Chcedźa wustawki zwjazka wobnowić

Mittwoch, 06. März 2019 geschrieben von:

Strukturna změna a kubłanje w srjedźišću

Choćebuz (SN/JaW). Strukturna změna we Łužicy a serbskorěčne kubłanje budźetej ćežišći lětušeje 19. hłowneje zhromadźizny Domowiny, kotraž wotměje so 30. měrca w Chróšćanskej „Jednoće“. To připowědźi předsyda Domowiny Dawid Statnik wčera na nowinarskej konferency w Choćebuskim Serbskim domje.

Domowinski zarjad liči z cyłkownje 190 delegatami na zhromadźiznje. Kaž zastupowacy jednaćel Domowiny Marcus Końcaŕ rozłoži, smě kóžde třěšnemu zwjazkej přisłušace towarstwo, njewotwisnje wot wulkosće, třoch delegatow na hłownu zhromadźiznu pósłać. „Na kóžde 50 čłonow jim dalšeho delegata přizwolimy. Tuž pojědźe na přikład župa Delnja Łužica, kotraž ma něhdźe 2 250 čłonow, z 48 delegatami do Chrósćic.“ Přeprosyli su sej na „hłownu“ wjacorych čestnych hosći. Swoje wobdźělenje připowědźili su hižo sakski ministerski prezident Michael Kretschmer (CDU), zapósłanc Němskeho zwjazkoweho sejma Klaus-Peter Schulze (SPD) a społnomócnjeny zwjazkoweho knježerstwa za wusydlencow a narodne mjeńšiny dr. Bernd Fabritius.

Ertnje abo pisomnje?

Mittwoch, 06. März 2019 geschrieben von:
Domowina hotuje so na hłownu zhromadźiznu. Njeje to žana wólbna, tuž změja po informacijach předsydy Dawida Statnika wjac chwile so „wobsahowym dypkam“ skutkowanja třěšneho zwjazka wěnować. To mam za dobre a trěbne. Jako sej podłožki k hłownej zhromadźiznje, kotrež wčera žurnalistam na nowinskej konferency w Choćebuskim Serbskim domje rozdźělichu, přečitach, pak mi napadny, zo drje budźe so předsyda w swojej rozprawje „dźěławosći třěšneho zwjazka, aktualnym a nowym politiskim wužadanjam a aktiwitam čłonskich cyłkow“ přiwobroćić, dalše informacije mjez druhim wo dźěle župow a towarstwow podadźa delegatam jenož pisomnje w mapje. Škoda, wšako mnohich runje dźěło na bazy zajimuje. A přednjesena rozprawa – njeje-li předołha – wostanje lěpje a dlěje w pomjatku. Prašam so mjenujcy, kelko delegatow sej pisomnje podate informacije woprawdźe přečita. Janek Wowčer

Wostanu dale w rozmołwje

Montag, 04. März 2019 geschrieben von:

Drježdźany (SN/JaW). Serbskorěčne kubłanje na šulach steješe w srjedźišću dźěłoweje rozmołwy zastupjerjow serbskich institucijow ze sakskim statnym ministrom za kultus Christianom Piwarzom (CDU) minjeny pjatk w Drježdźanach. Pjećčłonskej skupinje Serbow přisłušachu wědomostnica Budyskeho Serbskeho instituta dr. Jana Šołćina, zastupjerka intendanta za serbske dźiwa­dło w Němsko-Serbskim ludowym dźiwadle Ma­dlenka Šołćic, jednaćelka Ludoweho nakładnistwa Domowina Marka Maćijowa, nawodnica Rěčneho centruma WITAJ dr. Beata Brězanowa a direktor Załožby za serbski lud Jan Budar.

Póstniske wjeselo je Serbskopazličanske karnewalowe towarstwo wčera wobydlerjam Chróšćanskeho Domu swj. Ludmile wobra­dźiło. Z dźěćacej a młodźinskej škričkowej gardu předstajichu jim wurězki ze swojeho programa. Na to podachu so k zbraše­nym w klóštrje Marijinej hwězdźe w Pančicach-Kukowje, hdźež su tohorunja póstnicy swjećili. Foto: Feliks Haza

Prócuja so wo managera

Dienstag, 26. Februar 2019 geschrieben von:

Towarstwo Njepilic dwór wostanje hesłu „Kak to jo było“ dale swěrne

Rowno (AK/SN). Towarstwo Njepilic dwór prócuje so wo to, přistajić kultur­neho managera. „K tomu smy próstwu wo podźělne spěchowanje na Załožbu za serbski lud stajili, nadźijamy so pozitiwneje wotmołwy“, podšmórny předsyda Manfred Ni­kel minjeny pjatk na hłownej zhromadźiznje towarstwa w Rownom. Trěbne je městno za přewod a ko­ordinaciju projektow w pěstowarnjach, šulach a zarjadnišćach. Kulturny manager měł tež wopytowarjow a turistow po Nje­pilic statoku přewodźeć. Jeho nadawki su mnohostronske.

Popołdnjo jara wuspěšne było

Montag, 25. Februar 2019 geschrieben von:

Stróža (kl/SN). Swójbne popołdnjo minjeny pjatk w Stróžanskim Domje tysac hatow bě po wuprajenjach Budyskeje župy­ „Jan Arnošt Smoler“ jara wuspěšne. Župa bě je z biosferowym rezerwatom Hornjołužiska hola a haty a z towarstwom Radiška spřihotowała. Něhdźe 40 wopytowarjow bě přeprošenje sćěhowało, předewšěm dźěći ze staršimi abo z dźědom a wowku. „Wjeselimy so, zo bio­sferowy rezerwat dale a časćišo serbske temy do swojich poskitkow zapřijima“, zwurazni čłonka Radiški Jana Pětrowa.

Spočatnje wobhladachu sej přitomni bajkowy film wo wódnym mužu z lěta 1991, za kotryž bě Dieter Kempe hudźbu stworił. Po tym so dźěći na wšelakich stacije pospytachu, paslichu a molowachu abo zešichu sej klanku-připołdnicu. Nimo toho zhonichu tójšto wo powěsćach z wódnym mužom, kotrež jednaja w blišej wokolinje – na přikład wo bitwje wódneho muža z Drabom w Malešecach. Nima­le wšitke stacije běchu dwurěčne. Lutki, připołdnica a wódny muž běchu tež jako ručne klanki předstajene. Towarstwo Krabatowy młyn z Čorneho Chołmca bě je za zarjadowanje přewostajiło.

Mytuja kolekcije jutrownych jejkow

Montag, 25. Februar 2019 geschrieben von:

Spěchowanski kruh za serbsku ludowu kulturu wuhotuje tež lětsa znowa wubě­dźowani wo najrjeńše jutrowne jejko. Wotnětka přijimuje towarstwo kolekcije dorosta.

Budyšin (SN/bn). Kóždolětnje wotměwa kruh wot Załožby za serbski lud podpě­rane zarjadowanje w dwěmaj etapomaj. Najprjedy wupisa wubědźowanje za dźěći a młodostnych, potom su dorosćeni na rjedźe. Minjenu srjedu je towarstwo prěnje wurisanje zahajiło. W nowinskej zdźělence „namołwja spěchowanski kruh dźěći a młodostnych z cyłeje Łužicy, kiž čuja so ze serbskej tradiciju zwjazani a kotrymž hajenje a zdźerženje tutoho nałožka na wutrobje leži, so na našim lětu­šim 66. wubědźowanju wobdźělić“.

Michała Hórnika wopominali

Montag, 25. Februar 2019 geschrieben von:
125. posmjertniny serbskeho prócowarja, kanonika Michała Hórnika, su přičina, jeho­ na wšelake wašnje počesćić. Hižo pjatk bě tójšto ludźi na Budyski Mikławšk k Hórnikowemu rowej přišło a na njeho spominało. Wopominansku narěč měješe farar Gerat Wornar (srjedźa). Towarstwo Cyrila a Metoda bě zarjadowanje orga­ni­zowało. Zdobom stej dalšej počesćeni předwidźanej. Štwórtk, 7. měrca, planuja we 18.30 hodź. spominanje we Worklečanskej kapałce zhromadnje z tamnišim kapałkowym towarstwom a ze župu „Michał Hórnik“, 8. měrca potom z Worklečanskej šulu, kotraž je to­horunja po Michale Hórniku pomjenowana. Foto: SN/Hanka Šěnec

W skečach brachi šwikali

Montag, 25. Februar 2019 geschrieben von:

Kopata połna žurla na prěnim kapičkowym wječoru w „Bjesadźe“

Njebjelčicy (AKr/SN). W Njebjelčanskej „Bjesadźe“ wotmě so sobotu prěni kapičkowy wječor 49. sezony Serbskopazličanskeho karnewaloweho towarstwa (WCV). Nory zbliska a zdaloka běchu do Njebjelčic přichwatali, mjez druhim z Kamjeneje pola Radworja, Jaseńcy, Noweje Wjeski a Pančic-Kukowa. Někotři wobdźěleja so tam hižo wjele lět, dokelž so na pisany program a rjanu bjesadu wjesela.

Wšitcy pak su wćipni na princowski por. Lětsa staj to princ Michał III. a jeho princesna Christina I. z dźěćacej princesnu Linu, dwórskim noru Nicom a škričkowej princesnu Saruh. Žurla bě zaso połnje wobsadźena, a program započa so z reju škričkoweje gardy.

Swěru a horliwje w Lipje spěwała

Montag, 25. Februar 2019 geschrieben von:

Wčera, 24. februara, swjećeše Herta Libšowa w kruhu swójbnych, přiwuznych a přećelow w Pančicach-Kukowje wosomdźesaćiny.

1939 narodźi so wona Kneblecom jako šeste dźěćo. Mać a nan staraštaj so w te­hdyšim času wosebje wo ćělne derje­měće. Hłód wšak často před durjemi steje­še, ale dobri ludźo, kotřiž mějachu ratarstwo, jim z nuzy wupomhachu. Přede­wšěm nan skićeše swojim dźěćom dobre wukubłanje, wědźo, zo je to wažny měznik do přichoda. Tak poda so Herta po wuchodźenju 10. lětnika na studij wučer­stwa za delni schodźenk.

Anzeige