Swoju lětušu hłownu zhromadźiznu zwjazachu čłonojo Towarstwa přećelow Serbow (SPL) minjenu sobotu w Praze ze 111. róčnicu załoženja SPL. Tež Domowina je gratulowała.

Praha (Łu/SN). Towarstwo přećelow ­Ser­bow (SPL) – při Serbskim seminarje w Praze – je w zwisku z lětušej hłownej zhromadźiznu minjenu sobotu w čěskej stolicy na 111 lět spomóžneho skutkowanja zhladowała. Mjez gratulantami sposrědkowa referent Domowiny za kulturu a wukraj Clemens Škoda zbožopřeća předsydy Domowiny Dawida Statnika. Tam mjez druhim rěkaše: „Přez wjele generacijow mějachmy čěskich přećelow, kotřiž starosćachu so wo dóńt serbskeho ludu. Tež hdyž je so pomjenowanje towarstwa měnjało, wostachu čłonojo nam w dobrych a ćežkich časach přez lětstotk swěrni.“ Zdobom wupraji Clemens Škoda jako čłon SPL předsydstwu towarstwa swój dźak a připóznaće za zdokonjane čestnohamtske dźěło.

Slepo (SN/mwe). Po tym zo staj dotalny předsyda towarstwa Serbski kulturny turizm (SKT) Manfred Hermaš a jeho naměstnik Stefan Malink zastojnstwo złožiłoj, wotměchu so minjeny pjatk na hłownej zhromadźiznje cyłka w Slepjanskim Serbskim kulturnym centrumje nowowólby. Jednohłósnje su tam přitomni čłonojo SKT Pětra Brězana, Do­mowinskeho referenta za hospodarstwo a infrastrukturu, za noweho předsydu wuzwolili. 34lětneho Smječkečana zastupuje Stephanie Bierholdtec, w Slepjanskej gmejnje za turizm zamołwita. Mathias Reiche, sobudźěłaćer Budyskeho ­hotela „Best Western“, wostanje dale pokładnik. Předsydstwu přisłušeja Hanka Budarjowa, Manfred Hermaš, Cornelia Schnippa, Claudia-Maria Steglich a Milena Stokowa.

Hory (AK/SN). Serbske rozmołwne koła Bjesady wobohaćeja a wožiwjeja skutkownosć wosadow. To rěka, zo wukonjeja wažne dźěło. To podšmórny předsyda Serbskeho ewangelskeho towarstwa Mato Krygaŕ na sobotnym zeńdźenju Bjesadow Budyskeho wokrjesa w gmejnskim domje na Horach. „Tajke zetkanja wostanu dale bytostne, wšako hajimy rěč a zhromadnosć“, wón rozłoži. „Zeńdźenja kaž dźensa su nam pohon a motiwacija do přichoda.“ Wjac hač 30 serbšćinu wuknjacych z Horow, Ćiska, Rakec, Hodźija a Bukec je so na dźěłarničce wobdźěliło, na kotruž běštej Bjesada z Horow a Serbske ewangelske ­towarstwo přeprosyłoj.

Nowe koło ZSW wo „Mlóčach“ rěčało

Freitag, 02. März 2018 geschrieben von:
Na wčerawšim prěnim rozmołwnym kole „tracTare“ je 15 zajimcow, přewažnje spisowaćelki a basnicy, natwar a wobsah antologije „Mlóče“ rozjimało. Wudawaćelka zběrki Ingrid Juršikowa (nalěwo) wopisa, kak běše ke knize dóšło a kak je wona zhromadnje z lektorom a awtorami na njej dźěłała. Redaktorka Serbskeho rozhłosa Monika Gerdesowa wobkrući swoje mysle, kotrež bě w recensiji k wudaću sformulowała. „tracTare“ steji w tradiciji rjada wuměłskich rozmołwow Zwjazka serbskich wuměłcow a ma wuměnu mjez tworjacymi, rozšěrjacymi a recipientami wotnětka prawidłownje zesylnjeć. Foto: Carmen Schumann

Hoklapnica za Njepilic statok

Dienstag, 27. Februar 2018 geschrieben von:

Rowno (AK/SN). Na lětušej hoklapnicy – hłownej zhromadźiznje – Rownjanskeho towarstwa Njepilic dwór předstaji předsyda Manfred Nikel minjeny pjatk bilancu lěta 2017. „Loni mějachmy cyłkownje 1 180 wopytowarjow. Smy 64 zarjadowanjow přewjedli, mjez nimi běštej samo kwasnej hosćinje. Wosebje w jutrownym času wobdźělichu so mnohe skupiny na debjenju jejkow“, w rozprawje rěka. Dohromady su čłonojo towarstwa, mjez druhim Manfred Richter, Erika Petrick, Manfred Hermaš a Petra Schubert zajimcow 37 razow po statoku wjedli. Wose­bity wjeršk bě 18. dworowy swjedźeń, na kotrymž je Juliana Kaulfürstowa ludźom „Powěsće na Njepilic dworje“ powědała.

Tež projekty z pěstowarnjemi a šulemi běchu towarstwu loni přewšo wažne. Mjez druhim organizowachu zhromadnje z Jabłońčanskim dnjowym přebywanišćom projektny dźeń „Žně wowsa“. Dźěći zaběrachu so tam z prašenjom, kak so rostlina naposledk na muku pře­dźěłuje. Za nje kaž tež za zarjadowarjow bě dźeń wulke wjeselo.

Móhło dawno jasne być

Dienstag, 27. Februar 2018 geschrieben von:
Hižo wot lońšeho planuje Domowina přewjesć konferencu k strukturnemu wuwiću we Łužicy. To je derje tak! Wšako dźiwa třěšny zwjazk kaž žadyn druhi na serbske aspekty přewšo ćežkeje temy. Derje tuž, zo je Zwjazkowe předsydstwo Domowiny puć runało, konferencu dale a dopřihotować. Za dobru strategisku kročel mam, zo su sej zamołwići termin z politikarjemi dorěčeli. To je wažne, zo znowa „swójsku poliwku“ njewarimy, ale zo so wšitke za wuwiće Łužicy wažne instancy za jedne blido sydnu a so dorozumja. Za wuběrny namjet tež mam, zo měł předewzaćel wo swojich nazhonjenjach ze strukturnej změnu přednošować. Tak politikarjo najlěpje zhonja, što je spomóžne a što nic. Škoda pak, zo so Domowina z přihotami tak dliji. Prašenja kaž, štó přednošuje, ­kajki budźe wotběh a budźe podijowa ­diskusija abo nic, dźě móhli dawno jasne być. Janek Wowčer

Nowy naćisk kónc februara předpołožić

Montag, 26. Februar 2018 geschrieben von:

Choćebuz (HA/SN). Domowinska župa Delnja Łužica hotuje so na swoju lětušu hłownu zhromadźiznu 9. měrca w Depsku. Z wjerškom w lětnym skutkowanju je so župne předsydstwo na swojim wuradźowanju minjeny štwórtk w Choćebuzu zaběrało. Jako hosći wočakuja na „hłownu“ braniborsku knježerstwowu społnomócnjenu za serbske naležnosće, statnu sekretarku dr. Ulriku Gutheil (SPD), a krajneho radu wokrjesa Sprjewja-Nysa Haralda Altekrügera (CDU).

Něhdźe 70 delegatam z 41 skupin a 25 towarstwow chce předsydstwo wo zdokonjanym rozprawjeć. Mjez druhim wo tym, kak je so župa zhromadnje z druhimi gremijemi a towarstwami prócowała loni do serbskeho sydlenskeho ruma přiwzate komuny do serbskeho žiwjenja zapřijeć. Na hłownej zhroma­dźiznje chce runje tak sylnje wabić za europsku ini­ciatiwu Minority SafePack a za kraj­ne wubědźowanje „Serbska rěč je žiwa.“

Za Dźeń Saksow so přizjewić

Freitag, 23. Februar 2018 geschrieben von:

Budyšin (SN/bn). Domowina namołwja serbske towarstwa a kulturne skupiny, na lětušim Dnju Saksow so wobdźělić. Swjedźeń wotměje so tónraz wot 7. hač do 9. septembra w Torgauwje. Zajimcy móža so nětko na internetnej stronje orga­nizatorow přizjewić.

Referent Domowiny za kulturu a wukraj Clemens Škoda na to skedźbnja, zo wobsteji móžnosć, sej jězbne wudawki zdźěla narunać dać. Za to pak dyrbja so požadarjo hač do 1. měrca zawjaznje přizjewić. Domowinski zarjad skići w tym nastupanju podpěru. Serbja měli „swoju kulturu a rěč na swjedźenju towarstwow předstajić“, rěka k tomu w nowinskej zdźělence třěšneho zwjazka.

Dźeń Saksow – najwjetši ludowy a domizniski swjedźeń w swobodnym staće – je dotal stajnje něhdźe 250 000 hač do 600 000 wopytowarjow přiwabił. Lětsa zarjaduje jón kuratorij pod nawodom prezidenta Sakskeho krajneho sejma dr. Matthiasa Rößlera (CDU) 27. raz. Minjene lěta bě jeničce muski chór Delany prawidłownje serbsku kulturu na nim zastupował. Lětsa pak so spěwarjo terminowych přičin dla wobdźělić njemóža.

Njemóža přidatne projekty přewjesć

Mittwoch, 21. Februar 2018 geschrieben von:

Budyšin/Choćebuz (SN/JaW). Lětuši hospodarski plan Domowiny je jedne z ćežišćow, z kotrymž chcedźa so čłonojo jeje zwjazkoweho předsydstwa přichodny pjatk w internaće Choćebuskeho Delnjoserbskeho gymnazija rozestajeć.

Byrnjež lětuši plan wurunany etat předwidźał, Domowinje nachwilne hospodarjenje ćeže načinja. Přičina je, zo njeje pobrachowaceho zwjazkoweho knje­žerstwa dla jeje etat hišće wob­zamk­njeny. „Dóstawamy tuž najprjedy jenož połojcu spěchowanja. Tohodla njemó­že­my žane přidatne a wjetše projekty přewjesć“, rjekny referent třěšneho zwjazka za hospodarstwo Pětr Brězan na naprašowanje našemu wječornikej.

Póstne seminary zahajene

Mittwoch, 21. Februar 2018 geschrieben von:

Smochćicy (rl/SN). Něhdźe sto zajimcow je lětuši prěni póstny seminar póndźelu do Domu biskopa Bena w Smochćicach přiwabił. Referentaj, něhdyši Budyski su­perin­tendent Reinhard Pappai a ně­hdyši krajny młodźinski farar ewangelskeje cyrkwje Harald Bretschneider z Drježdźan, tam napominaštaj, zo mamy tež dźensa hladajo na přiběrace brónjenje skedźbliwi być.

Přednošowarjej dopominaštaj na cyrkwinske měrowe hibanje w 1980tych lě­tach­, w kotrychž běštaj wobaj aktiwnaj. „Europa bě tehdy pulwrowy sud“, rje­kny farar Bretschneider. Wón skedźbni na symbol „Mječe na radlicy“ – hesło to, kotrež so dwójce w Starym zakonju jewi. Reinhard Pappai, kiž měješe tajki symbol tón wječor na pulowru přišity, skonstatowa hladajo na prašenje „Mječe na radlicy – bě žno to?“, zo „šće to em njebě“. Pokaza pak tež na to, zo dyrbiš druhdy brónje wužiwać, chceš-li agresorow přewinyć. Woprawdźite rozrisanje konfliktow wón z toho přiwšěm njewočakuje.

Anzeige

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson