Njech so poradźi

Freitag, 03. September 2021 geschrieben von:
Mjeztym zo tele dny powěsće z politiskeho swěta zwjetša ničo kmaneho njewobsahuja, bě powěsć, zo w Pěskecach lětsa druhi raz winowy swjedźeń přewjedu, zawěr­no dobra powěsć. Jara rady dopominam so na premjeru na Pěskečanskim sportnišću před lětomaj. Štož běchu akterojo wjesneho sportoweho towarstwa tam na nohi stajili, njeje jenož mje za­horiło, ale drje wšón publikum. Zabawna dujer­ska hudźba, perfektne wjedro a słódne wino wšelakorych družin postarachu so wo wulkotny wječor. Tajki drje lětsa znowa dožiwimy, budu-li wonkowne wuměnjenja podobne. Ja znajmjeńša Pěskečanam a jich podpěraćelam hižo nětko přeju, zo njech so jich winowy swjedźeń runje tak derje poradźi kaž tón 2019. A jeli kóž­dy kusk dobreje nalady sobu při­nje­se, je wuspěch znowa zaručeny. Wšako za tajkimi zetkanjemi w słowjanskim duchu dawno žedźimy, dokelž wone minjene měsacy prosće móžne njeběchu. Marian Wjeńka

Tež łužiske wino w poskitku

Freitag, 03. September 2021 geschrieben von:

Pěskečanske sportowe towarstwo přihotuje druhi winowy swjedźeń

Pěskecy (SN/MWj). Po wuspěšnej premjerje před lětomaj wotměje Pěskečanske sportowe towarstwo jutře za tydźeń, 11. septembra, swój druhi winowy swjedźeń. Prěnje tajke zarjadowanje 2019 měješe přewšo dobry wothłós. „Loni je bohužel přewjesć njemóžachmy. Lětsa so nas mnozy prašachu, hač drje to zaso budźe­. Ćim bóle so woni wjesela, a my wězo tež, zo móžemy swój winowy swjedźeń wotměć“, praji sobuorganizator Xaver­ Smoła z Njebjelčic. Wón a dalši sobu­wojowarjo z přihotowanskeje sku­piny běchu minjene lěta wjacore razy na wo­pyće w Strážnicy a Dolnich Bojanovicach na Morawje a su so wot tamnišich swjedźenjow tajkeho razu natyknyć dali. Skónčnje chcychu pospytać tajke něšto doma na nohi stajić. A to je so jim před lětomaj wulce poradźiło.

Wo přichod serbskeho ludu so starosćił

Dienstag, 31. August 2021 geschrieben von:

Zrudźaca powěsć je nas dosćahnyła, zo je swěrny čłon Zwjazka serbskich rjemjeslnikow a předewzaćelow (ZSRP), knjez Florian Šołta z Worklec, po sćerpnje znjesenej chorosći, na wustrowjenje so nadźijejo 24. awgusta zemrěł. Znajachmy jeho wšitcy jako optimistiskeho, wjesołeho a přeco přećelneho sobustawa.

Jara wažny wopyt rěčneho monitoringa dla

Freitag, 27. August 2021 geschrieben von:

Žylow/Dešno (SN/at). „Wosebje so wje­­selu, zo móžemy za cyły serbski lud zastupujujo my w Delnjej Łužicy wo po­­li­tiskich ramikowych wuměnjenjach a našej aktualnej situaciji rozprawjeć.“ To rjekny wčera městopředsyda Domowiny dr. Hart­mut Leipner, witajo čłonow poradźowaceho wuběrka za ramikowe zrěče­nje wo škiće narodnych mjeńšin na mo­nitoringowy wopyt. W rozmołwje z našim wječornikom charakterizowaše Leipner wčerawšu wuměnu jako „jara wažnu“. Předsydce wuběrka Marie B. Hags­gård ze Šwedskeje a jeje přewodźerjam rozjasnichu serbscy zastupjerjo dosć dobre prawniske połoženje Serbow w Němskej. „Na­jebać to njeje situacija tajka róžojta“, Leipner wuzběhny. Hosćo zhonichu tež wo tym, zo so Delnjoserbja wo fungowacu šulsku syć prócuja.

Hrubjelčicy. Po lońšej nanuzowanej přestawce korony dla přeprošujetej Serbske ewangelske towarstwo a Maćijec swójba wšitkich Serbow a dalšich zajimcow sobotu, 11. septembra, na lětnje pućowanje a serbski swjedźeń. Po tym zo je Krygarjec swójba hač do lěta 2019 dohromady 15 razow tele zarjadowanje we Wuježku organizowała, wotměje so wone nětko prěni raz na nowym městnje w Hru­bjelčicach. Zajimcy zetkaja so w 13 hodź. při pomniku za padłych Prěnjeje swětoweje wójny w Bělšecach (GPS 51.136793, 14.446996) na kóncu Pomnikoweje dróhi. Wottam pućuja zhromadnje po Šćežce sydom serbskich kralow. Judit Heroldowa, kotraž je ideju z mandźelskim a kamjenjećesarjom wuwiła, chce wobdźělnikow přewodźeć a jim zajimawostki wo kralach a kamjenjach powědać. Krute črije su na kóždy pad trěbne. Po puću njech so kóždy sam ze swojeho nachribjetnika zastara.

Zaběra ze stawiznami kubła

Donnerstag, 26. August 2021 geschrieben von:

Ze stawiznami Domowiny w Braniborskej so hłubšo zaběrać, to namjetuje dr. Pětš Šurman, župan najwjetšeje Domowinskeje župy Delnja Łužica, z widom na dalši jubilej třěšneho zwjazka.

Choćebuz (SN/at). Wo wšelakich deficitach w dźěle Domowinskeje župy Delnja Łužica je nowy župan dr. Pětš Šurman w rozmołwje z našim wječornikom spočatk junija rěčał. „Na přikład měli w župje w młodźinskim dźěle wjace činić. K tomu słuša kontakt k wjesnym sku­pinam, zo bychmy tež přichodnje dalšich młodych kandidatow za předsydstwo měli a jich bóle do župneho skutkowanja zapřijeli“, wón tehdy wuwjedźe.

Hotuja so na Nukstock-openair

Mittwoch, 25. August 2021 geschrieben von:
Čłonki a čłonojo towarstwa barakka hotuja so na Nukstock-openair. Hižo wot minjeneho kónca tydźenja woni nowy areal w Nuknicy podłu Satkule blisko městnosće, hdźež běchu festiwal 1997 prěni raz wotměli, za hosći a hudźbnikow připra­wjeja. Zajutřišim a sobotu chce dohromady dźesać skupinow resp. solo-interpretow publikum z metalowymi, jazzowymi, awantgardistiskimi a wospjet samo dosć měrnymi zynkami zahorić. Nukstock zwoprawdźa lětsa z wobšěrnym hygienowym konceptom. K tomu tež słuša, zo žaneje wječorneje kasy njebudźe. Zbywace zastupne lisći­ki su hišće hač do pjatka pod www.cybersax.de na předań. Foto: Měrćin Bulank

Regionalny młodźinski projekt

Mittwoch, 25. August 2021 geschrieben von:

Młodźina europskich narodnych mjeńšin­ (MENS) a towarstwo Pawk wu­ho­tujetej we wobłuku projekta „Changing the Narrative“ regionalny seminar w Budyšinje. Hač do kónca awgusta móža­ so zajimcy za njón přizjewić.

Budyšin (SN/bn). „Dokelž za čas pan­demije žane wjetše mjezynarodne se­mina­ry wotměć njemóžachmy, smy mjeńše regionalne projekty zahajili“, rěka­ w zhromadnej nowinskej zdźělence MENS a Pawka. „Zaměr je, młodych přisłušnikow europskich narodnych mjeńšin a jich organizacije hromadu wjesć kaž tež dołhodobne styki wutwo­rić a pohłubšić.“

Hosćićel seminara wot 17. do 20. septembra w Budyskim Serbskim domje je młodźinske towarstwo Pawk. Pře­prošeni su młodostni wšitkich štyrjoch w Němskej připóznatych narodnych mjeńšin w starobje 16 do 30 lět. Hłowne ćežišćo zetkanja budźe dźěłarnička „Diskri­minacija a rasizm napřećo minoritam“. Wobdźělnicy maja tam „nawuknyć přećiwo wěstym předsudkam po­stupować. Zhromadnje zdźěłaja koncepty, kak hodźi so ‚parolam stajneho blida‘ a stereotypam spřećiwjeć.“

Kriza znowa jako šansa

Mittwoch, 25. August 2021 geschrieben von:
Mjeńše skupinki – předewšěm na polu kubła­nja sej to poprawom wšitcy přeja. Štož so w šulach hižo lětdźesatki dołho nješlachći, chce Młodźina europskich na­rod­nych mjeńšin­ lětsa we wobłuku „regionalnych projektow“ zwoprawdźić. Přičina toho wšak njeje zasadne dopóznaće, zo je hdys a hdys efektiwnišo, schadźuja-li so maksimalnje dwacećo, zo bychu so z palacymi temami rozestajeli, ale – koho to tele dny hišće dźiwa – kriza pandemije dla. Snano pak wukopa so „nuzowa warianta“ jako model za přichod. Hdyž młodźi zastu­pjerjo w Němskej připóznatych mjeńšin přichodnje w Budyšinje wšědny rasizm a diskriminaciju rozjimaja, nje­změja wo­ni­ jeno składnosć, ćežišća intensiwnje a wosebje wosobinsce wobswětlić, ale tež wo rozrisanjach rozmyslować. Wuslědki móhli potom takrjec sobu domoj wzać a so na městnje wo lěpše połoženje starać. Najlěpši wupuć z kóždeježkuli ka­lamity je a wostanje – rady tež razny – dialog. Bosćan Nawka

Sej serbski swět wotkryli

Donnerstag, 19. August 2021 geschrieben von:

W Čornym Chołmcu je była składnosć pokazać, što wšitko wědźa a móža

Čorny Chołmc (SN/MiR). Drježdźanske towarstwo Stup dale bě minjenu njedźelu na wosebitym wulěće. Sydom swójbow je so podało do Čorneho Chołmca. „Nam je wažne wotewrěć našim dźěćom šěroki wid na serbsku rěč a kulturu“, zwurazni předsydka towarstwa Jadwiga Pjacec, „a za to skićeja nam městnosće a zarjadowanja we Łužicy dobru móžnosć.“ Zabawny dźeń wotmě so w ramiku zarjadowanja Budyskeho wokrjesa „Kuturny bus“, kiž bě tónkróć wosebje we Wojerowskich kónčinach po puću. Jedna stacija bě Krabatowy młyn w Čornym Chołmcu. Dźěći, jich starši kaž tež wowki a dźědojo pak njejsu sej tam jeničce do­jěli, zo bychu so po zarjadnišću rozhla­dowali, woni su přebytk aktiwnje sobu wuhotowali.

Serbska debata

Neuheiten LND