Zmužitosć a wizije SŠT

Dienstag, 29. Dezember 2015 geschrieben von:

Budyšin (SN/MiR). Serbske šulske towarstwo hotuje so na swjedźeń 25lětneho wobstaća. 23. januara wotměje so kubłanska a wučerska schadźowanka čłonow a hosći SŠT w Haslowje. Na róčnicu załoženja 5. januara pak přeproša předsydstwo podpěraćelow, přećelow, politikarjow a zajimcow do Budyskeho Serbskeho domu na přijeće. K jubilejej wuda towarstwo nowu publikaciju swo­jeje dźěławosće pod titlom „Wo přiswojenju serbšćiny a němčiny“ – 25 lět Serbske šulske towarstwo z.t.“, kotruž chce předsydka SŠT Ludmila Budarjowa tón dźeń žurnalistam předstajić.

W nowostce hraje dotalne skutkowanje šulskeho towarstwa runje tak wulku rólu kaž ličby a fakty wo wu­wi­ću projekta Witaj, kotryž bu na iniciatiwu towarstwa w Serbach zawjedźeny. Wažnu rólu hraje dale analyza skutko­wanja koncepcije 2plus na serbskich a dwurěčnych šulach Łužicy. Při tym za­běra rozklučowanje po wotpowědnych třoch rěčnych skupinach wuznamne městno. Sformulowane su tež wizije, kotrež mějachu čłonojo při załoženju SŠT, a staw jich zwoprawdźenja. Za to trjebachu wjele mocy.

„Serbske lěto“ pola Němcow w Danskej

Montag, 21. Dezember 2015 geschrieben von:

Zwjazk němskich Sewjeroschleswigčanow (BDN) planuje, klětu přewjesć „serbske lěto“ w južnej Danskej. Jeho přihot leži hłownje w rukomaj Kristin Heelemanec, studentki kultury a managementa a předsydki Pawka.

Aabenraa (SN/smi). Cyłe lěto chce so mjeńšina Němcow w Danskej klětu ze Serbami zaběrać. Prěnjotnje běše jenož wustajeńca w kooperaciji mjez Němskim muzejom w Danskej a Serbskim muzejom w Budyšinje planowana. Z toho pak wuwi so myslička wjetšeho razu. Kristin Heelemanec, předsydka młodźinskeho towarstwa Pawk, pomha ju we wobłuku praktikuma pola BDN zwoprawdźić.

Rěčne koło klětu dale wjedu

Donnerstag, 17. Dezember 2015 geschrieben von:

Wojerecy (SN/at). Na lětsa zdokonjane zhladowali a wo klětušich předewzaćach dorozumili su so čłonojo předsydstwa župy „Handrij Zejler“ wčera we Wojerowskim Domowinskim domje.

Kaž regionalna rěčnica Domowiny ­za Wojerowski region Christina Šołćina na naprašowanje zdźěli, běchu projekty za wučbu serbšćiny w měrcu k tomu přinošowali, zo su so šulerjo Krabatoweje zakładneje šule w Kulowje, Lessingoweho gymnazija kaž tež spěchowanskeje šule za zbrašenych we Wojerecach z rěču, kulturu, tradicijemi a nałožkami našeho ludu bliže zaběrali.

Ze swójskim projektom wobrubichu spočatk septembra wotkryće wobnowjeneje wopomjatneje tafle na załoženskim domje Domowiny we wobłuku přepo­daća Wobydlerskeho centruma Piwarska hasa 1. Při tej składnosći wuprajene přeće, zo njech tule serbska kultura swoje městno nańdźe, chcedźa klětu zwoprawdźić. „Planujemy 23. oktobra 2016 nazymski koncert z Přezpólnymi. Woni chcedźa pěsnje ze Smolerjoweje zběrki spěwać“, wuswětli Christina Šołćina.

Nadawki hišće lěpje spjelnjeć

Dienstag, 15. Dezember 2015 geschrieben von:

Nowowuzwolene předsydstwo Kamjenskeje župy chce swoje nadawki hišće lěpje spjelnjeć. Za to je na swojim wčerawšim prěnim zetkanju po wólbach štyri wuběrki wutworiło.

Chrósćicy (KJu/SN). Předsydstwo Kamjenskeje župy „Michał Hórnik“ je so wčera w Chrósćicach skonstituowało. Nowa županka Zala Cyžowa wuradźowanje nawjedowaše. Za jeje naměstnicu wuzwolichu čłonojo gremija Hórčanku Katharinu Jurkowu, kotraž skutkuje hłow­nohamtsce jako regionalna rěčnica w župje a tak nadawki regionalneho zwjazka a jeho projekty derje znaje.

Bilanca a wuhlad na nowe projekty

Montag, 14. Dezember 2015 geschrieben von:

Přijomna to adwentnička, na kotruž bě ZSW swojich čłonow minjeny pjatk do Haslowskeho hosćenca přeprosył. Jeho předsyda István Kobjela wužiwaše składnosć a poda krótku bilancu dźěławosće nachilaceho so lěta 2015.

Haslow (AW/SN). „Smy tójšto zdokonjeli a ke kulturnemu žiwjenju hódnje přinošowali“, předsyda ZSW wuzběhny. Z čitanjemi w pěstowarnjach, šulach, Domowinskich skupinach Hornjeje a Delnjeje Łužicy spřistupnichmy zjawnosći serbsku literaturu. Z diskusijnym wječorom ze syriskim basnikom a lěkarjom dr. Abdelwahhabom Azzawijom w Budyšinje kaž tež z čitanjom z nim a jeho bratrom w Drježdźanskim literarnym domje Villa Augustin, kotrejž organizowaše čłon předsydstwa ZSW a předsyda Koła serbskich spisowaćelow Benedikt Dyrlich, zarjadowa so towarstwo sobu do solidaritneho hibanja na dobro ćěkancow.

Přihoty na reformaciski jubilej

Montag, 14. Dezember 2015 geschrieben von:

Towarstwo za serbsku rěč w cyrkwi z.t. wotmě njedawno swoju hłownu zhromadźiznu. Tam předźěłachu wustawki, wuzwolichu nowe předsydstwo a přihotowachu nowe projekty.

Choćebuz. Nimo čłonow towarstwa su tež někotři hosćo na zhromadźiznu přichwatali, mjez nimi předsyda Serbskeho ewangelskeho towarstwa z Hornjeje Łužicy Měrćin Wirth.

Předsyda Uwe Gutšmit z Bórkowow a serbski dušepastyr Ingolf Kśenka z Janšojc rozkładźeštaj ćežišća swojich prócowanjow. Kśenka podšmórny wosebje wulki woznam lětušeho Łužiskeho cyrwinskeho dnja, kotryž bě so 4. julija w Choćebuzu wotměł. Wón měnješe, zo bě to tež za serbskich křesćanow wjeršk.

W diskusiji wuzběhnychu wobdźělnicy zhromadźizny podpěru cyrkwinskeho wjednistwa. Ćežišćo diskusije běchu projekty přichodnych lět. Najwažniše předewzaće je wutworić Zwjazk serbskich křesćanow w ewangelskej cyrkwi, kotryž ma dwurěčny charakter łužiskich wosadow skrućić a podpěrać. Jako přihot planuje towarstwo wudawać serbske cyrkwinske łopjeno z mjenom „Nowy wósadnik“. Prěnje čisło je hižo k hodam předwidźane.

Z počesćenjom

Freitag, 11. Dezember 2015 geschrieben von:

Budyšin (kl/SN). Wobdźělnicy kónclětneho zarjadowanja župy „Jan Arnošt Smoler“ su wčera w Budyskim Serbskim domje lětuše skutkowanje bilancowali.

Předsyda Domowiny Dawid Statnik počesći nawodnicu Malešanskeje Witaj-pěstowarnje Borboru Kralowu z Čestnym znamješkom Domowiny. Ze swojim dźěłom wona prinicip dwurěčnosće a nawuknjenja serbšćiny mjez dźěćimi dale wuwiwa. Programy dźěći w serbskej rěči a drasće ewangelskich Serbow su w gmejnskim žiwjenju stajny wjeršk.

Po zhladowanju na lětuše aktiwity a projekty w župje stejachu klětuše předewzaća w srjedźišću. We wobłuku wopominanja Jana Arnošta Smolerja składnostnje jeho 200. narodnin organizuje župa 3. měrca počesćenje při Smolerjowym pomniku w Budyšinje. Projektowy dźeń župow Budyšin, Kamjenc a Wojerecy za šulerjow B-serbšćiny w Hornim Hajnku je na 100. posmjertne narodniny Jurja Brězana wusměrjeny.

Šulerjo Radworskeje Serbskeje wyšeje šule z wučerku Walburgu Sćapanowej zanjesechu hodowne pěsnje a předstajichu nałožk a drastu swjateje Borbory.

W Brězowce hromadźe dźerža

Mittwoch, 09. Dezember 2015 geschrieben von:

Rozprawjamy wo hłownej zhromadźiznje župy „Jakub Lorenc-Zalěski“

Štwórty raz su zastupjerjo Domowinskich skupin a towarstwow pod třěchu župy „Jakub Lorenc-Zalěski“ minjeny pjatk w Slepom swoju hłownu zhromadźiznu přewjedli. Dwě lěće ma župa nětko status zapisaneho towarstwa. Jeje skutkowanje wusměrja so na wsy Slepjanskeje wosady a Mužakowskeje hole, kaž su to Wochozy, potajkim na žro bazoweho dźěła w bywšim wokrjesu Běła Woda. Ale tež w Hamorje chcedźa zaměrne serbske aktiwity zaso nastorčić, kaž župan Manfred Hermaš informowaše.

Projekt slepjanšćina

Tule docpěte postupy maja so wosebje wuzběhnyć. Předsydstwo waži sej skutkowanje towarstwa Njepilic dwór a Dietera Redda. Swoje rěčne kursy wu­směrjeja na to, slepjanšćinu z wobdźělnikami ertnje aktiwnje nałožować. Někotre lěta su słowa a wopřijeća zběrali. Słownik slepjanšćiny chcedźa bórze wudać. Towarstwo Kólesko pomha trěbne wuměnjenja za zwoprawdźenje přede­wzaća wu­tworić, rěka w pisomnje předležacej rozprawje delegatam.

Počesćenje wjeršk lěta było

Wažny fakt sebjezrozumjenja

Mittwoch, 09. Dezember 2015 geschrieben von:

„Dźensniša hłowna zhromadźizna je jara aktiwne lěto znazorniła. Mam župu ,Jakub Lorenc-Zalěski‘ za přewšo hibićiwu. Za wjeršk lětušeho skutkowanja mam dowolnosć, nětko němsko-serbski šulski kompleks twarić. To je za Slepjanski region jara wažne. Ći, kotřiž maja hórke diskusije do přichoda znjesć, sami dopokazuja, zo je perspektiwa. To mje stajnje zaso­ zwjesela“, rjekny předsyda Domo­winy Dawid Statnik našemu wječornikej po župnej hłownej zhromadźiznje.

Prócu, wožiwić slepjanšćinu, ma předsyda Domowiny za wosebitosć tohole zapisaneho towarstwa. „Tam su wulke polěpšenja docpěli, mam wulki respekt před zdokonjanym. Kniha ,Płachta pełnych hulicowankow‘ a spěwnik stej spomóžny zakład, zo bychu rěč zachowali, jeje status dale wuwili.“ Dawid Statnik skedźbni na tudyšu mentalitu, kotraž so tež w nałožowanju slepjanšćiny wotbłyšćuje. „W Slepjanskej wosadźe su rěč, narodna drasta a nałožki, kaž na přikład dźěćetko, jónkrótne“, wobkrući wón wažny fakt sebjezrozumjenja župy. at

Přez wjesny klub k Domowinje

Mittwoch, 09. Dezember 2015 geschrieben von:

Jedna z třoch nowych čłonow jednaćelskeho předsydstwa Domowinskeje župy „Jakub Lorenc-Zalěski“ je Ingrid Lejnikowa z Rownoho. 57lětna předsydari tamnišemu wjesnemu klubej. „Jako tón te- hdyšej Domowinskej župje Běła Woda/Niska přistupi, stach so z Domowinjanku“, praji wona. Rownjanka prócuje so wo wuske zhromadne dźěło wjesneho kluba z towarstwom Njepilic dwór, ke kotrehož załoženskim čłonam wona słuša, runje tak kaž z wohnjowej woboru. Wšako móžeš wjesne tradicije w zhromadnosći najlěpje hajić.

Anzeige