, přewjesć serbsku kubłansku konferencu za Delnju Łužicu, prawdźepodobnje klětu nalěto.

Rozjimali su tež połoženje hladajo na wuhlowu a energijowu politiku we Łužicy a na nowe wusměrjenje energijoweho koncerna LEAG. Tež k tej tematice měła so wosebita konferenca přewjesć, wobdźělnicy namjetowachu. Přezjedni sej běchu,­ zo wotwisuje přichod serbskeho ludu wot hospodarskeje a socialneje situacije.­ Tuž ma Domowina prawo, w tychle wažnych prašenjach sobu rěčeć. A to chcedźa spočatk septembra w Budyšinje z kandidatami jednotliwych stron k wólbam zwjazkoweho sejma­ činić.

Dźak za pomoc

Freitag, 30. Juni 2017 geschrieben von:

Choćebuz (SN/JaW). Wo zwoprawdźenju kooperaciskeho zrěčenja Domowiny ze župu Delnja Łužica je so prezidij zwjazkoweho předsydstwa wčera w Choćebuzu sam wobhonił. Kaž předsyda Domowiny Dawid Statnik zdźěla, bilancowachu přitomni dotalnu skutkowansku dobu. Načeli su tež temu strukturna změna we Łužicy. Facit bě, zo je połoženje serbskeho ludu wusko z hospodarskej situaciju we Łužicy zwjazane.

Wuhódnoćili su čłonojo gremija mjez druhim XII. mjezynarodny folklorny festiwal „Łužica/Łužyca 2017“, wabjenje za wobydlersku iniciatiwu Minority SafePack kaž tež FUEN-seminar słowjanskich mjeńšin. „Prezidij dźakuje so wšitkim wuměłcam a kulturnym ćělesam kaž tež čestnohamtsce skutkowacym pomocnikam, kotřiž su k poradźenju festiwala přinošowali. Wosebje dźakujemy so wobsedźerjam statokow w Hochozy a Chrósćicach, kotrež běchu festiwalej wosebity raz spožčili. Bjez nich njeby folklorny festiwal tak wuspěšny był“, Statnik wu­zběhny.

Pozitiwnje wuprajichu so wčera tež wo debaće Sakskeho krajneho sejma k serbskim wobsaham.

Po wšěch serbskich katolskich wosadach je so minjenej dnjej zrudźaca powěsć rozšěriła, zo bě wutoru w 82. žiwjenskim lěće znaty a woblubowany braška Jakub Młynk z Rakec na prawdu Božu wotešoł.

Sprawny, wotewrjeny a horliwy Serb a přikładny wěriwy křesćan, kiž bě stajnje wjesołeje mysle, narodźi so­ 25. julija 1935 w Róžeńće. We wójnskich lětach zastupi wón tam do šule, a ju wuchodźiwši je w Ra­dworju nawuknył powołanje pjekarja. Po tym zo bě tež w Budyšinje chlěb a całty pjekł, dźěłaše krótki čas we Wulkodubrawskej Margarećinej hěće a we Wětrowskej šamotowni.

Woženiwši so bydleše ze swójbu w Rakecach, hdźež je hač do rentnarskeje staroby w tamnišim rybarstwje jako šofer dźěłał. Njeličomne tysacy kilometrow běše wón z tehdyšim nawodu Rakečanskeho rybarstwa Walterom Rudolfom po cyłej wuchodnej Němskej po puću. Z nakładnym awtom wožeše rybu tohorunja do Pólskeje a Čěskeje, hdźež je so dźakowano swojej maćeršćinje derje dorozumić móhł. Jeho zasłužba je, zo nawjaza Rakečanski rybarski zawod lěta 1966 přećelske zwiski z čěskim statnym rybarstwom w Blatnje blisko Českich Budě­jovic.

W Židźinom je tamniši chór wčera na tradicionalne spěwanje pod měrowym dubom přeprosył. Nimo spěwarjow dožiwi něhdźe sto připosłucharjow tež wokalny ansambl amici della musica. Wobě ćělesy zwjazuje, zo jej Kerstin Liederowa nawjeduje. Mjeztym zo Židźinski chór swój němsko-serbski repertoire přednjese, poskići wokalny ansambl wurězki ze swojeho programa „Wo cuzych­ krajach a ludźoch“. Po programje wjedła je Weronika Boswankowa. Foto: Ulrike Herzger

Literarny swjatk wohroženy

Donnerstag, 22. Juni 2017 geschrieben von:

Budyšin (SN). Swoje čestnohamtske skutkowanje za přihoty 39. swjedźenja serbskeje poezije staj Benedikt Dyrlich a Měto Benada wot wčerawšeho dnja wusadźiłoj, kaž we wozjewjenju zdźě­lataj. Z přihotowanskim wuběrkom planowany a zdźěłany tuchwilny koncept je po jeju měnjenju „wuskeho časoweho ramika­ hač do planowaneho zahajenja swjedźenja 22. julija dla lědy hišće zwoprawdźomny“. Wobaj wobwinujetaj předsydu Zwjazka serbskich wuměłcow Jana Bělka, zo njeje mjez nim a nimaj hač „do dźensnišeho dnja k žanomu do­jednanju wo tymle skutkowanju dóšło“, za kotrež běchu jimaj gremije ZSW nadawk dali.

Předsyda ZSW Jan Bělk ma wumjetowanja za lózyskosć. Jako přičinu mjenuje wón rozdźělnej prawniskej poziciji wobeju stron nastupajo zrěčenje za Dyrlicha a Benadu, kotrež jeju skutkowanje za Swjedźeń serbskeje poezije rjaduje. Pozicija Bělka je, zo ma so tajke dojednanje na prawniske zasady złožować. Lětuši literarny­ swjatk ma wón za wohroženy.

Žylowčenjo w Choćebuzu rejwali

Mittwoch, 21. Juni 2017 geschrieben von:
Choćebuska měšćanska hala bě minjenu sobotu wulki rejwanski palast. Něhdźe 130 čłonow Choćebuskeho dźiwadła Piccolo a dalšich ansamblow je tam najwšelakoriše reje wot moderny přez folkloru hač k rock’n’rollej prezentowało. Mjez hóstnymi ćělesami bě tež Žylowski Němsko-Serbski ansambl (hlej wobraz). Wuměłcy předstajichu kermušnu reju, za kotruž bě Mia Faccinelli ze Serbskeho ludoweho ansambla­ choreografiju spisała. Foto: Michael Helbig

Zajimcy na live- wusyłanju witani

Dienstag, 20. Juni 2017 geschrieben von:

Budyšin/Chrósćicy (SN). Jutře, 21. junija, je sćelak Deutschlandfunk z hosćom w Chrósćicach. Kaž Domowina zdźěli, wusyła Deutschlandfunk dźeń do zahajenja XII. mjezynarodneho folklorneho festiwala „Łužica“ z farskeho dwora live-přinošk „Länderzeit“ (10.10–11.30 hodź.).

Rozhłosownicy chcedźa pokazać, kak wobydlerjo we Łužicy swoju kulturu, wuměłstwo a rěč haja a što to za jich zwja­zanosć z domiznu woznamjenja. Tule temu ma redakcija tež za připosłucharjow w druhich zwjazkowych krajach za zajimawu. Nimo toho chcedźa wuwědomić, kak je móžno wohroženu rěč zachować a přichodnym generacijam dale dawać kaž tež, kak maja so etniske mjeńšiny škitać.

Rozmołwni partnerojo budu jutře mjez druhim Chróšćanski farar Měrćin Deleńk, direktorka Budyskeho Serbskeho muzeja Christina Boguszowa, młodostni Antonija Wjeselic, Pětr Dźisławk a Lukaš Kólca kaž tež předsyda Domowiny Dawid Statnik. Wšitcy zajimcy su wutrobnje přeprošeni, so jutře jako hosćo live-wusyłanja wobdźělić.

Anzeige